ဟယ်ရီပေါ်တာနှင့် လျှို့ဝှက်ခန်းဆောင်

ဝီကီပီးဒီးယား မှ
Jump to navigation Jump to search
ဟယ်ရီပေါ်တာနှင့် လျှို့ဝှက်ခန်းဆောင်
Harry Potter and the Chamber of Secrets
Harry Potter and the Chamber of Secrets.jpg
မူလ ယူကေ ပုံနှိပ်ထုတ်ဝေခြင်း ၏ မျက်နှာဖုံးပုံစံ
စာရေးသူ ဂျေ ကေ ရိုးလင်း
J. K. Rowling
သရုပ်ဖော်သူ
  • ကလစ်ဖ် ရွိုက်
    Cliff Wright (ယူကေ ပုံနှိပ်ထုတ်ဝေခြင်း)
  • ဂျော်နီ ဒပ်ဒဲလ်
    Jonny Duddle (၂၀၁၄ ယူကေ တည်းဖြတ်ထုတ်ဝေခြင်း)
  • မာရီ ဂရန်းပရယ်
    Mary GrandPré (အမေရိကန် ပုံနှိပ်ထုတ်ဝေခြင်း)
  • ကေဇူ ကီဘူရ်ရှီ
    Kazu Kibuishi (၂၀၁၃ အမေရိကန် တည်းဖြတ်ထုတ်ဝေခြင်း)
  • ဂျင်မ် ကေး
    Jim Kay (ရုပ်ပြစာအုပ်)
အတွဲ ဟယ်ရီပေါ်တာ
ထုတ်ဝေအမှတ်
စာအုပ်အတွဲစဉ်တွင် အမှတ်စဉ် ၂ (ဒုတိယမြောက်)
အမျိုးအစား မှော်အတတ်ဆိုင်ရာ
ထုတ်ဝေသူ
ထုတ်ဝေသည့်ရက်
၁၉၉၈ ဇူလိုင် ၂ (ယူနိုက်တက်ကင်းဒမ်း)
၁၉၉၉ ဇွန် ၂ (အမေရိကန်ပြည်ထောင်စု)
စာမျက်နှာ ၂၅၁ (ယူကေ ပုံနှိပ်ထုတ်ဝေခြင်း)
၃၆၀ (၂၀၁၄ ယူကေ တည်းဖြတ်ထုတ်ဝေခြင်း)
၃၄၁ (အမေရိကန် ပုံနှိပ်ထုတ်ဝေခြင်း)
၃၆၈ (၂၀၁၃ အမေရိကန် တည်းဖြတ်ထုတ်ဝေခြင်း)
ISBN ဝ-၇၄၇၅-၃၈၄၉-၂
ယခင်စာအုပ် ဟယ်ရီပေါ်တာနှင့် ပြဒါးရှင်လုံး
နောက်ထွက်စာအုပ် ဟယ်ရီပေါ်တာနှင့် အက်ဇခါဘန်အကျဉ်းသား

ဟယ်ရီပေါ်တာနှင့် လျှို့ဝှက်ခန်းဆောင် (အင်္ဂလိပ်: Harry Potter and the Chamber of Secretsဟယ်ရီပေါ်တာနှင့် လျှို့ဝှက်အခန်းဟယ်ရီပေါ်တာနှင့် မိစ္ဆာခန်းဆောင် စသည်ဖြင့်လည်း ဘာသာပြန်ဆိုကြ) သည် ဗြိတိသျှစာရေးဆရာမ ဂျေ ကေ ရိုးလင်း ရေးသားထားသည့် နာမည်ကြီး မှော်အတတ်ဆိုင်ရာ စိတ်ကူးယဉ် ဝတ္ထုရှည် တစ်ခု ဖြစ်၍၊ ထိုဝတ္ထုသည် ဟယ်ရီပေါ်တာ စာအုပ်အတွဲစဉ်တွင် ဒုတိယမြောက် ဖြစ်သည်။ ဇာတ်လမ်းမှာ ကျောင်းစင်္ကြများ၏ နံရံများပေါ်မှ သတိပေးစာတိုအတွဲများက လျှို့ဝှက်ခန်းဆောင် ပွင့်သွားပြီ ဖြစ်ပြီး၊ မှော်သွေးစစ်စစ် မိသားစုများမှ လာသူ မဟုတ်သောသူ အားလုံးကို ဆလိုင်သရင်၏ အမွေခံ မှ သုတ်သင်သတ်ဖြတ်သွားလိမ့်မည် ဟု သတိပေးထားစဉ် ဟယ်ရီပေါ်တာ၏ ဟော့ဂ်ဝပ် စုန်းကဝေအတတ်နှင့် မှော်ပညာကျောင်းတော်ကြီးတွင် ဒုတိယနှစ် ကျောင်းသားဘဝ အကြောင်း ဖြစ်သည်။ အဆိုပါ ခြိမ်းခြောက်မှုများမှာ ကျောင်းတွင် နေထိုင်သူအချို့အား ကျောက်ရုပ်ဖြစ်အောင် ပြုစားခြင်းများအပြီး တိုက်ခတ်မှုများ ဖြစ်ပေါ်ပြီးနောက် တွေ့ရခြင်း ဖြစ်၏။ ထိုနှစ်အတွင်း ဟယ်ရီနှင့် သူ၏ သူငယ်ချင်းများ ဖြစ်သည့် ရွန်နှင့် ဟာမိုင်ယွန်းနီ တို့က ထိုတိုက်ခိုက်မှုများကို စုံစမ်းစစ်ဆေး ဖော်ထုတ်ပေးခဲ့လေသည်။

ထိုစာအုပ်ကို ယူနိုက်တက်ကင်းဒမ်းတွင် ၁၉၉၈ ခုနှစ်၊ ဇူလိုင်လ ၂ ရက်တွင် ဘလွမ်းစ်ဘာရီ စာအုပ်တိုက်မှ ထုတ်ဝေခဲ့၍ ၊ အမေရိကန်ပြည်ထောင်စုတွင်မူ ၁၉၉၉ ခုနှစ်၊ ဇွန်လ ၂ ရက်တွင် စကောလာ့စတစ်မှ ထုတ်ဝေဖြန့်ချိခဲ့လေသည်။ ရိုးလင်းသည် စာအုပ်ကို အဆုံးသတ် ဇာတ်သိမ်းရန် ခက်ခဲကြောင်း တွေ့ရသော်လည်း စာအုပ်သည် ဝေဖန်ရေးဆရာများ၊ လူငယ်စာဖတ်သူများနှင့် စာပေဖြန့်ချိရေးလုပ်ငန်းများ၏ မြင့်မားသော ချီးကျူးဂုဏ်ပြုမှုနှင့် ဆုတံဆိပ်များအား လက်ခံရရှိခဲ့ပေသည်။ သို့ရာတွင် အချို့သုံးသပ်သူများကမူ ဤစာအုပ်သည် ငယ်ရွယ်သော ကလေးငယ်များအား အလွန်အမင်း ကြောက်ရွံ့စေမှုကို ဖြစ်စေသည်ဟု ယူဆကြ၏။ အတွဲစဉ်၏ အခြားဝတ္ထုများကဲ့သို့ပင် ဤ လျှို့ဝှက်ခန်းဆောင် ဝတ္ထုသည် ဘာသာရေးဆိုင်ရာ ငြင်းခုံဆွေးနွေးမှုများကို ဖြစ်စေခဲ့ပြန်သည်။ အခြားသူများက ဤစာအုပ်၏ မိမိကိုယ်တိုင် စွန့်လွှတ်အနစ်နာခံမှု ၊ လူတစ်ယောက်၏ စရိုက်နှင့် အရည်အချင်းသည် ထိုသူ၏ ရွေးချယ်မှုများမှ ရလဒ်များ ဖြစ်သည် ဆိုသော နည်းလမ်းများအား အလေးပေးမှု စသည်တို့အတွက် ချီးမွမ်းကြစဉ် ၊ အချို့သော ဘာသာရေးဆိုင်ရာ ဩဇာရှိအာဏာပိုင်များကမူ ၎င်း၏ မှော်အတတ်ပညာဆိုင်ရာများ ပါဝင်မှုကို ရှုတ်ချဝေဖန်ခဲ့ကြလေသည်။

အချို့ ဟောပြောသူများက ပုဂ္ဂိုလ်ရေးဆိုင်ရာ ကိုယ်ပိုင်လက္ခဏာများသည် ဤစာအုပ်၏ အားကြီးသော အဓိကဆိုလိုရင်းဖြစ်သည်ဟု ဆိုကြ၏။ ဤစာအုပ်များတွင် မှော်ပညာမတတ်သူများ၊ လူသားမဟုတ်သူများ၊ အသက်မရှိသူများ စသည်ဖြင့် ခွဲခြားဖော်ပြသည့် လူမျိုးရေးခွဲခြားမှုဝါဒကို ငြင်းဆိုခြင်းအား လမ်းညွှန်ပြသပေးသည်ဟု ဆိုကြသည်။ အချို့သော ဟောပြောသုံးသပ်သူများကမူ ဇာတ်လမ်းထဲတွင် သတိပေးခြင်းနှင့် ဆန့်ကျင်လျက် လှုပ်ရှားမှုနှင့် ယုံကြည်စိတ်ချနိုင်မှုတို့အား စစ်ဆေးထားခြင်းမရှိသော ဒိုင်ယာရီစာအုပ်စသော ရင်းမြစ်များမှ လာသည့် သတင်းအချက်အလက်များကို မမေးမစမ်းဘဲ လက်ခံစွက်ဖက်ခြင်းသည် စဉ်းစားဖွယ်ရှိကြောင်း ဆိုကြသည်။ အဖွဲ့အစည်းဆိုင်ရာ လုပ်ဆောင်မှုအား မိမိကိုယ်တိုင်ထမ်းဆောင်မှု အဖြစ် သရုပ်ဖော်ပြီး ၊ အရည်အချင်းညံ့ဖျင်းမှု ရှိသည် ဟူ၍လည်း ဆိုကြပြန်သည်။ ဤစာအုပ်သည် ဟယ်ရီပေါ်တာ စာအုပ်အတွဲစဉ်၏ ဆဋ္ဌမမြောက် ဝတ္ထုဖြစ်သော ဟယ်ရီပေါ်တာနှင့် သွေးနှောမင်းသား နှင့် ဆက်သွယ်ချက်အချို့ရှိသည် ဟုလည်း လူအများ သိကြလေသည်။

၂၀၀၂ ခုနှစ်တွင် ထွက်ရှိခဲ့သော ဟယ်ရီပေါ်တာနှင့် လျှို့ဝှက်ခန်းဆောင် ရုပ်ရှင်ကားသည်လည်း (ထိုခေတ်အချိန်ကာလက) အမြဲတမ်းအတွက် ကမ္ဘာ့ဝင်ငွေရရှိမှု အမြင့်မားဆုံးသော ဇာတ်ကားများစာရင်းတွင် သတ္တမမြောက် လိုက်ခဲ့သေးသည်။ ဇာတ်ကားအညွှန်းနှင့် ဝေဖန်ရေးများတွင်လည်း အများအားဖြင့် ကောင်းမွန်စွာ အထောက်အကူပြုစေခဲ့သည်။ ဝတ္ထုကို အခြေခံသော ဗွီဒီယိုဂိမ်းများလည်း မရေမရာ ပေါ်ထွက်လာခဲ့ပြီး၊ အများစုမှာ ကျေနပ်အားရဖွယ် သုံးသပ်ချက်များ ရရှိခဲ့သည်။