မြင်းခြံ ကိုးဆောင်တိုက်ဆရာတော်

ဘဒ္ဒန္တသောဘိတမဟာထေရ်
ဘာသာ	ဗုဒ္ဓဘာသာ
ကျောင်းတိုက်	မြင်းခြံမြို့၊ ကိုးဆောင်တိုက် ပခုက္ကူကျောင်းသစ် စာသင်တိုက်
ဘွဲ့တံဆိပ်	အဘိဓဇမဟာရဋ္ဌဂုရု အဘိဓဇအဂ္ဂမဟာသဒ္ဓမ္မဇောတိက
အခြားအမည်များ	မြင်းခံမြို့၊ကိုးဆောင်တိုက်ဆရာတော်ကြီး
ပုဂ္ဂိုလ်ရေးရာ
မွေးဖွား	(1910-02-25)ဖေဖော်ဝါရီ ၂၅၊ ၁၉၁၀ မန္တလေးတိုင်းဒေသကြီး၊ ပုဂံမြို့နယ်၊ သီရိပစ္စယာရွာ
ကွယ်လွန်	၁၇ နိုဝင်ဘာ၊ ၂၀၀၄(2004-11-17) (အသက် ၉၄)
မိဘ	ဦးဘိုးခစ်၊ဒေါ်ကျော့
ရာထူး တာဝန်
ဌာန	နိုင်ငံတော် သံဃမဟာနာယကအဖွဲ့
ဂုဏ်ဒြပ်	ဥက္ကဋ္ဌဆရာတော်
ယခင်	ပဲခူးမြို့မ ဆရာတော်
ဆက်ခံ	ဘဒ္ဒန္တကုမာရ (မကွေးဆရာတော်)

ဘဒ္ဒန္တသောဘိတမဟာထေရ် (၁၉၁၀-၂၀၀၄) သည် မြန်မာနိုင်ငံသား ဗုဒ္ဓဘာသာရဟန်းတော်တစ်ဦးဖြစ်ကာ နိုင်ငံတော် သံဃမဟာနာယကအဖွဲ့ ၏ ဒုတိယမြောက် ဥက္ကဋ္ဌဆရာတော်ဖြစ်ခဲ့သည်။သက်တော်ရှည် မြင်းခံမြို့၊ကိုးဆောင်တိုက် ဆရာတော်ကြီး ဟူ၍ ထင်ရှားသည်။ ဆရာတော် အား မန္တလေးတိုင်းဒေသကြီး၊ ပုဂံမြို့နယ်၊ သီရိပစ္စယာရွာ တွင် ခမည်းတော် ဦးဘိုးခစ်၊မယ်တော် ဒေါ်ကျော့ တို့က  ၁၂၇၁-ခုနှစ်၊ တပေါင်းလပြည့်ကျော်(၃)ရက်၊ သောကြာနေ့ တွင် ဖွားမြင်ခဲ့သည်။

ရဟန်းပြုခြင်း

သက်တော် ၁၂ နှစ် အရွယ် ၁၂၈၃-ခုနှစ်တွင် သီရိပစ္စယာသာယာဝတေ့ကျောင်း ဆရာတော်ဦးပညာဝံသကို ဥပဇ္ဈာယ်ပြု၍ မိဘ နှစ်ပါးတို့၏ ပစ္စယာနုဂ္ဂဟဖြင့် ရှင်သာမဏေ အဖြစ်သို့ ရောက်သည်။သက်တော် ၂၀ အရွယ် ၁၂၉၁-ခုနှစ်သို့ ရောက်သောအခါ မြင်းခြံမြို့၊ ဈေးကြီးရပ်၊ သမာဓိဝန်မင်းဆန်ကုန်သည်ကြီး ဦးထွန်းခိုင်၊ ကျောင်းဒါယိကာမကြီး ဒေါ်နန်းစိန် မိသားစု၏ ပစ္စယာနုဂ္ဂဟကိုခံယူပြီး ကိုးဆောင်တိုက် ခဏ္ဍသိမ် ၌ ဟင်္သာတမြို့ တလုတ္ထော် သမိုင်ထန်းတောကြီး ဆရာတော်ကြီး အား ဥပဇ္ဈာယ်ပြု၍  ရဟန်းအဖြစ်သို့ ရောက်တော်မူခဲ့သည်။

စာသင်သားဘဝ

ရဟန်းသိက္ခာ(၂)ဝါ အရ ၁၂၉၃-ခုနှစ်တွင် ပခုက္ကူမြို့ ဆရာတော်အရှင်ပညာ နှင့် အရှင်သုန္ဒရတို့ထံတွင် ဝိသုဒ္ဓိမဂ်မဟာဋီကာ၊ သမ္မောဟဝိနောဒနီ အဋ္ဌကထာ၊ ကင်္ခါဋီကာသစ်၊ အဘိဓမ္မာပါဠိတော်များ ကို ဆိုဝါဖြင့် သင်ယူတော်မူခဲ့သည်။ ရဟန်း(၅)ဝါအရောက်တွင်  ပိဋကတ်စာပေများအား နှံ့စပ်ကျွမ်းကျင်စွာ သင်ယူပြီးမြောက်ခဲ့သည်ဆိုသော မှတ်တမ်းရှိသည်။

အောင်မြင်တော်မူခဲ့သည့် စာမေးပွဲများ

• အစိုးရ ငယ်
• အစိုးရ  လတ်
• အစိုးရ ကြီးတန်း တို့အား တစ်ဆင့်ပြီး တစ်ဆင့်အောင်မြင်ခဲ့။
• အစိုးရဓမ္မာစရိယစာမေးပွဲ  (၁၃၁၂-ခုနှစ်) ဂုဏ်ထူးဆောင်ကျမ်းများ နှင့်တကွ ထူးမြတ်စွာအောင်မြင်ခဲ့၍ သာသနဓဇ သိရီပဝရ ဓမ္မာစရိယဘွဲ့တံဆိပ်တော် နှင့် အောင် လက်မှတ်တော် ရရှိ။

ထမ်းဆောင်ခဲ့သည့် သာသနာရေးတာဝန်များ

• ပထမအကြိမ် ဂိုဏ်းပေါင်းစုံ သံဃာ့အစည်းအဝေး ပွဲကြီး၏ (၆၆)ပါး ကိုယ်စားလှယ်
• ၁၉၈၀-ခုနှစ်မှ ၁၉၈၁-ခုနှစ်အထိ နိုင်ငံတော်သံဃမဟာနာယက
• ၁၉၈၁-ခုနှစ်မှ ၁၉၉၃-ခုနှစ်အထိ ဒုတိယဥက္ကဋ္ဌ
• ၁၉၉၃-ခုနှစ် မှ ၂၀၀၄-ခုနှစ် အထိ နိုင်ငံတော် သံဃမဟာနာယကအဖွဲ့ ဥက္ကဋ္ဌ
• မြင်းခြံခရိုင်ဝိနည်းဓိုရ်
• ပါဠိပညာရေး အဖွဲ့နာယက
• ပါဠိတက္ကသိုလ် ဗဟိုကိုယ်စားလှယ်
• ဆဌသင်္ဂါယနာ သင်္ဂီတိကာရကနှင့် ဘာဏက
• ဆဋ္ဌသင်္ဂါယနာ ပါဠိဝိသောဓက
• ဂျပန်ပြည် သာသနာပြုအဖွဲ့ဝင်
• သာသနာတော် သန့်ရှင်း တည်တံ့ပြန့်ပွားရေးဦးစီး အဖွဲ့ဝင်
• သာသနာတော် သန့်ရှင်း တည်တံ့ပြန့်ပွားရေး ပထမအကြိမ် ဂိုဏ်းပေါင်းစုံ သံဃာ့အစည်းအဝေးကြီး၏ (၆၆)ပါး၊ ကိုယ်စားလှယ်အဖွဲ့ဝင်
• သမ္မုတိရ သံဃာ့ကိုယ်စားလှယ်
• နိုင်ငံတော်ဗဟိုသံဃာ့ဝန်ဆောင်အဖွဲ့ ဥက္ကဋ္ဌ
• နိုင်ငံတော်သံဃမဟာနာယကအဖွဲ့ ဥက္ကဋ္ဌ
• နိုင်ငံတော်ပရိယတ္တိသာသနာ့တက္ကသိုလ် ကြီးများ (ရန်ကုန်၊ မန္တလေး)တို့၏ အဓိပတိ
• အပြည်ပြည်ဆိုင်ရာ ထေရဝါဒ ဗုဒ္ဓသာသနာပြု တက္ကသိုလ် အဓိပတိ
• မဟာဝိသုတာရာမ ဂဏ ဝါစကနိကာယအဖွဲ့ကြီး၏ အဓိပတိ

ရေးသားခဲ့သော ကျမ်းများ

• ဝါကျသံသယဝိသောဓနီကျမ်း
• ဝိနယဗဟုသုတ ပကာသနီကျမ်း
• မြင်းခြံ ကိုးဆောင်ကံဆောင် ကမ္မဝါစာကျမ်း
• မဟာပရိတ်တော်ကြီး နိဿယသစ်

ဆက်ကပ်ပူဇော်ခြင်းခံရသောဘွဲ့တံဆိပ်များ

• အဘိဓဇမဟာရဋ္ဌဂုရု(၁၉၈၆)
• အဘိဓဇအဂ္ဂမဟာ သဒ္ဓမ္မဇောတိက(၁၉၉၅)

ဘဝနတ်ထံ ပျံလွန်တော်မူခြင်း

ဆရာတော်ကြီး သည် သက်တော်-၉၅ နှစ်၊ သိက္ခာတော်-၇၆ ဝါ အရ ၁၃၆၆-ခု၊ တန်ဆောင်မုန်းလဆန်း (၆) ရက် (၁၇-၁၁-၂၀၀၄)ရက်နေ့၊ ဗုဒ္ဓဟူးနေ့၊ နံနက်(၁၁) နာရီ (၃၅)မိနစ်တွင် တစ်ဘဝခန္ဓာ ဇာတ်ကင်းပြတ် ချုပ်ငြိမ်း၊ ရုပ်သိမ်းပျံလွန်တော်မူခဲ့သည်။