ထီးစောင့်နတ်များ

ထိုထီးတို့မှာ နန်းတွင်း၌ အမျိုးမျိုးဖြစ်၍ ထီးကို စောင့်သောနတ်များနှင့်ထီးလုပ်ပုံ လုပ်နည်း၊ မည်သို့သုံးစွဲသည်တို့ကို ရွှေဘိုနိဒါန်း၌ ဖော်ပြထားသည်မှာ *ကနကဒဏ်ထီးကို သမ္မာဒေဝနတ်သမီးစောင့်သည်။

• သမုဒ္ဒရာဇ်ထီးကို သမုဒ္ဒရာဇ်နတ်သမီး စောင့်၏။
• စန္ဒထီးကို စန္ဒနတ်သမီး စောင့်၏။
• ပဒုမထီးကို ပဒုမာနတ်သမီးစောင့်၏။
• သမုက္ခထီးကို သမုက္ခနတ်သမီးစောင့်၏။
• ဝိသုကြုံထီးကို ဝိသုကမ္မနတ်သမီးစောင့်၏။
• ကမ္ဗုထီးကို ကမ္ဗုနတ်သမီး စောင့်၏။
• ဥရူထီးကို ဥရူနတ်သမီးစောင့်၏။
• သမ္မုတိထီးကို သမ္မုတိနတ်သမီး စောင့်၏။

ထိုထီးများ၏အရပ်အဝအတွင်း ရွှေခြူးညောင်ရွက်၊ ကြယ်၊ ပုလဲဆိုင်း၊ သန္တာဆိုင်း၊ စိန်ဆိုင်း၊ မြဆိုင်း၊ ပတ္တမြားဆိုင်းမှစ၍ ရွှေချိန်ကျောက်ဝင် လုပ်ရိုးဆောင်ရိုးအထားအနေများမှာ စာစောင်များတွင် အင်းစောက်နှင့် ဇာလျားပြကာ ရှိပြီဖြစ်၍ အထူးမဆိုပြီ။ တေမိဇာတ်တော်ကို ထောက်သဖြင့် ထီးကို နတ်သမီးစောင့်ကြောင်းကို သိရသည်။