သံဃမိတ္တာထေရီ
| တစ်စိတ်တစ်ပိုင်း ဖော်ပြချက် |
| ဗုဒ္ဓဘာသာ |
|---|
 |
ပါဋလိပုတ်ပြည့်ရှင် အသောကမင်းကြီး၏ သမီးတော် သံဃမိတ္တာမင်းသမီး[၁]။ [၂] သံဃမိတ္တာ ထေရီမ ဖြစ်သည်။
မင်းသမီးဘဝ
[ပြင်ဆင်ရန်]သံဃမိတ္တာမင်းသမီးသည် ဇမ္ဗူဒိပ်ကျွန်း အလုံးကို အစိုးရသော အသောကမင်းကြီးနှင့် ဝေဋိသ (ဝေဋိသဂိရိ) [၃] မိဖုယားတို့မှ ဖွားမြင်သည့် နှစ်ယောက် မြောက် သမီးတော်ဖြစ်သည်။ [၄] သူမသည် အရွယ်ရောက်သောအခါ မိမိမောင်ဝမ်းကွဲ အဂ္ဂိဗြဟ္မာမင်းသားနှင့် လက်ထပ်ထိမ်းမြား၍ သားတစ် ယောက်ကို ဖွားမြင်ရရှိခဲ့သည်၊ သား၏ အမည်ကား မထင်ရှားပေ။ ခင်ပွန်းဖြစ်သူ အဂ္ဂိဗြဟ္မာမင်းသားကား အသောကမင်းကြီး အဘိသိက်ခံယူပြီးနောက် ၄-နှစ်မြောက်သောအခါ သံဃမိတ္တာ၏ ဘထွေးတော် အိမ်ရှေ့ မင်းသားတိဿနှင့်အတူ ရဟန်းပြုသွားခဲ့သည်။ အသောကမင်းကြီးက ဇမ္ဗူဒိပ်ကျွန်း ၈၄၀၀၀-သောမြို့တို့၌ တစ်မြို့လျှင် တစ်ကျောင်းစီအားဖြင့် စေတီတော် ၈၄၀၀၀-နှင့် တကွ ၈၄၀၀၀-သော ကျောင်းတို့ကို ဆောက်လုပ်ပြီးနောက် ထိုကျောင်းတို့ကို ရေစက်ချ လှူဒါန်းသည့် ကျောင်းလွှတ်ပွဲအပြီး၌ ခမည်းတော်မင်းကြီး၏ ဆန္ဒအရ မောင်တော် မဟိန္ဒမင်းသားနှင့်အတူ သာသနာ့ဘောင်သို့ ဝင်ရောက်ခဲ့ပေသည်။ [၅]
ထေရီမဘဝ
[ပြင်ဆင်ရန်]သံဃမိတ္တာမင်းသမီး၏ ဥပဇ္ဈာယ်ဆရာမကား ဓမ္မပါလီထေရီမဖြစ်၍ သရဏဂုံ, သိက္ခာပုဒ်ကို ပေးသောဆရာမကား အာယုပါလီထေရီမ-ဖြစ်သည်။ ရှင်ပြုပြီးကာမျှဖြစ်သော သံဃမိတ္တာမင်းသမီးကို ရှင်ပြုရာသိမ်အပြင် ၌ပင်လျှင် သိက္ခာသမ္မုတိကိုပေး၍ ပါဏာတိပါတာဝေရမဏိ အစ ဝိကာလ ဘောဇနာဝေရမဏိအဆုံးရှိသော သိက္ခာ ၆-ပါးကို ဆောက်တည်စေခြင်းအားဖြင့် သိက္ခာပုဒ်၌ တည်စေကြပြီ။ အသက် ၆၀-ရှိသော သာမဏေမပင်ဖြစ်စေကာမူ “ပါဏာတိပါတာ ဝေရမဏိံ ဒွေဝဿာနိ အဝီတိက္ကမ္မ သမာဒါနံ သမာဒိယာမိ” အရှိသည်ဖြင့် သိက္ခာပုဒ် ၆-ပါးကို ဆောက်တည်၍ ကျင့်အပ်ကုန်သည် သာတည်း။ မှန်၏ သိက္ခာပုဒ် ၆-ပါးတို့၌ ၂-နှစ်ပတ်လုံး မကျင့်သော သာမဏေမကို ပဉ္စင်းခံပေးခြင်းငှာ မအပ်။ [၆]
သီဟိုဠ်သာသနာပြုဘဝ
[ပြင်ဆင်ရန်]သံဃမိတ္တာထေရီမသည်— မဟိန္ဒထေရ် သီဟိုဠ်ကျွန်းသို့ သာသနာပြုရောက်၍ မကြာမြင့်မီပင် ဒေဝါနံပိယတိဿမင်း၏ မရီးတော် အနုဠာမိဖုယားကြီးကို ရဟန်းခံ (ရဟန်းပြု) ပေးရန် ဒေဝါနံပိယတိဿမင်း၏ ပင့်လျှောက် ချက်အရ ဗောဓိပင်ကို ယူဆောင်ပြီး သီဟိုဠ်ကျွန်းသို့သွားရောက်၍ ဘိက္ခုနီသာသနာကို အစပျိုးခဲ့ပေသည်။ [၇] [၈]