သိမ်းဝေ

သီရိပျံချီ၊ ဦး သိမ်းဝေ
မွေးဖွား	၁၉၅၃&#၁၆၀;(၁၉၅၃) (အသက် ၇၃)
နိုင်ငံလူမျိုး	ဗမာ-တရုတ်
အခြား အမည်များ	Serge Pun
အလုပ်အကိုင်	ရိုးမဘဏ် တည်ထောင်သူနှင့် ဥက္ကဋ္ဌ

ဦးသိမ်းဝေ (ခ) Serge Pun သည် တရုတ်နွယ်ဖွား စီးပွားရေးလုပ်ငန်းရှင် တစ်ဦး ဖြစ်သည်။ သူသည် မြန်မာနိုင်ငံအခြေစိုက် ရိုးမဘဏ် အား ဦးဆောင်ခဲ့ပြီး ပညာရေး၊ ကျန်းမာရေး၊ အိမ်ရာများ နှင့် စတော့အိတ်ချိန်းလုပ်ငန်းများ ပါဝင်သည့် Serge Pun & Associates Group ကို တည်ထောင်ခဲ့သူလည်း ဖြစ်သည်။

ငယ်ဘဝ

ဦးသိမ်းဝေကို ရန်ကုန်တွင် မွေးဖွားခဲ့သည်။ ဗမာ-တရုတ်နွယ်ဖွားဖြစ်သည်။ စိန်ပေါလ်ကျောင်းဟု အများခေါ်သည့် အ.ထ.က(၆) ဗိုလ်တထောင် ကျောင်းတွင် တက်ရောက် ပညာသင်ကြားသည်။

၁၉၆၂ ခုနှစ် ဦးနေဝင်း အာဏာသိမ်းပြီးနောက် နိုင်ငံခြားသားပိုင် နေအိမ်များနှင့် စီးပွားရေးလုပ်ငန်းများကို ပြည်သူပိုင်သိမ်းလိုက်သည့်အတွက် ၁၉၆၅ ခုနှစ်တွင် တရုတ်နိုင်ငံ ဘေဂျင်းမြို့ သို့ ၎င်းတို့မိသားစု ပြောင်းရွှေ့နေထိုင်ခဲ့သည်။ အသက် ၁၂ နှစ်အရွယ်တွင် တရုတ်နိုင်ငံ ယူနန်ပြည်အစွန်အဖျားရှိ “အစောင့်နီ” အလုပ်စခန်းသို့ ပို့လွှတ်ခြင်းခံခဲ့ရသည်။

၁၉၇၃ ခုနှစ်တွင် ဟောင်ကောင် သို့ ထပ်မံ ပြောင်းရွှေ့ကာ လှေငယ်ကလေးတစ်စင်းဖြင့် သင်္ဘောများသို့ စားသောက်ဖွယ်ရာများပို့ဆောင်ပေးသည့် အလုပ်လုပ်ခဲ့သည်။ ယင်းနောက် ဟောင်ကောင် အိမ်ခြံမြေတွင် အသက်မွေးဝမ်းကြောင်းပြုခဲ့သည်။

စီးပွားရေးလုပ်ငန်းများလုပ်ကိုင်ခြင်း

ဦးသိမ်းဝေသည် ၁၉၉၁ ခုနှစ်တွင် မြန်မာနိုင်ငံသို့ ပြန်လာခဲ့ပြီး မော်တော်ကားထုတ်လုပ်ရေး၊ ငွေကြေးဝန်ဆောင်မှုများ၊ အိမ်ခြံမြေဖွံ့ဖြိုးတိုးတက်မှု၊ နည်းပညာ၊ ဆောက်လုပ်ရေးနှင့် ကျန်းမာရေးစောင့်ရှောက်မှု အပါအဝင် ကဏ္ဍများစွာကို လွှမ်းခြုံထားသည့် Serge Pun & Associates ကို တည်ထောင်လုပ်ဆောင်သည်။

၎င်းသည် အများပိုင်ကုမ္ပဏီဖြစ်သော First Myanmar Investment Co Ltd (FMI)ကုမ္ပဏီကို ၁၉၉၂ ခုနှစ်တွင်တည်ထောင်သည်။ ၁၉၉၃ ခုနှစ်တွင် ဦးသိမ်းဝေသည် ဘဏ်လုပ်ငန်းလိုင်စင်ရရှိခဲ့ပြီးနောက် မြန်မာနိုင်ငံ၏ ဒုတိယမြောက်ပုဂ္ဂလိကဘဏ်ဖြစ်သော ရိုးမဘဏ်ကို ဖွင့်လှစ်ခဲ့သည်။ နိုင်ငံတော်အေးချမ်းသာယာရေးနှင့်ဖွံ့ဖြိုးရေးကောင်စီနှင့် နီးကပ်သည့် ဆက်ဆံရေးရှိခဲ့သည်။

၂၀၁၀ ပြည့်နှစ် နောက်ပိုင်းတွင် ရန်ကုန်မြို့ ဆူးလေဘုရားလမ်းနှင့် ဗိုလ်ချုပ်အောင်ဆန်းလမ်းထောင့်တွင် တည်ရှိသည့် ၁၀ ဧက ကျယ်ဝန်းသော Yoma Central စီမံကိန်းကို ဆောင်ရွက်သည်။ယင်းစီမံကိန်းသည် ရိုးမအုပ်စု နှင့် ဂျပန် မစ်ဆူဘီရှိကော်ပိုရေးရှင်းတို့ ဖက်စပ်လုပ်ကိုင်ကာ ဒေါ်လာသန်း ၈,၀၀ တန်သည်။ အာရှဖွံ့ဖြိုးရေးဘဏ်နှင့် ကမ္ဘာ့ဘဏ်လက်အောက်ရှိ အပြည်ပြည်ဆိုင်ရာ ဘဏ္ဍာရေးကော်ပိုရေးရှင်း (IFC) တို့ ကလည်း အဆိုပါစီမံကိန်းတွင် ၁၀ ရာခိုင်နှုန်း ရင်းနှီးမြှုပ်နှံထားသည်။

ယင်းအပြင် ဦးသိမ်းဝေသည် ဝေဖန်မှုမျိုးစုံရှိခဲ့သည့် တရုတ်က ဘီလီယံနှင့် ချီ ရင်းနှီးမြှုပ်နှံတည်ဆောက်မည့် ရန်ကုန်မြို့သစ်စီမံကိန်း၏ ရန်ကုန်မြို့သစ် ဖွံ့ဖြိုးတိုးတက်ရေး ကုမ္ပဏီလီမိတက် (NYDC) တွင်လည်း ဒါရိုက်တာ အဖြစ် တာဝန်ထမ်းဆောင်ခြင်းလည်း ရှိခဲ့သည်။

၂၀၂၁ ဖေဖော်ဝါရီနောက်ပိုင်းဖြစ်ရပ်များ

ဦးသိမ်းဝေသည် ၂၀၂၁ ခုနှစ်၊ဖေဖော်ဝါရီ ၄ ရက် တွင် ပြုလုပ်သည့် စစ်အာဏာသိမ်းအကြီးအကဲ စစ်ကောင်စီဥက္ကဋ္ဌ နှင့် ဘဏ္ဍာရေးလုပ်ငန်းရှင်များ တွေ့ဆုံပွဲသို့ တက်ရောက်ခဲ့သူများထဲမှ တစ်ဦး ဖြစ်သည်။

ထို့နောက်ပိုင်းတွင် သူဦးဆောင်သည့် ရိုးမဘဏ်သည် စစ်တပ်ပိုင် မိုဘိုင်းအော်ပရေတာ မိုင်တဲလ် အတွက် တာဝါတိုင်များ တည်ဆောက်ရန် ချေးငွေ ထုတ်ပေးခြင်း အစရှိသည့် ကိစ္စများဖြင့် မြန်မာစစ်တပ်နှင့် စီးပွားရေးဆိုင်ရာ ဆက်နွယ်မှုရှိကြောင်း ထုတ်ဖော်ခံရသည်။ ယင်းအပြင် စစ်ကောင်စီနှင့် နီးကပ်ဆက်ဆံရေးရှိသူအဖြစ် နိုင်ငံတကာအဖွဲ့အစည်းအချို့မှ ဖော်ညွှန်းဝေဖန်ကြသည်။

ဤသို့ဖြင့် နောက်ဆက်တွဲသက်ရောက်မှုအနေဖြင့် ကမ္ဘာ့ဘဏ်၏ အပြည်ပြည်ဆိုင်ရာဘဏ္ဍာရေးကော်ပိုရေးရှင်း (IFC) သည် ၎င်းဦးဆောင်သော ရိုးမဘဏ် တွင် ရင်းနှီးမြှုပ်နှံထားသည့် အမေရိကန်ဒေါ်လာ ၅ သန်းနှင့် ညီမျှသော ရှယ်ယာ ၄ ဒသမ ၅ ရာခိုင်နှုန်းအား ရုပ်သိမ်းခဲ့သည်။ သူသည် လူထုပိုက်ဆံဖြင့် စစ်ကောင်စီ၏ ဘဏ္ဍာတိုက်ကို ဖြည့်စည်းပေးသည့် ပုဂ္ဂလိကဘဏ်သူဌေးကြီးများထဲ ပါဝင်သူဟု Myanmar Now က ဖော်ပြခဲ့သည်။ ၎င်းပိုင် ရိုးမဘဏ်က စစ်ကောင်စီ၏ ငွေတိုက်စာချုပ်ရောင်းချပွဲ၌ ကျပ်သန်းပေါင်း ၁၀,၀၀၀ ကျော်အထိ လေလံဝင်ဆွဲခဲ့၍ဖြစ်သည်။

၂၀၂၃ ခုနှစ် ဇူလိုင်လအတွင်း၊ ပြည်သူ့ကာကွယ်ရေးတပ်များ၏ ပြည်တွင်းခုခံစစ်ပွဲ နှင့်ပတ်သက်၍ နေပြည်တော် သို့ တက်မသိမ်းနိုင်လျှင် ရပြီ ဟု ပြောကြားထားသည့် ၎င်း၏ ရုပ်သံဖိုင်အတို တစ်ခု ဆိုရှယ်မီဒီယာ၌ ပြန့်နှံ့ခဲ့သည်။ယင်းနှင့်စပ်လျဥ်းပြီး သူသည် အပြင်းအထန် ဝေဖန်ခြင်းကိုခံခဲ့ရသည်။

ဖမ်းဆီးထိန်းသိမ်းခံရခြင်း

၂၀၂၄ ခုနှစ် မေလ တတိယပတ်တွင် ရိုးမဘဏ်လုပ်ငန်းများ၏ အကြီးအကဲ ဦးသိမ်းဝေ သည် နေပြည်တော်တွင် ခေါ်ယူ စစ်မေးခံနေရပြီး ၊ ၎င်းသည် ပြင်ပကမ္ဘာနှင့် လွတ်လပ်စွာ ဆက်သွယ်ခွင့်မရကြောင်း၊ မြန်မာနိုင်ငံမှလည်း ယခုအခြေအနေတွင် ထွက်ခွာခွင့်မရှိကြောင်း ကုမ္ပဏီဘက်က သတင်းများ ထုတ်ပြန်ခဲ့သည်။

ထိုသို့ ထုတ်ပြန်ပြီးသည့်နောက် ၂၀၂၄ ခုနှစ် ဇူလိုင်လ ၁၀ ရက် တွင် စင်ကာပူနိုင်ငံရှိ ရိုးမလုပ်ငန်းစု (Yoma Strategic Holdings) ၏ အစုရှယ်ယာများသည် ၂၀ ရာခိုင်နှုန်းကျော်အထိ ကျဆင်းသွားခဲ့ပြီး ယင်းကျဆင်းမှုနှုန်းသည် ၃ နှစ်အတွင်း အများဆုံးကျဆင်းမှုဖြစ်ကြောင်း စင်ကာပူအခြေစိုက် The Straits Times က ဖော်ပြခဲ့သည်။

၂၀၂၄ ခုနှစ် ဇူလိုင် ၂၄ ရက် တွင် နေပြည်တော်တွင် ဖမ်းဆီးချုပ်နှောင်ခံထားရသည့် သူဌေးကြီး Serge Pun ခေါ် ဦးသိမ်းဝေ သည် မသေချာမရေရာသော အခြေအနေများဖြစ်ပေါ်နေ၍ ၎င်းရှယ်ယာအများစုပိုင်ဆိုင်သည့် စင်ကာပူစတော့အိတ်ချိန်းစာရင်းဝင် Yoma Strategic Holdings လုပ်ငန်းစုအပါအဝင် အခြားသောကုမ္ပဏီ၏ လုပ်ငန်းခွဲများအားလုံးတွင် ရာထူးများမှ နုတ်ထွက်ခဲ့သည်။

၂၀၂၄ ခုနှစ် ဇူလိုင်နှောင်းပိုင်း တွင် ငွေကြေးခဝါချမှုနှင့် အခြားတရားမဝင်ငွေလွှဲပြောင်းမှုများဖြင့် တရားစွဲဆို ခံခဲ့ရပြီး၊၂၀၂၅ ခုနှစ် ဧပြီ ၄ ရက် တွင် ထောင်ဒဏ် ၁၃ နှစ် ချမှတ်ခံခဲ့ရသည်။

မိသားစုဘဝ

ဦးသိမ်းဝေသည် အိမ်ထောင်သည်တစ်ဦးဖြစ်ပြီး သား ၄ ဦးရှိသည်။

ရရှိခဲ့သောဆုများ

၁၉၉၉ ခုနှစ်တွင် တောင်ကယ်ရိုလိုင်းနားတက္ကသိုလ်က ဆာ့ခ်ျဖန်ကိုစီးပွားရေးစီမံခန့်ခွဲမှုဆိုင်ရာဂုဏ်ထူးဆောင်ဒေါက်တာဘွဲ့ (Doctorate of Philosophy in Business Administration) ချီးမြှင့်ခဲ့သည်။ ၂၀၁၃ ခုနှစ် ဩဂုတ်လထုတ် Forbes Asia က စင်္ကာပူ၏ အချမ်းသာဆုံး ၅၀ စာရင်းတွင် ၎င်းအား နံပါတ် ၃၈ နေရာတွင်ဖော်ပြခဲ့သည်။

၂၀၂၂ ခုနှစ် နိုဝင်ဘာ ၁၉ ရက်တွင် နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ မင်းအောင်လှိုင်က သီရိပျံချီဘွဲ့ ချီးမြှင့်ခဲ့သည်။