လိမ်လည်မှု

ကျားဖြန့် သို့မဟုတ် ကျားဖျန့်ဟူ၍ လူသိများသည့် အသုံးအနှုံးမှာ တရုတ်ဘာသာစကား - 诈骗 (Zhàpiàn) ၏ အသံထွက်ဖြစ်သည်။ အဓိပ္ပာယ်အရ လိမ်လည်မှုများ၊ ငွေကြေးလိမ်လည်မှုများ၊ ဖြားယောင်းသွေးဆောင်မှုများကို ခေါ်ဆိုခြင်းဖြစ်သည်။ အင်္ဂလိပ်ဘာသာစကားအရ Fraud ဖြစ်သည်။

ကျားဖြန့်၏ အနက်အဓိပ္ပာယ်မှာ တရုတ်ဘာသာစကားအရ လိမ်လည်မှုဖြစ်သော်လည်း တရုတ်နိုင်ငံအပါအဝင် အရှေ့တောင်အာရှတွင် ကျားဖြန့်ကို နားလည်ထားကြသည်မှာ အွန်လိုင်း သို့မဟုတ် အင်တာနက်ကို အသုံးပြု၍ လိမ်လည်ခြင်းဖြစ်သည်။ အွန်လိုင်းငွေလိမ်လုပ်ငန်းဟုလည်း နားလည်ထားကြသည်။

ကျားဖြန့်လုပ်ငန်းသည် ကမ္ဘောဒီယား၊ လာအို၊ ဖိလစ်ပိုင်နှင့် မြန်မာ အစရှိသည့် အရှေ့တောင်အာရှနိုင်ငံများတွင် ကြီးမားကျယ်ပြန့်စွာ အခြေစိုက်၍ လည်ပတ်နေသော လုပ်ငန်းများဖြစ်သည်။ ကျားဖြန့်လုပ်ကိုင်သူများသည် လူကုန်ကူးမှု၊ လက်နက်မှု၊ မူးယစ်ဆေးဝါးမှု၊ လောင်းကစားမှု၊ ရာဇဝတ်မှုများ ထူပြောရာ နယ်စပ်ဒေသများတွင် အခြေတည်လေ့ရှိကာ မြန်မာစစ်တပ်က အာဏာသိမ်းထားသော မြန်မာနိုင်ငံကဲ့သို့ နိုင်ငံများ၌ စစ်အာဏာရှင်များနှင့် ဒေသတွင်း လက်နက်ကိုင်အဖွဲ့များ၏ အကာအကွယ်ပေးမှုအောက်တွင် လုပ်ငန်းလည်ပတ်လေ့ရှိကြသည်။ ကျားဖြန့်လုပ်ငန်းများသည် ၂၀၂၀ ခုနှစ်၊ ကိုဗစ်-၁၉ ရောဂါကူးစက်မှု ကမ္ဘာ့ကပ်ကာလအတွင်းနှင့် ကမ္ဘာ့ကပ်ကာလပြီးနောက်ပိုင်း ပိုမိုဖွံ့ဖြိုးလာကာ ယခုအခါ နိုင်ငံပေါင်းချုပ် အွန်လိုင်းငွေကြေးလိမ်လည်မှု အသင်းကြီး ဖြစ်နေကြောင်း အမေရိကန် ပြည်ထောင်စု ငြိမ်းချမ်းရေးအင်စတီကျု (USIP) က ဆိုထားသည်။

နိုင်ငံပေါင်းစုံမှ ပညာတတ်ပြီး ဘာသာစကားကျွမ်းကျင်သည့် လူငယ်များစွာသည် မြင့်မားသော လစာမက်လုံးဖြင့် လူကုန်ကူးခံရကာ ကျားဖြန့် အွန်လိုင်းငွေကြေး လိမ်လည်သည့်လုပ်ငန်းတွင် လုပ်ကိုင်ရန် အတင်းအကျပ် ဖိအားပေးလုပ်အားစေခိုင်းခံနေကြရသည်။ အထူးသဖြင့် တရုတ်၊ ဟောင်ကောင်၊ အိန္ဒိယ၊ မလေးရှား၊ နီပေါ၊ ဖိလစ်ပိုင်၊ ထိုင်ဝမ်၊ ထိုင်း၊ ဗီယက်နမ်၊ မြန်မာ အစရှိသည့် အာရှနိုင်ငံများနှင့် အာဖရိကနိုင်ငံများမှ အလုပ်ကောင်းနှင့် လစာကောင်း လိုအပ်နေကြသည့် ပညာတတ်လူငယ်လူရွယ်များစွာမှာ ကျားဖြန့်လုပ်ငန်းအတွက် လူကုန်ကူးခံနေကြရသည်။ အကြီးအကျယ် နှိပ်စက်ညှဉ်းပန်းသတ်ဖြတ်ခံနေရပြီး လူ့အခွင့်အရေး ချိုးဖောက်ခံနေကြရသည်။ ကျွန်ပြုခိုင်းစေမှု၊ ပြန်ပေးဆွဲမှု၊ လူကုန်ကူးမှု၊ ရာဇဝတ်မှုများနှင့် ကျားဖြန့်လုပ်ငန်းမှာ ဒွန်တွဲလျက်ရှိသည်။

လူမှုကွန်ရက်တွင် သားကောင်ရှာဖွေခြင်း၊ အွန်လိုင်း၌ အမျိုးသမီးအဖြစ် အကောင့်အတုဖန်တီးပြီး အနောက်နိုင်ငံမှ အွန်လိုင်းသုံးစွဲသူ အမျိုးသားများကို ခရစ်တိုကာရန်စီ ဟုခေါ်ဆိုသည့် ဒစ်ဂျစ်တယ် ငွေကြေးများ လွှဲပြောင်းလာအောင် ဖြားယောင်းခြင်း၊ လိမ်လည်သော ရင်းနှီးမြှုပ်နှံမှုများပြုလုပ်ရန် အချစ်ဇာတ်လမ်းများဖြင့် ဖြားယောင်းသွေးဆောင်ခြင်း၊ ဂိမ်းအပလီကေးရှင်း (App) အတုများ၊ ဝက်ဘ်ဆိုဒ်စာမျက်နှာ (Website) အတုများ၊ ကုမ္ပဏီလုပ်ငန်းအတုများဖြင့် ငွေကြေးအမြတ်အစွန်းများ မက်လုံးပေး၍ လိမ်လည်ခြင်းစသဖြင့် ကျားဖြန့်ပုံစံမျိုးစုံ ရှိနိုင်သည်။

ကျားဖြန့်လိမ်လည်ခံရမှုကြောင့် ဒေါ်လာဘီလီယံနှင့်ချီပြီး နစ်နာနေသောကြောင့် တရုတ်နိုင်ငံက အိမ်နီးချင်းနိုင်ငံများနှင့် ပူးပေါင်းပြီး  ဖမ်းဆီးနှိမ်နင်းမှုများ ဆက်တိုက်ဆိုသလို ပြုလုပ်နေလျက်ရှိပါသည်။