အ.ထ.က(၁)လသာ

	ရွေးချယ်သတ်မှတ်ခြင်းများ
	ရန်ကုန်မြို့ပြ အမွေအနှစ်

အ.ထ.က (၁) လသာ
အ.ထ.က (၁) လသာ
	အမှတ်(၁) အခြေခံပညာအထက်တန်းကျောင်း ၊ လသာမြို့နယ်
လိပ်စာ
	အမှတ်(၂၇၀) ၊ ဗိုလ်ချုပ်အောင်ဆန်းလမ်းနှင့် ရွှေတိဂုံဘုရားလမ်းထောင့် ၊ လသာမြို့နယ် ၊; ရန်ကုန်တိုင်းဒေသကြီး
သတင်းအချက်အလက်
အမျိုးအစား	အစိုးရအထက်တန်းကျောင်း
ဆောင်ပုဒ်	သီလ သမာဓိ ပညာ
တည်ထောင်	၁၈၇၁ ခုနှစ် ၊ မတ်လ ၃ ရက်
ကျောင်းအမှတ်	(၁)
ကျောင်းအုပ်ကြီး	ဦးမျိုးမင်းဦး(ယာယီ ကျောင်းအုပ်)
အတန်းများ	သူငယ်တန်း မှ ဒသမတန်း အထိ
ကျောင်းသား/သူဦးရေ	၂၀၀၀ ခန့်
	ရွေးချယ်သတ်မှတ်ခြင်းများ
	ရန်ကုန်မြို့ပြ အမွေအနှစ်

အမှတ်(၁)အခြေခံပညာအထက်တန်းကျောင်း၊ လသာမြို့နယ် သည် အမှတ်(၂၇၀)၊ ဗိုလ်ချုပ်အောင်ဆန်းလမ်းနှင့်ရွှေတိဂုံဘုရားလမ်းထောင့်၊ လသာမြို့နယ်၊ ရန်ကုန်တိုင်းဒေသကြီးတွင်တည်ရှိသော အစိုးရအထက်တန်းကျောင်းဖြစ်သည်။ ၁၈၇၁ခုနှစ်က အင်္ဂလိပ်အစိုးရတို့တည်ထောင်ပေးခဲ့သောအစိုးရကျောင်း(၆)ကျောင်းအနက် အထက်တန်းအဆင့်ပြည့်မှီသည့် တစ်ခုတည်းသောကျောင်းဖြစ်သည်။

ရန်ကုန်ဟိုက်စကူးကျောင်း (Rangoon High School) ဟူ၍၎င်း၊
ရန်ကုန်အစိုးရအထက်တန်းကျောင်း (Rangoon Government High School) ဟူ၍၎င်း၊
စင်ထရယ်အထက်တန်းကျောင်း (Central High School) ဟူ၍၎င်း၊
ဗဟိုစံပြအထက်တန်းကျောင် း(Central State Model High School) ဟူ၍၎င်း၊
ယခု အ.ထ.က(၁)လသာ (Basic Education High School No.(1) LATHA) ဟူ၍၎င်း အမည်(၅)မျိုးခေါ်တွင်ခဲ့သည်။

သမိုင်းကြောင်း

အ.ထ.က ၁ လသာ ကျောင်းသည် အင်္ဂလိပ်အစိုးရတို့ အောက်မြန်မာပြည်ကိုသိမ်းပိုက်ပြီးချိန်တွင် မြန်မာနိုင်ငံအတွက် ပထမဦးဆုံးတည်ထောင်ဖွင့်လှစ်ပေးသော အစိုးရအထက်တန်းအဆင့်မီကျောင်းတစ်‌‌ေကျာင်းဖြစ်သည်။ ၁၈၇၁ ခုနှစ်၊ မတ်လ ၃ ရက်နေ့တွင် ဤကျောင်းကို ရန်ကုန်အစိုးရအထက်တန်းကျောင်း (Yangon Government High School) အမည်ဖြင့် စတင်တည်ထောင်ခဲ့သည်။ ၁၈၇၄ ခုနှစ်၊ မတ်လ ၂ ရက်နေ့တွင် စတင်ဖွင့်လှစ်သည်။ စတင်ဖွင့်လှစ်ချိန်တွင် ကျောင်းအုပ်ကြီးအဖြစ် ပထမဦးဆုံးဆောင်ရွက်ခဲ့သည့်ပုဂ္ဂိုလ်မှာ Mr.ဂီလ်ဘတ်(Mr.Gilbert) ဖြစ်သည်။ ထို့ပြင် ရန်ကုန်ကောလိပ်ကို ၁၉၀၀ပြည့်နှစ်၌ အထက ၁ လသာတွင် ဦးစွာဖွင့်လှစ်ခဲ့သည်။ ကျောင်းစတင်ဖွင့်လှစ်ချိန်မှစ၍အချိန်အတော်အကြာထိအမျိုးသားသီးသန့်ကျောင်းဖြစ်ခဲ့သည်။ များမကြာမီကာလမှသာကျောင်းသူများပါပညာသင်ကြားခွင့်ရရှိခြင်းဖြစ်သည်။

ကျောင်းဆောင်များ

အရှေ့ဆောင်ပုံသဏ္ဌာန်မှာ အင်္ဂလိပ်အက္ခရာ အီး(E) ပုံဖြစ်သည်။ ကျောင်း၏ အနောက်ဆောင်ပုံသဏ္ဌာန်မှာ မြန်မာအက္ခရာ ဂငယ်(ဂ)ပုံဖြစ်သည်။ သူငယ်တန်း(KG) မှ ဒသမတန်း(G-11) အထိ ပညာသင်ကြားနိုင်သည်။ ကျောင်းသား၊ ကျောင်းသူပေါင်းနှစ်ထောင်(၂,၀၀၀)ခန့် နှင့် ဆရာ၊ ဆရာမပေါင်းခြောက်ဆယ်(၆၀)ခန့် ရှိသည်။

ပညာသင်ကြားနေသော ကျောင်းသား၊ ကျောင်းသူ များလိမ္္မာယဉ်ကျေးပြီး ဘာသာတရားကိုင်းရှိုင်းတတ်စေရန်အလို့ဌာ ကျောင်းဝန်းအတွင်း၌ပင် ကျောင်းသားဟောင်းများ၊ စေတနာရှင်အလှူရှင်များ၊ ‌ဆရာ၊ ဆရာမများမှ စုပေါင်းကာတည်ဆောက်ခဲ့သော ‌ဗဟိုစံပြဓမ္မာရုံအား ၂၀၁၃ခုနှစ်၊ မတ်လ (၃၁) ရက်နေ့တွင် အောင်မြင်စွာဖွင့်လှစ်နိုင်ခဲ့သည်။

အထက ၁ လသာ ၏ မျက်နှာစာရှိ ပင်မနှစ်ထပ်ကျောင်းဆောင်ကြီးအား ကျောင်းသားဟောင်းဖြစ်သူ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် နှင့်တပ်မတော်မိသားစုဝင်များ၊ ကျောင်းသားဟောင်းများ၊အလှူရှင်များ မှစုပေါင်းမတည်ကာ ငွေကျပ်သိန်းလေးထောင်ခန့် အကြီးစားပြုပြင်မွမ်းမံခဲ့ပြီး ၂၀၁၅ ခုနှစ် ၊ စက်တင်ဘာလ ၄ ရက်နေ့တွင် ကျောင်းအုပ်ဆရာကြီးထံသို့ အောင်မြင်စွာလွှဲပြောင်းပေးအပ်ခဲ့သည်။

ထို့ပြင် အထက ၁ လသာ တည်ထောင်စဉ်က ဆောက်လုပ်ခဲ့ပြီး ၁၉၆၃ခုနှစ်တွင်မီးလောင်၍ပျက်စီးသွားသော နဂိုမူလကျောင်းဆောင်နေရာ၌ ကျောင်းသားဟောင်းဖြစ်သူ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် မှ မတည်ကာ စေတနာရှင်အလှူရှင်များ၊ ကျောင်းသားဟောင်းများမှစုပေါင်း၍ ငွေကျပ်သိန်းပေါင်းတစ်သောင်းခန့်လှူဒါန်းကာ လေးထပ်ကျောင်းဆောင်သစ်ကြီးအားဆောက်လုပ်ပြီး ၂၀၁၇ ခုနှစ်၊ ဒီဇင်ဘာလ ၂၅ ရက်တနင်္လာနေ့တွင် ပညာရေးဝန်ကြီးဌာန၊ အခြေခံပညာဦးစီးဌာနသို့ လွှဲပြောင်းပေးအပ်ခဲ့သည်။

၁၉၆၅-၁၉၈၅ ခုနှစ် ပညာသင်နှစ် နှင့် ၁၉၈၆ခုနှစ်နောက်ပိုင်းပညာသင်နှစ် တွင်ပညာသင်ကြားခဲ့ကြသော ကျောင်းသားဟောင်းကြီးများအဖွဲ့သည် ကျောင်းတော်ကြီးအား ယခုလက်ရှိတိုင် လိုအပ်သည်များကိုပြုပြင်မွမ်းမံပေးလျက်ရှိသည်။

ကျောင်းအုပ်ကြီးများ

မစ္စတာ ဂီလ်ဘတ် (၁၈၇၁)
စည်သူ ဦးချို (၁၉၃၀- ၁၉၃၅)
ပညာမင်းကြီး စည်သူဦးကောင်း (၁၉၃၅- ၁၉၄၀)
သင်္ချာပါရဂူ ဝဏ္ဏကျော်ထင် ဦးဘသန်းတင်
ဒေါ်လှနု (၁၉၆၇- ၁၉၇၃)
ဦးဘသောင်းတင် (၁၉၇၃- ၁၉၈၁)
ဦးအေးသိန်း (၁၉၈၁- ၁၉၈၈)
ဦးတင်ရွှေ (၁၉၈၈- ၁၉၈၉)
ဦးတိုးမောင် (၁၉၈၉- ၁၉၉၀)
ဦးတင်ထွန်း (၁၉၉၂- ၂၀၀၀)
ဦးအုန်းမြင့် (၂၀၀၀- ၂၀၀၃)
ဦးစိုးမြင့် (၂၀၀၅- ၂၀၁၀)
ဦးစိုးမင်း (၂၀၁၀- ၂၀၁၇)
ဦးတင်မောင်အေး (၂၀၁၇- ၂၀၂၁)
ဦးမျိုးမင်းဦး (ယာယီ ကျောင်းအုပ်)

ထင်ရှားသော ကျောင်းသားဟောင်းများ

ဗိုလ်ချုပ်မှူးကြီး မင်းအောင်လှိုင် - တပ်မတော်ကာကွယ်ရေးဦးစီးချုပ်
ဒေါက်တာဘဦး - နိုင်ငံတော်သမ္မတ(ငြိမ်း)
ဦးမောင်မောင်ကြီး - ပြည်ထောင်စုမြန်မာနိုင်ငံရွေးချယ်ရေးအဖွဲ့ဥက္ကဋ္ဌ(ငြိမ်း)
ဗိုလ်ချုပ်သန်းဖေ(ငြိမ်း)
ဦးအောင်ချိန် - ရဲမင်းကြီး
သတိုးမဟာသရေစည်သူ ဒေါက်တာဦးသိမ်းမောင်
ဦးရန်အောင် - နိုင်ငံတော်ရှေ့နေချုပ်
ဦးမောင်မောင်ခ - နိုင်ငံတော်ဝန်ကြီးချုပ်
ဗိုလ်ချုပ်ကြီးစိုးဝင်း - နိုင်ငံတော်ဝန်ကြီးချုပ်
ဦးမင်းနောင်
ဓနုဖြူစိုးသိန်း
စန္ဒရားလှထွဋ်
ကာတွန်းဦးစိန်ကြီး
ကိုဖုန်းမော် - ၈၈၈၈ အရေးခင်း ဆန္ဒပြပွဲတွင် ကျဆုံးခဲ့သောသူ
အေးသာအောင်၊ ဦး
မောင်မောင်သိုက်

ကိုးကား

အ.ထ.က ၁ လသာ ကျောင်းသားဟောင်းများ၏ အမှတ်တရမဂ္ဂဇင်း ၊
အ.ထ.က ၁ လသာ ကျောင်းသမိုင်း