မြန်မာနိုင်ငံပြန်တမ်း

ပြည်ထောင်စုသမ္မတ မြန်မာနိုင်ငံတော် ပြန်တမ်း

အမျိုးအစား	အစိုးရပြန်တမ်း
ထုတ်ဝေသူ	ပြန်ကြားရေးဝန်ကြီးဌာန၊ မြန်မာနိုင်ငံ အစိုးရ
တည်ထောင်ခြင်း	၂ ဇန်နဝါရီ ၁၈၇၅
ဘာသာစကား	မြန်မာ
ဌာနချုပ်များ	ရန်ကုန်
ဝက်ဘ်ဆိုဒ်	moi.gov.mm/ppe/
နိုင်ငံ	Myanmar
မြို့	Yangon

ပြည်ထောင်စုသမ္မတမြန်မာနိုင်ငံတော်ပြန်တမ်း (အင်္ဂလိပ်: Republic of the Union of Myanmar Gazette) သည် ပြည်ထောင်စုသမ္မတမြန်မာနိုင်ငံတော်အစိုးရ၏ ပြန်တမ်းဖြစ်သည်။ မြန်မာနိုင်ငံပြန်တမ်းသည် ပြည်ထောင်စုအစိုးရ၏ အမိန့်ကြော်ငြာစာ၊ အမိန့်ထုတ်ပြန်ချက်၊ ဥပဒေ/ နည်းဥပဒေ ပြင်ဆင်ချက်၊ ရာထူးတာဝန်ခန့်အပ်မှု၊ အစိုးရအဖွဲ့၏ မှတ်တမ်းများပါဝင်သည့် အစိုးရပိုင် စာစောင်ဖြစ်ပြီး ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာနက အပတ်စဉ် ထုတ်ဝေသည်။ မြန်မာနိုင်ငံပြန်တမ်း အပိုင်း ၁ တွင် အစိုးရ၏ အမိန့်ကြော်ငြာစာ၊ ဘွဲ့ထူးဂုဏ်ထူးချီးမြှင့်ခြင်းတို့နှင့်ပတ်သက်သည့် ကိစ္စများ၊ တရားရေးနှင့် ပတ်သက်သည့်ကိစ္စများ၊ အခွန်အယူခံခြင်းနှင့် ပတ်သက်သည့်ကိစ္စများ၊ ရာထူးအဆင့်တိုးမြှင့်ခန့်ထားမှုများ ပါဝင်သည်။ အပိုင်း ၂ တွင် ရာထူးတာဝန်အရွှေ့အပြောင်းနှင့် ဆိုင်သည့်ကိစ္စရပ်များ ပါဝင်သည်။ အပိုင်း ၄ တွင် စီးပွားရေးလုပ်ငန်းများနှင့် သက်ဆိုင်သည့် ကိစ္စရပ်များပါဝင်သည်။ သောကြာနေ့တိုင်း မြန်မာဘာသာဖြင့် ထုတ်ဝေသည်။

အမည်များ

ခေတ်အဆက်ဆက်တွင် အမည်အမျိုးမျိုး ပြောင်းလဲခဲ့သည်။

• ဗြိတိသျှဘားမားဂေဇက်
• ဘားမားဂေဇက်
• ပြည်ထောင်စုဆိုရှယ်လစ်သမ္မတမြန်မာနိုင်ငံတော်ပြန်တမ်း
• ပြည်ထောင်စုသမ္မတမြန်မာနိုင်ငံတော်ပြန်တမ်း

မှတ်တမ်းမိတ္တူများ

အမျိုးသားမော်ကွန်းတိုက်အဖြစ် ဆောင်ရွက်သော အမျိုးသားစာကြည့်တိုက်တွင် ၁၈၇၅ မှ ၁၉၂၅ ခုနှစ်အထိထုတ်ဝေခဲ့သော ဘားမားဂေဇက်များကို မိုက်ခရိုဖလင်များဖြင့်လည်းကောင်း၊ ၁၉၇၅ ခုနှစ်မှ ၁၉၆၇ ခုနှစ်အထိ ထုတ်ဝေခဲ့သည်များကို စာစောင်မိတ္တူများအနေဖြင့်လည်းကောင်း ထိန်းသိမ်းထားရှိသည်။ ဂျပန်ကိုလိုနီခေတ်အတွင်း ဒေါက်တာဘမော်အစိုးရက မြန်မာဘာသာအား ရုံးသုံးဘာသာစကားအဖြစ် သတ်မှတ်ခဲ့ရာ ဘားမားဂေဇက် ကဲ့သို့သော တရားဝင်ထုတ်ပြန်မှုများကို မြန်မာ၊ အင်္ဂလိပ် နှစ်ဘာသာဖြင့် ဖြန့်ချိခဲ့သည်။ ဩစတြေးလျအမျိုးသားစာကြည့်တိုက်တွင် ၁၉၇၄ ခုနှစ်မှနောက်ပိုင်းအထိ ထုတ်ဝေခဲ့သော ဘားမားဂေဇက် အားလုံးကို ထိန်းသိမ်းထားရှိသည်။

ပြင်ပလင့်ခ်များ

• ပြည်ထောင်စုသမ္မတမြန်မာနိုင်ငံတော်ပြန်တမ်း