ဓီရာမိုရ်
| ဓီရာမိုရ် Dira More | |
|---|---|
 ဓီရာမိုရ် ဂီတကဗျာစတူဒီယိုတွင် ရှိနေစဉ် (၂၀၂၀) | |
| မွေးဖွား | မောင်မောင်ဇော်ထက် ၄ ဇွန်၊ ၁၉၇၄ ကော့ကရိတ်မြို့ ကရင်ပြည်နယ် |
| ပညာရေး | ဝိဇ္ဇာ(ဂီတ) မဟာဝိဇ္ဇာ(ဂီတဖွဲ့သီမှု) |
| မိခင်ကျောင်း | အမျိုးသားယဉ်ကျေးမှုနှင့်အနုပညာတက္ကသိုလ်(ရန်ကုန်) တိုကျိုအနုပညာတက္ကသိုလ် |
| အလုပ်အကိုင် | သံစုံတီးဝိုင်းဦးဆောင်ညွှန်ကြားသူ၊ တေးရေးဆရာ၊ အဆိုတော်၊ ဂီတဒါရိုက်တာ၊ ဂီတမှူး |
| တက်ကြွလှုပ်ရှားနှစ်များ | ၂၀၀၀-လက်ရှိ |
| အိမ်ထောင်ဖက်(များ) | မေထူးချို |
| သားသမီး | ၃ |
| မိဘ(များ) | ဦးထွန်းနိုင် ဒေါ်ညွန့်နွယ် |
| ရရှိသည့်ဆုများ | မြန်မာ့ ရုပ်ရှင် ထူးချွန်ဆု |
| ဝက်ဘ်ဆိုဒ် | diramore.com/en |
| ဂီတခရီးလမ်း | |
| တူရိယာ |
|
| တေးသံသွင်း ကုမ္ပဏီ | Third Eye Gita Kabyar Production |
| ပူးတွဲ ပါဝင်မှု | Gita Kabyar Orchestra NUAC Orchestra |
| လက်မှတ် | |
 | |
ဓီရာမိုရ် ဟုအများကသိကြသော ဦးမောင်မောင်ဇော်ထက် (၄ ဇွန် ၁၉၇၄ မွေးဖွား) သည် အမျိုးသားယဉ်ကျေးမှုနှင့်အနုပညာတက္ကသိုလ်(မန္တလေး) မှ ဒုတိယပါမောက္ခချုပ်(သင်ကြား) ဖြစ်ကာ မြန်မာ့ရုပ်ရှင်ထူးချွန်ဆုရ ဂီတပညာရှင်ဖြစ်သည်။[၁]
ဦးမောင်မောင်ဇော်ထက်၏ အနုပညာအမည် ဓီရာမိုရ် ကို သူ၏ဖခင်နှင့် အကိုအကြီးဆုံးတို့မှ မှည့်ခေါ်ခဲ့ခြင်းဖြစ်သည်။ ဓီရာ ဆိုသည်မှာ ပါဠိစကားလုံးဖြစ်ပြီး ပညာရှိသော ဟု အဓိပ္ပာယ်ရသည်။ မိုရ် ကား မြင်းမိုရ်တောင် ကို အစွဲပြုခေါ်ဆိုထားခြင်းဖြစ်သည်။ ထို့ကြောင့် ဓီရာမိုရ် ဟူသော အမည်ကို "မြဲမြံသောပညာရှိသူ၊ သာ၍ပညာရှိသူ" (တနည်း) "မောင်ပညာမြင့်"ဟု ဆိုလိုကြောင်း မှတ်ယူနိုင်သည်။[၂]
ငယ်ဘဝနှင့်ပညာရေး
ဓီရာမိုရ်ကို ၁၉၇၄ ဇွန် ၄ ရက်တွင် ဦးထွန်းနိုင်နှင့် ဒေါ်ညွန့်နွယ်တို့မှ ကရင်ပြည်နယ်၊ ကော့ကရိတ်မြို့၌ မွေးဖွားခဲ့သည်။ မွေးချင်း ၇ယောက်အနက် အငယ်ဆုံးဖြစ်သည်။ [၂] အကိုအကြီးဆုံးကြောင့် ငယ်စဉ်ကတည်းကပင် ဂီတကိုဝါသနာပါခဲ့သည်။ အသက် ၁၂နှစ်အရွယ်တွင် အကိုများဖွဲ့စည်းထားသော တီးဝိုင်း၏အဖွဲ့ဝင်တစ်ယောက်ဖြစ်လာကာ မော်လမြိုင်မြို့၌ကျင်းပသော ပွဲတော်များတွင် ပါဝင်ဖျော်ဖြေခဲ့သည်။ ၁၉၉၂ တွင် တက္ကသိုလ်ဝင်စာမေးပွဲကို ရူပဗေဒဂုဏ်ထူးဖြင့် အထက(၄)၊ မော်လမြိုင်မှ အောင်မြင်ခဲ့သည်။ [၃]
၁၉၉၃ တွင် အမျိုးသားယဉ်ကျေးမှုနှင့်အနုပညာတက္ကသိုလ်(ရန်ကုန်) ဖွင့်လှစ်သောအခါ ဓီရာမိုရ်သည် ဂီတဘာသာရပ်ကို အထူးပြုသင်ယူခဲ့သည်။ [၂] ကျောင်းသားဘဝမှာပင် သူသည် ဂီတဖြင့်အသက်မွေးဝမ်းကြောင်းပြုရန် ဆုံးဖြတ်ခဲ့သည်။[၃]
ကနဦးတွင် ဓီရာမိုရ်သည် မြန်မာဂီတအပေါ် စိတ်ဝင်စားမှု နည်းပါးခဲ့သည်။ တက္ကသိုလ်၌ မြန်မာ့ရိုးရာဂီတအကြောင်း သင်ယူရသောအခါမှသာ ရိုးရာဂီတ၏ အလှနှင့် အနှစ်သာရကို သိမြင်နားလည်လာခဲ့သည်။ [၄] နောင်တွင် နိုင်ငံတော်အဆင့် မြန်မာ့ရိုးရာယဉ်ကျေးမှု ဆိုကရေးတီးပြိုင်ပွဲများတွင် နှဲ၊ အိုးစည်၊ ဒိုးပတ် စသော ရိုးရာတူရိယာတို့ဖြင့် ပါဝင်ယှဉ်ပြိုင်ကာ ရွှေ၊ ငွေ၊ ကြေး ဆုတံဆိပ်များလည်း ရရှိခဲ့သည်။ ထို့ပြင် သူသည် အသံဖမ်းခြင်း၊ အသံထပ်ခြင်း၊ ရုပ်ရှင်နောက်ခံတေး ဖန်တီးခြင်းဆိုင်ရာ အသိပညာတို့ကို ပညာရှင်ကြီးများဖြစ်ကြသော ဂီတလုလင်ဦးကိုကို၊ စန္ဒယားဦးလှထွတ်၊ တယောဦးတင်ရီ၊ ထရမ်းပက်ဦးဝင်းဦးတို့ထံမှ ရရှိခဲ့သည်။[၄] ဓီရာမိုရ်သည် ဝိဇ္ဇာ(ဂီတ) ဘွဲ့ကို ၁၉၉၇ တွင် ရရှိခဲ့သည်။[၂]
၂၀၀၃ ခုနှစ်တွင် ဓီရာမိုရ်ကို Monbukagakusho Scholarship Program of Japan မှ ပညာသင်ဆု ချီးမြှင့်ခဲ့သည်။ သို့ဖြစ်၍ ဂျပန်နိုင်ငံ၊ တိုကျိုအနုပညာတက္ကသိုလ် (ဂဲဒိုင်) တွင် သုတေသနကျောင်းသားအဖြစ် ၂၀၀၄ အထိ တက်ရောက်ကာ ၂၀၀၆ တွင်မူ မဟာဝိဇ္ဇာ(ဂီတဖွဲ့သီမှု) ဘွဲ့ကို ၎င်းတက္ကသိုလ်မှပင် ရရှိခဲ့သည်။[၂] မဟာဝိဇ္ဇာဘွဲ့အတွက် ဓီရာမိုရ် တင်သွင်းခဲ့သော တေးသွားအမည်မှာ End of This Life ဖြစ်သည်။ ထိုတေးသွားမှာ မြန်မာရိုးရာတီးလုံးကွက်တစ်မျိုးဖြစ်သော ဗျိုင်းတောင် (နာရေးတွင်တီးခတ်လေ့ရှိသောတေးသွား) ၏ အငွေ့အသက်ကို ဆင့်ပွားဖန်တီးရေးဖွဲ့ထားခြင်းဖြစ်သည်။ End of This Life တေးသွားတွင် လူသားတစ်ယောက်၏ နောက်ဆုံးအချိန်မတိုင်မီ ဖြစ်ပေါ်သည့်ခံစားမှုများကို အပိုင်းငါးပိုင်းခွဲကာ ဖော်ပြထားသည်။ ယင်းတို့မှာ - သတိပြန်လည်ခြင်း၊ အတိတ်ကိုအမှတ်ရခြင်း၊ နာကျင်ခြင်း၊ သေခြင်းတံခါးဝ၊ ချုပ်ငြိမ်းခြင်း တို့ ဖြစ်သည်။ ဓီရာမိုရ်သည် ဤတေးသွားကို အပြီးသတ်ရန် တစ်နှစ်ခန့် အချိန်ယူခဲ့ရသည်။ ထို့အပြင် ဂျပန်တွင် ပညာသင်ယူဆဲကာလအတွင်း Bunkyo Amateur Orchestra ၏ အဖွဲ့ဝင်အဖြစ်လည်း တီးခတ်ခဲ့သေးသည်။[၅]
အသက်မွေးဝမ်းကျောင်း
အစိုးရဝန်ထမ်း
၁၉၉၇ တွင် ဓီရာမိုရ်သည် ပထမဘွဲ့ကို ရရှိခဲ့ပြီး အမျိုးသားယဉ်ကျေးမှုနှင့်အနုပညာတက္ကသိုလ်(ရန်ကုန်)၊ ဂီတပညာဌာနတွင် နည်းပြအဖြစ် ခန့်အပ်ခံခဲ့ရသည်။ ထို့နောက် ပညာသင်ဆုကိုရရှိရာ ဒုတိယဘွဲ့အတွက် ဂျပန်နိုင်ငံ၊ တိုကျိုအနုပညာတက္ကသိုလ်၌ ၂၀၀၃ မှ ၂၀၀၆ အထိ ပညာဆက်လက်ဆည်းပူးခဲ့သည်။[၃] ၂၀၀၇သို့ရောက်သောအခါ အမျိုးသားယဉ်ကျေးမှုနှင့်အနုပညာတက္ကသိုလ်(ရန်ကုန်)၊ ဂီတပညာဌာနတွင် လက်ထောက်ကထိက ဖြစ်လာခဲ့သည်။ ၂၀၁၀ မှ ၂၀၁၁ အထိ ယဉ်ကျေးမှုဝန်ကြီးဌာန၊ အနုပညာ ဦးစီးဌာနတွင် လက်ထောက်ညွှန်ကြားရေးမှူးအဖြစ် တာဝန်ထမ်းဆောင်ခဲ့သည်။ ၂၀၁၁ မှာပင် အမျိုးသားယဉ်ကျေးမှုနှင့်အနုပညာတက္ကသိုလ်(ရန်ကုန်)၊ ဂီတပညာဌာနသို့ တွဲဘက်ပါမောက္ခအဖြစ် ပြန်လည်၍တာဝန်ပေးအပ်ခြင်းခံရသည်။ ၂၀၁၃တွင် အမျိုးသားယဉ်ကျေးမှုနှင့်အနုပညာတက္ကသိုလ်(ရန်ကုန်)၊ ဂီတပညာဌာန၏ ပါမောက္ခ၊ ဌာနမှူး ဖြစ်လာခဲ့ပြီး ၂၀၁၉ တွင်မူ အမျိုးသားယဉ်ကျေးမှုနှင့်အနုပညာတက္ကသိုလ်(မန္တလေး) ၏ ဒုတိယပါမောက္ခချုပ်(သင်ကြား)အဖြစ် ရာထူးတိုးမြှင့်ခန့်ထားခြင်းခံရသည်။[၃]
ဂီတပညာရှင်
ဂီတပညာရှင်အနေဖြင့် ဓီရာမိုရ်သည် တေးရေးဆရာ၊ အဆိုတော်၊ ဂီတဒါရိုက်တာ၊ ဂီတမှူး စသော ကဏ္ဍအသီးသီးကို ဆောင်ရွက်လျက်ရှိသည်။ [၆]
တေးရေးဆရာ၊ အဆိုတော်
၂၀၀၀ ခုနှစ်တွင် ဓီရာမိုရ်သည် ဂစ်တာရှိလား အယ်လ်ဘမ်ဖြင့် တေးရေးဆရာ၊ အဆိုတော်အဖြစ် ဂီတလောကသို့ စတင်ဝင်ရောက်ခဲ့သည်။ ထို့နောက် ၂၀၀၈ တွင် ဒုတိယအယ်လ်ဘမ် ကျွန်တော်နဲ့ဂီတ၊ ၂၀၁၂ တွင် တတိယအယ်လ်ဘမ် လမင်းဖမ်းပွဲ နှင့် ၂၀၁၆ တွင် စတုတ္ထအယ်လ်ဘမ် မြစ်အိုကြီး တို့ ထွက်ရှိခဲ့သည်။[၇] အဆိုတော်တစ်ယောက်အနေဖြင့် ဓီရာမိုရ်သည် နိုင်ငံခြားအဆိုတော်အချို့နှင့် ဂီတဖန်တီးမှုများ ပူးပေါင်းဆောင်ရွက်ခဲ့သည်။ ၂၀၁၆ တွင် ဂျပန်အဆိုတော် Suwa Junko နှင့်တွဲဖက်၍ "တံခါး/ Friends" အမည်ရှိ သီချင်းတစ်ပုဒ်ကို Kumamoto ငလျင်ပြန်လည်ထူထောင်ရေးရံပုံငွေအတွက် ဖြန့်ချိခဲ့သည်။[၈] ၂၀၁၇တွင် အင်္ဂလိပ်အဆိုတော် Joss Stone ၏ ကမ္ဘာလှည့်ဖျော်ဖြေရေးခရီးစဉ်အတွင်း သူမနှင့်တွဲဖက်ကာ "ဘုရားပေးဆု" အမည်ရှိ သီချင်းတစ်ပုဒ်ကို ပုံစံအသစ်ဖြင့် ဖန်တီးဖြန့်ချိခဲ့ပြန်သည်။[၉]
ဂီတဒါရိုက်တာ
ဓီရာမိုရ်သည် "ဂီတကဗျာ"သံစုံတီးဝိုင်း (ယခင် - "အော်ပရာ"သံစုံတီးဝိုင်း) ကို ၂၀၀၂ ခုနှစ်တွင် တည်ထောင်ကာ ဂီတဒါရိုက်တာအဖြစ် စတင်ဆောင်ရွက်ခဲ့သည်။ ဓီရာမိုရ်နှင့် ဂီတကဗျာ၏ အစောဆုံးတင်ဆက်မှုမှာ ခိုင်သင်းကြည်မင်္ဂလာဆောင်ခွေ ဟု လူသိများသော "ချစ်သူတို့ရဲ့မင်္ဂလာတေး"အယ်လ်ဘမ် ဖြစ်သည်။[၁၀] ဂီတဒါရိုက်တာအဖြစ် ဓီရာမိုရ်၏ ထင်ရှားသောလုပ်ဆောင်ချက်များမှာ - ၂၀၁၃ အရှေ့တောင်အာရှ အားကစားပြိုင်ပွဲဖွင့်ပွဲ၊ပိတ်ပွဲ၊ ၂၀၁၄ အာဆီယံမသန်စွမ်း အားကစားပြိုင်ပွဲဖွင့်ပွဲ၊ပိတ်ပွဲ၊ ၂၀၁၇၊ ၂၀၁၈၊ ၂၀၁၉ တို့တွင် ကျင်းပခဲ့သော မြန်မာ့ရုပ်ရှင်ထူးချွန်ဆုချီးမြှင့်ပွဲ၊ ဂျပန်-မြန်မာပွဲတော်၊ အာဆီယံ-ရုရှားသံစုံတီးဝိုင်းပူးပေါင်းတင်ဆက်မှု၊ Taipei Civic Orchestra၊ BBC Symphony Orchestra တို့ဖြင့် ပူးပေါင်းတင်ဆက်မှု စသည်တို့ ဖြစ်ကြသည်။[၁၁][၁၂][၁၃][၁၄] ၂၀၁၆ တွင် ဓီရာမိုရ်သည် Charles Wallace Burma Trust (UK-registered Charity) အဖွဲ့အစည်း၏ ဆုချီးမြှင့်ခြင်းကိုခံရကာ အင်္ဂလန်နိုင်ငံ ဘရစ္စတိုးတက္ကသိုလ်သို့ ဧည့်ပညာရှင်အဖြစ် ၃လကြာ သွားရောက်ခဲ့ရသည်။[၁၅]ထိုကာလအတွင်း သူသည် BBC Symphony Orchestra နှင့် Orchestra for Myanmar and New Children's Choir တို့အတွက် မြန်မာဂန္ထဝင်သီချင်းတစ်ပုဒ်ဖြစ်သော "ရွေတညာ" သီချင်းကို Orchestral Version အဖြစ် စီစဉ်ဖန်တီးပေးရုံသာမက[၁၂]ဘရစ္စတိုးတက္ကသိုလ်၊ အနုပညာဌာနတွင်လည်း မြန်မာဂန္ထဝင်ဂီတအကြောင်းကို ဟောပြောပွဲပြုလုပ်ခဲ့သည်။[၁၆]ထို့ပြင် ဓီရာမိုရ်သည် ၂၀၁၆ ခုနှစ်တွင် အမျိုးသားယဉ်ကျေးမှုနှင့်အနုပညာတက္ကသိုလ်(ရန်ကုန်) မှ ဂီတကျောင်းသား၊ ကျောင်းသူများနှင့် NUAC Orchestra ကို စတင်ဖွဲ့စည်းကာ ၂၀၁၈ တိုင်အောင် ဂီတဖျော်ဖြေပွဲများ နှစ်စဉ်တင်ဆက်ခဲ့သည်။[၁၇]ထိုမျှသာမက ဓီရာမိုရ်သည် ဝေလ၊ လင်းလင်း၊ ဟန်ထူးလွင်၊ စိုင်းစိုင်းခမ်းလှိုင်၊ နီနီခင်ဇော် စသောနာမည်ကျော်အဆိုတော်များ၏ ဖျော်ဖြေပွဲများတွင်လည်း ဂီတဒါရိုက်တာအဖြစ် ပူးပေါင်းပါဝင်ခဲ့သည်။[၁၈][၁၉][၂၀]
ဂီတမှူး
၂၀၀၄ ခုနှစ်တွင် ဒါရိုက်တာကြည်ဖြူသျှင် ရိုက်ကူးသော "ချစ်သောအရိမဒ္ဒနပူရ၏မဟာအောင်ပွဲ" ရုပ်ရှင်ဖြင့် ဓီရာမိုရ်သည် ရုပ်ရှင်နောက်ခံတေးဖန်တီးသူ၊ ဂီတမှူးအဖြစ် စတင်ဆောင်ရွက်ခဲ့သည်။[၂၁]ဂီတမှူးအနေဖြင့် ဓီရာမိုရ်သည် မြန်မာ့ရုပ်ရှင်ထူးချွန်ဆု(တေးဂီတဆု) ၂ကြိမ် ရရှိထားသူ ဖြစ်သည်။ ပထမအကြိမ်မှာ "ဇော်က ကနေသည်" ရုပ်ရှင်ဖြင့် ၂၀၀၉ ခုနှစ်အတွက် ရရှိခဲ့ခြင်းဖြစ်ပြီး ဒုတိယအကြိမ်မှာ "လူးရတနာသိုက်" ရုပ်ရှင်ဖြင့် ၂၀၁၆ ခုနှစ်အတွက် ရရှိခဲ့ခြင်းဖြစ်သည်။[၂၂] ၎င်းအပြင် ဓီရာမိုရ်သည် ဒါရိုက်တာ ဉာဏ်ကျယ်စေ ရိုက်ကူးသော "ကျွန်မ မလိုချင်တဲ့ ကျွန်မဘဝ" animation ဇာတ်လမ်းတိုဖြင့် အမေရိကန်နိုင်ငံတွင် ကျင်းပပြုလုပ်သော Epic Animation, Comic and Game Festival 2016 မှ ချီးမြှင့်သည့် Best Music Score Award ကိုလည်း ရရှိခဲ့သည်။[၂၃] ယခုအချိန်ထိဆိုလျှင် သူသည် ရုပ်ရှင်ဇာတ်ကား ၅၀ကျော်အတွက် နောက်ခံတေးဂီတ ဖန်တီးခဲ့ပြီးဖြစ်သည်။[၂၁]
ဓီရာမိုရ်၏ ကြိုးပမ်းအားထုတ်မှုများထဲတွင် မြန်မာဂီတကို ထိန်းသိမ်းခြင်း နှင့် ဖြန့်ဝေခြင်းတို့လည်း အပါအဝင်ဖြစ်သည်။[၃]၂၀၁၃ ခုနှစ်တွင် မြန်မာရိုးရာဂီတ၊ သီချင်း ပုဒ်ရေ ၁၀၀ ကို လေ့လာစုစည်းကာ ပြန်လည်အသံသွင်းသည့် "Beauty of Tradition" အမည်ရှိ ပရောဂျက်ကို စတင်လုပ်ဆောင်ခဲ့သည်။ ထို့နောက် ဂျပန်မှ တေးထုတ်လုပ်ရေးကုမ္ပဏီတစ်ခုဖြစ်သော Airplane Label နှင့် ပူးပေါင်း၍ "Beauty of Tradition" ပရောဂျက် အမည်အောက်၌ မြန်မာရိုးရာဂီတအယ်လ်ဘမ် ၃ ခွေကို ဂျပန်နိုင်ငံတွင် ဖြန့်ချိဖြစ်ခဲ့သည်။[၂၄]သို့သော်လည်း မြန်မာ့ဂီတကို ထိန်းသိမ်းရန် ကြိုးပမ်းရာတွင် သီချင်းပုဒ်ရေ ၁၀၀ မျှဖြင့် မလုံလောက်နိုင်ဟု ယူဆခဲ့သည်။ ထို့ကြောင့် ပရောဂျက်ကို မြန်မာရိုးရာဂီတ၊သီချင်းပုဒ်ရေ ၁၀၀၀ စုစည်းမှုအဖြစ် ထပ်မံချဲ့ထွင်ကာ "ဂီတရတနာ" ဟု ပြန်လည်အမည်ပေးခဲ့သည်။[၂၅] ၎င်းပရောဂျက်၏ ရည်ရွယ်ချက်မှာ သက်တမ်းကြာမြင့်ပြီး ရှားပါးနေပြီဖြစ်သော မြန်မာရိုးရာဂီတ၊ သီချင်းပုဒ်ရေ ၁၀၀၀ ကို အသံအရည်အသွေးကောင်းကောင်းဖြင့် လွယ်ကူစွာရှာဖွေနားဆင်နိုင်သော ဂီတမော်ကွန်းတိုက်တစ်ခု ဖြစ်ပေါ်လာစေရန်ပင်ဖြစ်သည်။ ဤပရောဂျက်မှ သီချင်းအသီးသီးကို နိုင်ငံအဝှမ်းမှ ရိုးရာဂီတပညာရှင်ကြီးများ၏ အကူအညီဖြင့် လေ့လာစုစည်းကာ ရိုးရာဂီတပညာရှင်များနှင့်အတူ ဂျပန်အသံဖမ်းအင်ဂျင်နီယာ Hiroshi Iguchi ၏ အကူအညီဖြင့် ပြန်လည်အသံသွင်းခဲ့သည်။ ပရောဂျက်တွင် ကဏ္ဍအားဖြင့် ၇ မျိုး ပါဝင်သည်။ ထိုကဏ္ဍများမှာ - မဟာဂီတ၊ ကာလပေါ်၊ သဘင်ဂီတ၊ မြန်မာဆိုင်း၊ ကျေးလက်ဂီတ၊ နတ်ချင်း၊ လက်စွမ်းပြ တို့ ဖြစ်ကြသည်။ ယင်းပရောဂျက်ကို အတွဲ ၉ တွဲဖြင့် ဖြန့်ချိရန် စီစဉ်ထားသည်။ ၂၀၁၈ ခုနှစ်တွင် "ဂီတရတနာ" ကို စတင်မိတ်ဆက်ကာ Spotify၊ MMN နှင့် JOOX ကဲ့သို့သော နိုင်ငံတကာနှင့် ပြည်တွင်းတေးဂီတဝက်ဘ်ဆိုဒ်များတွင် ဖြန့်ချိခဲ့သည်။[၂၅]၂၀၁၉နှောင်းပိုင်းတွင် "ဂီတရတနာ" အတွဲ ၆ အထိ ထွက်ရှိပြီးဖြစ်သည်။
ဆရာတဖြစ်လဲ ဂီတပညာရှင် ဓီရာမိုရ်သည် ဂီတဆိုင်ရာအသိပညာများကို အခွင့်သင့်တိုင်း မျှဝေလေ့ရှိသူဖြစ်သည်။ အစိုးရဆိုင်ရာ၊ ပုဂ္ဂလိကဆိုင်ရာ ပြည်တွင်း၊ ပြည်ပအလုပ်ရုံဆွေးနွေးပွဲများ၊ ပညာရပ်နှီးနှောဖလှယ်ပွဲများတွင် ပါဝင်ဆွေးနွေးခြင်း၊ ILBC၊ Yangon Music School၊ MMDC ကဲ့သို့သော သင်တန်းကျောင်းများတွင် သင်ကြားပို့ချခြင်းတို့ကို ပြုလုပ်လေ့ရှိသည်။[၂၁]ယခုအခါ ဓီရာမိုရ်သည် အမျိုးသားယဉ်ကျေးမှုနှင့်အနုပညာတက္ကသိုလ်(မန္တလေး)၏ ဒုတိယပါမောက္ခချုပ်တာဝန်ကို ထမ်းဆောင်ရင်း တစ်ဖက်တွင်လည်း တေးရေးဆရာ၊ အဆိုတော်၊ ဂီတဒါရိုက်တာ၊ ဂီတမှူး စသော အနုပညာလုပ်ငန်းများကို ဆက်လက်လုပ်ကိုင်လျက်ရှိသည်။[၃]
ရရှိခဲ့သောဆုများ
| ခုနှစ် | ဆု | အမျိုးအစား | ရွေးချယ်ခံလက်ရာ | ရလဒ် |
|---|---|---|---|---|
| ၂၀၀၉ | မြန်မာ့ရုပ်ရှင်ထူးချွန်ဆု | နောက်ခံတေးဂီတ | ဇော်က ကနေသည် | ဆုရရှိ[၂၆] |
| ၂၀၁၆ | မြန်မာ့ရုပ်ရှင်ထူးချွန်ဆု | နောက်ခံတေးဂီတ | လူးရတနာသိုက် | ဆုရရှိ[၂၇] |
| 2016 | Epic Animation, Comic and Game Festival, USA | Best Music Score | ကျွန်မ မလိုချင်တဲ့ ကျွန်မဘဝ | ဆုရရှိ[၂၃] |
| ၂၀၁၉ | မြန်မာနိုင်ငံရုပ်ရှင်အစည်းအရုံးမှပေးအပ်သော ဂုဏ်ပြုဆု | ဂီတ | – | ဆုရရှိ[၂၈] |
တေးအယ်လ်ဘမ်များ
ဓီရာမိုရ်သည် တစ်ကိုယ်တော်တေးအယ်လ်ဘမ် လေးခွေ ထွက်ရှိပြီးဖြစ်သည်။
| ခုနှစ် | အယ်လ်ဘမ် | သီချင်းပုဒ်ရေ | ထုတ်လုပ်ရေး |
|---|---|---|---|
| ၂၀၀၀ | ဂစ်တာရှိလား | ၁၁ | Third Eye |
| ၂၀၀၈ | ကျွန်တော်နဲ့ဂီတ | ၁၀ | Gita Kabyar Production |
| ၂၀၁၂ | လမင်းဖမ်းပွဲ | ၁၀ | Gita Kabyar Production |
| ၂၀၁၆ | မြစ်အိုကြီး | ၁၀ | Gita Kabyar Production |
ကိုယ်ပိုင်ဘဝ
ဓီရာမိုရ်သည် မမေထူးချိုနှင့် ၂၀၀၈ တွင် လက်ထပ်ခဲ့သည်။ ယခုအခါတွင် သားသမီး ၃ဦး ထွန်းကားပြီးဖြစ်သည်။ [၃၀]
ကိုးကား
- ↑ ဓီရာမိုရ်_ဂီတပညာရှင်။
- ↑ ၂.၀ ၂.၁ ၂.၂ ၂.၃ ၂.၄ diramore-human-of-mawlamyine။
- ↑ ၃.၀ ၃.၁ ၃.၂ ၃.၃ ၃.၄ ၃.၅ di-ra-mo_profiled။
- ↑ ၄.၀ ၄.၁ diramore-interview-irrawaddy။
- ↑ diramore-interview-popular။
- ↑ diramore-interview-mizzima။
- ↑ diramore's-old-river-album-review-irrawaddy။
- ↑ junko-suwa-connecting-the-hearts။
- ↑ joss-stone-total-world-tour။
- ↑ chit-thu-doe-ye-mingalar-tay။
- ↑ myanmar-academy-ceremony-music။
- ↑ ၁၂.၀ ၁၂.၁ myanmar-orchestra-strikes-an-international-chord။
- ↑ local-musicians-join-asean-russia-orchestra။
- ↑ a-golden-evening-of-music။
- ↑ charles-wallace-burma-trust-award။ 27 April 2020 တွင် မူရင်းအား မော်ကွန်းတင်ပြီး။ 5 April 2020 တွင် ပြန်စစ်ပြီး။
- ↑ diramore-talks-about-his-recent-compositions။
- ↑ nuac-orchestra-music-showcase။
- ↑ wai-la-live-in-360။
- ↑ a-road-to-starry-night-big-bag။
- ↑ sai-sai-one-man-show။
- ↑ ၂၁.၀ ၂၁.၁ ၂၁.၂ diramore-interview-mizzima။
- ↑ diramore-second-academy။
- ↑ ၂၃.၀ ၂၃.၁ my-life-i-don't-want။
- ↑ diramore-promotes-myanmar-classical-music။
- ↑ ၂၅.၀ ၂၅.၁ gitayadana-reviving-forgotten-treasures။
- ↑ diramore-interview-irrawaddy။
- ↑ Myanmar Academy Awards for 2016။
- ↑ myanmar-copyright-day။ 25 March 2020 တွင် မူရင်းအား မော်ကွန်းတင်ပြီး။ 5 April 2020 တွင် ပြန်စစ်ပြီး။
- ↑ diramore's-old-river-album-review-irrawaddy။
- ↑ diramore-songs-influenced-by-marriage-kids။