တရုတ်၏နောက်ဆုံးသတိပေးချက်

စကားပုံ၏အရင်းအမြစ်ဖြစ်သော ထိုင်ဝမ်ရေလက်ကြားသို့ ကင်မန်းမှမြင်ကွင်း

တရုတ်နိုင်ငံ၏နောက်ဆုံးသတိပေးချက် (အင်္ဂလိပ်: China's final warning၊ ရုရှား: последнее китайское предупреждение) သည် ဆိုဗီယက်ခေတ်က ပေါ်ပေါက်လာသော ရုရှား စကားပုံဖြစ်သည်။ လက်တွေ့အကျိုးဆက်များမရှိသော သတိပေးချက်မျိုးကို ရည်ညွှန်းရာတွင်သုံးစွဲကြသည်။

ပေါ်ပေါက်ပုံ

ထိုင်ဝမ်ရေလက်ကြားပြဿနာများကြောင့် ၁၉၅၀ နှင့် ၁၉၆၀ အတွင်း တရုတ်ပြည်သူ့သမ္မတနိုင်ငံ–အမေရိကန် ဆက်ဆံရေးမှာ တင်းမာလျက်ရှိခဲ့သည်။ ထိုင်ဝမ်ရေလက်ကြားကို အမေရိကန်စစ်ဂျက်တိုက်လေယာဉ်များက ပုံမှန်ကင်းလှည့်လေ့ရှိပြီး ယင်းရေလက်ကြားတွင် ယင်းတိုက်လေယာဉ်များ၏ စစ်ရေးလေ့ကျင့်မှုအတွက် "နောက်ဆုံးသတိပေးချက်" အသွင်ဖြင့် တရုတ်ကွန်မြူနစ်ပါတီမှ အမေရိကန်၏လုပ်ဆောင်ချက်များကို သပိတ်မှောက်ခဲ့သည်။ သို့ရာတွင် ထို"နောက်ဆုံးသတိပေးချက်" ကိုလျစ်လျူရှုခြင်းကြောင့် မည်သည့်အကျိုးဆက်များမရှိခဲ့ပေ။ ဒုတိယ ထိုင်ဝမ်ရေလက်ကြားအရေးအခင်းအတွင်း ၁၉၅၈ စက်တင်ဘာ ၇ ရက်တွင် တရုတ်ပြည်သူ့သမ္မတနိုင်ငံသည် အမေရိကန်နိုင်ငံသို့ ၎င်းတို့၏စစ်လေယာဉ်ပျံသန်းမှုများအတွက် ပထမဆုံးသော "နောက်ဆုံးသတိပေးချက်"ကို ထုတ်ပြန်ခဲ့သည်။ ထိုအချိန်က အမေရိကန်နိုင်ငံသည် ထိုင်ဝမ်ကျွန်းရှိ တရုတ်သမ္မတနိုင်ငံကိုသာ "တရုတ်နိုင်ငံ"အဖြစ် အသိအမှတ်ပြုခဲ့ရာ တရုတ်ပြည်သူ့သမ္မတနိုင်ငံ ထိန်းချုပ်ထားသည့်ရေပြင်တွင် ကင်းထောက်ပျံသန်းမှုများပြုလုပ်ခဲ့သည်။ တရုတ်ပြည်သူ့သမ္မတနိုင်ငံသည် အဆိုပါဖြစ်ရပ်များကို မှတ်တမ်းတင်ပြီး ဖြစ်ပွားခဲ့သည့် ဖြစ်ရပ်တိုင်းအတွက် သံတမန်လမ်းကြောင်းများမှတစ်ဆင့် "နောက်ဆုံးသတိပေးချက်များ" ထုတ်ပြန်ခဲ့လေရာ ၁၉၆၄ ခုနှစ်အပြီးတွင် ထို"နောက်ဆုံးသတိပေးချက်"ပေါင်း ၉၀၀ ကျော်ရှိခဲ့သည်။

ဆက်စပ်ဖတ်ရန်

• တရုတ်လူမျိုးတို့၏ခံစားချက်များကိုထိပါးခြင်း
• စက္ကူကျား