သိန်းညွန့် (နိုင်ငံရေးသမား)

သိန်းညွန့် အမည်ရှိ အခြားပုဂ္ဂိုလ်များအတွက် သိန်းညွန့် (သံတူကြောင်းကွဲ) ကို ကြည့်ပါ။

ဦး သိန်းညွန့်
အမျိုးသားကာကွယ်ရေးနှင့်လုံခြုံရေးကောင်စီ၏ ဗဟိုအကြံပေးအဖွဲ့ဝင်
တာဝန်ထမ်းဆောင်ဆဲ
တာဝန် စတင် ၃၁ ဇူလိုင် ၂၀၂၅
ခန့်အပ်သူ	အမျိုးသားကာကွယ်ရေးနှင့်လုံခြုံရေးကောင်စီ
သမ္မတ	ဗိုလ်ချုပ်မှူးကြီး မင်းအောင်လှိုင် (ယာယီတာဝန်)
ခေါင်းဆောင်	စောထွန်းအောင်မြင့်၊ အဖွဲ့ခေါင်းဆောင်
ယခင်လူ	ရာထူးစတင်
နိုင်ငံတော်စီမံအုပ်ချုပ်ရေးကောင်စီ ဗဟိုအကြံပေး အဖွဲ့ဝင်
တာဝန်သက်တမ်း ၁ ဖေဖော်ဝါရီ ၂၀၂၃ – ၃၁ ဇူလိုင် ၂၀၂၅
နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ	ဗိုလ်ချုပ်မှူးကြီး မင်းအောင်လှိုင်
နိုင်ငံတော်စီမံအုပ်ချုပ်ရေးကောင်စီ အဖွဲ့ဝင်
တာဝန်သက်တမ်း ၂ ဖေဖော်ဝါရီ ၂၀၂၁ – ၁ ဖေဖော်ဝါရီ ၂၀၂၃
ခန့်အပ်သူ	တပ်မတော်ကာကွယ်ရေးဦးစီးချုပ်ရုံး အမိန့်အမှတ် ၉/၂၀၂၁
နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ	ဗိုလ်ချုပ်မှူးကြီး မင်းအောင်လှိုင်
ပြည်သူ့လွှတ်တော် ကိုယ်စားလှယ်
တာဝန်သက်တမ်း ၃၀ မတ် ၂၀၁၁ – ၃၀ မတ် ၂၀၁၆
ယခင်လူ	အခြေခံဥပဒေ စတင်
ဆက်ခံသူ	အခြေခံဥပဒေ ဖျက်သိမ်း
မဲဆန္ဒနယ်	သင်္ဃန်းကျွန်းမြို့နယ်
အနိုင်ရမဲ အရေအတွက်	၄၈,၆၀၃
ကိုယ်ရေး အချက်အလက်များ
မွေးဖွား	၂၆ ဒီဇင်ဘာ ၁၉၄၄&#၁၆၀;(၁၉၄၄-၁၂-၂၆) (အသက် ၈၁) မြန်မာနိုင်ငံ
လူမျိုး	မြန်မာ
နိုင်ငံရေးပါတီ	အမျိုးသားဒီမိုကရေစီအဖွဲ့ချုပ် အမျိုးသား ဒီမိုကရေစီ အင်အားစု (၂၀၁၀-၂၀၁၁) အမျိုးသားဒီမိုကရေစီပါတီသစ် (၂၀၁၁ - လက်ရှိ)
အလုပ်အကိုင်	နိုင်ငံရေးသမား

ဦးသိန်းညွန့် သည် နိုင်ငံတော်စီမံအုပ်ချုပ်ရေးကောင်စီ ဗဟိုအကြံပေးအဖွဲ့ ၏အဖွဲ့ဝင်တစ်ဦးဖြစ်သည်။ ယခင်က နိုင်ငံတော်စီမံအုပ်ချုပ်ရေးကောင်စီ အဖွဲ့ဝင်တစ်ဦးဖြစ်သည်။ ဦးသိန်းညွန့်သည် အမျိုးသားဒီမိုကရေစီအဖွဲ့ချုပ် (NLD) ပါတီ ဗဟိုအလုပ်အမှုဆောင် ကော်မတီဝင်ဟောင်း တစ်ဦး ဖြစ်ပြီး NLD ပါတီမှ ခွဲထွက်ပြီးနောက် အမျိုးသား ဒီမိုကရေစီ အင်အားစု (NDF) ပါတီ ထူထောင်သူများတွင် တစ်ဦးအပါအဝင် ဖြစ်သည်။

နိုင်ငံရေး

ဦးသိန်းညွန့်သည် ၁၉၉၀ အထွေထွေရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်ပါတီမှ သင်္ဃန်းကျွန်းမြို့နယ်တွင် ယှဉ်ပြိုင်အနိုင်ရခဲ့သည်။ သို့သော် ၂၀၁၀ အထွေထွေရွေးကောက်ပွဲကို အမျိုးသားဒီမိုကရေစီအဖွဲ့ချုပ်က သပိတ်မှောက်၍ ယှဉ်ပြိုင်ခြင်းမပြုသောကြောင့် ပါတီမှနုတ်ထွက်ခဲ့သည်။ ထို့နောက်ပိုင်း အမျိုးသားဒီမိုကရေစီအဖွဲ့ချုပ်မှ ထွက်ရှိလာခဲ့သူများဖြစ်သော ဦးခင်မောင်ဆွေ၊ ဒေါက်တာသန်းငြိမ်း တို့နှင့်အတူ အမျိုးသားဒီမိုကရေစီ အင်အားစုပါတီကို တည်ထောင်ခဲ့သည်။

အမျိုးသားဒီမိုကရေစီ အင်အားစုပါတီမှ ၂၀၁၀ ပြည့်နှစ် ရွေးကောက်ပွဲတွင် ဝင်ရောက်ယှဉ်ပြိုင်ရန် ကြိုးစားခဲ့သော်လည်း ပါတီတွင်းရန်ပုံငွေ ပြဿနာများကြောင့် အမျိုးသားဒီမိုကရေစီ အင်အားစုပါတီမှ ထုတ်ပယ်ခံခဲ့ရသည်။ ၂၀၁၀ ရွေးကောက်ပွဲတွင် ရန်ကုန်တိုင်းဒေသကြီး၊ သင်္ဃန်းကျွန်းမြို့နယ် ပြည်သူ့လွှတ်တော် ကိုယ်စားလှယ်နေရာတွင် တစ်သီးပုဂ္ဂလအနေဖြင့် ယှဉ်ပြိုင်အနိုင်ရခဲ့သည်။ ထို့နောက် အမျိုးသားဒီမိုကရေစီပါတီသစ် (NNDP) ကို ၂၀၁၁ အောက်တိုဘာတွင် တည်ထောင်ပြီး ၂၀၁၅ ခုနှစ် ရွေးကောက်ပွဲတွင် ဝင်ရောက်ယှဉ်ပြိုင်ခဲ့ရာ ရှုံးနိမ့်ခဲ့သည်။

ဦးသိန်းညွန့်သည် ၂၀၁၀ ပြည့်နှစ် အထွေထွေရွေးကောက်ပွဲအပြီး ပထမအကြိမ်လွှတ်တော်သက်တမ်းတွင် ကလေးသူငယ်မုဒိန်း မှုကျူးလွန်သူများကို သေဒဏ်ပေးရေးလှုပ်ရှားမှု၊ အဂတိလိုက်စားမှုတားမြစ်ရေး ဥပဒေမူကြမ်း တင်သွင်းခြင်း၊ အလုပ်သမားအရေး၊ လူ့အခွင့်အရေးနှင့်ပတ်သက်သည့် အဆို၊ မေးခွန်းတင်သွင်းခြင်းများ ဆောင်ရွက်ခဲ့သည်။

အမျိုးသားဒီမိုကရေစီ ပါတီသစ်သည် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီနှင့် မဟာမိတ်ဖွဲ့ခဲ့သည်။ ၂၀၂၀ ပြည့်နှစ် ရွေးကောက်ပွဲမတိုင်မီ တပ်မတော်ကာကွယ်ရေးဦးစီးချုပ်နှင့် တွေ့ဆုံခဲ့သော နိုင်ငံရေးပါတီတွေများတွင် အမျိုးသားဒီမိုကရေစီ ပါတီသစ်လည်း ပါဝင်ခဲ့သည်။ ၂၀၂၀ အထွေထွေရွေးကောက်ပွဲကို ယှဉ်ပြိုင်ရာတွင်လည်း ထပ်မံရှုံးနိမ့်ခဲ့ပြန်သည်။

နိုင်ငံတော် ကောင်စီဝင်အဖြစ် တာဝန်ပေးခံရခြင်း

၂၀၂၁ ခုနှစ် ဖေဖော်ဝါရီလ ၁ ရက်နေ့တွင် တပ်မတော်မှ အာဏာသိမ်းယူမှု ဖြစ်ပွားခဲ့ပြီးနောက် ဖွဲ့စည်းခဲ့သော နိုင်ငံတော်စီမံအုပ်ချုပ်ရေးကောင်စီတွင် အဖွဲ့ဝင်အဖြစ် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ခန့်အပ်ခဲ့သည်။ စစ်ကောင်စီဝင်ဖြစ်လာပြီးနောက် မေလ ၃ နှင့် ၅ တွင် ၎င်း၏သားဖြစ်သူပိုင်ဆိုင်သည်ဟု အငြင်းပွားဖွယ်နေအိမ်၌ ပါတီရုံးပြန်ဖွင့်ရန် ကြိုးပမ်းခဲ့သဖြင့် သားဖြစ်သူနှင့် အငြင်းပွားမှုတစ်ခုရှိခဲ့သည့်အပြင် အစောပိုင်းကာလ မတ် ၂၇ ရက် တွင် သားဖြစ်သူကို ဖမ်းဝရမ်းထုတ်ထားကြောင်း ဦးသိန်းညွန့်ကိုယ်တိုင်က ဖုန်းဆက်ခြိမ်းခြောက်ခဲ့သည်ဟု သတင်းတစ်ခုတွင် ၎င်း၏သားဖြစ်သူက ပြောဆိုထားမှုလည်းရှိသည်။ မေလ ၁၂ ၌ ထိုသားဖြစ်သူနှင့် ဇနီးကို စစ်ကောင်စီကဖမ်းဆီးခဲ့၏ ။

နိုင်ငံတော် ကောင်စီဝင်အဖြစ်မှ ဖယ်ရှားခံရခြင်း

၂၀၂၃ ဖေဖော်ဝါရီ ၁ရက်တွင် အသစ်ပြန်လည်ဖွဲ့စည်းလိုက်သော နိုင်ငံတော်စီမံအုပ်ချုပ်ရေးကောင်စီတွင် ဦးသိန်းညွန့် ပါမလာတော့ဘဲ ကောင်စီဝင်အဖြစ်မှ နိုင်ငံတော်စီမံအုပ်ချုပ်ရေးကောင်စီ ဗဟိုအကြံပေးအဖွဲ့ ၏ အဖွဲ့ဝင်အဖြစ် ရာထူးလျှောကျသွားသည်။ ဝန်ကြီးအဆင့်နေအိမ်မှ ဖယ်ပေးရသည်။

၂၀၂၅ ခုနှစ်၊ ဇူလိုင်လ ၃၁ ရက်နေ့တွင် နိုင်ငံတော်စီမံအုပ်ချုပ်ရေးကောင်စီကို ဖျက်သိမ်းပြီးနောက် အမျိုးသားကာကွယ်ရေးနှင့် လုံခြုံရေးကောင်စီရုံး၏ အမိန့်အမှတ် ၁၀/၂၀၂၅ ဖြင့် ယခင် နစကကောင်စီဝင်များနှင့် နစက ဗဟိုအကြံပေးအဖွဲ့ဝင်များကို ကာလုံဗဟိုအကြံပေးအဖွဲ့သစ်ကို တာဝန်ပေးခံရသည်။

အရေးယူပိတ်ဆို့ခံရခြင်း

ဦးသိန်းညွန့်သည် အမေရိကန်ဘဏ္ဍာရေးဝန်ကြီးဌာန၏ ၂၀၂၁ မေ ၁၇ရက် ဒဏ်ခတ်ပိတ်ဆို့အရေးယူမှု နှင့် ဥရောပသမဂ္ဂ၏ ၂၀၂၁ ဧပြီ ၁၉ ရက် ဒဏ်ခတ်ပိတ်ဆို့အရေးယူမှုများအား ခံထားရသည်။