နိုင်ငံခြားဘာသာတက္ကသိုလ် (ရန်ကုန်)

ဝီကီပီးဒီးယား မှ
Jump to navigation Jump to search
ရန်ကုန်နိုင်ငံခြားဘာသာတက္ကသိုလ်
Yangon University of Foreign Languages
YUFL
Let's serve our country with foreign languages


တည်ထောင်ခုနှစ် ၁၉၆၄ခုနှစ်၊ ဇန်နဝါရီလ
ပါမောက္ခချုပ် ဒေါက်တာကြည်ရွှင် (၂၀၁၆ - ယခု)
တည်နေရာ အမှတ်(၁၁၉/၁၃၁)၊ တက္ကသိုလ်ရိပ်သာလမ်း၊ ကမာရွတ်မြို့နယ်ရန်ကုန်တိုင်းဒေသကြီး

ရန်ကုန်နိုင်ငံခြားဘာသာတက္ကသိုလ် (အင်္ဂလိပ်: University of Foreign Languages, Yangon) သည် မြန်မာနိုင်ငံ၏ ပထမဆုံးသော နိုင်ငံခြားဘာသာတက္ကသိုလ်ဖြစ်သည်။ အချိန်ပြည့်ဘွဲ့သင်တန်းများ၊ အချိန်ပိုင်း ဒီပလိုမာသင်တန်းများနှင့် ညနေပိုင်းလက်မှတ်ရသင်တန်းများဖွင့်လှစ် ပို့ချလျက်ရှိသည်။ တရုတ်ဘာသာ၊ အင်္ဂလိပ်ဘာသာ၊ ပြင်သစ်ဘာသာ၊ ဂျာမန်ဘာသာ၊ အီတာလျံဘာသာ၊ ဂျပန်ဘာသာ၊ ကိုရီးယားဘာသာ၊ ရုရှားဘာသာ၊ စပိန်ဘာသာ၊ ထိုင်းဘာသာနှင့် နိုင်ငံခြားသားများအတွက် မြန်မာဘာသာတို့ကို သင်ကြားပေးလျက်ရှိသည်။

သမိုင်းကြောင်း[ပြင်ဆင်ရန်]

၁၉၆၄ခုနှစ်၊ ဇန်နဝါရီလတွင် ရန်ကုန်နိုင်ငံခြားဘာသာသိပ္ပံအမည်ဖြင့် ပထမဆုံးတည်ထောင်ခဲ့သည်။ ထိုစဉ်က ဂျပန်၊ ပြင်သစ်၊ ဂျာမန်နှင့် ရုရှားဘာသာများကို သင်ကြားပို့ချခဲ့သည်။ ၁၉၆၅ခုနှစ်တွင် တရုတ်ဘာသာ၊ ၁၉၆၉ခုနှစ်တွင် အင်္ဂလိပ်ဘာသာနှင့် ၁၉၇၄တွင် နိုင်ငံခြားသားများအတွက် မြန်မာစာတို့ကို တိုးချဲ့သင်ကြားပေးခဲ့သည်။ ၁၉၉၆ခုနှစ်တွင် ရန်ကုန်နိုင်ငံခြားဘာသာသိပ္ပံမှာ ရန်ကုန်နိုင်ငံခြားဘာသာတက္ကသိုလ်သို့ အဆင့်မြှင့်တင်ခဲ့သည်။

တည်နေရာ[ပြင်ဆင်ရန်]

ရန်ကုန်တိုင်းဒေသကြီးကမာရွတ်မြို့နယ်၊ အမှတ်(၁၁၉/၁၃၁)၊ တက္ကသိုလ်ရိပ်သာလမ်းတွင် တည်ရှိသည်။ ရန်ကုန်တက္ကသိုလ်ရန်ကုန်ပညာရေးတက္ကသိုလ်၊ ဆေးတက္ကသိုလ်(၁) ရန်ကုန်၊ ရန်ကုန်စီးပွားရေးတက္ကသိုလ်၊ အမေရိကန်ပြည်ထောင်စု သံရုံး၊ ဒေါ်အောင်ဆန်းစုကြည်(နိုင်ငံတော်အတိုင်ပင်ခံပုဂ္ဂိုလ်)နေအိမ် တို့ အနီး၊ အချက်အချာကျသောနေရာတွင်တည်ရှိသည်။

ဖွဲ့စည်းပုံ[ပြင်ဆင်ရန်]

ပြည်ထောင်စုသမ္မတမြန်မာနိုင်ငံတော်အစိုးရ၏ ပညာရေးဝန်ကြီးဌာန လက်အောက်တွင် တည်ရှိသည်။ ပါမောက္ခချုပ်၊ ဒုတိယ ပါမောက္ခချုပ်နှင့် သက်ဆိုင်ရာ ဘာသာရပ်အသီးသီး၏ ပါမောက္ခများက တာဝန်ယူအုပ်ချုပ်ကြသည်။ အင်ဂျင်နီယာဌာန၊ ကျောင်းသားရေးရာဌာနနှင့် စာမေးပွဲဌာနများလည်း ပါဝင်သည်။

သင်ကြားရေးနှင့် လက်မှတ်များ[ပြင်ဆင်ရန်]

အချိန်ပြည့်လေးနှစ်ဘွဲ့သင်တန်းပြီးဆုံးလျှင် ဝိဇ္ဖာဘွဲ့(သက်ဆိုင်ရာဘာသာ) ရရှိမည် ဖြစ်သည်။ နံနက်ပိုင်းလေးနှစ် ဘွဲ့လွန်ဒီပလိုမာသင်တန်းပြီးဆုံးလှျင် ဒီပလိုမာ(သက်ဆိုင်ရာဘာသာ) ရရှိမည်ဖြစ်သည်။ ညနေပိုင်းသင်တန်းများအတွက်မူ အောင်လက်မှတ်(သက်ဆိုင်ရာဘာသာ)များ ပေးအပ်ချီးမြှင့်သည်။

ပညာသင်နှစ်[ပြင်ဆင်ရန်]

နှစ်တစ်နှစ်၏ ဒီဇင်ဘာလဆန်းတွင် စတင်ပြီး မတ်လကုန်တွင်ပထမနှစ်ဝက်ပြီးဆုံးသည်။ ဒုတိယနှစ်ဝက်သည် ဇွန်လဆန်းမှ စက်တင်ဘာလကုန်အထိဖြစ်သည်။ တစ်နှစ်လျှင် ရှစ်လစာသင်ကြားချိန်ရှိပြီး လေးလသည် ကျောင်းပိတ်ရက်အားလပ်ချိန်ဖြစ်သည်။[၁]

ဘဏ္ဍာရေး[ပြင်ဆင်ရန်]

ပြည်သူပိုင်တက္ကသိုလ်ဖြစ်သောကြောင့် ပြည်ထောင်စုလွှတ်တော်နှင့် ပညာရေးဝန်ကြီးဌာနတို့၏ စီမံခန့်ခွဲ ဆုံးဖြတ်မှုဖြင့် အခွန်ထမ်းမြန်မာနိုင်ငံသူနိုင်ငံသားတို့မှ ထောက်ပံ့သည်။

တက္ကသိုလ်ဝင်ခွင့်[ပြင်ဆင်ရန်]

လုပ်ထုံးလုပ်နည်း[ပြင်ဆင်ရန်]

အချိန်ပြည့်ဘွဲ့သင်တန်း[ပြင်ဆင်ရန်]

တက္ကသိုလ်ဝင်တန်းအောင်မြင်ပြီးသူများသည် တက္ကသိုလ်ရွေးချယ်လျှောက်ထားနိုင်သော ဇွန်လကုန်ပိုင်းမှစ၍ ရန်ကုန်နိုင်ငံခြားဘာသာတက္ကသိုလ်သို့ တိုက်ရိုက်လျှောက်ထားနိုင်သည်။ (၂၀၁၈ ခုနှစ်မှစ၍) ဇူလိုင်လကုန်ပိုင်းတွင် နှုတ်ဖြေစာမေးပွဲကိုဖြေဆိုရသည်။ တက္ကသိုလ်တက်ရောက်ခွင့်ရရန် နှစ်အလိုက်သတ်မှတ်သည့် တက္ကသိုလ်ဝင်တန်းအောင်ရမှတ်နှင့် နှုတ်ဖြေစာမေးပွဲရမှတ်တို့ လိုအပ်သည်။ အင်္ဂလိပ်ဘာသာတက်ရောက်ရန် တက္ကသိုလ်ဝင်တန်း အင်္ဂလိပ်စာရမှတ် (၆၅) မှတ်အနည်းဆုံးလိုအပ်သည်။ ဒီဇင်ဘာလတွင် ပထမပညာသင်ကာလကို စတင်တက်ရောက်ရသည်။

အချိန်ပိုင်းဒီပလိုမာသင်တန်း[ပြင်ဆင်ရန်]

နိုင်ငံပိုင်တက္ကသိုလ်တစ်ခုခုမှ ဘွဲ့ရရှိပြီးသူများသာ တက်ရောက်နိုင်သည်။ တက်ရောက်လိုသူတိုင်း အင်္ဂလိပ်စာ စာမေးပွဲငယ်ကို ဝင်ရောက်ဖြေဆိုရပြီး ထိုစာမေးပွဲပေါ်မူတည်၍ တက်ရောက်ခွင့်ကိုဆုံးဖြတ်သည်။

ညနေပိုင်းအောင်လက်မှတ်ရသင်တန်း[ပြင်ဆင်ရန်]

တက္ကသိုလ်ဝင်တန်းအောင်မြင်ပြီးသူ မည်သူမဆို တက်ရောက်နိုင်သည်။ လူဦးရေကန့်သတ်ထားပြီး ဦးရာလူစနစ်ဖြင့် လျှောက်ထားနိုင်သည်။

ပညာသင်ကြားခြင်းအချိန်ကာလ[ပြင်ဆင်ရန်]

အချိန်ပြည့်ဘွဲ့သင်တန်း[ပြင်ဆင်ရန်]

ဘွဲ့သင်တန်းများကို အများပြည်သူအားလပ်ရက်များမှအပ တနင်္လာနေ့မှ သောကြာနေ့ ထိ ဖွင့်လှစ်ပို့ချသည်။ သင်တန်းကာလကြာမြင့်ချိန်မှာ လေးနှစ်ဖြစ်သည်။

အချိန်ပိုင်းဒီပလိုမာသင်တန်း[ပြင်ဆင်ရန်]

ဒီပလိုမာသင်တန်းများသည် အများပြည်သူအားလပ်ရက်များမှအပ တနင်္လာနေ့မှ သောကြာနေ့ နံနက်ခုနစ်နာရီမှ ရှစ်နာရီငါးဆယ်ထိ တက်ရောက်သင်ယူရသည်။ သင်တန်းကာလကြာမြင့်ချိန်မှာ သုံးနှစ်ဖြစ်သည်။

ညနေပိုင်းအောင်လက်မှတ်ရသင်တန်း[ပြင်ဆင်ရန်]

အခြေခံ၊ အလယ်အလတ်၊ အဆင့်မြင့်သင်တန်းများ ခွဲခြားထားသည်။ သင်တန်းတစ်ခုလျှင် နှစ်ပိုင်းခွဲပြီး တစ်ပိုင်းလျှင် သုံးလကြာမြင့်သည်။ အဆင့်မြင့်သင်တန်း၏ အပိုင်းနှစ်ကို ပြီးဆုံးလျှင် အချိန်ပိုင်းဒီပလိုမာသင်တန်း၏ နောက်ဆုံးနှစ်ကို တိုက်ရိုက်တက်ရောက်နိုင်သည်။ သင်တန်းချိန်မှာ ညနေငါးနာရီ တစ်ဆယ့်ငါးမိနစ်မှ ခုနစ်နာရီအထိဖြစ်သည်။

စုစည်းအဖွဲ့များ[ပြင်ဆင်ရန်]

စာကြည့်တိုက်[ပြင်ဆင်ရန်]

ရန်ကုန်နိုင်ငံခြားဘာသာတက္ကသိုလ်၏ စာကြည့်တိုက်တွင် ဘာသာရပ်အသီးသီး၏ စာအုပ်များကို ထားရှိသည်။ မဂ္ဂဇင်းနှင့် ဂျာနယ်အချို့ကိုလည်း ဖတ်ရှုနိုင်သည်။ ဆရာ/မများ၊ ကျောင်းသူကျောင်းသားများ စာကြည့်တိုက်အသင်းဝင်များအဖြစ် ဝင်ရောက်နိုင်ပြီး စာအုပ်များကိုငှားရမ်းဖတ်ရှုနိုင်သည်။ အခြားစာအုပ်များကို တစ်ကြိမ်လျှင်နှစ်အုပ်၊ နှစ်ပတ်အထိငှားရမ်းနိုင်ပြီး ရက်လွန်ကြေးမှာ တစ်ရက်လျှင်တစ်ကျပ်ဖြစ်သည်။

ပညာရေးနှင့်အခြားအဖွဲ့အစည်းများ[ပြင်ဆင်ရန်]

ဌာနခွဲများ[ပြင်ဆင်ရန်]

  • မြန်မာဘာသာဌာန၊
  • အင်္ဂလိပ်ဘာသာဌာန၊
  • ဂျပန်ဘာသာဌာန၊
  • တရုတ်ဘာသာဌာန၊
  • ပြင်သစ်ဘာသာဌာန၊
  • ကိုရီးယားဘာသာဌာန၊
  • ဂျာမန်ဘာသာဌာန၊
  • ရုရှားဘာသာဌာန၊
  • အီတာလျံဘာသာဌာနနှင့်
  • ထိုင်းဘာသာဌာန များမှာ အဓိကဌာနများဖြစ်သည်။

အချိန်ပြည့်သင်တန်းသားများ မယူမနေရ တက်ရောက်ရသော အခြားဌာနများမှာ ဘာသာဗေဒဌာန၊ သမိုင်းဌာန၊ ဒဿနိကဗေဒဌာန၊ အရှေ့တိုင်းပညာဌာန များရှိသည်။

သင်ကြားရေးနှင့်မပတ်သက်သော အခြားဌာနများမှာ အင်ဂျင်နီယာဌာန၊ ကျောင်းသားရေးရာဌာနနှင့် စာမေးပွဲဌာနတို့ဖြစ်ကြသည်။

အသင်းအဖွဲ့များ[ပြင်ဆင်ရန်]

ရန်ကုန်နိုင်ငံခြားဘာသာတက္ကသိုလ်တွင် ပါမောက္ခချုပ် ဒေါက်တာကြည်ရွှင်စတင်တာဝန်ထမ်းဆောင်သည့်ကာလမှစ၍ ကျောင်းသားအသင်းအဖွဲ့များ၊ ဆရာအသင်းအဖွဲ့များကို လွတ်လပ်စွာ ဖွဲ့စည်းခွင့်ရသည်။ ရန်ကုန်နိုင်ငံခြားဘာသာကြက်ခြေနီအသင်းကို မြန်မာနိုင်ငံကြက်ခြေနီအသင်း၏ အသင်းခွဲတစ်ခုအဖြစ် ဖွဲ့စည်းတည်ထောင်ထားသည်။ အခြားအသင်းအဖွဲ့များမှာ အနုပညာအသင်း၊ အားကစားအသင်းနှင့် စာပေးရေရာအသင်းတို့ဖြစ်ကြသည်။ မြန်မာနိုင်ငံကင်းထောက်၊ တက္ကသိုလ်အရံလေ့ကျင့်တပ်ရင်း (UTC)၊ ဆရာသမဂ္ဂ၊ ကျောင်းသားများသမဂ္ဂ (Students' Union) နှင့် ကျောင်းသားအသင်းအဖွဲ့များစွာရှိသည်။

အဆောက်အအုံများ[ပြင်ဆင်ရန်]

LRC၊ NB၊ EB၊ COE နှင့် ISH (ယခင် MWB) ဟူ၍ အဓိကအဆောင်(၅)ဆောင်ရှိသည်။ ယခင်က OB နေရာတွင် ယခုအခါ ကျောင်းဆောင်အသစ် EB တည်ဆောက်ပြီးဖြစ်သည်။

ဆက်စပ်ကြည့်ရှုရန်[ပြင်ဆင်ရန်]

ကိုးကား[ပြင်ဆင်ရန်]

ပြင်ပလင့်ခ်များ[ပြင်ဆင်ရန်]