ဇော်မျိုးတင်

ဒုတိယဗိုလ်ချုပ်ကြီး စည်သူ သီရိပျံချီ ဇော်မျိုးတင်
စစ်ထောက်ချုပ်
တာဝန်ထမ်းဆောင်ဆဲ
တာဝန် စတင် ဇန်နဝါရီ ၂၀၂၆
ခန့်အပ်သူ	တပ်မတော်ကာကွယ်ရေးဦးစီးချုပ်
ယခင်လူ	ဒုတိယဗိုလ်ချုပ်ကြီး ဇော်ဟိန်း
ကယားပြည်နယ် ဝန်ကြီးချုပ်
တာဝန်သက်တမ်း ၃၁ ဇူလိုင် ၂၀၂၅ – ၃၀ ဒီဇင်ဘာ ၂၀၂၅
ခန့်အပ်သူ	အမျိုးသားကာကွယ်ရေးနှင့် လုံခြုံရေးကောင်စီ
သမ္မတ	မင်းအောင်လှိုင် (ယာယီတာဝန်)
ယခင်လူ	ကိုယ်တိုင်
ဆက်ခံသူ	ဦးစိန်ဦး
တာဝန်သက်တမ်း ၁ ဖေဖော်ဝါရီ ၂၀၂၂ – ၃၁ ဇူလိုင် ၂၀၂၅
ခန့်အပ်သူ	နိုင်ငံတော်စီမံအုပ်ချုပ်ရေးကောင်စီ
သမ္မတ	မြင့်ဆွေ (ယာယီ) မင်းအောင်လှိုင် (ယာယီတာဝန်)
ယခင်လူ	ခင်မောင်ဦး
ဆက်ခံသူ	ကိုယ်တိုင်
တပ်မတော်လေ့ကျင့်ရေးအရာရှိချုပ်
တာဝန်သက်တမ်း ဩဂုတ် ၂၀၂၁ – ဇန်နဝါရီ ၂၀၂၂
ယခင်လူ	ဗိုလ်ချုပ်ကြီး မောင်မောင်အေး ညှိကွပ်ရာထူးနှင့်ပူးတွဲတာဝန်ယူ
ဆက်ခံသူ	ဗိုလ်ချုပ်ကြီး မောင်မောင်အေး ညှိကွပ်ရာထူးနှင့်ပူးတွဲတာဝန်ယူ
နေပြည်တော်တိုင်းစစ်ဌာနချုပ် တိုင်းမှူး
တာဝန်သက်တမ်း ဇန်နဝါရီ ၂၀၂၁ – ဩဂုတ် ၂၀၂၁
ယခင်လူ	ဗိုလ်ချုပ် သောင်းထိုက်ရွှေ
ဆက်ခံသူ	ဗိုလ်ချုပ်ဇော်ဟိန်း
ကယားပြည်နယ်အစိုးရအဖွဲ့ လုံခြုံရေးနှင့်နယ်စပ်ရေးရာဝန်ကြီး
တာဝန်သက်တမ်း ၅ ဇူလိုင် ၂၀၁၃ – ၂၃ ဖေဖော်ဝါရီ ၂၀၁၇
ယခင်လူ	ဗိုလ်မှူးကြီး တင်စိုး
ဆက်ခံသူ	ဗိုလ်မှူးကြီး မြင့်ဝေ
ပထမအကြိမ် နှင့် ဒုတိယအကြိမ် ကယားပြည်နယ် လွှတ်တော် တပ်မတော်သားကိုယ်စားလှယ်
တာဝန်သက်တမ်း ၅ ဇူလိုင် ၂၀၁၃ – ၂၃ ဖေဖော်ဝါရီ ၂၀၁၇
ယခင်လူ	ဗိုလ်မှူးကြီး တင်စိုး
ဆက်ခံသူ	ဗိုလ်မှူးကြီး မြင့်ဝေ
ကိုယ်ရေး အချက်အလက်များ
မွေးဖွား	၁၉၆၇ မြန်မာနိုင်ငံ
မိခင်ကျောင်း	စစ်တက္ကသိုလ် (အပတ်စဉ်-၃၂)
စစ်မှုထမ်းခြင်း
သစ္စာခံနိုင်ငံ	မြန်မာ
တပ်/တပ်ဖွဲ့ခွဲ	တပ်မတော် (ကြည်း)
ရာထူး	ဒုတိယ ဗိုလ်ချုပ်ကြီး

ဒုတိယဗိုလ်ချုပ်ကြီး ဇော်မျိုးတင် သည် လက်ရှိ စစ်ထောက်ချုပ် အဖြစ် တာဝန်ထမ်းဆောင်နေပြီး၊ ကယားပြည်နယ် ဝန်ကြီးချုပ် အဖြစ်မှ မူလစစ်ဘက်ရာထူးသို့ ပြန်လည် ထမ်းဆောင်ခဲ့သူ ဖြစ်သည်။ယင်းမတိုင်မီက လွိုင်ကော်ဒေသကွပ်ကဲမှု စစ်ဌာနချုပ် ဒကစမှူး၊ နေပြည်တော်တိုင်းစစ်ဌာနချုပ် တိုင်းမှူး၊ တပ်မတော်လေ့ကျင့်ရေးအရာရှိချုပ် အဖြစ် ဆောင်ရွက်ခဲ့သည်။ထို့အပြင် ၂၀၁၃ ခုနှစ် မှ ၂၀၁၇ ခုနှစ်အတွင်း ကယားပြည်နယ် လွှတ်တော်၏ တပ်မတော်သားလွှတ်တော်ကိုယ်စားလှယ် နှင့် ပြည်နယ်အစိုးရအဖွဲ့၏ လုံခြုံရေးနှင့် နယ်စပ်ရေးရာဝန်ကြီး အဖြစ် နိုင်ငံရေးရာထူးများကိုလည်း ထမ်းဆောင်ခဲ့သည်။

စစ်မှုထမ်းခြင်း

အစောပိုင်းဘဝ

သူသည် စစ်တက္ကသိုလ် အပတ်စဉ် (၃၂)ဆင်း ဖြစ်သည်။၎င်း၏ ပြန်တမ်းဝင် ကိုယ်ပိုင်အမှတ်မှာ ကြည်း (၂၂၅၈၂) ဖြစ်သည်။

တပ်မတော်သားလွှတ်တော်ကိုယ်စားလှယ်ဘဝ

သူသည် ၂၀၁၃ ခုနှစ်၊ဇူလိုင် ၅ရက် တွင် ဗိုလ်မှူးကြီးရာထူးဖြင့် ဒေသကွပ်ကဲမှုစစ်ဌာနချုပ် (လွိုင်ကော်) မှနေ၍ ကယားပြည်နယ်အစိုးရအဖွဲ့၏ လုံခြုံရေးနှင့်နယ်စပ်ရေးရာဝန်ကြီးအဖြစ်လည်းကောင်း၊ပထမအကြိမ် ကယားပြည်နယ်လွှတ်တော် ၏ တပ်မတော်သားလွှတ်တော်ကိုယ်စားလှယ်အဖြစ် လည်းကောင်း ခန့်အပ်တာဝန်ပေးခံရသည်။

၂၀၁၆ခုနစ်၊ဇန်နဝါရီ ၁၈ရက် တွင် ကယားပြည်နယ်လွှတ်တော် တပ်မတော်သားကိုယ်စားလှယ် အဖြစ် ကြေညာခံရပြီး၊ဒုတိယအကြိမ် ကယားပြည်နယ်လွှတ်တော် ၏ တပ်မတော်သားလွှတ်တော်ကိုယ်စားလှယ်အဖြစ် ၂၀၁၇ခုနှစ်၊ဖေဖော်ဝါရီ ၂၃ရက် အထိ ထမ်းဆောင်ခဲ့သည်။

သူသည် ပြည်နယ် လုံနယ်ဝန်ကြီးအဖြစ် ဦးခင်မောင်ဦး နှင့် အယ်လ်ဖောင်းရှိုတို့၏ ကယားပြည်နယ်အစိုးရအဖွဲ့များတွင် ၄နှစ်နီးပါးဆက်တိုက် ဆောင်ရွက်ခဲ့သူဖြစ်သည်။

မူလစစ်ဘက်တာဝန်ပြန်လည်ထမ်းဆောင်

၂၀၁၇ခုနှစ်၊ဖေဖော်ဝါရီနှောင်းပိုင်းတွင် ဗိုလ်မှူးချုပ်ရာထူးတိုးဖြင့် အရှေ့ပိုင်းတိုင်းစစ်ဌာနချုပ်လက်အောက်ရှိ၊ ကယားပြည်နယ်နှင့်သက်ဆိုင်သည့် ဒေသကွပ်ကဲမှုစစ်ဌာနချုပ် (လွိုင်ကော်)၏ ဒကစမှူး ဖြစ်လာခဲ့သည်။

ထို့နောက် နေပြည်တော်ရှိ တပ်မတော်ကာကွယ်ရေးဦးစီးချုပ်ရုံး၊စခန်းမှူးတာဝန်အား ဗိုလ်ချုပ်ရာထူးဖြင့် ဆက်လက်ထမ်းဆောင်ခဲ့သည်။

၂၀၂၁ခုနှစ် ဇန်နဝါရီလတွင် တပ်မတော်အင်အားသို့ရောက်ရှိသွားသော နေပြည်တော်တိုင်းစစ်ဌာနချုပ်တိုင်းမှူး ဗိုလ်ချုပ် သောင်းထိုက်ရွှေ၏ နေရာသို့ အစားထိုးခန့်အပ်ခံရပြီး စစ်တိုင်းမှူးဖြစ်လာခဲ့သည်။

၂၀၂၁ အာဏာသိမ်းမှုဖြစ်ချိန်တွင် သူသည် နေပြည်တော်တိုင်းစစ်ဌာနချုပ်၏ တိုင်းမှူး အဖြစ် တာဝန်ယူထားရသည်။

၂၀၂၁ခုနှစ် အာဏာသိမ်းမှုဖြစ်ပွားပြီးနောက်ပိုင်း ကြည်း၊ ရေ၊ လေ ညှိနှိုင်းကွပ်ကဲရေးမှူးနှင့် တပ်မတော်လေ့ကျင့်ရေးအရာရှိချုပ်အဖြစ် ပူးတွဲတာဝန်ယူထားသူ ဗိုလ်ချုပ်ကြီးမောင်မောင်အေးအား ထိုနှစ် စက်တင်ဘာလတွင် ညှိနှိုင်းကွပ်ကဲရေးမှူးအဖြစ်သာ တာဝန်ယူစေခဲ့ပြီးနောက် ဗိုလ်ချုပ် ဇော်မျိုးတင်သည် ဒုတိယဗိုလ်ချုပ်ကြီးအဆင့် ရာထူးတိုးဖြင့် တပ်မတော်လေ့ကျင့်ရေးအရာရှိချုပ်အဖြစ် ခန့်အပ်ခံရသည်။ ၎င်း၏ တိုင်းမှူးနေရာသို့ စစ်တက္ကသိုလ်ကျောင်းအုပ်ကြီး ဗိုလ်ချုပ်ဇော်ဟိန်းအား ခန့်အပ်ခဲ့သည်။

ပြည်နယ်ဝန်ကြီးချုပ်ဘဝ

၂၀၂၂ခုနှစ် ဇန်နဝါရီလတွင် ကယားပြည်နယ် လွိုင်ကော်ခရိုင်တွင် တပ်မတော်နှင့် ဒေသခံကာကွယ်ရေးတပ်ဖွဲ့များ၊ လက်နက်ကိုင်အဖွဲ့အစည်းများအကြား တိုက်ပွဲများ အပြင်းအထန်ဖြစ်ပွားခဲ့ပြီး ပြည်နယ်မြို့တော်ဖြစ်သော လွိုင်ကော်မြို့နှင့် ပတ်ဝန်းကျင်ရှိ ဒေသခံများ ရှောင်တိမ်းထွက်ပြေးခဲ့ရသည်အထိ ဖြစ်ခဲ့သည်။

၂၀၂၂ခုနှစ် ဇန်နဝါရီလ ၃၁ရက်နေ့တွင် ပြည်နယ်ဝန်ကြီးချုပ်အဖြစ် (၂)ကြိမ်တိုင် တာဝန်ယူခဲ့သူ၊ ဦးခင်မောင်ဦး သည် ပြည်နယ်ဝန်ကြီးချုပ်တာဝန်မှ အနားပေးခံရသည်။ ထိုနေရာသို့ ၂၀၂၂ခုနှစ် ဖေဖော်ဝါရီလ ၁ရက်နေ့တွင် ဒုတိယဗိုလ်ချုပ်ကြီး ဇော်မျိုးတင် သည် ပြည်နယ်ဝန်ကြီးချုပ် အဖြစ် အစားထိုး ခန့်အပ်ခံရသည်။

၂၀၂၅ခုနှစ်၊ ဒီဇင်ဘာ ၃၀ ရက်တွင် အမျိုးသားကာကွယ်ရေးနှင့်လုံခြုံရေးကောင်စီရုံးသည် အမိန့်အမှတ်၊ ၅၄ / ၂ဝ၂၅ ဖြင့် ကယားပြည်နယ်ဝန်ကြီးချုပ် ဦးဇော်မျိုးတင်အား စစ်ဘက်မူလတာဝန်များ ပြန်လည်ထမ်းဆောင်စေလိုက်​ကြောင်း အမိန့်တစ်ရပ်ထုတ်ပြန်ခဲ့သည်။

အမျိုးသားကာကွယ်ရေးနှင့်လုံခြုံရေးကောင်စီသည် ပြည်ထောင်စုသမ္မတမြန်မာနိုင်ငံတော် ဖွဲ့စည်းပုံအခြေခံဥပဒေ ပုဒ်မ ၄၂၇၊ ပုဒ်မခွဲ (ခ) အရ ကယားပြည်နယ်ဝန်ကြီးချုပ် ဦးဇော်မျိုးတင်အား စစ်ဘက်မူလတာဝန်များ ပြန်လည်ထမ်းဆောင်စေလိုက်​ကြောင်း အမိန့်စာတွင်ဖော်ပြခဲ့ပြီး၊ ကယားပြည်နယ်အစိုးရအဖွဲ့ စီးပွား​ရေးရာ ဝန်ကြီး ဦးစိန်ဦးသည် ကယားပြည်နယ် ဝန်ကြီးချုပ် အသစ် ဖြစ်လာခဲ့သည်။

မူလစစ်ဘက်တာဝန်ပြန်လည်ထမ်းဆောင်

၂၀၂၆ ခုနှစ် ဇန်နဝါရီလတွင် ဦးဇော်မျိုးတင် သည် ဒုတိယဗိုလ်ချုပ်ကြီး ရာထူးဖြင့် တပ်မတော်၏ စစ်ထောက်ချုပ် တာဝန်ကို ပေးအပ်ခံခဲ့ရပြီး၊ ဗိုလ်မှူးကြီး အဆင့်နှင့် ဒုတိယဗိုလ်ချုပ်ကြီး အဆင့်တို့တွင် မူလ စစ်ဘက်တာဝန်ကို နှစ်ကြိမ်တိုင် ပြန်လည် ထမ်းဆောင်ရသူအဖြစ် စာရင်းဝင်ခဲ့သည်။

ဂုဏ်ပြုခံရခြင်း

၂၀၂၂ ခုနှစ်၊ဇန်နဝါရီ ၄ ရက် တွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ သည် အမိန့်ကြော်ငြာစာအမှတ် ၂/၂၀၂၂ ဖြင့် စွမ်းဆောင်မှုဆိုင်ရာ ဂုဏ်ထူးဆောင်ဘွဲ့ဖြစ်သည့် ဇေယျကျော်ထင်ဘွဲ့ ကို ချီးမြှင့်အပ်နှင်းခဲ့သည်။

၂၀၂၂ ခုနှစ်၊ နိုဝင်ဘာလ  ၁၇  ရက်တွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ သည် အမိန့်ကြော်ငြာစာအမှတ် ၂၁၁/၂၀၂၂ ဖြင့် စွမ်းဆောင်မှုဆိုင်ရာ ဂုဏ်ထူးဆောင်ဘွဲ့ဖြစ်သော သီရိပျံချီဘွဲ့ကို ချီးမြှင့်အပ်နှင်းခဲ့သည်။

၂၀၂၅ ခုနှစ်၊ဇန်နဝါရီ ၄ ရက် နှင့် ဧပြီ ၁၇ ရက် တို့တွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ သည် ၎င်းအား တပ်မတော်ဆိုင်ရာ စွမ်းဆောင်မှုဂုဏ်ထူးဆောင်တံဆိပ်ဖြစ်သည့် မြန်မာနိုင်ငံစစ်မှုထမ်းသင်္ဂဟတံဆိပ်အားလည်းကောင်း၊စည်သူဘွဲ့အား လည်းကောင်း တပ်မတော်အရာရှိကြီးရာထူးအဆင့်အတန်းဖြင့် ချီးမြှင့်အပ်နှင်းခဲ့သည်။