ဇော်မြင့်မောင်

ဝီကီပီးဒီးယား မှ
အ​ညွှန်း​သို့ ခုန်ကူးရန် ရှာဖွေရန် ခုန်ကူးမည်
ဒေါက်တာ

ဦးဇော်မြင့်မောင်
Zaw Myint Maung.jpg
ဒုတိယ​မြောက် မန္တလေးတိုင်းဒေသကြီးအစိုးရအဖွဲ့ ဝန်ကြီးချုပ်
တာဝန်သက်တမ်း
၃၀ မတ် ၂၀၁၆ – ၁ ​ဖေ​ဖော်ဝါရီ ၂၀၂၁
ယခင်လူဦးရဲမြင့်
ဆက်ခံသူဦးမောင်ကို (ကောင်စီဥက္ကဋ္ဌ)
မန္တ​လေးတိုင်း​ဒေသကြီးလွှတ်​တော်ကိုယ်စားလှယ်
တာဝန်သက်တမ်း
၈ ဖေဖော်ဝါရီ ၂၀၁၆ – ၃၁ ဇန်နဝါရီ ၂၀၂၁
မဲဆန္ဒနယ်အမရပူရမြို့နယ် မဲဆန္ဒနယ် ၁
ပြည်သူ့လွှတ်တော် ကိုယ်စားလှယ်
တာဝန်သက်တမ်း
၂ မေ ၂၀၁၂ – ၂၉ ဇန်နဝါရီ ၂၀၁၆
ယခင်လူဦးလှထွန်း
ဆက်ခံသူဦးရွှေကို
မဲဆန္ဒနယ်ကျောက်ပန်းတောင်းမြို့နယ်
ပြည်သူ့လွှတ်တော် ရွေးကောက်ခံ ကိုယ်စားလှယ်
ယခင်လူအခြေခံဥပဒေ စတင်
ဆက်ခံသူအခြေခံဥပဒေ ဖျက်သိမ်း
မဲဆန္ဒနယ်အမရပူရမြို့နယ် မဲဆန္ဒနယ် ၁
အနိုင်ရမဲ အရေအတွက်၂၁,၁၁၉ (၆၆%)
ကိုယ်ရေး အချက်အလက်များ
မွေးဖွား (၁၉၅၁-၁၂-၁၁) ဒီဇင်ဘာ ၁၁၊ ၁၉၅၁ (အသက် ၆၉)
အမရပူရမြန်မာနိုင်ငံ
လူမျိုးမြန်မာ
နိုင်ငံရေးပါတီအမျိုးသားဒီမိုကရေစီအဖွဲ့ချုပ်
ကြင်ဖော်(များ)​ဒေါက်တာ ​ဒေါ်ယုယု​မေ
သွေးသားတော်စပ်သူဦးချစ်မောင် (ဖခင်)
မိခင်ကျောင်းမန္တလေးဆေးတက္ကသိုလ်
အလုပ်အကိုင်မန္တလေးတိုင်းဒေသကြီး ဝန်ကြီးချုပ်၊ နိုင်ငံရေးသမား၊ ဆရာဝန်

ဦးဇော်မြင့်မောင် သည် မြန်မာနိုင်ငံသား နိုင်ငံရေးသမားနှင့် နိုင်ငံရေးအကျဉ်းသားဟောင်း တစ်ဦး ဖြစ်သည်။ မန္တလေးတိုင်းဒေသကြီး လွှတ်တော်တွင် အမရပူရမြို့နယ်မှ လွှတ်တော် ကိုယ်စားလှယ်အဖြစ် ရွေးကောက်ခံထားရပြီးနောက် မန္တလေးတိုင်းဒေသကြီး ဝန်ကြီးချုပ်အဖြစ် ခန့်အပ်တာဝန်ပေးအပ်ခြင်း ခံရသည်။[၁] ၁၉၉၀ အထွေထွေ ရွေးကောက်ပွဲတွင် မဲအရေအတွက် ၂၁,၁၁၉ (၆၆%) ဖြင့် ပြည်သူ့လွှတ်တော် ကိုယ်စားလှယ်အဖြစ် ရွေးကောက်ခံခဲ့ရသည်။[၂]

ငယ်စဉ်ဘဝ[ပြင်ဆင်ရန်]

၁၉၅၁ ခုနှစ် ဒီဇင်ဘာလ ၁၁ ရက်နေ့တွင် မန္တလေးတိုင်း၊ အမရပူရမြို့နယ်တွင် မွေးဖွားခဲ့သည်။ ၁၉၇၉ ခုနှစ်တွင် မန္တလေးဆေးတက္ကသိုလ်မှ ဆရာဝန်ဘွဲ့ ရရှိခဲ့သည်။[၂] ယင်းနောက် စစ်ကိုင်းတိုင်းရှိ ရွာသစ်ကြီးဆေးရုံတွင် အလုပ်လုပ်ကိုင်ခဲ့သလို ၁၉၈၃ ခုနှစ်မှ ၁၉၈၈ ခုနှစ်အထိ မန္တလေးတက္ကသိုလ်တွင် ဓာတုဗေဒသရုပ်ပြ အဖြစ် လုပ်ကိုင်ခဲ့သည်။[၂]

နိုင်ငံရေး[ပြင်ဆင်ရန်]

ပါတီစုံ ဒီမိုကရေစီ အထွေထွေ ရွေးကောက်ပွဲ၊ ၁၉၉၀ တွင် အမရပူရမြို့နယ်မှ အမျိုးသား ဒီမိုကရေစီ အဖွဲ့ချုပ် ကိုယ်စားပြု အမတ်အဖြစ်ရွေးကောက်တင်မြှောက်ခြင်း ခံရသည်။ သို့သော်နိုင်ငံရေးအခြေအေနများကြောင့် ၁၉၉၀ ခုနှစ် နိုဝင်ဘာလ ၂၂ ရက်နေ့တွင် ဖမ်းဆီးခံခဲ့ရပြီး ပြစ်မှုဆိုင်ရာ ဥပဒေပုဒ်မ ၁၂၂ ဖြင့် ထောင်ဒဏ် ၂၅ နှစ် ချမှတ်ခံခဲ့ရသည်။[၂] ရန်ကုန်တက္ကသိုလ် ၇၅ နှစ်မြောက် နှစ်ပတ်လည်တွင် မဂ္ဂဇင်းထုတ်ဝေခဲ့မှုကြောင့် ၁၉၉၆ ခုနှစ် မတ်လတွင် ၁၉၅၀ အရေးပေါ်အက်ဥပဒေဖြင့် နောက်ထပ် ၇ နှစ် ထပ်မံချမှတ်ခံခဲ့ရသည်။[၂] မြစ်ကြီးနား အကျဉ်းထောင်တွင် စုစုပေါင်း ၁၉ နှစ် ထောင်ဒဏ်ကျခံခဲ့ရပြီး[၃] ၂၀၀၉ ခုနှစ် ဖေဖော်ဝါရီ ၂၁ ရက်နေ့တွင် လွတ်မြောက်လာခဲ့သည်။[၃]

ထို့နောက် ကြားဖြတ် ရွေးကောက်ပွဲ၊ ၂၀၁၂တွင် ကျောက်ပန်းတောင်မြို့နယ် ကိုယ်စားပြု၍ ပြည်သူ့လွှတ်တော်ကိုယ်စားလှယ်အဖြစ် ရွေးကောက်တင်မြှောက်ခြင်း ခံခဲ့ရသည်။ အထွေထွေ ရွေးကောက်ပွဲ၊ ၂၀၁၅တွင် မန္တလေးတိုင်းဒေသကြီး လွှတ်တော်အတွက် အမရပူရမြို့နယ် ကိုယ်စားပြုရွေးကောက်တင်မြှောက်ခြင်း ခံခဲ့ရကာ ထိုမှတဆင့် မန္တလေးတိုင်းဒေသကြီးအစိုးရအဖွဲ့ ဝန်ကြီးချုပ် ဖြစ်လာခဲ့သည်။

၂၀၂၁ခုနှစ် အာဏာသိမ်းခံရသည့်နေ့တွင် မိသားစုနှင့်အတူ ဖမ်းဆီးထိန်းသိမ်းခြင်း ခံခဲ့ရပြီး အောင်မြေသာစံမြို့နယ်တရားရုံးတွင် ပုဒ်မ ၅၀၅(ခ)ဖြင့် အမှုဖွင့်အရေးယူခြင်းခံနေရသည်။ ဖေဖော်ဝါရီလ ၂၄ရက်နေ့တွင် မိသားစုဝင်များကို နေအိမ်အကျယ်ချုပ်မှ လွှတ်ပေးကာ ဒေါက်တာဇော်မြင့်မောင်နှင့် တိုင်းအစိုးရအဖွဲ့ဝင်များအား အိုးဘိုအကျဉ်းထောင်သို့ပို့ဆောင်ခဲ့သည်။[၄]

ကျန်းမာ​ရေး[ပြင်ဆင်ရန်]

ဒေါက်တာဇော်မြင့်မောင်သည် တိုင်းဒေသကြီးဝန်ကြီးချုပ် တာဝန်ယူနေစဉ်အတွင်း ၂၀၁၉ခုနှစ် အောက်တိုဘာလမှ ဒီဇင်ဘာလအထိ သွေးကင်ဆာရောဂါ ခံစားခဲ့ရသဖြင့် ထိုင်းနိုင်ငံ၊ ဘန်ကောက်မြို့သို့ သွားရောက် ကုသမှုခံယူခဲ့သည်။ မန္တလေးမြို့သို့ ပြန်ရောက်လာချိန်တွင် ၂၀၁၉ခုနှစ် ဒီဇင်ဘာ ၃၁ရက်နေ့၌ ကျင်းပသည့် နှစ်သစ်ကူးပွဲတော်တွင် အအေးမိပြီး နာမကျန်းဖြစ်ရာမှ ဘန်ကောက်မြို့သို့ ပြန်လည်သွားရောက်ခဲ့ရသည်။[၅] ထိုစဉ်အတောအတွင်းက ၎င်း၏နေရာကို တိုင်းဒေသကြီးဝန်ကြီး ဦးဇာနည်အောင်က ခေတ္တ တာဝန်ယူထားခဲ့သည်။[၆]

၂၀၂၁ အာဏာသိမ်းမှုပြီးနောက် အိုးဘိုအကျဉ်းထောင်အတွင်း နေထိုင်နေရစဉ် ၂၀၂၁ခုနှစ် ဩဂုတ်လ ၆ရက်နေ့တွင် ကိုဗစ် ၁၉ရောဂါ ကူးစက်ခံခဲ့ရပြီး မန္တလေးဆေးရုံကြီးသို့ ပို့ဆောင်ကာ ကုသခဲ့ရသည်။ဩဂုတ်လ ၂၇ရက်နေ့တွင် ပြန်လည်သက်သာလာသဖြင့် အိုဘိုးထောင်သို့ ပြန်လည်ပို့ဆောင်ခံခဲ့ရသည်။[၇]

အိမ်ထောင်ရေး[ပြင်ဆင်ရန်]

ဇနီးဖြစ်သူ ဒေါက်တာ ဒေါ်ယုယုမေနှင့် အိမ်ထောင်ကျကာ သမီး (၁) ဦးရှိသည်။

ကိုးကား[ပြင်ဆင်ရန်]

  1. "Names of Pyithu Hluttaw representatives announced"၊ ပြည်ထောင်စု ရွေးကောက်ပွဲ ကော်မရှင်၊ Government of Myanmar၊ 2 April 2012။ 5 October 2012 တွင် ပြန်စစ်ပြီး 
  2. ၂.၀ ၂.၁ ၂.၂ ၂.၃ ၂.၄ Khin Kyaw Han (1 February 2003)။ Brief Biographies of Elected MPs1990 Multi-party Democracy General Elections။ 5 October 2012 တွင် ပြန်စစ်ပြီး။
  3. ၃.၀ ၃.၁ released Political Prisoners from 2007 to dateAssistance Association for Political Prisoners (Burma) (2008)။ 5 October 2012 တွင် ပြန်စစ်ပြီး။
  4. "ဖမ်းဆီးထိန်းသိမ်းခံထားရသည့် မန္တလေးတိုင်းဝန်ကြီးချုပ်နှင့် တိုင်းအစိုးရအဖွဲ့ဝန်ကြီးများ၏ မိသားစုဝင်များကို နေအိမ်အကျယ်ချုပ်မှ ပြန်လွှတ်"။ 
  5. "နှစ်သစ်ကူးပွဲမှာ လူထုရှေ့ပြန်ပေါ်လာသည့် မန္တလေးတိုင်း ဝန်ကြီးချုပ်"။ 
  6. "ထိုင်းတွင် ဆေးကုနေသော မန္တလေးဝန်ကြီးချုပ် ကျန်းမာရေး မစိုးရိမ်ရ ဟုဆို"။ 
  7. "ကျန်းမာရေး ပြန်ကောင်းလာလို့ ဒေါက်တာဇော်မြင့်မောင်ကို အိုးဘိုထောင် ပြန်ပို့"။