သောင်းတင်

ဦးသောင်းတင်
ဒုတိယဝန်ကြီး၊ ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာန
တာဝန်သက်တမ်း ၂၇ ဩဂုတ် ၂၀၁၂ – ၃၀ မတ် ၂၀၁၆
သမ္မတ	ဦးသိန်းစိန်
ကိုယ်ရေး အချက်အလက်များ
မွေးဖွား	(1960-05-27) ၂၇ မေ၊ ၁၉၆၀ မန္တလေးမြို့၊ မန္တလေးတိုင်း
လူမျိုး	မြန်မာ
ကြင်ဖော်	တင်တင်အေး
သားသမီး	သမီး ၁ ဦး
မိခင်ကျောင်း	ရန်ကုန်စက်မှုတက္ကသိုလ်၊ ရန်ကုန်ကွန်ပျူတာတက္ကသိုလ်
အလုပ်အကိုင်	စီးပွားရေးလုပ်ငန်းရှင်
ကျွမ်းကျင်မှု	ကွန်ပျူတာပညာရှင်

ဦးသောင်းတင်သည် မြန်မာ ကွန်ပျူတာပညာရှင်၊ စီးပွားရေးလုပ်ငန်းရှင်တစ်ဦးဖြစ်ပြီး ဒုတိယဝန်ကြီး (ဆက်သွယ်ရေးနှင့် သတင်းအချက်အလက်နည်းပညာ ဝန်ကြီးဌာန) အဖြစ် ၂၀၁၂ ခုနှစ် ဩဂုတ်လ ၂၇ ရက်မှ ၂၀၁၆ ခုနှစ် မတ်လ ၃၀ ရက်အထိ တာဝန်ထမ်းဆောင်ခဲ့သည်။ ဦးသောင်းတင်ကို ၁၉၆၀ ခုနှစ် မေလ ၂၇ ရက်နေ့တွင် မန္တလေးမြို့၌ မွေးဖွားခဲ့ပြီး မွေးချင်း ၆ ဦးအနက် အကြီးဆုံးဖြစ်သည်။

ပညာရေး

၁၉၇၇ ခုနှစ်တွင် အထက (၁၄) မန္တလေးမှ အခြေခံပညာအထက်တန်းအောင်မြင်ခဲ့ပြီး ဒေသကောလိပ်တွင်သင်္ချာဘာသာတွဲကို သင်ယူခဲ့ပြီး ၁၉၈၀ တွင် ရန်ကုန်စက်မှုတက္ကသိုလ်၌ အီလက်ထရောနစ် ဘာသာရပ်ကို ဆက်လက်သင်ယူခဲ့သည်။ အင်ဂျင်နီယာဘွဲ့ ရပြီးနောက် ကွန်ပျူတာသိပ္ပံ မဟာဘွဲ့ ကို ရန်ကုန်ကွန်ပျူတာတက္ကသိုလ်မှ ရရှိခဲ့သည်။

စီးပွားရေးလုပ်ငန်း

၁၉၈၆ ခုနှစ်တွင် ကေအမ်ဒီကွန်ပျူတာသင်တန်းကို ကြည့်မြင်တိုင်မြို့နယ်၊ ဦးကြွယ်ဟိုးလမ်းတွင် ဇနီးဖြစ်သူ ဒေါ်တင်တင်အေးနှင့်အတူ စတင်ဖွင့်လှစ်ခဲ့သည်။ ထို့နောက် ကေအမ်ဒီကုမ္ပဏီများအုပ်စုအဖြစ် လုပ်ငန်းများ ချဲ့ထွင်ခဲ့သည်။

နိုင်ငံရေးဘဝ

ဦးသောင်းတင်သည် သမ္မတ ဦးသိန်းစိန်လက်ထက်တွင် ၂၀၁၂ ခုနှစ် ဩဂုတ်လ ၂၇ ရက်မှ ၂၀၁၆ ခုနှစ် မတ်လ ၃၀ ရက်အထိ ဆက်သွယ်ရေးနှင့် သတင်းအချက်အလက်နည်းပညာဝန်ကြီးဌာန၊ ဒုတိယဝန်ကြီးအဖြစ် တာဝန်ထမ်းဆောင်ခဲ့သည်။

၂၀၂၁ ခုနှစ် ဖေဖော်ဝါရီလ ၂ ရက်နေ့တွင် နိုင်ငံတော်စီမံအုပ်ချုပ်ရေးကောင်စီ မှ ပြည်ထောင်စုရွေးကောက်ပွဲကော်မရှင်၏ အဖွဲ့ဝင်သစ်အတွက် ဦးသောင်းတင်အား အမိန့်အမှတ် ၇/၂၀၂၁ အားဖြင့် ခန့်အပ်ထုတ်ပြန်ခဲ့သော်လည်း၊ ၎င်း၏ ခန့်အပ်ခံရခြင်းသည် လူမှုကွန်ရက်များတွင် ပြင်းထန်သော ဝေဖန်မှုများနှင့် ကြုံတွေ့ခဲ့ရသည်။ အထူးသဖြင့် ဦးသောင်းတင် ယခင်က ဦးဆောင်ခဲ့သော KMD လုပ်ငန်းအား သပိတ်မှောက်ရန် နှိုးဆော်သံများ ထွက်ပေါ်လာခဲ့သည်။ ဤဖြစ်စဉ်နှင့်အတူ ၂၀၂၁ ခုနှစ် ဖေဖော်ဝါရီ ၂၃ ရက်တွင် စကစမှ အမိန့်အမှတ် ၈၆/၂၀၂၁ ဖြင့် ဦးသောင်းတင်အစား ဦးအောင်မိုးမြင့်အား အစားထိုးခန့်အပ်ကြောင်း နောက်ဆုံးကြေညာချက် ထုတ်ပြန်ခဲ့သည်။

လက်ရှိတာဝန်များ

1. ဥက္ကဋ္ဌ၊ KMD Group of Companies
2. Country Representative, ASEAN Business Advisory Council
3. အဖွဲ့ဝင်၊ e-Government Steering Committee
4. ဒုတိယဥက္ကဋ္ဌ၊ ပြည်ထောင်စုသမ္မတမြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များ အသင်းချုပ်

မိသားစု

ဆရာဝန်တင်ရွှေ၏ သမီးဖြစ်သူ ဒေါ်တင်တင်အေး နှင့် လက်ထပ်ခဲ့ပြီး သမီးတစ်ဦးရှိသည်။