ယာမာဘုံ

နတ်ချမ်းသာသို့ ကောင်းစွာ ရောက်သော နတ်၊ ဆင်းရဲဒုက္ခ-ကင်း-မရှိ-သော နတ်ချမ်းသာများ နေရာဘုံဖြစ်သည်။ ယာမာနတ်ပြည်သည် နတ်ပြည် ၆-ထပ်တို့တွင် ၃-ထပ်မြောက်နတ်ပြည်ဖြစ်၍ တာဝတိံသာနတ်ပြည်၏ အထက်ယူဇနာ ၄၂၀၀၀-ကွာဝေးသော အရပ်၌ တည်ရှိ၏။ တာဝတိံသာ၌ သိကြားမင်းရှိသကဲ့သို့ ယာမာဘုံတွင်လည်း သုယာမနတ်မင်း အုပ်ချုပ်သည်။ ယင်းနတ်မင်းသည် သိကြားမင်းရာထူးကိုလည်းရသည်။ ဤစကြဝဠာမှတစ်ပါးသော စကြဝဠာတို့၌လည်း ယာမာနတ်ပြည် အသီးသီးရှိကြသည်။

ယာမာနတ်သက်သည် သူတို့၏အရေအတွက်အားဖြင့် နှစ်ပေါင်း(၂၀၀၀)ရှိသည်။

လူတို့၏အရေအတွက်အားဖြင့် (၁၄)ကုဋေ(၄)သန်းရှိသည်။

လူတို့၏ နှစ်(၂၀၀)သည် ယာမာနတ်ပြည်၌ (၁)ရက် ဖြစ်သည်။

ယာမာနတ်တို့သည် စာတုမဟာရာဇ်နတ် တာဝတိံသာနတ်တို့ကဲ့သို့ ဘူမဋ္ဌ = မြေ၌ တည်သောနတ် အာကာသဋ္ဌ = ကောင်းကင်၌ တည်သော နတ်ဟု ၂-မျိုးမရှိ၊ အာကာသဋ္ဌ = ကောင်းကင်၌ တည်သော နတ်တစ်မျိုးတည်းသာ။ ယင်းနတ်တို့၏ အဆက်ဆက်သည် စကြဝဠာတံတိုင်းတိုင်အောင် ရောက်သည်။

စာတုမဟာရာဇ်, တာဝတိံသာ ယာမာ အစရှိသော နတ်တို့၌ လူတို့ကဲ့သို့ သုက်သွေး များရှိသည်။ သို့သော် သုက်လွှတ်မှု = သုက်သွေး ယိုထွက်မှုမရှိပေ။ လူတို့ကဲ့သို့ မေထုန်မှု (ဖိုမဆက်ဆံမှု) ပြုကြသည်။ ပဋိသန္ဓေတည်မှု သားသမီး မွေးဖွားမှုမရှိ။ ယင်းနတ်တို့၏ ဖိုမဆက်ဆံမှုသည် ထိုခဏ၌ (တစ်ခဏချင်း) ဖြစ်ပေါ်လာသော ကိလေသာကို ငြိမ်းအေးစေနိုင်သော အတွေ့ချမ်းသာမျှသာဖြစ်၏။

“စာတုမဟာရာဇ်နှင့် တာဝတိံသာနတ်တို့သည် လူတို့ကဲ့သို့ ဖိုမဆက်ဆံမှုပြုမှ ကာမကိစ္စပြည့်ဝသည်။ ယာမာနတ်တို့သည် အချင်းချင်း ပွေ့ဖက်ရုံမျှဖြင့်, တုသိတာနတ်တို့သည် လက်ဆွဲရုံမျှဖြင့်, နိမ္မာနရတိနတ်တို့သည် ပြုံးရုံမျှဖြင့် ပရနိမ္မိတဝသဝတ္တီနတ်တို့သည် ကြည့်ရုံမျှဖြင့် ကာမကိစ္စပြီး–ပြည့်ဝ-ကြသည်” ဟု ကေစိဆရာတို့ ဆိုကြသည်။ သို့သော် လိုရင်းအဓိကဖြစ်သော ကာယဖြင့် မတွေ့ထိရဘဲ ဖောဋ္ဌဗ္ဗကာမကိစ္စ မပြီးစေနိုင်သောကြောင့် လည်းကောင်း နတ်ပြည် ၆-ထပ်၌ဖြစ်သော ကာမဂုဏ်တို့၏ တစ်ဆင့်ထက်တစ်ဆင့် သာလွန်မွန်မြတ်သောကြောင့် လည်းကောင်း ယင်း ကေစိဆရာတို့၏ ဝါဒကို မဟာအဋ္ဌကထာ၌ ပယ်ထားပြီး ဖြစ်သည်။