သူရဲကောင်းမှတ်တမ်းဝင်တံဆိပ်

သူရဲကောင်းမှတ်တမ်းဝင်တံဆိပ်
ဆုတံဆိပ်ပုံ
အမျိုးအစား	တပ်မတော် စွမ်းရည်သတ္တိဆိုင်ရာ ဂုဏ်ထူးဆောင်တံဆိပ်
ဆုချီးမြှင့်ရခြင်း	"... သူရဘွဲ့ဖြင့် ဂုဏ်ပြုချီးမြှင့်အပ်နှင်းထိုက်သည့် အရည်အချင်း ရာနှုန်းပြည့် မမီသော်လည်း ရန်သူနှင့်ရင်ဆိုင် တိုက်ခိုက်ရာ၌ ကြံ့ခိုင်သောစိတ်ဓာတ်၊ ပြောင်မြောက်သော သူရသတ္တိဖြင့် မိမိတာဝန်ကို ထမ်းဆောင်ခြင်း။"
ဖော်ပြချက်အကျဉ်း	အချင်း ၃.၂ cm ရှိ စက်ဝိုင်းပုံဖြစ်ပြီး အလယ်တွင် အချင်း ၂.၃ cm ရှိ စက်ဝိုင်းအတွင်း ဖောင်းကြွနေသည့် ၅ ထောင့်ကြယ်ရှိသည်။ အတွင်းနှင့် အပြင် စက်ဝိုင်း နှစ်ခုအကြားတွင် မြန်မာပန်းပုံခွေပုံဖော်ထားသည်။ တံဆိပ်၏ ကျောဘက်တွင် “ပြည်ထောင်စုသမ္မတမြန်မာနိုင်ငံတော်” စာတန်းကို အထက်၌ လည်းကောင်း၊ “သူရဲကောင်းမှတ်တမ်းဝင်တံဆိပ်” စာတန်းကို အောက်၌ လည်းကောင်း တံဆိပ်အဝိုင်းအလိုက် ဖောင်းကြွပြုလုပ်ထားသည်။ အလယ်တွင် ချီးမြှင့်သည့် ခုနှစ်သက္ကရာဇ်ကို ရေးထိုးထားပြီး တံဆိပ်ထိပ်တွင် ဖဲကြိုးတပ်ရန် ရွှေကွင်းကလေးတပ်ဆင်ထားသည်။
နိုင်ငံ	မြန်မာ
ဆုတံဆိပ်ပေးအပ်သူ	နိုင်ငံတော်သမ္မတ
အကျုံးဝင်သူများ	စာတွင်ရှု့
ဖဲကြိုး
ကျောဘက်
အခြေအနေ	ချီးမြှင့်ဆဲ
ဆားဗစ်တန်းဖဲကြိုးတိုပုံ
တပ်ဆင်ရန်အဆင့်သတ်မှတ်ချက်
နောက်ထပ် (ပိုမြင့်သော)	သီဟဗလတံဆိပ်
နောက်ထပ် (ပိုနိမ့်သော)	မြန်မာနိုင်ငံစစ်မှုထမ်းသင်္ဂဟတံဆိပ်
ဆက်နွယ်	သူရဘွဲ့

သူရဲကောင်းမှတ်တမ်းဝင်တံဆိပ်သည် မြန်မာ့တပ်မတော် စွမ်းရည်သတ္တိဆိုင်ရာ ဂုဏ်ထူးဆောင်တံဆိပ်တစ်ခုဖြစ်သည်။

ပြည့်စုံရမည့် အရည်အချင်းများ

သူရဘွဲ့ဖြင့် ဂုဏ်ပြုချီးမြှင့်အပ်နှင်းထိုက်သည့် အရည်အချင်း ရာနှုန်းပြည့် မမီသော်လည်း ရန်သူနှင့်ရင်ဆိုင် တိုက်ခိုက်ရာ၌ ကြံ့ခိုင်သောစိတ်ဓာတ်၊ ပြောင်မြောက်သော သူရသတ္တိဖြင့် မိမိတာဝန်ကို ထမ်းဆောင်ခြင်း။

ဆုတံဆိပ်ဆိုင်ရာ အချက်အလက်များ

သူရဲကောင်းမှတ်တမ်းဝင်တံဆိပ်၏ ပုံသဏ္ဌာန်၊ အရွယ်အစား၊ အတိုင်းအထွာ၊ ဖဲကြိုးအရောင်အသွေး၊ တံဆိပ်အမှတ်အသားများနှင့် ပတ်သက်၍ အဓိပ္ပာယ်ဖော်ဆောင်ချက်များဖြစ်သည်။

ပစ္စည်းအမျိုးအစားနှင့် အလေးချိန်

ဆုတံဆိပ်အား (၁၄ ပဲရည်) ရွှေ ၃ ကျပ်သားဖြင့် ပြုလုပ်ထားသည်။

ပုံသဏ္ဌာန်နှင့် အရွယ်အစား

• စက်ဝိုင်းပုံသဏ္ဌာန်ဖြစ်၍ အချင်း ၃.၂ စင်တီမီတာရှိသည်။
• တံဆိပ်၏ အလယ်တွင် အချင်း၂.၃ စင်တီမီတာရှိ စက်ဝိုင်းအတွင်း ရောင်ခြည်ဖြာထွက်နေဟန် ၅ ထောင့်ကြယ်ကို ဖောင်းကြွပြုလုပ်ထားသည်။
• အတွင်းစက်ဝိုင်းနှင့် အပြင်စက်ဝိုင်း၏ အကြားတွင် မြန်မာပန်းပုံခွေပုံဖော်ထားသည်။
• တံဆိပ်၏ ကျောဘက်တွင် “ပြည်ထောင်စုသမ္မတမြန်မာနိုင်ငံတော်” ဟူသော စာတန်းကို အထက်၌လည်းကောင်း၊ “သူရဲကောင်းမှတ်တမ်းဝင်တံဆိပ်” ဟူသောစာတန်းကို အောက်၌ လည်းကောင်း ထား၍ တံဆိပ်အဝိုင်းအလိုက် ဖောင်းကြွပြုလုပ်ထားသည်။ အလယ်လစ်လပ်သော နေရာတွင် ချီးမြှင့်အပ်နှင်းသည့် ခုနှစ်သက္ကရာဇ်ကို ရေးထိုးထားသည်။
• တံဆိပ်ထိပ်တွင် ဖဲကြိုးတပ်ဆင်ရန် ရွှေဖြင့်ပြုလုပ်ထားသော ကွင်းကလေး တပ်ဆင်ထားသည်။

ဖဲကြိုးအရွယ်အစားနှင့် အရောင်အသွေး

• ဖဲကြိုး၏ အရောင်မှာ ဟင်္သပဒါးအနီရောင်ဖြစ်၍ အကျယ်မှာ ၃.၈ စင်တီမီတာရှိသည်။
• ဖဲကြိုး၏ အလယ်တွင် ၀.၈ စင်တီမီတာအကျယ်ရှိ အစိမ်းရောင်အစင်းရှိ၍ ယင်းအစိမ်းရောင်၏ ဘေးတစ်ဖက်တစ်ချက်တွင် ၀.၅ စင်တီမီတာ အကျယ်ရှိ အဖြူရောင်အစင်း ၂ စင်းရှိသည်။

တံဆိပ်ပါ အမှတ်အသားများနှင့် ပတ်သက်၍ အဓိပ္ပာယ်ဖော်ဆောင်ချက်

• မြန်မာပန်းပုံခွေသည် မြန်မာ့ရိုးရာ ယဉ်ကျေးမှုအနုပညာကို ဖော်ဆောင်သည်။
• ကြယ်၏ ရောင်ခြည်ဖြာထွက်နေသည့် သဘောမှာ တံဆိပ်ချီးမြှင့်ခံရသူတို့ အစဉ်အမြဲ အရည်အသွေးတောက်ပြောင်မှုရှိသည့်အဓိပ္ပာယ်ကို ဖော်ဆောင်သည်။

ပုံတူတံဆိပ်ငယ်

• ဤတံဆိပ်နှင့်အတူ ချီးမြှင့်မည့် ပုံတူတံဆိပ်ငယ်ကို လက်ဝဲဘက်ရင်ဘက်တွင် တပ်ဆင်ရန်ဖြစ်သည်။

ဂုဏ်ပြုစာလွှာ

ဤတံဆိပ်နှင့်အတူ ရွှေရောင်ဖြင့်ရိုက်နှိပ်ထားသော ဂုဏ်ပြုစာလွှာတစ်စောင် ပါရှိသည်။

ချီးမြှင့်ခြင်းခံရသူများ

၂၀၂၅ ခုနှစ်

ချီးမြှင့်သည့်နှစ်	ရာထူး	အမည်	အဖွဲ့အစည်း	ချီးမြှင့်သူ
၂၀၂၅	ဗိုလ်ချုပ်	အောင်နေမျိုး	ကာကွယ်ရေးဝန်ကြီးဌာန	မင်းအောင်လှိုင်
	ဗိုလ်မှူးချုပ်	ထွန်းထွန်းဝင်း	ကာကွယ်ရေးဝန်ကြီးဌာန
	ဗိုလ်မှူးကြီး	ကျော်စံဦး	ကာကွယ်ရေးဝန်ကြီးဌာန
	ဗိုလ်မှူးကြီး	ဖြူဝင်း	ကာကွယ်ရေးဝန်ကြီးဌာန
	ဗိုလ်မှူးကြီး	နိုင်ဝင်	ကာကွယ်ရေးဝန်ကြီးဌာန
	ရဲမှူးချုပ်	မျိုးသူရနောင်	မြန်မာနိုင်ငံရဲတပ်ဖွဲ့
	ဒုတိယဗိုလ်မှူးကြီး	ရဲဝင်းထွန်း	ကာကွယ်ရေးဝန်ကြီးဌာန
	ဒုတိယဗိုလ်မှူးကြီး	ကောင်းမြတ်သူ	ကာကွယ်ရေးဝန်ကြီးဌာန
	ဗိုလ်ကြီး	ကျော်ကျော်ခန့်	ကာကွယ်ရေးဝန်ကြီးဌာန

နောက်ထပ်ကြည့်ရန်

• သုဓမ္မသင်္ဂဟ
• အောင်ဆန်းသူရိယဘွဲ့
• ဇေယျကျော်ထင်ဘွဲ့