ပဲခူးတိုင်းဒေသကြီး

ပဲခူးတိုင်းဒေသကြီး
တိုင်းဒေသကြီး
အလံတော် စည်းတံဆိပ်
မြန်မာနိုင်ငံတွင်း တည်နေရာ
ကိုဩဒိနိတ်: 18°15′N 96°0′E
နိုင်ငံ	မြန်မာ
ဒေသ	အောက်မြန်မာနိုင်ငံ
မြို့တော်	ပဲခူးမြို့
အစိုးရ
• ဝန်ကြီးချုပ်	ဦးဝင်းသိန်း (NLD)
• အစိုးရ	ပဲခူးတိုင်းဒေသကြီး အစိုးရအဖွဲ့
• ဥပဒေပြုရေး	ပဲခူးတိုင်းဒေသကြီး လွှတ်တော်
• တရားလွှတ်တော်	ပဲခူးတိုင်းဒေသကြီး တရားလွှတ်တော်
ဧရိယာ
• စုစုပေါင်း	၃၉၄၀၂.၃ စတုရန်းကီလိုမီတာ (၁၅၂၁၃.၃ စတုရန်းမိုင်)
ဧရိယာအဆင့်	ဆဋ္ဌမ
လူဦးရေ (၂၀၁၄)
• စုစုပေါင်း	၄,၈၆၇,၃၇၃
• အဆင့်	ဆဋ္ဌမ
• သိပ်သည်းမှု	၁၂၀/km၂ (၃၂၀/sq mi)
အချိန်ဇုန်	မြန်မာစံတော်ချိန် (UTC+06:30)
HDI (၂၀၁၇)	0.547 နိမ့် · နဝမ
ဝက်ဘ်ဆိုဒ်	bagoregion.gov.mm

ပဲခူးတိုင်းဒေသကြီးသည် မြန်မာနိုင်ငံ၏ တိုင်းဒေသကြီးခုနှစ်ခုတွင် တစ်ခုအပါအဝင် ဖြစ်သည်။ မြို့တော်မှာ ပဲခူးမြို့ (ဍုၚ်ဗဂေါ)ဖြစ်သည်။ ပဲခူးတိုင်းဒေသကြီးရှိ လူဦးရေမှာ ၂၀၁၄ ခုနှစ် သန်းခေါင်စာရင်းအရ ၄,၈၆၇,၃၇၃ ဦး ဖြစ်သည်။ ပဲခူးတိုင်းဒေသကြီးတွင် မြို့နယ် (၂၈) မြို့နယ်၊ မြို့(၅၁)မြို့၊ ရပ်ကွက်ပေါင်း (၃၂၅) ခု၊ ကျေးရွာအုပ်စုပေါင်း(၁၄၁၀) အုပ်စု နှင့် ကျေးရွာပေါင်း (၆၄၄၁) ရွာပါဝင်ပါသည်။

တည်နေရာ

ပဲခူးတိုင်းဒေသကြီးသည် မြောက်ဘက်တွင် နေပြည်တော် ပြည်ထောင်စုနယ်မြေနှင့် မကွေးတိုင်းဒေသကြီး၊ အရှေ့ဘက်တွင် ကရင်ပြည်နယ်နှင့် မွန်ပြည်နယ်၊ တောင်ဘက်တွင် ရန်ကုန်တိုင်းဒေသကြီး၊ အနောက်ဘက်တွင် ဧရာဝတီတိုင်းဒေသကြီးနှင့် ရခိုင်ပြည်နယ်တို့နှင့် နယ်နိမိတ်ထိစပ်လျက်ရှိသည်။

မြောက်လတ္တီတွဒ် ၁၆ ဒီဂရီ ၄၇ မိနစ်မှ ၁၉ ဒီဂရီ ၂၀ မိနစ်၊ အရှေ့လောင်ဂျီကျု ၉၄ ဒီဂရီ ၃၅ မိနစ်မှ ၉၇ ဒီဂရီ ၁၀ မိနစ် အတွင်းကျရောက်ပြီး ဧရိယာအားဖြင့် ၉၇၃၇၀၄၃ဧက၊ စတုရန်းမိုင်အားဖြင့် ၁၅၂၁၄.၁၀ စတုရန်းမိုင် ကျယ်ဝန်းသည်။

သမိုင်းကြောင်း

ဒုတိယအကြိမ် ကျူးကျော်စစ်ပွဲအပြီး ၁၈၅၃-ခု၊ ဇန်နဝါရီလ(၂၀)ရက်နေ့တွင် အောက်မြန်မာပြည်ကို အင်္ဂလိပ်တို့၏ ကိုလိုနီအဖြစ် အပြီးအပိုင် သိမ်းပိုက်ခြင်းခံရသည်။ ထိုအချိန်မှစ၍ ကိုလိုနီအုပ်ချုပ်ရေး စနစ်အရ ပဲခူးတိုင်းကို စတင်ဖွဲ့စည်းခဲ့သည်။

ပဲခူးတိုင်းတွင် မြန်မာသမိုင်းကြောင်း၌ ထင်ရှားခဲ့သော မင်းနေပြည်တော်ဟောင်းများ ပါဝင်နေပေသည်။ အရှေ့မြောက်ပိုင်းတွင် ကေတုမတီ အမည်ဖြင့် ကျော်ကြားခဲ့သော မြန်မာပဒေသရာဇ်တို့၏ နေပြည်တော်ဟောင်း တောင်ငူမြို့တည်ရှိပေသည်။ အနောက်မြောက်စွန်းတွင် မြန်မာသမိုင်းဦး၌ ကြီးကျယ်စည်ကားခဲ့သော ပျူလူမျိုးတို့၏ မြို့တော် သရေခေတ္တရာမြို့ဟောင်း ရှိပေသည်။ ပဲခူးတိုင်း၏ မြို့တော်ဖြစ်သော ပဲခူးမြို့သည်လည်း ရှေးအတိတ်ကာလက မွန်ပဒေသရာဇ်တို့ ထီးနန်းစိုက်ခဲ့ရာ ဟံသာဝတီ မင်းနေပြည်တော်အဖြစ် ထင်ရှားခဲ့ပေသည်။

ရာသီဥတု

ပဲခူးတိုင်းဒေသကြီး တောင်ပိုင်းဒေသများသည် အကြမ်းအားဖြင့် စိုစွတ်သော မုတ်သုံရာသီဥတုရရှိကာ မြောက်ပိုင်းဒေသများမှာမူ ခြောက်သွေ့သည့် ရာသီဥတုရှိပါသည်။ ပဲခူး၊ တောင်ငူနှင့် ပြည်မြို့များတွင် နွေဥတု အပူဆုံးကာလများတွင် အပူချိန် ၈၈ ဒီဂရီ မှ ၉၀ ဒီဂရီ ဖာရင်ဟိုက် ထိရှိတတ်သည်။ ပျှမ်းမျှအားဖြင့် တိုင်းဒေသကြီးတစ်ခုလုံး၏ အပူချိန်မှာ ၇၅ ဒီဂရီ ဖာရင်ဟိုက်ဖြစ်သည်။ မိုးရေချိန်မှာ အမြင့်ဆုံးအားဖြင့် မြစ်သားမြို့တွင် ၁၃၂.၃၆ လက်မထိ စံချိန်တင်ရောက်ရှိခဲ့ဖူးသကဲ့သို့ အနိမ့်ဆုံးအားဖြင့် ပြည်မြို့တွင် ၄၅.၄၉ လက်မသာရရှိခဲ့ဖူးသည်။

ပါဝင်သောမြို့နယ်များ

ပဲခူးတိုင်းဒေသကြီး မြေပုံ

• ကဝမြို့နယ်
• ကျောက်ကြီးမြို့နယ်
• ကျောက်တံခါးမြို့နယ်
• ကြို့ပင်ကောက်မြို့နယ်
• ဇီးကုန်းမြို့နယ်
• ညောင်လေးပင်မြို့နယ်
• တောင်ငူမြို့နယ်
• ထန်းတပင်မြို့နယ်
• ဒိုက်ဦးမြို့နယ်
• နတ်တလင်းမြို့နယ်
• ပဲခူးမြို့နယ်
• ပန်းတောင်းမြို့နယ်
• ပေါက်ခေါင်းမြို့နယ်
• ပေါင်းတည်မြို့နယ်
• ပြည်မြို့နယ်
• ဖြူးမြို့နယ်
• မင်းလှမြို့နယ်
• မိုးညိုမြို့နယ်
• ရေတာရှည်မြို့နယ်
• ရွှေကျင်မြို့နယ်
• ရွှေတောင်မြို့နယ်
• လက်ပံတန်းမြို့နယ်
• ဝေါမြို့နယ်
• သနပ်ပင်မြို့နယ်
• သာယာဝတီမြို့နယ်
• သဲကုန်းမြို့နယ်
• အုတ်တွင်းမြို့နယ်
• အုတ်ဖိုမြို့နယ်

ထင်ရှားသည့်နေရာများ

• ကမ္ဘောဇသာဒီ နန်းတော်
• ကျိုက်ပွန်ဘုရား
• ရွှေမော်ဓောဘုရား(ပဲခူး)
• ရွှေသာလျောင်း ရုပ်ပွားတော်ကြီး