ခင်မောင်ဆွေ

ဦး ခင်မောင်ဆွေ
အမျိုးသားကာကွယ်ရေးနှင့်လုံခြုံရေးကောင်စီ၏ ဗဟိုအကြံပေးအဖွဲ့ဝင်
တာဝန်ထမ်းဆောင်ဆဲ
တာဝန် စတင် ၃၁ ဇူလိုင် ၂၀၂၅
ခန့်အပ်သူ	အမျိုးသားကာကွယ်ရေးနှင့်လုံခြုံရေးကောင်စီ
သမ္မတ	ဗိုလ်ချုပ်မှူးကြီး မင်းအောင်လှိုင် (ယာယီတာဝန်)
ခေါင်းဆောင်	စောထွန်းအောင်မြင့်၊ အဖွဲ့ခေါင်းဆောင်
ယခင်လူ	ရာထူးစတင်
နိုင်ငံတော်စီမံအုပ်ချုပ်ရေးကောင်စီ ဗဟိုအကြံပေးအဖွဲ့ဝင်
တာဝန်သက်တမ်း ၁ ဖေဖော်ဝါရီ ၂၀၂၃ – ၃၁ ဇူလိုင် ၂၀၂၅
နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ	ဗိုလ်ချုပ်မှူးကြီး မင်းအောင်လှိုင်
ယခင်လူ	အဖွဲ့စတင်
ဆက်ခံသူ	ကောင်စီဖျက်သိမ်း
နိုင်ငံတော်စီမံအုပ်ချုပ်ရေးကောင်စီ အဖွဲ့ဝင်
တာဝန်သက်တမ်း ၂ ဖေဖော်ဝါရီ ၂၀၂၁ – ၁ ဖေဖော်ဝါရီ ၂၀၂၃
ယခင်လူ	ကောင်စီစတင်
ဆက်ခံသူ	ရာထူးအနားပေး
အမျိုးသား ဒီမိုကရေစီ အင်အားစုပါတီဥက္ကဋ္ဌ
တာဝန်ထမ်းဆောင်ဆဲ
တာဝန် စတင် ဇွန် ၂၀၁၀
ကိုယ်ရေး အချက်အလက်များ
မွေးဖွား	ဇူလိုင် ၁၉၄၂ (အသက် ၈၃–၈၄) ငသိုင်းချောင်းမြို့၊ ပုသိမ်ခရိုင်၊ မြန်မာနိုင်ငံ
လူမျိုး	မြန်မာ
နိုင်ငံရေးပါတီ	အမျိုးသားဒီမိုကရေစီအဖွဲ့ချုပ် အမျိုးသား ဒီမိုကရေစီ အင်အားစု (၂၀၁၀-လက်ရှိ)
အလုပ်အကိုင်	နိုင်ငံရေးသမား

ဦးခင်မောင်ဆွေ သည် လက်ရှိတွင် အမျိုးသားဒီမိုကရေစီအင်အားစု (NDF) ပါတီဥက္ကဋ္ဌ ဖြစ်ပြီး အမျိုးသားကာကွယ်ရေးနှင့် လုံခြံရေးကောင်စီ၏ ဗဟိုအကြံပေးအဖွဲ့ဝင် တစ်ဦး ဖြစ်သည်။​

ယခင်က ဖျက်သိမ်းပြီးဖြစ်သော နိုင်ငံတော်စီမံအုပ်ချုပ်ရေးကောင်စီ ဗဟိုအကြံပေးအဖွဲ့၏ အဖွဲ့ဝင်တစ်ဦးလည်း ဖြစ်ပြီး ယင်းမတိုင်းခင်နိုင်ငံတော်စီမံအုပ်ချုပ်ရေးကောင်စီဝင် တစ်ဦး ဖြစ်ခဲ့သည်။

ဦးခင်မောင်ဆွေသည် အမျိုးသားဒီမိုကရေစီအဖွဲ့ချုပ် (NLD) ပါတီ ဗဟိုအလုပ်အမှုဆောင် ကော်မတီဝင်ဟောင်း တစ်ဦး ဖြစ်ပြီး NLD ပါတီမှ ခွဲထွက်ခဲ့ကာ အမျိုးသားဒီမိုကရေစီအင်အားစု (NDF) ပါတီကို တည်ထောင်သူများတွင် တစ်ဦးအပါအဝင်ဖြစ်သည်။ ၂၀၂၀ ပြည့်နှစ် ရွေးကောက်ပွဲမတိုင်မီ တပ်မတော်ကာကွယ်ရေးဦးစီးချုပ်နှင့် တွေ့ဆုံခဲ့သော နိုင်ငံရေးပါတီတွေများတွင် အမျိုးသား ဒီမိုကရေစီ အင်အားစုပါတီလည်း ပါဝင်ခဲ့သည်။

အစောပိုင်းဘဝနှင့် ပညာရေး

ဦးခင်မောင်ဆွေကို ၁၉၄၂ ခုနှစ် ဇူလိုင်လတွင် ပုသိမ်ခရိုင်၊ ငသိုင်းချောင်းမြို့တွင် မွေးဖွားခဲ့သည်။ ၁၉၆၀ ခုနှစ်တွင် ပုသိမ်မြို့မှ အထက်တန်းအောင်မြင်ခဲ့ပြီး ၁၉၆၆ ခုနှစ်တွင် ဘူမိဗေဒဘာသာရပ်ဖြင့် သိပ္ပံဘွဲ့ရရှိခဲ့သည်။ ၁၉၆၆ ခုနှစ်မှ ၁၉၈၈ ခုနှစ်အထိ မြန်မာ့ရေနံကော်ပိုရေးရှင်းတွင် ဘူမိဗေဒပညာရှင်အဖြစ် လုပ်ကိုင်ခဲ့သည်။

နိုင်ငံရေး

ရှစ်လေးလုံးအရေးအခင်းတွင် ရေနံမြေအလုပ်သမားသမဂ္ဂအတွင်းရေးမှူးအဖြစ် ဆောင်ရွက်ခဲ့သည်။ ထို့နောက် ဒေါ်အောင်ဆန်းစုကြည်၏ ဖိတ်ခေါ်မှုဖြင့် အမျိုးသားဒီမိုကရေစီအဖွဲ့ချုပ် ပါတီဝင် ဖြစ်လာခဲ့ပြီး ၁၉၈၈ ခုနှစ် အောက်တိုဘာလတွင် ဗဟိုဦးစီးအဖွဲ့ဝင်အဖြစ်လည်းကောင်း၊ ၁၉၈၉ ခုနှစ် ဇူလိုင်တွင် အလုပ်အမှုဆောင်အဖွဲ့ဝင်အဖြစ်လည်းကောင်း ဆောင်ရွက်ခဲ့သည်။

၁၉၉၀ ပြည့်နှစ် ပါတီစုံအထွေထွေ ရွေးကောက်ပွဲတွင် စမ်းချောင်းမြို့နယ်မှ ဝင်ရောက်ယှဉ်ပြိုင် အနိုင်ရခဲ့သော်လည်း နိုင်ငံတော် ငြိမ်ဝပ်ပိပြားမှု တည်ဆောက်ရေးအဖွဲ့မှ အာဏာလွှဲပြောင်းရန် ငြင်းဆန်ခဲ့ပြီး နိုင်ငံရေးသမားများကို ဖမ်းဆီးအကျဉ်းချခဲ့ရာ ဦးခင်မောင်ဆွေလည်း ဖမ်းဆီးခံခဲ့ရသည်။ ၁၉၉၀ ပြည့်နှစ် အောက်တိုဘာလတွင် ဦးခင်မောင်ဆွေကို နိုင်ငံတော်ပုန်ကန်မှု၊ အကြည်ညိုပျက်စေမှုများဖြင့် ထောင်ဒဏ် ၁၇ နှစ် ချမှတ်ခဲ့သည်။

၂၀၀၈ ခုနှစ် စက်တင်ဘာလတွင် ထောင်မှလွတ်မြောက်လာခဲ့ပြီး ၂၀၁၀ ရွေးကောက်ပွဲ ဝင်မဝင်ကိစ္စနှင့် ပတ်သက်၍ အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင် ကော်မတီဝင်များ သဘောထားကွဲလွဲရာမှ ပါတီမှ နုတ်ထွက်ခဲ့သည်။ ထို့နောက် ဒေါက်တာသန်းငြိမ်းနှင့် ဦးခင်မောင်ဆွေတို့ ဦးဆောင်ကာ ၂၀၁၀ ပြည့်နှစ် ဇွန်လတွင် အမျိုးသား ဒီမိုကရေစီ အင်အားစုပါတီကို ဖွဲ့စည်းခဲ့သည်။

စစ်ကောင်စီဝင်

၂၀၂၁ ခုနှစ် ဖေဖော်ဝါရီလ ၁ ရက်နေ့တွင် တပ်မတော်မှ အာဏာသိမ်းယူမှု ဖြစ်ပွားခဲ့ပြီးနောက် ဖွဲ့စည်းခဲ့သော နိုင်ငံတော်စီမံအုပ်ချုပ်ရေးကောင်စီတွင် အဖွဲ့ဝင်အဖြစ် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ခန့်အပ်ခဲ့သည်။

နိုင်ငံတော် ကောင်စီဝင်အဖြစ်မှ ဖယ်ရှားခံရခြင်း

စစ်အာဏာသိမ်းပြီး ၂နှစ်အကြာ ၂၀၂၃ ဖေဖော်ဝါရီ ၁ရက်တွင် အသစ်ပြန်လည်ဖွဲ့စည်းလိုက်သော နိုင်ငံတော်စီမံအုပ်ချုပ်ရေးကောင်စီတွင် ဦးခင်မောင်ဆွေ ပြန်မပါလာတော့ဘဲ ဖယ်ရှားခံလိုက်ရသည်။သို့သော်လည်း ၎င်းကို နိုင်ငံတော်စီမံအုပ်ချုပ်ရေးကောင်စီ ဗဟိုအကြံပေးအဖွဲ့ တွင် အဖွဲ့ဝင်အဖြစ်မူဆက်လက်ခန့်ထားခဲ့သည်။အကြံပေးအဖွဲ့ အဖွဲ့ဝင်ဖြစ်လာပြီးနောက် မူလနေထိုင်ရာ ဝန်ကြီးအဆင့်နေအိမ်မှ ဖယ်ပေးလိုက်ရပြီး ဒုတိယဝန်ကြီးအဆင့်နေအိမ်သို့ ပြောင်းရွှေ့ရကာ လစာလည်း အလျှော့ခံရသည်။

ထို့နောက်၊ စစ်ကောင်စီဝင်ဟောင်းများ ခန့်အပ်ဖွဲ့စည်းထားသည့် နိုင်ငံတော်စီမံအုပ်ချုပ်ရေးကောင်စီ၏ ဗဟိုအကြံပေးအဖွဲ့ဝင် အဖြစ် ပြောင်းရွေ့ခံရသည်။

ကာလုံအကြံပေးအဖွဲ့ဝင်

နိုင်ငံတော်စီမံအုပ်ချုပ်ရေးကောင်စီကို ဖျက်သိမ်းပြီးနောက် အမျိုးသားကာကွယ်ရေးနှင့် လုံခြုံရေးကောင်စီရုံး၏ အမိန့်အမှတ် ၁၀/၂၀၂၅ ဖြင့် ယခင် နစက ကောင်စီဝင်များနှင့် နစက ဗဟိုအကြံပေးအဖွဲ့ဝင်များကို ကာလုံဗဟိုအကြံပေးအဖွဲ့သစ်တွင် ပြောင်းရွေ့တာဝန်ပေးခံရသည်။

အရေးယူပိတ်ဆို့ခံရခြင်း

စစ်ကောင်စီဝင်ဖြစ်သူ ဦးခင်မောင်ဆွေသည် အမေရိကန်ဘဏ္ဍာရေးဝန်ကြီး၏ ၂၀၂၁ မေ ၁၇ရက် ဒဏ်ခတ်ပိတ်ဆို့အရေးယူမှုပြုလုပ်တွင် ဦးခင်မောင်ဆွေ ထည့်သွင်းခံရသည်။ယင်းအပြင် ဥရောပသမဂ္ဂကလည်း ဦးခင်မောင်ဆွေကို ၂၀၂၁ ဧပြီ ၁၉ ရက်တွင် အရေးယူပိတ်ဆို့ ဒဏ်ခတ်ထားသည်။