ပဲခူး-စစ်တောင်းတူးမြောင်း

ဝီကီပီးဒီးယား မှ
အ​ညွှန်း​သို့ ခုန်ကူးရန် ရှာဖွေရန် ခုန်ကူးမည်

ပဲခူး-စစ်တောင်းတူးမြောင်းသည် အင်္ဂလိပ်တို့ မြန်မာပြည်တွင် ပထမဆုံး ဖောက်လုပ်ခဲ့သော တူးမြောင်းဖြစ်သည်။ ပဲခူးမြစ်နှင့် စစ်တောင်းမြစ်ကို ဆက်သွယ်မိစေရန် ဆာအက်ရှ လေအီဒင် (Sir Ashly Eden) အမိန့်အရ ပဲခူး-စစ်တောင်းတူးမြောင်းကို ခရစ်သက္ကရာဇ် ၁၈၇၃-၇၄ ခုနှစ်တွင် စတင်ဖောက်လုပ်ခဲ့သည်။ တူးမြောင်းသည် စစ်တောင်းမြစ်ကွေ့ပေါ်ရှိ မြစ်ကျိုးရွာမှနေ၍ ဝေါမင်းရွာနှင့် သနပ္ပင်မြို့များကို ဖြတ်သန်းကာ ပဲခူးမြို့တောင်ဘက် ပဲခူးမြစ်ပေါ်ရှိ တာဝရွာနှင့် လာရောက် ဆက်သွယ်ထားခြင်း ဖြစ်သည်။ တူးမြောင်း၏ အလျားသည် (၃၈)မိုင်ရှည်၍ တူးမြောင်း၏ ထိပ်နှစ်ဖက်တွင် အရှည် (၂၄၀)ပေနှင့် အကျယ် ပေ(၃၀)စီ ရှိသော ရေတံခါး တစ်ခုစီ တပ်ဆင်ထားသည်။ ကုန်ကျငွေ စုစုပေါင်းမှာ ၁၉၀၃-၄ခုနှစ်အထိ ၄၄-သိန်းကျပ် ဖြစ်သည်။ တူးမြောင်းကို ခရစ်သက္ကရာဇ် ၁၈၇၈-၈၈ ခုနှစ်တွင် စတင်ဖွင့်လှစ်ခဲ့ပြီး အသုံးပြုခဲ့သည်။

စစ်တောင်းမြစ်အတွင်းမှ မျောချလာသော သစ်များကို ဤတူးမြောင်းမှ တစ်ဆင့် ပဲခူးမြစ်အတိုင်း ရန်ကုန်မြို့သို့ ရောက်သည်အထိ ဖောင်ဖွဲ့ယူဆောင်နိုင်ပေသည်။ ပဲခူးမြစ်တစ်ဝိုက်နှင့် စစ်တောင်းမြစ်တစ်ဝိုက်မှ ဆန်စပါးတို့ကိုလည်း ဤတူးမြောင်းမှပင် အလွယ်တကူ သယ်ဆောင်နိုင်ပေသည်။ တူးမြောင်းသည် ရန်ကုန်-မော်လမြိုင် အဝေးပြေးလမ်းမကြီးသစ်ကြီးနှင့် ပဲခူး သန်လျင်လမ်းမကြီးတို့ဘေးမှ ဖြတ်သန်းသွားသည်။


ကိုးကား[ပြင်ဆင်ရန်]

  1. လွင်မောင် ရေးသော မှတ်တမ်းသမိုင်း ပဲခူး-မကွေးတိုင်း၊ ၁၉၇၅၊ ဇူလိုင်လ၊ စာ-၂၄