လင်္ကာရည်ကျော်

ဝီကီပီးဒီးယား မှ
အ​ညွှန်း​သို့ ခုန်ကူးရန် ရှာဖွေရန် ခုန်ကူးမည်
လင်္ကာရည်ကျော်
မွေးဖွားရဲမြင့်ကျော်
(၁၉၆၁-၁၂-၂၀) ဒီဇင်ဘာ ၂၀၊ ၁၉၆၁ (အသက် ၅၉)
မြို့မတဲကြီးကုန်းရွာ၊ မြန်အောင်မြို့နယ်ဧရာဝတီတိုင်း
ကလောင်အမည်လင်္ကာရည်ကျော်၊ ဒေါက်တာရဲ
အလုပ်အကိုင်ကလေးအထူးကု ဆရာဝန်
ပညာရေးM.B.,B.S, M,Med.Sc (Paediatrics), MRCP (UK), MRCPCH, DCH(Glasgow), Dr.MedSc (Paediatrics), FRCP (Edin), FRCPCH
ရရှိသည့်ဆုများအမျိုးသား စာပေဆု (၂၀၀၇၊ ၂၀၀၉)[၁]သုတစွယ်စုံစာပေဆု (၂၀၁၃၊ ၂၀၁၇)

လင်္ကာရည်ကျော်သည် မြန်မာနိုင်ငံသား ကလေးအထူးကုဆရာဝန်၊ စာရေးဆရာတစ်ဦး ဖြစ်သည်။ အမည်ရင်းမှာ ဒေါက်တာ ရဲမြင့်ကျော် ဖြစ်သည်။ ဧရာဝတီတိုင်းဒေသကြီး၊ မြန်အောင်မြို့နယ်၊ မြို့မ တဲကြီးကုန်းကျေးရွာ၊ အဖဦးတင်ညွန့်၊ အမိဒေါ်မြရီ တို့မှ ၁၉၆၁-ခုနှစ်၊ ဒီဇင်ဘာလ (၂၀)ရက်နေ့တွင် မွေးဖွားသည်။

ရန်ကုန်မြို့တွင် ကြီးပြင်းခဲ့ပြီး အ.ထ.က(၁) လမ်းမတော်တွင် ပညာသင်ကြားခဲ့သည်။

၁၉၇၉-ခုနှစ်တွင် အမှတ်(၂) ဒေသကောလိပ်၊ ရန်ကုန်တိုင်းမှ ပုံနှိပ်ထုတ်ဝေရေး အတတ်ပညာ ဒီပလိုမာ ရရှိခဲ့သည်။ ၁၉၈၀-မှ ၁၉၈၅ အတွင်း ဆေးတက္ကသိုလ် (၁) ရန်ကုန် နှစ်လည်မဂ္ဂဇင်း ကော်မတီ၏ တာဝန်ခံ စာတည်းအဖြစ် ဆောင်ရွက်ရင်း လင်္ကာရည်ကျော် အမည်ဖြင့် ဝတ္ထု၊ ကဗျာများ စတင်ရေးသားသည်။ ၁၉၈၅ တွင် အမ်ဘီဘီအက်စ် ဘွဲ့ရရှိပြီးနောက် ၁၉၈၆-၈၇ အတွင်း ဆေးသုတေသန ဦးစီးဌာနတွင် ကွင်းဆင်းသုတေသန အရာရှိတာဝန် ထမ်းဆောင်သည်။

၁၉၈၇-ခုနှစ်မှ ၁၉၉၀ အတွင်း ဗိုလ် အဆင့်ဖြင့် တပ်မတော်တွင် ဆေးမှူးတာဝန် ထမ်းဆောင်ရင်း ရှမ်းပြည်နယ်မွန်ပြည်နယ်နှင့် ကရင်ပြည်နယ် ရှေ့တန်းစစ်မျက်နှာများတွင် အနေကြာခဲ့သည်။ ၁၉၉၀ တွင် အရပ်ဘက် တာဝန်ပြန်လည် ထမ်းဆောင်သည်။

၁၉၉၀-ခုနှစ်မှ ၁၉၉၁ အတွင်း သထုံမြို့နယ် ပြည်သူ့ဆေးရုံတွင် လက်ထောက်ဆရာဝန် တာဝန်ထမ်းဆောင်ခဲ့ပြီး ၁၉၉၁ မှ စ၍ ဘွဲ့လွန်ဆေးပညာ သင်တန်းများ ဆက်တိုက်တက်ရောက်ခဲ့သည်။ ၁၉၉၃-ခုနှစ်တွင် ဆေးတက္ကသိုလ်(၁) ရန်ကုန်မှ M,Med.Sc(Paediatrics) ဘွဲ့ ရရှိခဲ့သည်။ ၁၉၉၇-ခုနှစ်မှ ၁၉၉၉ အတွင်း UK နိုင်ငံသို့ ပညာတော်သင် သွားရောက်ပြီး MRCP (UK) ဘွဲ့၊ MRCPCH ဘွဲ့နှင့် DCH(Glasgow)ဘွဲ့များ ရယူခဲ့သည်။ ၂၀၀၅-ခုနှစ်တွင် ဆေးတက္ကသိုလ်(၁) ရန်ကုန်မှ Dr.MedSc(Paediatrics) ပါရဂူဘွဲ့ကို၎င်း၊ ၂၀၀၆-ခုနှစ်တွင် Royal College of Physicians of Edinburgh မှ FRCP(Edin)ဘွဲ့ကို၎င်း ချီးမြှင့်ခဲ့သည်။ ၂၀၁၅ ခုနှစ်တွင် Royal College of Paediatrics and Child Health, UK မှ FRCPCH ဘွဲ့ ချီးမြှင့် ခဲ့သည်။

၂၀၀၀-ပြည့်နှစ်မှ စ၍ နာမည်ရင်းဖြင့်ရေးသားသော ကလေးကျန်းမာရေးပညာ ဆောင်းပါးများဖြင့် စာပေနယ်သို့ ပြန်လည်ဝင်ရောက်ခဲ့သည်။ ၂၀၀၃-ခုနှစ်တွင် ကျော်သက်ခိုင်စာပေမှ ထုတ်ဝေသော ကျန်းမာပြည့်ကြွယ်၊ ရင်သွေးငယ် စာအုပ်မှာ ပထမဦးဆုံး ထုတ်ဝေသော အင်တာဗျူး ဆောင်းပါးပေါင်းချုပ် ဖြစ်ပြီး ၂ဝဝ၄ ခုနှစ်တွင် နရသူခိ သုခချမ်းသာ မဂ္ဂဇင်းတွင် ပါရှိသော "အချစ်ကိုပင်လျှင် လျှပ်တပြတ်မျှသာ" ဝတ္ထုတိုဖြင့် စာပေနယ်ထဲသို့ ဝင်ရောက်လာခဲ့သည်။ ၂၀၀၆-ခုနှစ်တွင် ရတနာသိုက်စာပေမှ ထုတ်ဝေသော ပထမအိပ်မက် ဝတ္ထုတိုများ စာအုပ်မှာ ပထမဦးဆုံး ထုတ်ဝေသော ဝတ္ထုတိုပေါင်းချုပ် စာအုပ်ဖြစ်သည်။ ၂၀၀၇-ခုနှစ်တွင် နန်းဒေဝီစာပေမှ ထုတ်ဝေသော ကလေးကျန်းမာရေးဆိုင်ရာ အယူအဆ အမှားများ စာအုပ်မှာ ပထမဦးဆုံး ပင်ကိုယ်ရေး ဆောင်းပါးပေါင်းချုပ် ဖြစ်ပြီး ကြိုးကြာတောင်ပံခတ်သံ စာအုပ်မှာ ပထမဦးဆုံး ဝတ္ထုရှည် စဆုံးဖြစ်သည်။

ကြိုးကြာတောင်ပံခတ်သံ အား ဒါရိုက်တာ စင်ယော်မောင်မောင်မှ ရုပ်ရှင်အဖြစ်ရိုက်ကူးကာ ၂၀၀၉-ခုနှစ် မြန်မာ့ ရုပ်ရှင် ထူးချွန်ဆု (ဇာတ်ကားဆု)ကို ဇင်ယော်ရုပ်ရှင် ထုတ်လုပ်ရေးမှ ရရှိခဲ့သည်။ ၂၀၁၄ ခုနှစ်တွင် ကြိုးကြာတောင်ပံခတ်သံ ကိ တက္ကသိုလ်များ မြန်မာစာအဖွဲ့က ဝိဇ္ဇာဘွဲ့ (မြန်မာစာ) အတွက် ပြဌာန်းခဲ့သည်။၂ဝဝ၉ ခုနှစ်တွင် ထုတ်ဝေသော ဒုတိယမြောက် ဝတ္ထုရှည် ဒေါက်တာရွှေသွေးနှင့်မပန်းမှုံ သည်လည်း အမျိုးသား စာပေဆု (ဝတ္ထုရှည်) ရရှိခဲ့သည်။ ၂၀၀၀ပြည့်နှစ်မှ စ၍ ကလေးကျန်းမာရေး ပညာပေးစာအုပ်များရေးသားထုတ်ဝေခဲ့ပြီး မမွေးဖွားမီမှ အရွယ်ရောက်သည်အထိ ကလေးပြုစုစောင့်ရှောက်နည်းများ စာအုပ်နှင့် ၂၀၁၃ ခုနှစ်တွင် သုတစွယ်စုံစာပေဆု ကို အသုံးချသိပ္ပံ ဘာသာရပ်ကဏ္ဍ မှရရှိခဲ့သည်။ ဒုတိယအကြိမ် အဖြစ် ၂၀၁၇ ခုနှစ်တွင် 'သား သို့ ' စာအုပ်ဖြင့် ယင်းဆုကို လူငယ်စာပေ ကဏ္ဍမှ ထပ်မံရရှိခဲ့သည်။

ယခုအခါ ဆရာသည် ပါမောက္ခ၊ ဌာနမှူး၊ ကလေးကျန်းမာပညာဌာန၊ ဆေးတက္ကသိုလ်(၁) ရန်ကုန်၊ တာဝန်ခံ ကလေးအထူးကုဆရာဝန်ကြီး၊ ကလေးဆေးရုံကြီး ရန်ကုန် တာဝန်မှ အငြိမ်းစား ယူခဲ့ပြီး အာစီယံကလေးအထူးကုဆရာဝန်များအသင်းချုပ် ဥက္ကဌ တာဝန်ကို ဆက်လက်ထမ်းဆောင်ရင်း ရသ၊ သုတ နှင့် ဓမ္မစာပေများ စဉ်ဆက် မပြတ် ရေးသားလျက်ရှိသည်။

ထုတ်ဝေပြီးသောစာအုပ်များ[ပြင်ဆင်ရန်]

လင်္ကာရည်ကျော် ကလောင်အမည်ဖြင့် ထုတ်ဝေထားသည့် စာအုပ်များမှာ အောက်ပါအတိုင်း ဖြစ်သည်။

ဝတ္ထုရှည်[ပြင်ဆင်ရန်]

  1. ကြိုးကြာတောင်ပံခတ်သံ (၂၀၀၇၊ ၂၀၀၄)
  2. ဒေါက်တာရွှေသွေးနှင့်မပန်းမှုံ (၂၀၀၉၊ ၂၀၁၀၊ ၂၀၁၂)
  3. နေဝင်အိပ်တန်းတက် (၂၀၁၀)
  4. ချစ်စရာအိမ်ကလေး (၂၀၁၁)
  5. တိမ်တွေတောင်တွေနှင့်ခရီးသည် (၂၀၁၂)
  6. တစ်ပွင့်ကျန် (၂၀၁၂)
  7. တိမ်ညိုမှာ ငွေဇာကွပ်ကယ်နှင့် (၂၀၁၃)
  8. ပန်းဒေါင်း (၂၀၁၄)
  9. ကျောက်စရစ်ခဲကလေးများမှတစ်ဆင့် (၂၀၁၅)

ဝတ္ထုတိုပေါင်းချုပ်[ပြင်ဆင်ရန်]

  1. ပထမအိမ်မက်ဝတ္ထုတိုများ (၂၀၀၇၊ ၂၀၁၀)
  2. သမားလည်ပြန်ဝတ္ထုတိုများ (၂၀၀၉)
  3. သိင်္ဂါရအလှည့်ဝတ္ထုတိုများ (၂၀၁၀)
  4. အမြူတေရတနာ ဝတ္ထုတိုများ (၂၀၁၀)
  5. ဆရာ့နှလုံးသားဝတ္ထုတိုများ (၂၀၁၁)
  6. နေညိုကမ်းနဖူး ဝတ္ထုတိုများ (၂၀၁၁)
  7. ဝိုးတဝါးအတွေးစများနှင့် ဝတ္ထုတိုများ (၂၀၁၁)
  8. နှလုံးသားညာဘက် အပေါ်ခန်းဝတ္ထုတိုများ (၂၀၁၂)

ဓမ္မဆောင်းပါး[ပြင်ဆင်ရန်]

  1. မင်္ဂလာရှိသော အောင်မြင်မှု

ပါမောက္ခ ရဲမြင့်ကျော်(ဒေါက်တာရဲ) ကလေးအထူးကုဆရာဝန်ကြီး အနေဖြင့် ထုတ်ဝေထားသော စာအုပ်များမှာ အောက်ပါအတိုင်းဖြစ်သည်။

ဆောင်းပါးပေါင်းချုပ်[ပြင်ဆင်ရန်]

  1. ကလေးကျန်းမာရေးဆိုင်ရာ အယူအဆမှားများ (၂၀၀၇၊ ၂၀၁၂)
  2. ရင်သွေးရတနာ ကလေးများအတွက် (၂၀၀၈)
  3. ရင်သွေးတို့ ရှင်သန်ကျန်းမာဖို့ (၂၀၀၈)
  4. စိန်တုံးကြီးများအကြောင်း (၂၀၀၉)
  5. ရှေးဦးကလေးသူနာပြုစုနည်း (၂၀၀၉)
  6. ကလေးနှလုံးရောဂါများအကြောင်း (၂၀၀၉)
  7. ဒါစိုးရိမ်စရာလားနှင့်စိုးရိမ်စရာများ (၂၀၀၉)
  8. မမွေးဖွားမီမှ အရွယ်ရောက်သည်အထိ ကလေးပြုစု စောင့်ရှောက်နည်းများ (၂၀၁၁)
  9. စာရေးဆရာ ဆရာဝန်၏ အရူးလွယ်အိတ် (၂၀၁၁)
  10. ကလေးဆရာဝန်၏ ဆရာဝန်ကလေးဘဝ
  11. အရောင်စုံအသွေးစုံ ကလေးကျန်းမာရေးဆောင်းပါးများ (၂၀၁၁)
  12. လှုပ်လှုပ်ရှားရှား ကလေးကျန်းမာရေးဆောင်းပါးများ (၂၀၁၁)
  13. လူငယ်တွေဖတ်စေချင်သည့် ကျွန်တော့်ဆောင်းပါးများ (၂၀၁၂)
  14. နောက်ဆက်တွဲ ကလေးကျန်းမာရေး အယူအဆမှားများ (၂၀၁၂)
  15. တကယ်နော်ခက်သည့် အရွယ်တွေအကြောင်း (၂၀၁၂)
  16. နောက်ဆက်တွဲ ကလေးကျန်းမာရေး အယူအဆမှားများ (၂၀၁၄)

ဘာသာပြန်ဆောင်းပါး[ပြင်ဆင်ရန်]

  1. ခေါင်းဆောင်ကောင်းဖြစ်မည့် စိတ်နေသဘောထား (၂၀၀၉)

ကိုးကား[ပြင်ဆင်ရန်]