အောင်လင်းထွန်း

ဗိုလ်ချုပ် အောင်လင်းထွန်း
ကာကွယ်ရေးဝန်ကြီးဌာန ဒုတိယဝန်ကြီး
တာဝန်သက်တမ်း ၁၁ မေ ၂၀၂၁ – ၂၈ မေ ၂၀၂၄
ခန့်အပ်သူ	နိုင်ငံတော်စီမံအုပ်ချုပ်ရေးကောင်စီ
သမ္မတ	ဦးမြင့်ဆွေ (ယာယီ)
ခေါင်းဆောင်	မြထွန်းဦး
ဝန်ကြီးချုပ်	မင်းအောင်လှိုင်
ယခင်လူ	ဗိုလ်ချုပ် မြင့်နွယ်
ဆက်ခံသူ	ဗိုလ်ချုပ် ကိုလေး
ကိုယ်ရေး အချက်အလက်များ
မွေးဖွား	၁၉၇၁
မိခင်ကျောင်း	စစ်တက္ကသိုလ် အပတ်စဉ်(၃၃)
စစ်မှုထမ်းခြင်း
သစ္စာခံနိုင်ငံ	မြန်မာ
တပ်/တပ်ဖွဲ့ခွဲ	တပ်မတော် (ကြည်း)
ပြန်တမ်းဝင်အမှတ်	ကြည်း ၂၃၁၆၈

ဗိုလ်ချုပ် အောင်လင်းထွန်း (၁၉၇၁ ဖွား) သည် ကာကွယ်ရေးဝန်ကြီးဌာန ၏ ဒုတိယဝန်ကြီး အဖြစ် ထမ်းဆောင်ခဲ့သူ ဖြစ်သည်။ ယင်းမတိုင်မီက သူသည် တပ်မတော် တွင် တွဲဖက် စစ်ထောက်ချုပ် ဖြစ်ခဲ့သည်။

ပညာရေးနှင့် စစ်မှုထမ်းဘဝ

သူသည် စစ်တက္ကသိုလ် အပတ်စဉ် (၃၃) ဆင်း ဖြစ်သည်။ ပြန်တမ်းဝင်အမှတ် ကြည်း ၂၃၁၆၈ ဖြင့် တပ်မတော် တွင် စစ်မှုထမ်းသည်။တပ်မတော် တွင် တာဝန် အဆင့်ဆင့်ထမ်းဆောင်ပြီးနောက် တပ်မ ၂၂ တပ်မမှူး အဖြစ် ရာထူးတိုးသည်။ယင်းနောက် တွဲဖက် စစ်ထောက်ချုပ် (၁) အဖြစ် ဆက်လက်ရာထူးတိုးသည်။

ဒုတိယဝန်ကြီးဖြစ်လာပုံ

တပ်မတော် က ၂၀၂၁ ဖေဖော်ဝါရီ တွင် စစ်အာဏာသိမ်းပြီးနောက် သူသည် ၂၀၂၁ ခုနှစ် မေလ ၁၁ ရက်တွင် ကာကွယ်ရေးဝန်ကြီးဌာန ၏ ဒုတိယဝန်ကြီး ဖြစ်လာသည်။

ပဟေဠိသဖွယ်ရာထူးမှဖယ်ရှားခံရမှု

၂၀၂၄ ခုနှစ် မေလ ၂၈ ရက်နေ့တွင် စစ်ကောင်စီ က အမိန့်အမှတ် (၂၄/၂၀၂၄) ဖြင့် ကာကွယ်ရေးဝန်ကြီးဌာန ဒုတိယဝန်ကြီးအသစ်တစ်ဦး အား ခန့်အပ်ခဲ့သည်။ ထိုသို့ ခန့်အပ်ခဲ့ပြီး တစ်ရက်အကြာ မေလ ၃၀ရက်နေ့တွင် အစိုးရအဆက်ဆက် အမိန့်အမှတ်ဖြင့် ထုတ်ပြန်လေ့ရှိကြသော ရာထူးမှ အနားပေးခြင်း၊ရပ်စဲခြင်း စသည့် မည်သည့်အမိန့်စာကိုမှ ထုတ်ပြန်ခြင်းမပြုဘဲ အစိုးရ ပြန်ကြားရေးဝန်ကြီးဌာန ကဖော်ပြသည့် ပြည်ထောင်စုဝန်ကြီးများနှင့် ဒုတိယဝန်ကြီးများစာရင်း ထဲမှနေ၍ ဗိုလ်ချုပ်အောင်လင်းထွန်း၏ အမည်အား ဖယ်ရှားခဲ့သည်။ သူ့ကို ၂၀၂၄ခုနှစ် တပ်မတော်နေ့ မတိုင်မီ ကတည်းက တရုတ်နိုင်ငံကပေးသည့် ကျားဖြန့် ဆက်စပ်စာရင်းကြောင့် တပ်မတော်က ထိန်းသိမ်းစစ်ဆေးလိုက်ပြီး ရာထူးနေရာမှ အမည်ဖယ်ရှားခံရသည်အထိ လူမြင်ကွင်းမှ ပျောက်ကွယ်နေခဲ့သည်။ စစ်ကောင်စီဘက်က သတင်းမထုတ်ပြန်သော်လည်း ၎င်းအား တပ်မတော်မှ ထုတ်ပယ်ကာ ထောင်ဒဏ် ၁၀ နှစ် ချမှတ်လိုက်သည်ဟု သတင်းမီဒီယာများက ဖော်ပြကြသည်။

အရေးယူပိတ်ဆို့ခံရမှု

ဥရောပသမဂ္ဂ အဖွဲ့ က ၂၀၂၁ ခုနှစ် ဇွန်လ ၂၁ရက် တွင် ၎င်းအား ဒီမိုကရေစီ နှင့် တရားဥပဒေစိုးမိုးရေး ပျက်ပြားစေမှု၊ နိုင်ငံတွင်း လူ့အခွင့်အရေး ချိုးဖောက်မှုများထဲ တာဝန်ရှိသူ တစ်ဦးဟု သတ်မှတ်ဖော်ပြပြီး ပိတ်ဆို့အရေးယူမှုစာရင်း ထဲ ထည့်သွင်းသည်။ ယင်းအပြင် ဆွတ်ဇာလန်နိုင်ငံ က ၂၀၂၁ ခုနှစ် ဇူလိုင် ၁ရက် တွင် လည်းကောင်း စသည်ဖြင့် အရေးယူပိတ်ဆို့သည်။