ဘသန်း (စောင်း)

ဝီကီပီးဒီးယား မှ
(စောင်းဦးဘသန်း မှ ပြန်ညွှန်းထားသည်)
Jump to navigation Jump to search
အလင်္ကာကျော်စွာ
စောင်းဦးဘသန်း
အလင်္ကာကျော်စွာ စောင်းဦးဘသန်း
မွေးဖွားမြန်မာသက္ကရာဇ် ၁၂၇၀ပြည့်နှစ်၊တန်​ဆောင်မုန်းလပြည့်​ကျော် ၁၃ရက်၊ ခရစ်နှစ် ၁၉၀၈/၁၉၀၉
အုတ်ဖိုမြို့နယ်သာယာဝတီခရိုင်ဗြိတိသျှဘားမား
ကွယ်လွန်၆၊ ဇွန်၊ ၁၉၈၇
အလုပ်အကိုင်ဂီတပညာရှင်၊ ​တေး​ရေးဆရာ
မိဘ(များ)ဦးငယ် + ​ဒေါ်ဖွားမှီ
ရရှိသည့်ဆုများအလင်္ကာကျော်စွာဘွဲ့

စောင်းဦးဘသန်းသည် အလင်္ကာကျော်စွာဘွဲ့ရ မြန်မာဂီတပညာရှင်တစ်ဦး ဖြစ်သည်။

စောင်းဦးဘသန်း[ပြင်ဆင်ရန်]

စောင်းဦးဘသန်းအား ၁၂၇၀ ပြည့်နှစ်၊ တန်ဆောင်မုန်းလပြည့်ကျော်(၁၃)ရက်၊ သာယာ၀တီခရိုင်၊ အုတ်ဖိုမြို့နယ် မိုးညိုတန်းတွင် အဘ မင်းလှမြို့နယ်ပိုင် ရုံးစာရေးဦးငယ်၊ အမိ ဒေါ်ဖွားမှီတို့မှ မွေးဖွားခဲ့သည်။ မွေးချင်း(၅)ယောက်အနက် ဒုတိယ မြောက်သားဖြစ်သည်။ဖခင်က ဂီတဝါသနာ ပါသည့် အလျောက် အုပ်ဖိုမြို့မှဆိုင်းဆရာ ဦးဖိုးချစ်၊ ဦးဖိုးကြံတို့ထံတွင် ပတ္တလား မှ စ၍ ဆိုင်းဝိုင်းပညာသင်ယူခဲ့ရသည်။ လက်ထောက်ပတ်တီးဘဝ ငယ်ရွယ်စဉ်ကပင် ပေါင်းတည်မြို့မှ ဆရာရှင်း ထံမှ စောင်းပညာ ကို ဖခင်ဖြစ်သူ၏ အစီအမံဖြင့် သင်ယူခဲ့ရသည်။ဦးဘသန်း၏ဂီတ ဆရာများမှာ ဆရာရှင်း၊စာသင်ဦးဘအုန်း၊ စောင်းဦး အောင်လှ၊ ဆရာဦးကြည်တို့ဖြစ်သည်။ အဆိုပညာ ကို ကြည့်မြင်တိုင် ဆရာဦးဖိုးလှကြီးနှင့် ဆရာမြစ်ကြီးတို့ထံမှ လည်းကောင်း၊ သင်္ကေတရေးနည်းကို စန္ဒရား ဆရာဒီဇူဇာ နှင့် ကရင်မ ဆရာမကြီး မစ္စက်စိန်ဌေးတို့ထံမှ လည်းကောင်း သင်ယူခဲ့လေသည်။ ဦးဘသန်းသည် ဂီတ၊ အငြိမ့်နှင့် ဇတ်သဘင်လောကများတွင် ကျင်လည်ခဲ့ရာမှ စစ်ကြိုခေတ်ပန်းချီနှင့် တူရိယာ ကျောင်း တွင် တူရိယာ သင်တန်းနည်းပြ ဆရာ အဖြစ်ခန့်အပ်ခြင်းခံရသည်။ လွတ်လပ်ရေးရပြီးနောက် ကိုယ်ပိုင်တူရိယာ ကျောင်း၊ ကိုယ်ပိုင်စန္ဒရား၊ အငြိမ့်များတည်ထောင်ခဲ့ပြီးဆရာအတတ်သင်သိပ္ပံ ဂီတကထိက၊ ၎င်းမှ ယဉ်ကျေးမှူဌာန အထက်တန်းအရာရှိ အဖြစ် လုပ်ကိုင်ဆောင်ရွက်ခဲ့ပေသည်။ ယဉ်ကျေးဝန်ကြီးဌာနတွင် တာဝန်ပေးချက်အရ ရွှေပြည်ဦးဘတင်၊ ဆရာဘကလေး၊ ဦးချစ်မောင်၊ဦးဟန်ပဒေါ်စောမြဧကြည်၊ ဒေါ်ဒေလီညွန့်၊ ဦးဝန်(မင်းသုဝဏ်)၊ ဦးသိန်းဟန်(ဇော်ဂျီ)၊ဒေါ်တင်အုန်း၊ မန္တလေးဦးကျော် ၊သံလျင်ဦးမြဦးတို့နှင့် အတူ မဟာဂီတသင်ရိုး သီချင်းကြီးများ ကို ပန်တျာ မူမှန် ပြုစုခဲ့သည်။ အခြေခံကြိုးသီချင်း (၁၃)ပုဒ်ကို ထုတ်ဝေခဲ့သည်။ အနုပညာ ဖလှယ်ရေးအစီအစဉ်အရ ၁၉၅၂ ခုနှစ်တွင် တရုတ်ပြည်သူ့ “သမ္မတနိုင်ငံသို့ လည်းကောင်း၊၁၉၅၄ ခုနှစ်တွင် ယိုးဒယား နိုင်ငံသို့လည်းကောင်း၊ ၁၉၅၅-ခုနှစ်တွင် ဒုတိယအကြိမ် တရုတ်ပြည်သူ့ သမ္မတနိုင်ငံသို့လည်းကောင်း ၁၉၅၆ ခုနှစ်တွင် အိန္ဒိယ၊ ဆိုဗီယက်၊ ယူဂိုဆလပ်၊ ဂျာမဏီ၊ ချက်ကိုဆလိုဗက်ကီးယားနှင့် ပိုလန်နိုင်ငံများသို့ သွားရောက်ခဲ့ပါသည်။ ၁၉၈၇ ခုနှစ် ဇွန်လ (၆) ရက်နေ့၊ အသက်(၈၀) အရွယ်တွင် ကွယ်လွန်သည်။[၁]

ကိုးကား[ပြင်ဆင်ရန်]

  1. မြန်မာတူရိယာ ဂီတပညာ ကျော်များ (ပန်တျာ မြင့်အောင်)စာပေဗိမာန်စာအုပ်တိုက် ၁၆-၇-၆၂