ဟေမာနေဝင်း

ဟေမာနေဝင်း
အမည်ရင်း	ဟေမာနေဝင်း
မွေးဖွား	ရန်ကုန်မြို့၊ မြန်မာနိုင်ငံ
ဂီတဟန်	ပေါ့
အလုပ်အကိုင်	အဆိုတော်
တက်ကြွသည့်နှစ်များ	၁၉၈၀ ခုနှစ်များ–လက်ရှိ

ဟေမာနေဝင်း (Hayma Ne Win)သည် မြန်မာပြည်၏ အအောင်မြင်ဆုံး အမျိုးသမီးအဆိုတော်များအနက်မှ တစ်ယောက်အပါအဝင် ဖြစ်သည်။ သူမ၏ ဖခင်သည် နိုင်ငံကျော် ရုပ်ရှင်မင်းသား ကောလိပ်ဂျင်နေဝင်း ဖြစ်သည်။

ဟေမာနေဝင်းသည် ငယ်စဉ်က အနုပညာဝါသနာပါသော်လည်း ဗီဇကို သိသိသာသာ မပြခဲ့ချေ။ အနုပညာရှင် ဖခင်ကြီးကလည်း သူမအား တိုက်တွန်းခြင်း၊ ဆွဲခေါ်ခြင်း မရှိခဲ့ချေ။ သို့သော် သူမသည် ငယ်စဉ်ကပင် သီချင်းများကို အကြားဖြင့် အလွတ်ရ၍ သီဆိုနေတတ်ခဲ့သည်။ ဖခင်ဆုံးပါးသည့်အချိန်တွင် ဂရုဏာသက်ကြသော ဖခင်၏ အပေါင်းအသင်းမိတ်ဆွေများက သူမအား တေးစီးရီးထုတ်ရန် ကမ်းလှမ်းခဲ့ကြသည်။ ထိုမှစတင်၍ သီချင်းများ စတင်အသံသွင်း သီဆိုဖြစ်သည်။

အသက်ငယ်ရွယ်သေးချိန် ဂီတလောကတည်းကို စတင်ဝင်ရောက်သည့်အခါတွင် L.P.J တေးဂီတအဖွဲ့မှ သိန်းတန်(မြန်မာပြည်)က သူမအား စတိတ်ရှိုးများ ခေါ်ဆိုခဲ့သည်။ ဟေမာနေဝင်းသည် မေဆွိ၏ “ဘင်ဘို” သီချင်းကို စင်ပေါ်တွင် စတင်သီဆိုခဲ့သည်။ ထို့နောက် ကိုင်ဇာရေးဖွဲ့ပေးသည့် “လိပ်ပြာ”သီချင်း၊ သုခမိန်လှိုင်ရေးဖွဲ့ပေးသည့် “အချစ်ဘယ်ကစ” သီချင်းများကို သီဆိုခဲ့သည်။ ပထမဦးဆုံး သူမ၏ တေးအယ်လ်ဘမ်မှာ “ချစ်လူဆိုး” ဟု အမည်ရသည်။ သူမကို ပရိသတ်များ သိသွားသည့် သီချင်းမှာ “ယုံလား” ဖြစ်သည်။ ထိုသီချင်းကို မြန်မာ့ရုပ်မြင်သံကြား တေးဂီတအစီအစဉ်တွင် ရိုက်ကူးထုတ်လွှင့်ရာမှ သီချင်းကိုရော အဆိုတော်ကိုပါ ပရိသတ်များက အားပေးနှစ်သက်ခဲ့ကြသည်။

ဟေမာနေဝင်းသည် အဆိုတော်သက်တမ်းတစ်လျှောက် တစ်ကိုယ်တော် အယ်လ်ဘမ်များ၊ စုံတွဲသီချင်းများ အရေအတွက်များပြားစွာ သီဆိုထုတ်ဝေခဲ့သည်။ မြန်မာသံစဉ် သီချင်းများလည်း သီဆိုခဲ့သည်။

သူမ၏ မင်းကြောင့်၊ ဂြိုဟ်တုသတင်း၊ ယုံလား တေးအယ်လ်ဘမ်များကို ဆက်တိုက်ဆိုသလို ထုတ်ဝေခဲ့သည်။ ခွင့်လွှတ်နော် အယ်လ်ဘမ်သည် သူမကို ထိပ်ဆုံးနေရာက အဆိုတော်တစ်ယောက်အဖြစ် ပို့ဆောင်ပေးခဲ့သည်။ ထိုအယ်လ်ဘမ်ပြီးနောက် မကြာခင် သူမ အမေရိကန်ပြည်ထောင်စုတွင် နေထိုင်သော ဆွေမျိုးများဆီ အလည်ခရီးသွားခဲ့သည်။ အမေရိကားတွင် သူမကို စတိတ်ရှိုးပွဲ စီစဉ်ပေးသည့်အတွက် နိုင်ငံခြားတွင် ပထမဦးဆုံး တစ်ဦးတည်းဖြင့် စတိတ်ရှိုးလုပ်သည့် မြန်မာအဆိုတော်တစ်ဦး ဖြစ်လေသည်။

ထို့နောက် ပြန်လျော်ပေး အယ်လ်ဘမ်နှင့် အမေရိကားမှာ ရှိနေစဉ် “ချစ်ပြမယ်” အမည်ရှိ သီချင်းခွေတစ်ခွေ သွင်းပြီး မြန်မာပြည်တွင် ဖြန့်ချိခဲ့သည်။ ၂၀၀၅ ခုနှစ်တွင် သူမ၏ အကောင်းဆုံးတေးများကို ပြန်လည်အသက်သွင်းသည့် Live Show တစ်ခုကို ပြုလုပ်ခဲ့သည်။