လက်စွပ်များ၏ အရှင်သခင်

ဝီကီပီးဒီးယား မှ
Jump to navigation Jump to search
လက်စွပ်များ၏ အရှင်သခင်
  • The Fellowship of the Ring
  • The Two Towers
  • The Return of the King
စာရေးသူဂျေ အာ အာ တော်ကီးန်
နိုင်ငံယူနိုက်တက်ကင်းဒမ်း
ဘာသာစကားအင်္ဂလိပ်
အမျိုးအစား
  • Fantasy
  • Adventure
ထုတ်ဝေသူAllen & Unwin
ထုတ်ဝေခဲ့
  • ၂၉ ဇူလိုင် ၁၉၅၄
  • ၁၁ နိုဝင်ဘာ ၁၉၅၄
  • ၂၀ အောက်တိုဘာ ၁၉၅၅
မီဒီယာအမျိုးအစားပုံနှိပ်
OCLC1487587
Preceded byဟော့ဘစ်
Followed byတွန်ဘွန်ဘာဒီလ်၏ စွန့်စားခန်းများ

လက်စွပ်များ၏ အရှင်သခင် (အင်္ဂလိပ်: The Lord of the Rings) သည် အင်္ဂလိပ်စာရေးဆရာ ဂျေ အာ အာ တော်ကီးန် ရေးသားသော ထူးခြားဆန်းပြားသောစိတ်ကူးယဉ်ဇာတ်လမ်းဖြစ်သည်။ဤဇာတ်လမ်းကားတော်လ်ကီးန်၏၁၉၃၇ခုနှစ်စိတ်ကူးယဉ်ဝတ္ထုဖြစ်သည့်ဟော့ဘစ်( The Hobbit) ၏နောက်ဆက်တွဲဖြစ်ပြီးဟော့ဘစ်ထက်ပို၍များစွာကြီးမားကျယ်ပြန့်ခဲ့လေသည်။၁၉၃၇မှ၁၉၄၉ထိအဆင့်လိုက်ရေးသားခဲ့သောဤဝတ္ထုကြီးကားသန်း(၁၅၀) ကျော်ရောင်းရသောရောင်းအားအကောင်းဆုံးဝတ္ထုများထဲမှတစ်အုပ်ဖြစ်လေသည်။ဝတ္ထု၏ခေါင်းစဉ်မှာဤဇာတ်လမ်း၏အဓိကရန်သူတော်ကြီးအမှောင်သခင်ဆော်ရွန်ကိုရည်ရွယ်၍ပေးထားခြင်းဖြစ်သည်။ဆော်ရွန်မှာဒုတိယခေတ်တွင်middle-earth တစ်ခွင်လုံးအားစိုးမိုးဖို့အလို့ငှာတခြားလက်စွပ်များ(၁၉ကွင်း) ၏စွမ်းအားကိုထိန်းချုပ်ရန်အတွက်တစ်ခုသောလက်စွပ်ကိုမော်ဒေါနယ်မြေရှိအိုရိုဒူရင်ခေါ်ကြမ္မာဆိုးမီးတောင်(Mount Doom) တွင်ထုလုပ်ခဲ့သည်။တိတ်ဆိတ်ငြိမ်သက်သောရှိုင်းယားမှစတင်ကာmiddle-earthရှိနေရာအများစုကိုဝတ္ထုတွင်ပုံဖော်ရေးသားထားပေသည်။ခက်ခက်ခဲခဲခရီးစဉ်များ၊ထူးခြားဆန်းကြယ်သည့်တွေ့ကြုံမှုများ၊ကြည်နူးဖွယ်ရာနှင့်စိတ်ပျက်အားငယ်မှုများ၊ကြီးကျယ်သောတိုက်ပွဲကြီးများစသည့်အကြောင်းအရာတို့ကိုရေးဖွဲ့ထားခြင်းဖြစ်၏။ဇာတ်လမ်းအကြောင်းအရာများသာမကသီချင်းဂီတများကိုပါဝေဝေဆာဆာရေးသားထားလေသည်။

စာဖတ်သူများအနေဖြင့်သုံးအုပ်တွဲအဖြစ်သိကြသော်လည်းတော်ကီးန်မှာမူလကThe Silmarillion နှင့်The Lord of the Rings ကိုနှစ်တွဲတစ်အုပ်အဖြစ်ထုတ်ဝေချင်သည်။သို့သော်ထုတ်ဝေသူဖက်ကThe Lord of the Rings ဝတ္ထုတစ်ခုတည်းပင်ရှည်လျှားခြင်းနှင့်  အကျိုးအမြတ်အတွက်အလို့ငှာLOTR ကိုသုံးတွဲခွဲ၍ထုတ်ဝေခဲ့သည်။တစ်တွဲတွင်နှစ်ပိုင်းပါဝင်၍စုစုပေါင်းသုံးအုပ်တွဲအပိုင်းအားဖြင့်(၆)ပိုင်းဖြစ်လေသည်။ စာအုပ်၏အမည်များကို

(၁) လက်စွပ်အဖွဲ့ဝင်များ(သို့) လက်စွပ်နှင့်မိတ်ဆွေများ(The Fellowship of the Ring)

(၂) ရဲတိုက်မျှော်စဉ်ကြီးနှစ်ခု(The Two Towers)

(၃) ဘုရင်အဖြစ်ပြန်လည်ရောက်ရှိလာခြင်း(The Return of the King)

ဇာတ်လမ်းအကျဉ်း[ပြင်ဆင်ရန်]

မိတ်ဆက်[ပြင်ဆင်ရန်]

ဆော်ရွန်မှာဒုတိယခေတ်တွင်middle-earthတခွင်လုံးအားစိုးမိုးဖို့အလို့ငှာတခြားလက်စွပ်များ(၁၉ကွင်း) ၏စွမ်းအားကိုထိန်းချုပ်ရန်အတွက်တစ်ခုသောလက်စွပ်ကိုမော်ဒေါနယ်မြေရှိအိုရိုဒူရင်ခေါ်ကြမ္မာဆိုးမီးတောင်(Mount Doom) တွင်ထုလုပ်ခဲ့သည်။ဆော်ရွန်၏အယောင်ဆောင်လှည့်ဖြားမှုဖြင့်အက်ရက်ဂီရော်န်နယ်မြေရဲ့ခေါင်းဆောင်ကယ်လီဘရင်ဘိုက၎င်း၏အက်လ်ဖ်ပန်းပဲဖိုတွင်အက်လ်ဖ်များအတွက်၃ကွင်း၊ဒွာ့ဗ်လူပုများအတွက်၇ကွင်းနှင့်လူသားများအတွက်၉ကွင်းကိုဆင်မြန်းရန်ထုဆစ်ခဲ့ပြီးအသီးသီးပေးအပ်ခဲ့လေသည်။ထိုလက်စွပ်များထံတွင်ဆော်ရွန်၏အတတ်ပညာအနည်းနှင့်အများဆိုသလိုပါဝင်သွားခဲ့၏။အက်လ်ဖ်လက်စွပ်သုံးကွင်းကိုဆော်ရွန်မသိစေရန်ဖွက်ထားနိုင်ခဲ့လေသည်။ဒွာ့ဗ်လူပုများရဲ့အခြေခံမူလစိတ်ဓာတ်မာကြောခြင်းကြောင့်သူ့ထံသစ္စာခံစေရန်မပြုလုပ်နိုင်ခဲ့ပါသို့သော်ထိုလက်စွပ်များ၏စနက်မှာရွှေငွေရတနာများအပေါ်ပို၍မက်မောသောစိတ်များဖြစ်စေခဲ့သည်။လူသားများအတွက်ပေးသော၉ကွင်းကားထိုဝတ်ဆင်သူတို့ကိုသက်တမ်းရှည်စေခြင်း၊တခြားသောသူများရဲ့စိတ်ဆန္ဒအပေါ်တွင်လွမ်းမိုးနိုင်ခြင်းစသည့်မှော်ကဲ့သို့သောစွမ်းအားများပေးသည်။သို့သော်ထို၉ကွင်းပိုင်ရှင်တို့မှာတဖြည်းဖြည်းနွမ်းလျထိခိုက်လာကာအရိပ်အသွင်တစ္ဆေပုံစံများဖြစ်သွားကြသည်။နောက်ဆုံးတိုက်ပွဲကြီးတွင်ဂီဂက်လက်နှင့်အီလန်ဒီခေါင်းဆောင်သောအက်လ်ဖ်နှင့်လူသားမဟာမိတ်တပ်ပေါင်းစုကြီးကဆော်ရွန်ကိုတိုက်ခိုက်အနိုင်ယူခြေမှုန်းခဲ့ကြပြီးအီလန်ဒီ၏သားအစ်စီဒူးလ်ကဆော်ရွန်ဆီမှလက်စွပ်ကိုရရှိခဲ့၏။အစ်ဆီဒူးလ်ကိုအော့ခ်များကချောင်းမြောင်းလုပ်ကြံပြီးနောက်လက်စွပ်မှာအန်ဒူရင်မြစ်ထဲကြသွားပြီးဇာတ်မြုတ်သွားခဲ့သော်လည်းနှစ်ပေါင်းများစွာအကြာတွင်ဒီဂိုနှင့်ဆမီဂိုတို့ငါးမြှားထွက်ရင်းဒီဂိုကလက်စွပ်ကိုရေအောက်မှရှာဖွေတွေ့ခဲ့သည်။လက်စွပ်အစွမ်းကြောင့်နှစ်ဦးသားခိုက်ရန်ဖြစ်ပြီးဒီဂိုသေဆုံးကာဆမီဂိုလက်ထဲရောက်ရှိသွားခဲ့ပြန်သည်။လက်စွပ်ကား၎င်းကိုသက်တမ်းရှည်စေပြီးနှစ်ကာလများစွာထိုလက်စွပ်အစွမ်းကဖျက်စီးခဲ့လေရာမူလရုပ်မရှိတော့ပဲမှင်စာပုံစံယဲ့ယဲ့သာရှိသောဂိုလမ်အဖြစ်ရောက်ရှိသွားသည်။ထို့နောက်နှစ်ပေါင်းများစွာကြာသောအခါဂိုလမ်နေသောဂူထဲတွင်ဘီလ်ဘိုဘက်ဂင်ကအမှတ်မထင်တွေခဲ့ပြီးထိုလက်စွပ်မှာရှိုင်းယားတွင်အတော်ကြာအောင်ရှိနေခဲ့ပေသည်။ဂိုလမ်မှာလက်စွပ်ကိုရှာဖွေရင်းမော်ဒေါသို့ပြန်ရောက်ရှိနေပြီဖြစ်သောဆော်ရွန်ကဂိုလမ်ကိုဖမ်းဆီးနှိပ်စက်စေသဖြင့်ရှိုင်းယားရှိဘက်ဂင်ဆိုသူထံတွင်ရှိကြောင်းသိရှိခဲ့သည်။ထို့ကြောင့်သူ့ရဲ့စွမ်းအားရှိတဲ့အစေခံများဖြစ်သောလက်စွပ်တစ္ဆေ(သို့) အနက်ရောင်စီးနင်းသူများ(သို့)နာဇဂူး( Nazgul) များကိုလွှတ်၍လက်စွပ်ကိုရှာဖွေခိုင်းခဲ့၏။

(၁) လက်စွပ်အဖွဲ့ဝင်များ[ပြင်ဆင်ရန်]

ဝတ္ထုအဓိကဇာတ်ကောင်ဖရိုဒိုဘက်ဂင်မှာဘီလ်ဘိုဘက်ဂင်၏အသက်(၁၁၁)မြောက်မွေးနေ့တွင်မမျှော်လင့်ပဲဘီလ်ဘို၏လက်စွပ်ကိုအမွေအဖြစ်ရရှိခဲ့သည်။မှော်ဆရာဂန်ဒက်ဖ်ကထိုလက်စွပ်သည်ဆော်ရွန်၏လက်စွပ်အဖြစ်သံသယရှိခဲ့သည်။၁၇နှစ်ကြာသောအခါ၎င်း၏မှန်းဆချက်မှာအမှန်ပင်ဖြစ်၍လက်စွပ်အကြောင်းနှင့်မည်သို့မည်ပုံဖျက်ဆီးရမည်ကိုဖရိုဒိုပြောပြခဲ့သည်။၎င်း၏အကြံအတိုင်းဖရိုဒိုမှာ  ဆမ်ဝိုက်ဂမ်ဂျီး(သို့) ဆမ်၊မယ်ရီဒေါ့(က်)ဘရန်ဒီဘပ်က်(သို့) မယ်ရီ၊ပရယ်ဂရင်တွတ်(သို့) ပစ်ပင်တို့နှင့်အတူရှိုင်းယားမှထွက်ခွာခဲ့သည်။လမ်းတွင်အနက်ရောင်စီးနင်းသူများထံမှသီသီလေးလွတ်မြောက်ခဲ့ပြီးသစ်တောအိုကြီးကို(Old Forest) ဖြတ်သန်းခဲ့ကြ၏။ထိုစဉ်ထိုတောကြီးထဲ၌ဒုက္ခရောက်နေရာထူးဆန်း၍လူပျော်ကြီးတွန်ဘွန်ဘာဒီကကယ်ဆယ်ကာတွန်ဘွန်ဘာဒီနှင့်ဇနီးဂိုးဘယ်ရီတို့ထံတွင်ရက်အနည်းငယ်ကြာနေထိုင်ခဲ့ကြ၏(မှတ်ချက်- Peter Jackson ရိုက်သောဇာတ်ကားတွင်ဤအခန်းများမပါဝင်) ထိုမှဘရီးခေါ်သောမြို့လေးသို့ရောက်၍ဟိုဟိုဒီဒီလှည့်လည်သွားလာနေသောအာရဂွန်ဟုခေါ်သောခရီးသည်တစ်ဦးနှင့်တွေ့ဆုံ၍သူဦးဆောင်ကာဟော့ဘစ်လေးယောက်ကိုအနက်ရောင်စီးနင်းသူများအန္တယ်ရယ်မှရှောင်၍ရစ်ဗန်ဒဲအက်ဖ်မြို့တော်သို့ခေါ်ဆောင်ခဲ့သည်။လမ်းတစ်နေရာဝဲသာတော့ပ်ခံတပ်တွင်ဖရိုဒိုကိုအနက်ရောင်စီးနင်းသူများမှတိုက်ခိုက်ရာဓားဒဏ်ရာရခဲ့၏။အာရဂွန်မှပြန်လည်တိုက်ခိုက်ပြီးဖရိုဒိုတို့ကိုရစ်ဗန်ဒဲသို့ခေါ်ဆောင်သွားပြန်ရာရောက်ခါနီးတွင်အနက်ရောင်စီးနင်းသူများမိမလိုဖြစ်သွားသောဖရိုဒိုကိုရစ်ဗန်ဒဲအရှင်သခင်အယ်လ်ရွန်ကိုယ်တိုင်ကယ်ဆယ်ခဲ့၏။

ဖရိုဒိုမှာအယ်လ်ရွန်၏ကုသမှုကြောင့်ပြန်လည်သက်သာလာသည်။မှော်ဆရာအကြီးအကဲဖြစ်သည့်ဆာရူမန်မှာသစ္စာဖောက်သွားပြီးသူ့ကိုယ်တိုင်စွမ်းအားရရှိဖို့ကြိုးပမ်းနေကြောင်းဂန်ဒက်ဖ်ကရှင်းပြပြီးနောက်အစည်းအဝေးတရပ်ကျင်းပခဲ့သည်။ထိုအစည်းအဝေးမှလက်စွပ်ကိုဖျက်ဆီးရန်နှင့်တခုတည်းသောဖျက်ဆီးရန်နည်းလမ်းမှာထိုပစ္စည်းကိုထုလုပ်ခဲ့သောမော်ဒေါနယ်မြေကြီးရှိအိုရိုဒူရင်မီးတောင်တွင်ပစ်ချဖျက်ဆီးရန်သာဖြစ်သည်။ထို့ကြောင့်လက်စွပ်သယ်ဆောင်မည့်အဖွဲ့ကိုအဖွဲ့ဝင်(၉)ယောက်ဖြင့်ဖွဲ့စည်းခဲ့၏။ဖရိုဒို၊ဆမ်၊မယ်ရီ၊ပစ်ပင်၊အာရဂွန်၊ဘော်ရိုမီယာ၊လီဂိုလက်စ်၊ဂင်းမလီ၊ဂန်ဒက်ဖ်တို့ပင်ဖြစ်ကြသည်။လက်စွပ်အဖွဲ့ဝင်များရစ်ဗန်ဒဲမှတဆင့်တောင်ပိုင်းကိုသွားပြီးရက်ဒ်ဟွန်းတောင်ကြားမှဖြတ်သန်းသော်လည်းမအောင်မြင်သဖြင့်မော်ရီယာမိုင်းတွင်းကိုဆက်လက်သွားခဲ့ကြသည်။ထိုအထဲတွင်အော့ခ်များနှင့်မီးအရိပ်သဏ္ဍန်ရှိသောရှေးဟောင်းမိစ္ဆာကြီးဖြစ်သည့်ဘဲလ်ရော့ဂ်၏အန္တရာယ်ကိုရင်ဆိုင်ခဲ့ရာတွင်ဂန်ဒက်ဖ်ရောဘဲလ်ရော့ဂ်ပါချောက်နက်ကြီးထဲသို့ကြသွားခဲ့၏။ထိုမှလွတ်မြောက်လာခဲ့ပြီးအက်လ်ဖ်သစ်တောလော့သ်လိုရီရန်သို့ရောက်ရှိကာအရှင်သခင်နှစ်ဦးဖြစ်သည့်ကယ်လီဘော်န်နှင့်လေဒီဂလက်ဒရီရယ်တို့နှင့်တွေ့ဆုံခဲ့ပါသည်။ထိုအရှင်နှစ်ဦးဆီမှလှေနှင့်လက်ဆောင်များယူဆောင်ပြီးအန်ဒူရင်မြစ်ကြောင်းအတိုင်စုန်ဆင်းကာအေမွန်ဟန်တောင်ကုန်းဘက်ဆီသို့ရောက်ရှိခဲ့ကြသည်။ထိုနေရာ၌ဘော်ရိုမီယာသည်ဖရိုဒိုထံမှလက်စွပ်ယူရန်ကြိုးပမ်းခဲ့သည်။ဆော်ရွန်နှင့်ဆာယူမန်လွှတ်လိုက်သည့်အော့ခ်အဖွဲ့နှင့်တိုက်ပွဲဖြစ်ခဲ့ပြီးဖရိုဒိုကတစ်ဦးတည်းသွားရန်ဆုံးဖြတ်ခဲ့၏။သို့သော်၎င်းအကြံကိုရိပ်မိသောဆမ်ပါဖရိုဒိုနှင့်လိုက်သွားခဲ့လေသည်။

(၂) ရဲတိုက်မျှော်စဉ်ကြီးနှစ်ခု[ပြင်ဆင်ရန်]

ဤဇာတ်လမ်း၏အမည်မှာဆော်ရွန်၏ပုံရိပ်မျက်ခွံမရှိသောမျက်လုံးတော်ကြီးတည်ရှိသောဘားရက်ဒူရာ ရဲတိုက်ကြီးနှင့်ဆာရူမန်နေသောအောသန့်ခ် ရဲတိုက်ဤနှစ်ခု၏ကိုအစွဲပြု၍ပေးထားသည်။အေမွန်ဟန်တောင်ကုန်းတွင်ဖြစ်သောတိုက်ပွဲ၌ဘော်ရိုမီယာသေဆုံးခဲ့ကာမယ်ရီနှင့်ပစ်ပင်ကိုဖမ်းဆီးခေါ်ဆောင်သွားခဲ့သည်။အာရဂွန်၊လီဂိုလက်စ်၊ဂင်းမလီတို့ကား၎င်းတို့နောက်လိုက်လံကယ်ဆယ်ရန်ကြိုးပမ်းခဲ့သည်။ဖန်ဂွန်တောအုပ်ကြီးအနီး၌ရိုဟစ်ရင်ခေါ်သောရိုဟန်တပ်ဖွဲ့ကအော့ခ်များကိုနှိမ်နင်းခဲ့ကြပြီးမယ်ရီ၊ပစ်ပင်မှာဖန်ဂွန်တောအုပ်ထဲသို့လွတ်မြောက်သွားခဲ့သည်။နောက်၎င်းနှစ်ဦးမှာအန့်မျိုးနွယ်သို့သစ်ပင်ထိန်းကြောင်းသူခေါင်းဆောင်ဖြစ်သောသစ်မုတ်ဆိတ်ကြီးနှင့်တွေ့ဆုံခင်မင်ခဲ့၏။အာရဂွန်၊လီဂိုလက်စ်၊ဂင်းမလီတို့ကဖန်ဂွန်တောအုပ်အထိလိုက်လံရှာဖွေခဲ့ရာမမျှော်လင့်ပဲဂန်ဒက်ဖ်နှင့်တွေ့ဆုံ၍ဂန်ဒက်ဖ်ကအကြောင်းစုံရှင်းပြပြီးနောက်ရိုဟန်၏မြို့တော်အက်ဒေါ့ရပ်စ်သို့ဆက်လက်ထွက်ခွာခဲ့သည်။ဆာရူမန်၏သူလျှိုဂရီမာ၏လွှမ်းမိုးချုပ်ကိုင်မှုမှလွတ်မြောက်စေရန်ဂန်ဒက်ဖ်ကသီယိုဒန်ဘုရင်ကြီးကိုကူညီခဲ့သည်။သီယိုဒန်ဘုရင်ကြီးကဖြစ်လာမည့်တိုက်ပွဲအတွက်လူသူအင်အားများစုစည်းကာ  ရှေးဟောင်းခံတပ်ဖြစ်သောဟမ်းဒိ (Helm Deep)တွင်ပြင်ဆင်ခဲ့ပြီးတဖက်တွင်ဂန်ဒက်ဖ်ကားသစ်မုတ်ဆိတ်တို့အကူညီယူရန်ထွက်ခွာခဲ့၏။မယ်ရီပစ်ပင်တို့ကြောင့်နိုးထလာပြီဖြစ်သောအန့်တ်တို့ကားဆာရူမန်၏အိုင်ဆန်ဂတ်ကိုတိုက်ခိုက်ခဲ့ကြ၏။တဖက်ကဟမ်းဒိတွင်လည်းတိုက်ပွဲကြီးဖြစ်ပေါ်ခဲ့သည်။နောက်ဆုံးအော့ခ်များအပေါ်အသာစီးရခဲ့သည်။ဂန်ဒက်ဖ်ကဆာရူမန်အားမကောင်းမှုမလုပ်တော့ရန်ပြောဆိုသော်လည်းမအောင်မြင်ခဲ့ပါ။ဂရီမာကအပေါ်မှဂန်ဒက်ဖ်ကိုသတ်ဖြတ်ရန်ပလန်တီယာခေါ်ဖန်လုံးနှင့်ပေါက်ခဲ့သည်။ဂန်ဒက်ဖ်ကိုမထိဘဲလှေကားပေါ်သို့သာကြသွားပြီးပစ်ပင်ကဆင်းကောက်ခဲ့သည်။ထိုည၌ပစ်ပင်မှာမိမိကိုယ်ကိုမထိန်းနိုင်ပဲထိုဖန်လုံးကိုခိုးကြည့်မိသည်။ထိုစဉ်ဆော်ရွန်ကဖန်လုံးမှတဆင့်ပစ်ပင်ကိုတွေ့မြင်သွား၏။ထို့နောက်ဂန်ဒက်ဖ်ကပစ်ပင်ကိုခေါ်၍ဂွန်ဒိုးနိုင်ငံမိနပ်စ်တစ်ရစ်မြို့သို့ထွက်ခွာသွားခဲ့လေသည်။

တဖက်တွင်ဖရိုဒိုနှင့်ဆမ်သည်မော်ရီယာမိုင်းတွင်းမှတောက်လျှောက်လိုက်လာသောဂိုလမ်ကိုဖမ်းဆီးကာအတင်းအကျပ်မော်ဒေါ၏အနက်ရောင်တံခါးပေါက်ကြီးဆီသို့လမ်းပြခိုင်းခဲ့သည်။အစောင့်အကျပ်ထူထဲမှုကြောင့်ဝင်ခွင့်မသာပဲဂိုလမ်လမ်းပြသောလျှို့ဝှက်လမ်းကြောင်းအတိုင်းဆက်လက်ထွက်ခွာခဲ့ကြသည်။ထို့နောက်လမ်းတွင်ဘော်ရိုမီယာ၏ညီတော်စပ်သူဖယ်ရာမီရာနှင့်တွေ့ဆုံခဲ့ရာ၌ဖယ်ရာမီရာမှာအကိုဖြစ်သူလိုမဟုတ်ပဲလက်စွပ်အပေါ်တပ်မက်စိတ်ကိုထိန်းနိုင်ခဲ့သည်။ဂိုလမ်မှာလည်းဖရိုဒိုအပေါ်ထားရှိသောသစ္စာတရားနှင့်လက်စွပ်ကိုလိုချင်သောလောဘစိတ်တို့ကြားလွန်ဆွဲနေသောအချိန်လည်းဖြစ်သည်။လောဘ၏ကြိုးဆွဲရာနောက်လိုက်ပြီးဖရိုဒိုကိုသစ္စာဖောက်ကာစစ်ရစ်အန်ဂေါဥမင်လှိုင်ခေါင်းသို့ခေါ်ဆောင်သွားခဲ့ကာဖရိုဒိုကားပင့်ကူမကြီးရှီလော့ဘ်၏အဆိပ်စူးဒဏ်ခံခဲ့ရ၏။ဆမ်ကားလေဒီဂလက်ဒရီရယ်ပေးသောလက်ဆောင်အကူအညီဖြင့်ပင့်ကူကြီးကိုပြန်လည်တိုက်ထုတ်နိုင်ခဲ့သည်။ဖရိုဒိုသေဆုံးသွားပြီဟုယုံကြည်ရင်း၎င်းတစ်ဦးတည်းမူလရည်ရွယ်ချက်ကိုထမ်းဆောင်ရန်လက်စွပ်ကိုယူခဲ့သည်။နောက်အော့ခ်များကဖရိုဒိုမှာမသေသေးပဲမေ့မြောနေသည်ဟုပြောနေသံကိုဆမ်ကြားခဲ့လေသည်။

(၃) ဘုရင်အဖြစ်ပြန်လည်ရောက်ရှိလာခြင်း[ပြင်ဆင်ရန်]

ဂန်ဒက်ဖ်ကမိနပ်စ်တစ်ရစ်မြို့၏အကြီးအကဲသို့ဘုရင်ခံဒက်နက်သော်ကိုစစ်ပွဲနှင့်ပတ်သက်၍သတိပေးသော်လည်း၎င်းမှာပလန်တီယာဖန်လုံးမှတဆင့်( စုစုပေါင်း(၈) လုံးရှိသည်၊Midddle-Earth တွင်(၇)လုံးရှိ၏) ဆော်ရွန်၏လှည့်စားမှုခံနေရသောကြောင့်ဘာမျှမပြင်ဆင်ပဲစိတ်ပျက်လက်ပျက်ဖြစ်ကာနောက်ဆုံးမိမိကိုယ်ကိုမီးလောင်တိုက်သွင်းသတ်သေခဲ့သည်။ဆော်ရွန်ကကြီးကြယ်သောစစ်တပ်ကြီးလွှတ်၍မိနပ်စ်တစ်ရစ်မြို့ကိုတိုက်ခိုက်ခဲ့သည်။  ရိုဟန်ဘက်မှဘုရင်သီယိုဒန်ကအင်အားပြန်လည်စုစည်း၍မိနပ်စ်တစ်ရစ်ကိုကူညီရန်ခရီးထွက်လာခဲ့သည်။တဖက်တွင်အာရဂွန်ကသူ့၏မျိုးနွယ်မြောက်ပိုင်းသားတချို့အပါအဝင်လီဂိုလက်စ်၊ဂင်းမလီနှင့်အတူ"သေပြီးသူများ၏လမ်း" ကိုရွေးချယ်၍ဒန်ဟဲရိုးတောင်တွင်ရှေးဘုရင်အစ်စီဒူးလ်ထံတွင်ကတိသစ္စာဖျက်၍ကျိန်စာကြောင့်မကျွပ်လွတ်နိုင်ကြသေးသောနာနာဘာဝအုပ်စုကိုစုစည်းကာခေါ်ဆောင်လာခဲ့သည်။ထိုနာနာဘာဝတပ်ဖွဲ့ကဆော်ရွန်ကိုကူညီတိုက်ခိုက်ပေးရန်ချီတက်လာသောအူးမ်ဘားရ် ရေကြောင်းတပ်ကြီးကိုတိုက်ခိုက်ပေးခဲ့သည်။အာရဂွန်က၎င်းတို့၏သင်္ဘောများကိုယူဆောင်၍ဂွန်ဒိုးတောင်ဘက်ပိုင်းမှအင်အားများစုပြီးအန်ဒူရင်မြစ်အတိုင်းအထက်သို့ဆန်ကာမိနပ်စ်တစ်ရစ်သို့ချီတက်လာခဲ့သည်။မြို့မှာစစ်ဒဏ်ကိုအလူးအလဲခံနေရချိန်အာရဂွန်တို့ရောက်ရှိလာသောအခါစစ်ပွဲအလှည့်ပြောင်းဖြစ်သွား၏။မြို့စစ်မျက်နှာပြင်တိုက်ပွဲမှာအကြီးကြယ်ဆုံးဖြစ်ခဲ့၏။သီယိုဒန်ဘုရင်၏တူမတော်စပ်သူအီယိုဝင်ကမယ်ရီ၏ အကူအညီဖြင့်နာဇဂူးတို့သခင်ကိုသုတ်သင်နိုင်ခဲ့လေသည်။ထိုစစ်ပွဲအတွင်းသီယိုဒန်ဘုရင်ကြီးကျဆုံး၍အီယိုဝင်၊မယ်ရီတို့ဒဏ်ရာရရှိခဲ့သည်။

မော်ဒေါဘက်တွင်ကားဆမ်မှာဖရိုဒိုကိုစစ်ရစ်အန်ဂေါမျှော်စင်မှကယ်ဆယ်၍တိတ်တဆိတ်မီးတောင်သို့ထွက်ခွာခဲ့ကြသည်။တချိန်တည်းလိုလိုမှာပင်တဖက်ကအာရဂွန်တို့တပ်မှာဆော်ရွန်၏အလိုချင်ဆုံးလက်စွပ်ရှာဖွေနေခြင်းကိုအာရုံထွေပြားစေရန်အလို့ငှာမော်ဒေါသို့ဂွန်ဒိုး၊ရိုဟန်တပ်ဖွဲ့နှင့်အတူချီတက်လာခဲ့ကြသော်လည်းမော်ဒေါတွင်ကျန်ရှိနေသောတပ်အင်အားမှာအဆမတန်များပြားနေခဲ့သည်။ဖရိုဒိုတို့မီးတောင်သို့ရောက်ရှိလာပြီးဖရိုဒိုမှာလက်စွပ်၏ညို့ဓာတ်ကိုမခံနိုင်တော့ပဲသူ့ကိုယ်ပိုင်ပစ္စည်းဟုပြောကာဝတ်ဆင်လိုက်သည်။ဂိုလမ်ထိုနေရာသို့ရောက်ရှိလာ၍ဖရိုဒိုနှင့်ရုန်းရင်းဆန်ခတ်ဖြစ်ကာလက်စွပ်ဝတ်ထားသောလက်ကိုကိုက်ဖြတ်လိုက်သည်။အပျော်ကြီးပျော်၍ဂိုလမ်မှာဟန်ချက်ပျက်၍ချော်ရည်များမီးများရှိရာမီးတောင်ထဲသို့လက်စွပ်နှင့်အတူကျသွားသည်။လက်စွပ်ပျက်ဆီးသွားပြီးနောက်ဆော်ရွန်မှာစွမ်းအားများထာဝရပျောက်ဆုံးသွားသောကြောင့်ထိမ်းချုပ်မှုမရှိတော့သောမော်ဒေါတပ်မှာဖရိုဖရဲအနေထားကြောင့်အာရဂွန်တို့စစ်ပွဲအောင်မြင်ခဲ့လေသည်။

အာရဂွန်ကိုအာနောရ်နှင့်ဂွန်ဒိုးဘုရင်အဖြစ်တင်မြှောက်ကြပြီးအယ်ရွန်၏သမီးတော်အာရဝင်နှင့်လပ်ထပ်ခဲ့၏။ထို့နောက်ဟော့ဘစ်လေးယောက်ရှိုင်းယားသို့အပြန်တွင်  ရှိုင်းယားကိုရှာကေးခေါ်ဆာရူမန်ကညွှန်ကြားစေခိုင်းသောလူများကထိမ်းချုပ်ထားသောအခါမယ်ရီ၊ပစ်ပင်ဦးဆောင်၍ပြန်လည်တော်လှန်ခဲ့ကြသည်။  ရှိုင်းယားဘက်အန်းနေရာတွင်ပင်ဂရီမာကမကြေနပ်မှုများကြောင့်ဆာရူမန်ကိုသတ်ခဲ့သည်။ဂရီမာကိုလည်းဟော့ဘစ်လေးသည်တော်များကပစ်သတ်ခဲ့ကြသည်။မယ်ရီနှင့်ပစ်ပင်ကိုသူရဲကောင်းများအဖြစ်ချီးမြောက်ဂုဏ်ပြုကြသည်။ဆမ်မှာရို့စ်ကော်တွန်နှင့်လက်ထပ်၏။ဖရိုဒိုကားလက်စွပ်သယ်ဆောင်ခဲ့ရသောဒဏ်ကြောင့်လူရောစိတ်ရောနွမ်းနယ်ပင်ပန်းနေခဲ့သည်။နှစ်အနည်းငယ်အကြာဂန်ဒက်ဖ်၊ဘီလ်ဘိုတို့နှင့်အတူဂရေးဟက်ဗန်သို့ရောက်ရှိ၍ထိုမှတဆင့်မသေကျွန်းသို့အက်လ်ဖ်များနှင့်အတူထွက်ခွာသွားခဲ့ကြသည်။

အဓိကဇာတ်ကောင်များ[ပြင်ဆင်ရန်]

-လက်စွပ်အဖွဲ့ဝင်များ

•မီးခိုးရောင်ဂန်ဒက်ဖ်(အစ်စထရီ/မိုင်အာရ်မျိုးနွယ်၊မော်ရီယာမိုင်းတွင်းချောက်ထဲမကျခင်အထိအဖွဲ့ကိုဦးဆောင်ခဲ့ကာနောက်သေခြင်းတရားမှပြန်လာသောအခါအဖြူရောင်ဂန်ဒက်ဖ်အဖြစ်ပြန်လာခဲ့သည်)

•ဖရိုဒိုဘက်ဂင်( ဆော်ရွန်၏တစ်ကွင်းတည်းသောလက်စွပ်ကိုသယ်ဆောင်ရသူ)

•ဆမ်ဝိုက်ဂမ်ဂျီး(သို့) ဆမ်( ဘီလ်ဘို၊ဖရိုဒိုတို့၏ဥယာဉ်မှူးနှင့်မိတ်ဆွေ)

•မယ်ရီဒေါ့(က်)ဘရန်ဒီဘပ်က်(သို့)မယ်ရီ( ဖရိုဒို၏ဝမ်းကွဲညီတော်စပ်သူ)

•ပရယ်ဂရင်တွတ်(သို့) ပစ်ပင်(ဖရိုဒို၏ဝမ်းကွဲညီတော်စပ်သူ)

•အာရဂွန်( နူမန်နောရီးယန်(သို့) ဒူနဒိုင်းမျိုးရိုးမှဆင်းသက်လာသူ/ ဘုရင်အစ်ဆီဒူးမျိုးဆက်)

•ဘော်ရိုမီယာ( ဂွန်ဒိုးနိုင်ငံမိနပ်စ်တစ်ရစ်မြို့၊ဒက်နက်သော်၏သားကြီး)

•လီဂိုလက်စ်ဂရီးန်လိဖ်(မြောက်ပိုင်းမာ့က်ဝုဒ်တောအုပ်မှအက်လ်ဖ်မင်းသား)

•ဂင်းမလီ(ဂလွိုင်၏သား၊အဲရက်ဘော်ရ်တောင်အောက်မြို့)

-တွန်ဘွန်ဘာဒီနှင့်ဂိုးဘယ်ရီ(ထူးခြား၍စွမ်းအားရှိသောသူ၊အမျိုးနွယ်မသိရသောသူ၊ရှိုင်းယားအနီးတောအုပ်အိုကြီးနှင့်ဘဲရိုးဒေါင်းကြားတွင်အမြဲပျော်ပျော်ရွှင်ရွှင်နေထိုင်သောဇနီးမောင်နှံ( ရုပ်ရှင်တွင်ပါဝင်ခြင်းမရှိ))

-ဘီလ်ဘိုဘက်ဂင်( ဖရိုဒို၏ဦးလေးတော်စပ်သူ)

-ဖယ်ရာမီရာ( ဒက်နက်သော်၏သားအငယ်)

-ကယ်လီဘော်န်နှင့်လေဒီဂလက်ဒရီရယ်( လောရီရန်အက်လ်ဖ်တောအုပ်မှသခင်နှစ်ပါး၊အယ်လ်ရွန်၏ယောက္ခမများ)

-အယ်လ်ရွန်(ရစ်ဗန်ဒဲအက်လ်ဖ်မြို့တော်၏အရှင်၊အက်လ်ဖ်တစ်ဝက်လူသားတစ်ဝက်သွေးပါသူ)

-အာရဝင်( အယ်လ်ရွန်၏သမီး၊ကယ်လီဘော်န်နှင့်လေဒီဂလက်ဒရီရယ်တို့၏မြေး)

-သီယိုဒန်ဘုရင်( ရိုဟန်နိုင်ငံအဲဒေါ့ရပ်စ်မြို့)

-အီယိုမာ(သီယိုဒန်ဘုရင်၏တူတော်စပ်သူ)

-အီယိုဝင်(သီယိုဒန်ဘုရင်၏တူမ)

-သစ်မုတ်ဆိတ်သို့ဖန်ဂွန်( သစ်ပင်အသွင်ဖြင့်အသက်ရှိသောမျိုးနွယ်ထဲမှသက်တမ်းအရင့်ဆုံးဖြစ်သူ)

-ဂလော်ဖင်ဒယ်( ရစ်ဗန်ဒဲတွင်နေ၍ဖရိုဒိုကိုလက်စွပ်တစ္ဆေများရန်မှကယ်ဆယ်ခဲ့သူ)

-ဆော်ရွန်( မိုင်အာရ်မျိုးနွယ်၊ပထမအမှောင်သခင်မောဂေါ့၏လက်ရုံး၊ဒုတိယခေတ်တွင်စွမ်းအားရှိလက်စွပ်များထုရန်အက်လ်ဖ်များကိုလှည့်စား၍ကိုယ်တိုင်တိတ်တဆိတ်တစ်ကွင်းတည်းသောလက်စွပ်ကိုထုလုပ်ခဲ့သူ)

-ဒက်နက်သော်( ဂွန်ဒိုးနိုင်ငံတွင်ဘုရင်မျိုးဆက်ပျက်သောအခါကိုယ်စားအုပ်ချုပ်သောမျိုးဆက်၏နောက်ဆုံးပုဂ္ဂိုလ်)

-ဆာရူမန်( အစ်စထရီ/မိုင်အာရ်မျိုးနွယ်၊မှော်ဆရာဟုလူသိများသောငါးဦးတွင်အမြင့်ဆုံးရာထူးရှိသူ၊ဆော်ရွန်၏လက်စွပ်ကိုလိုချင်၍ရယူရန်ကြိုးပမ်းသူ)

-ဂရီမာဝမ်းတန့်ဂ်(ဆာရူမန်၏လက်သပ်သူလျှို၊သီယိုဒန်ဘုရင်ကိုအတွေးအမြင်မှားစေရန်ပြုလုပ်သူ)

-ဂိုလမ်( တစ်ချိန်ကဟော့ဘစ်တစ်ဦးဖြစ်ခဲ့သော်လည်းလက်စွပ်ဒဏ်ကြောင့်ရုပ်မပီသသော၊လက်စွပ်ကိုအမြဲပြန်လိုချင်၍ကြိုးပမ်းအားထုတ်နေသူ။

-ရှီလော့ဘ်( မိနပ်စ်မော်ဂေါရဲတိုက်၏အထက်နားရှိစစ်ရစ်အန်ဂေါဥမှင်လှိုင်ခေါင်းတွင်နေထိုင်သောပင့်ကူမကြီး)

-ဘဲလ်ရော့ဂ်(ဒူရင်မျိုးနွယ်ကြမ္မာငင်စေသူ၊မော်ရီယာမိုင်းတွင်းတွင်တည်ရှိနေသောမိစ္ဆာကောင်ကြီး)

-နာဇဂူးလ်( လက်စွပ်တစ္ဆေ(သို့) အနက်ရောင်စီးနင်းသူများ၊တစ်ချိန်ကလူသားများဆော်ရွန်ပေးခဲ့သောလက်စွပ်များကြောင့်ယခုလိုဝိဉာဏ်ဘဝနှင့်ဆော်ရွန်ကိုအလုပ်အကြွေးပြုနေရသူကိုးဦး၊အန်ဂ်မာ၏စုန်းဘုရင်သည်နာဇဂူးလ်ခေါင်းဆောင်)

-ဆော်ရွန်၏ပါးစပ်ပေါက်(ဆော်ရွန်၏ပြောရေးဆိုခွင့်ရှိသူ၊မျက်လုံးကြီးတည်ရှိရာဘားရက်ဒူရာမျော်စဉ်ကြီး၏တပ်မှူးကြီး)


ပုံဖော်တင်ဆက်မှုများ(Adaptations)[ပြင်ဆင်ရန်]

လက်စွပ်များ၏အရှင်သခင်ဝတ္ထုကိုရေဒီယိုဇာတ်လမ်း၊စကားပြောအသံသွင်းစာအုပ်၊ရုပ်ရှင်ဇာတ်လမ်း၊ပြဇာတ်ပုံစံ၊ဂိမ်းစသည့်ပုံဖော်တင်ဆက်မှုများစွာပြုလုပ်ခဲ့ကြသည်။

ရေဒီယို[ပြင်ဆင်ရန်]

၁၉၅၅-၅၆BBCတွင်မှအသံလွှင့်ခဲ့သည်။

၁၉၆၀တွင်WBAIမှဇာတ်လမ်းတိုပုံစံဖြင့်လည်းအသံလွှင့်ခဲ့သည်။

၁၉၇၉၌အမေရိကတွင်အသံလွှင့်၏။

၁၉၈၁တွင်BBCကပုံစံသစ်ဖြင့်အသံလွှင့်ခဲ့သည်။

ရုပ်ရှင်[ပြင်ဆင်ရန်]

၁၉၇၈၌The Lord of the Rings အမည်ဖြင့်ပင်ဒါရိုက်တာရက်လ်ဖ်ဘော့က်ရှီကဇာတ်လမ်းတစ်ခုလုံး၏ပထမတွဲ၊ဒုတိယတွဲကိုခြုံငုံမိသောကာတွန်းရုပ်ရှင်ထုတ်လုပ်ဖြန့်ချိခဲ့သည်။

၁၉၇၉၌The Return of the King အမည်ဖြင့်Rankin/Bass ကုမ္ပဏီကရိုက်ကူးခဲ့၏။

အအောင်မြင်ဆုံးမှာနယူးလိုင်းကထုတ်လုပ်၍နယူးဇီလန်ဒါရိုက်တာ ပီတာဂျက်ဆန်ရိုက်ကူးသောThe Lord of the Rings သုံးကားပင်ဖြစ်သည်။၂၀၀၁၌The Lord of the Rings : The Fellowship of the Ring ,၂၀၀၂၌The Lord of the Rings : The Two Towers,၂၀၀၃၌The Lord of the Rings : The Return of the King စသဖြင့်ထွက်ရှိလာခဲ့ရာရုပ်ရှင်ဇာတ်လမ်းနာမည်တစ်ခု၏အောက်တွင်Oscar ဆုသမိုင်း၌ဆုအများဆုံးရသောဇာတ်ကားဖြစ်လာခဲ့သည်။သုံးကားပေါင်း(၁၇) ဆုရရှိခဲ့၏။နောက်ဆုံးဇာတ်ကားThe Return of the King သည်အော်စကာ(၁၁) ဆုရရှိပြီးဘန်ဟာ၊တိုက်တန်းနစ်ဇာတ်ကားများနှင့်အတူအော်စကာအများဆုံးရဇာတ်ကားဖြစ်ခဲ့သည်။

ရုပ်မြင်သံကြားဇာတ်လမ်းတွဲ[ပြင်ဆင်ရန်]

၂၀၁၇, နိုဝင်ဘာ၌အမေဇုံကုမ္ပဏီကရိုက်ကူးဖို့မူပိုင်ခွင့်ကိုဒေါ်လာသန်း(၂၅၀) ဖြင့်ဝယ်ယူ၍ဒုတိယခေတ်မှစတင်ရိုက်ကူးမည်ဟုသတင်းထွက်ပေါ်ထားပြီး(၂၀၂၁)တွင်ဖြန့်ချိနိုင်လိမ့်မည်ဟုလည်းကြားသိရသည်။၂၀၁၈ထုတ်ပြန်ချက်များအရထုတ်လုပ်ဖူးသမျှရုပ်မြင်သံကြားဇာတ်လမ်းတွဲများတွင်စရိတ်စကအကြီးဆုံးဖြစ်မည်ဟုလည်းခန့်မှန်းထားကြသည်။


လွှမ်းမိုးမှုများ[ပြင်ဆင်ရန်]

တော်လ်ကီးန်သည်အခြားစိတ်ကူးယဉ်ဇာတ်လမ်းအများစုကဲ့သို့မဟုတ်ပဲသူ့ဇာတ်အိမ်ကိုသူ့ကမ္ဘာနှင့်သူတည်ဆောက်ခဲ့သည်။The Silmarillion သည်နှိုင်းယှဉ်ပြောရလျှင်သမ္မာကျမ်းစာကဲ့သို့သောကမ္ဘာဦးကျမ်းမျိုးဖြစ်၍Middle-Earth ၏ပထမခေတ်ကိုညွှမ်းဆိုသည်။  The Lord of the Rings ကားMiddle-Earth ၏တတိယခေတ်အကုန်တွင်ဖြစ်ပေါ်ခဲ့သောဇာတ်လမ်းမျိုးဖြစ်၏။ထို့ကြောင့်သာမန်Fantasy အစားHigh Fantasyဟုသတ်မှတ်ကြသည်။၎င်းရေးသောMiddle-Earth စာပေများကိုTolkien Legedarium ဟုသတ်သတ်မှတ်မှတ်ခွဲ၍လည်းအမျိုးစားသတ်မှတ်ကြသည်။The Lord of the Ringsသည်တော်လ်ကီးန်၏ဘာသာစကား၊ဝေါဟာရဗေဒ၊သူယုံကြည်သောရိုမန်ကသလစ်ဘာသာ၊ဖယ်ရီဇာတ်လမ်းပုံပြင်များ၊နော့စ်၊စကော့တလန်ဒဏ္ဍာရီကဲ့သို့သောအကြောင်းအရာများကိုစိတ်ပါဝင်စားမှုအရ  ၎င်း၏ပုဂ္ဂိုလ်ရေးရာလေ့လာစူးစမ်းမှုပုံစံအနေဖြင့်ထွက်ပေါ်လာခဲ့သည်။သူ့၏စစ်မှုထမ်းဘဝ၊သွားခဲ့သောခရီးစဉ်များ၊စစ်ပွဲအတွေ့အကြုံများ၏လွှမ်းမိုးမှုလည်းပါလေသည်။၎င်း၏ဒဏ္ဍာရီကိုအသေးစိတ်တည်ဆောက်သည်။အင်္ဂလိပ်လူမျိုးများတွင်မိရိုးဖလာပြောစဉ်ပုံပြင်များဘိုးဝုဖ်၊အာသာဘုရင်ကဲ့သို့သောအကြောင်းအရာများရှိသော်လည်းတိတိကျကျဒဏ္ဍာရီမရှိသဖြင့်တည်ဆောက်ခဲ့ခြင်းဖြစ်သည်ဟုကြားသိရသည်။ဇာတ်ကောင်များ၏မျိုးဆက်များဆင်းသက်ပုံ၊ဘာသာစကားများ၊စာရေးသားနည်းစနစ်၊အသံထွက်စနစ်၊ပြက္ခဒိန်များ၊အသေးစိတ်မြေပုံများ၊သမိုင်းကြောင်းများစသည်တို့ကိုတိတိကျကျကိုက်ညီအောင်ပြုစု၍တချို့ကိုThe Lord of the Rings၏နောက်ဆက်တွဲအခန်းများတွင်ထည့်သွင်းထားသည်။နောက်ပိုင်းထွက်ရှိသောစိတ်ကူးယဉ်ဇာတ်လမ်းများအပေါ်ကြီးကျယ်စွာလွှမ်းမိုးမှုရှိခဲ့၏။ဂီတအဖွဲ့များ၊သီချင်းများ၊ဂိမ်းလောကစသည်တို့အပေါ်တွင်လည်းမြောက်များစွာလွမ်းမိုးနိုင်ခဲ့သည်။တချို့သောနေရာများကိုလည်းဤဝတ္ထုထဲမှနာမည်များကိုယူငင်သုံးစွဲ၍အမည်သမုတ်ကြသည်။

ဝေဖန်မှု၊ချီးကြူးမှု[ပြင်ဆင်ရန်]

စတင်ထွက်ရှိသည်မှအကောင်းအဆိုးဝေဖန်မှု၊ချီးကျူးထောပဏာပြုမှုများအများအပြားရရှိခဲ့လေသည်။

Sunday Telegraph - (၂၀)ရာစု၏စိတ်ကူးယဉ်တည်ထွင်ထားသောအကြီးကျယ်ဆုံးဇာတ်လမ်းများထဲမှတစ်ခုဖြစ်သည်ဟု၍သုံးသပ်၏။

Sunday Times - အင်္ဂလိပ်စကားပြောသောနိုင်ငံများကိုနှစ်ပိုင်းပိုင်းလျှင်လက်စွပ်များ၏အရှင်သခင်ဝတ္ထုနှင့်ဟောဘစ်ဝတ္ထုကိုဖတ်ပြီးသောသူများနှင့်ဖတ်မည့်သူများဟူ၍အုပ်စုနှစ်ခုသာရှိသည်။

စသည့်အကောင်းမြင်မှုများရှိသလိုတစ်ချို့ကမူတောလ်ကီးန်၏လွန်စွာအသေးစိတ်ဆန်ရေးသားမှု၊စိတ်ပိုင်းဆိုင်ရာနက်ရှိုင်းမှုမပါဝင်ခြင်းစသည့်မကောင်းသောဝေဖန်မှုများလည်းခံခဲ့ရသည်။

မည်သို့ပင်ဖြစ်စေ၂၀၀၃တွင်BBC ကောက်ယူခဲ့သောThe Big Read စစ်တမ်းများအရဗြိတိန်နိုင်ငံ၏နှစ်သက်မှုအရှိဆုံးစာအုပ်အဖြစ်လည်းကောင်း၊(၂၀၀၄) ဩစတေးလျှABCကပြုလုပ်သောစစ်တမ်းတွင်လက်စွပ်များ၏အရှင်သခင်ဝတ္ထုကိုMy Favourite Book အဖြစ်ဩစတေးလျှနိုင်ငံသားများကမဲပေးရွေးချယ်ခဲ့ကြသည်။


ကိုးကား[ပြင်ဆင်ရန်]

https://en.m.wikipedia.org/wiki/The_Lord_of_the_Rings

https://en.m.wikipedia.org/wiki/The_Lord_of_the_Rings_(film_series)

The Encyclopedia of Arda: An Interactive Guide to the Works of J.R.R. Tolkienမှသက်ဆိုင်သောအတွင်းစာမျက်နှာများ

http://tolkiengateway.net/wiki/Main_Page မှသက်ဆိုင်သောအတွင်းစာမျက်နှာများ

https://www.imdb.com/title/tt7631058/?mode=desktop&ref_=m_ft_dsk

https://www.cnet.com/google-amp/news/lord-of-the-rings-amazon-series-cast-release-date-rumors-news/

https://lotr.fandom.com/wiki/The_Lord_of_the_Rings

https://en.m.wikipedia.org/wiki/English_mythology

မူရင်းဝတ္ထု