မောင်ခွေးဖို့ ကဗျာများ

မောင်ခွေးဖို့ ကဗျာများ

တတိယအကြိမ်ထုတ် မျက်နှာဖုံး (၁၉၅၆)
စာရေးသူ	မင်းသုဝဏ်
သရုပ်ဖော်သူ	ဦးဘဉာဏ်
နိုင်ငံ	မြန်မာနိုင်ငံ
ဘာသာစကား	မြန်မာ၊ အင်္ဂလိပ်
အကြောင်းအရာ	ကလေးကဗျာ
မီဒီယာ အမျိုးအစား	ပုံနှိပ်

မောင်ခွေးဖို့ ကဗျာများ (အင်္ဂလိပ်: Burmese Nursery Songs for Maung Khway)(မောင်ခွေးဖို့ ကလေးကဗျာများဟုလည်း ခေါ်)သည် ဆရာကြီး မင်းသုဝဏ် ရေးဖွဲ့သော ကလေးများအတွက် ကဗျာစာအုပ် ဖြစ်သည်။ ပန်းချီဆရာကြီး ဦးဘဉာဏ်က သရုပ်ဖော်ပုံများ ရေးဆွဲသည်။ ကဗျာ ၁၃ ပုဒ် ပါဝင်ပြီး၊ အချို့ကဗျာများကို ဂီတသံစဉ်ပါ ထည့်ထားသည်။

သမိုင်းကြောင်း

မင်းသုဝဏ်သည် ၁၉၃၁ တွင် ပထမနှစ် ဝိဇ္ဇာဂုဏ်ထူးတန်း ဖြေဆိုပြီးနောက် ဇာတိမြို့ဖြစ်သော ကွမ်းခြံကုန်းသို့ ပြန်ရောက်ရှိလာခဲ့သည်။ ယင်းကာလ ကမ္ဘာ့စီးပွားပျက်ကပ်ကြောင့် မိဘများမှာ စီးပွားရေးမကောင်းတော့သဖြင့် ကွမ်းခြံကုန်းမြို့၌ အမျိုးသား ကျောင်းဆရာအဖြစ် ဝင်ရောက် လုပ်ကိုင်သည်။ ယင်းကာလ၌ အမျိုးသားပညာရေးက ထုတ်ပြန်သော သင်ရိုးညွှန်းတမ်းရောက်ရှိလာခဒ့၏။ ထိုအထဲတွင် ကလေးငယ်များအား ပျော်ရွှင်စေရန်၊ မျိုးချစ်စိတ် ရှိစေရန်၊ ပညာလိုလားစေရန်တို့အတွက် ကလေးသီချင်းများ သင်ကြားစေရန်ဖြစ်ကာ အင်္ဂလိပ် မြန်မာ (သို့) မြန်မာ (သို့) အင်္ဂလိပ် ဘာသာစကားဖြင့် သင်ကြားပေးရန်ဟု ပါဝင်သည်။ ထိုစဉ်က အစဉ်သင့် သင်ကြားပေးရန် သင့်လျော်သည့် ကလေးသီချင်းများ မရှိဟု ဆိုသည်။

​ဆရာမင်းသုဝဏ် ကျောင်းမှ အိမ်ပြန်ရောက်သောအခါ ကလေးသီချင်းများသင်ရန်သာ ကြံစည်စိတ်ကူးနေ၏။ ခြံဝင်းရှေ့မှ ကလေးတစ်သိုက်တို့၏ ကဗျာလိုလို စာလိုလို ရေရွတ်သံများကြားခဲ့ရပြီးနောက် ရှေးဟောင်းနှောင်းဖြစ် ငယ်စဉ်ဘဝအကြောင်းများကို စဉ်းစားရင်း 'သပြေသီးကောက်' နှင့် 'ဥပုပ်စောင့်' ကဗျာနှစ်ပုဒ်ကို ၁၉၃၁ ဇွန်လ ၁၁ ရက်တွင် ရေးသားခဲ့သည်။ နောက်တစ်ရက်တွင် 'ရွှေဥဩ' ကဗျာ ကို ရေးသားခဲ့၍ နှစ်ရက်ခန့်အကြာ ၁၄ ရက်နေ့တွင် ခရုလုံး၊ ပိုးစုန်းကြူး၊ သဘက်ဆေး နှင့် တောက်တဲ့ စသည့် ကဗျာ လေးပုဒ်ကို ရေးသားခဲ့သည်။

ကာလအနည်ကြာသောအခါ အခြေနေအရ တက္ကသိုလ်ပြန်လည်တက်ရောက်ခဲ့ပြီး ရေးသားပြီးခဲ့သော ကလေးကဗျာ (၇) ပုဒ်ကို 'မောင်ထွေးဖို့' ဟူသော အမည်ဖြင့် တက္ကသိုလ် မဂ္ဂဇင်းသို့ ပို့ခဲ့ပြီး ၁၉၃၂ ဖေဖော်ဝါရီ တက္ကသိုလ် နှစ်ပတ်လည်မဂ္ဂဇင်းတွင် ပါဝင်လာခဲ့သည်။ ကလောင်အမည်ကို 'မြဝတ်ရည် ဟံသာကျေး' ဟု ယူခဲ့သည်။

တက္ကသိုလ်၏ ပထမဆုံး ပိဋကတ်တိုက်မှူး ဦးခင်ဇော် (ကေ) က ဆရာမင်းသုဝဏ်၏ ကလေးကဗျာများကို စိတ်ဝင်စား၍ သူ၏ စီစဉ်မှုဖြင့် မင်းသုဝဏ်ရေးခဲ့သော ကလေးကဗျာ (၁၃) ပုဒ်ကို ဦးခင်ဇော်ကိုယ်တိုင် ဂီတသင်္ကေတဖြင့် ဖန်တီးခဲ့သည်။ ထို့နောက် စာအုပ်ထုတ်ရန် စီစဉ်သောအခါ ဦးခင်ဇော်နှင့် ရင်းနှီးသော ပန်းချီ ဦးဘဉာဏ်က သရုပ်ဖော်ပန်းချီများ ရေးဆွဲသည်။ အင်္ဂလိပ်ဘာသာကို ပါမောက္ခလုစ် နှင့် ဦးခင်ဇော်တို့က ပြန်ဆိုခဲ့ကြသည်။ ဆရာ မင်းသုဝဏ်၏ 'မောင်ခွေးဖို့ ကဗျာများ' သည် 'မောင်ထွေးဖို့ကဗျာများ' စာအုပ်အဖြစ် ၁၉၄၀ တွင် ထွက်ရှိလာသည်။ မြန်မာနိုင်ငံ အမျိုးသမီး အသင်းက တာဝန်ယူကာ အမေရိကန် သာသနာပြုအဖွဲ့ (ABM) က ပုံနှိပ်ထုတ်ဝေသည်။

ထုတ်ဝေမှုများ

ပထမဆုံးစာအုပ်ကို ၁၉၄၀ တွင် ထုတ်ဝေနိုင်ခဲ့သည်။ ၁၉၅၆ တွင် ရှုမဝတိုက်က တတိယကြိမ် ရိုက်နှိပ် ထုတ်ဝေခဲ့သည်။ ၁၉၈၆ ဒီဇင်ဘာတွင် မြစ်မခဒယ်ဒီတာအဖွဲ့မှ စီစဉ်ပြီး၊ လောကစာပေတိုက်က အုပ်ရေ ၃၀၀၀ ဖြင့် ပထမအကြိမ် ထုတ်ဝေခဲ့ပြီး သရုပ်ဖော်ပန်းချီမှာ ဦးဘကြည် ဖြစ်သည်။ မင်းသုဝဏ် အသက် ၉၃ နှစ်(၁၉၀၉ ခုနှစ်)တွင် ရှုမဝတိုက်က ထုတ်ဖူးသော စာအုပ်ကို မူရင်းမပျက် စာပေလောကတိုက်က ပြန်ထုတ်ဝေသည်။

ခေါင်းစဉ်များ

ရှုမဝတိုက်ထုတ်

တွင် ပါရှိသော ၁၃ ပုဒ်မှာ

1. သပြေသီးကောက် (သံစဉ်ပါ)
2. ဥပုသ်စောင့် (သံစဉ်ပါ)
3. တောက်တဲ့
4. ပိုးစုန်းကြူး
5. ရွှေခဲကြက်တူရွေး
6. မာရ်နတ်သား
7. ပုခက်လွှဲချင်း (သံစဉ်ပါ) (လောကစာပေထုတ်တွင် အိပ်ပါလူလေးဟု ပြောင်းထား)
8. ပန်းသည် (သံစဉ်ပါ)
9. ဝင်္ကပါ (သံစဉ်ပါ)
10. လူကလေးရဲ့ အမှတ်အသား (သံစဉ်ပါ)
11. ကြွက်ကလေး (သံစဉ်ပါ)
12. သဘက်ဆေး
13. တူတူရေဝါး

တို့ဖြစ်သည်။

လောကစာပေတိုက်ထုတ်

ထပ်တိုးကဗျာများမှာ

1. ရွှေဥဩ
2. ရွှေဇယ်ပွဲ
3. ကြာဆစ်ကြိုး
4. နွေဦးမြိုင်လယ်
5. ယီးလေလေး
6. ဖြစ်ရလေ
7. ရေပေါက်ရေစက်
8. နက္ခတ်ပွဲ
9. ဆန်လုံးညို
10. မြင်းပျံ
11. သူတို့ရွာ
12. ပျားနှင့် ပန်း
13. တောင်ခိုးနှင့်တိမ်
14. ကျွဲလိုက်မောင်ထွေး
15. လယ်စောင့်တဲ
16. ခရုလုံး
17. သဘာဝ၏ပရိယာယ်
18. ဖားတလက်
19. ရှဉ့်တိုင်းပြည်
20. ပြုံးချိုချို
21. ထုပ်ဆီးတမ်း
22. ရေကြက်မ
23. မသူဇာနှင့် ကိုသာဝိုက်
24. ပေါက်ပင်
25. ရွှေကြိုးကြာ
26. စည်းရိုးထဲမှာရွာ
27. စည်းရိုးထဲမှာရွာ (ချဲ့ထွင်ကဗျာ)
28. ခရီးသည်
29. စာပို့သမား
30. သူ့မှာတမ်း
31. ယောက်ဖခွေးခေါ်
32. ဖိုးမောင် လာပြီ

စုစုပေါင်း ၄၅ ပုဒ်ရှိပြီး၊ ထပ်တိုးကဗျာများမှာ မဂ္ဂဇင်းများမှ ပြန်လည်စုဆောင်း ဖော်ပြထားပြီး၊ စုစည်းနေသည်ကပင် ၁၀ နှစ်ခန့် ကြာသွားသည်ဟု မင်းယုဝေက ဆိုသည်။

အမွေအနှစ်

မောင်ခွေးဖို့ကဗျာများအောင်မြင်သောအခါ အေဝမ်း ကုမ္ပဏီဖြသ့် ဓာတ်ပြားထုတ်ဝေခဲ့ရာ ဓာတ်ပြား (၂)ချပ်ရရှိခဲ့သည်။ ၁၉၃၅ အမေရိကန်ပြည်ထောင်စု ကလေးစာအုပ်ပြပွဲသို့ ပြသခဲ့ရာ နိုင်ငံပေါင်း (၅၀) ကျော်မှ စာအုပ်များနှင့် အတူqပြသနိုင်ခဲ့ပြီး စိတ်ဝင်စားမှု ခံခဲ့ရသည်။