ပင်လယ်မှိုကောင်

ဝီကီပီးဒီးယား မှ
Jump to navigation Jump to search

ပင်လယ်မှိုကောင်[ပြင်ဆင်ရန်]

ပင်လယ်ကမ်းခြေတစ်လျှောက် ရေအောက် ကျောက်ဆောင် များအကြားတွင်၊ ပန်းပွင့်၊ အထူးသဖြင့် မှိုပွင့်တူသော အရာ များကို တွေ့ရတတ်သည်။ ပဌမတွင် ယင်းတို့ကို အပင်များဟု ထင်ရသော်လည်း၊ စင်စစ် အပင်မဟုတ်ဘဲ၊ ပင်လယ်မှိုကောင် (ဝါ) အနဲမနီးကောင်ဟု ခေါ်သော ပင်လယ် သတ္တဝါ တစ်မျိုးသာ ဖြစ်ပေသည်။ ယင်းသတ္တဝါတို့သည် ရေအောက် ကျောက်ဆောင်များ၊ ခရုခွံများတွင် မြဲမြံစွာ တွယ်ကပ်နေ တတ်၍၊ ဆွဲနုတ်လျှင် အပို်င်းပိုင်းပြတ်၍ ပါလာတတ်လေသည်။ ပင်လယ်မှိုကောင်တို့သည် ပင်လယ်ခူ (ငထီး)၊ သန္တာ ကောင်များနှင့် အမျိုးနွှယ်၍၊ 'အက်တီနိုဝါ' မျိုးပေါင်းတွင် ပါဝင်သော ပင်လယ်သတ္တဝါမျိုး ဖြစ်သည်။ ပုံပန်းသဏ္ဌာန်မှာ တို၍ တုတ်သော ပင်စည်နှင့် တူသည်။ ပင်စည်၏ ထိပ်တွင် ပါးစပ်ရှိသည်။ ပါးစပ်၏ ပတ်လည်တစ်ဝိုက်တွင် ဂန္ဓမာပန်း၏ ပွင့်ဖတ်များနှင့် တူသော အာရုံမှင် (စမ်းလက်ဖမ်းလက်) အမြောက်အမြားရှိသည်။ ပင်လယ်မှိုကောင်းတို့သည် အရွယ် အစားစား ရှိကြသည်။ ထိပ်ဝ၏ အချင်းသည် ၁ လက်မ၏ ၄ ပုံ ၁ ပုံမှ တစ်ပေ ကျော် (အချို့ဒေသတွင် ၃ ပေကျော် အထိရှိသည်။ အစိမ်း၊ အဝါ၊ အဖြူ၊ အညို၊ မရမ်း၊ လိမ္မော် စသည်ဖြင့် အရောင် မျိုးစုံလည်း ရှိသည်။ တစ်ခါတစ်ရံ တစ်ကောင်တည်းမှာပင် အရောင် နှစ်မျိုး သုံးမျိုး ရှိတတ်သည်။ အထူးသဖြင့် အပူပိုင်း ဒေသမှ ပင်လယ်မှိုကောင်တို့သည် တောက်ပသော အရောင်များ ရှိကြသည်။ ထိုကြောင့် ပင်လယ်မှိုကောင်များရှိရာ ပင်လယ် ရေအောက်ကို မြင်လိုက်ရလျှင်၊ ရောင်စုံပန်းများ ပွင့်နေသော ဥယျာဉ်တစ်ခုကို မြင်တွေ့ရ ဘိသကဲ့သို့ မှတ်ထင်ရလေသည်။ ပင်လယ်မှိုကောင်တို့သည် အသားစား သတ္တဝါများ ဖြစ်ကြ သည်။ ယင်းတို့၏ အာရုံမှင်များ၏ အဖျားတွင် အဆိပ်ရှိသော အမျှင်များရှိသည်။ ယင်းတို့ အနီးသို့ ပုစွန်ဆိတ်၊ ငါးစသည် တို့ ရောက်လာလျှင်၊ အဆိပ်မျှင်များကို ထုတ်၍ အဆိပ်ထိ စေ ပြီးသော်၊ ယင်းတို့၏ ပါးစပ်တွင်းသို့ ရစ်ပတ်သိမ်း သွင်း၍ စားသောက်ကြလေသည်။ ပင်လယ်မှိုကောင်တို့ကို ရေတိမ်ရေနက်နှစ်မျိုးလုံးတွင် တွေ့နိုင်သည်။ အုပ်ဖွဲ့၍သော်၎င်း၊ အထီးတည်းသော်၎င်း နေတတ်သည်။ မျိုးပြန့်ပွားရေးအတွက် နည်းအမျိုးမျိုးဖြင့် ပေါက်ပွားကြရာ၊ များသောအားဖြင့် ဥမှ ပေါက်ပွားကြသည်။ အခြားပေါက်ပွားနည်းမှာ ကွဲပွားခြင်း ဖြစ်သည်။ ကွဲပွားရာ၌ အရွယ်ရောက်ပြီး ပင်လယ်မှိုကောင်၏ အလယ်တည့်တည့် အလယ်မှ အောက်သို့ နှစ်ခြမ်း ကွဲသွား၍၊ နှစ်ကောင်ဖြစ်လာ သည်။ ထိုနှစ်ခြမ်းကွဲသွားသော အခြမ်းမှ နောက်ထပ် နှစ်ခြမ်း ကွဲပြီးလျှင်၊ နှစ်ကောင် ဖြစ်လာပြန်လေသည်။ ယင်းသို့ဖြင့် တစ်ခြမ်းတစ်ခြမ်းမှ နှစ်ကောင် ပွားသွားလေသည်။ အခြား တစ်နည်းမှာ အဖူးကူးခြင်း ဖြစ်၍၊ ပင်လယ်မှိုကောင်၊ အောက်ခြေမှ အဖူးထွက်သကဲ့သို့ ထွက်လာပြီးလျှင်၊ သီးခြား ဖြစ်သွားကာ အကောင်ပွားခြင်း ဖြစ်လေသည်။ ယင်းတို့သည် တစ်နေရာတည်းတွင် တစ်သမတ်တည်း မြဲမြံစွာ တွယ်၍သာ နေမည် မဟုတ်ချေ။ တဖြည်းဖြည်း ရွေ့သွားနိုင်ကြပေသည်။ ပင်လယ်မှိုကောင်တို့တွင် အရိုးအသားဟူ၍ မရှိဘဲ၊ ပျော့အိပျော့နဲ့ ခန္ဓာကိုယ် ရှိကြသည်။ ယင်းတို့ သေသည့်အခါ အစအန မကျန် ကြေမွ ပျက်စီးသွားသည်။ ပင်လယ်မှိုကောင် တို့သည် နှစ်ပေါင်း ၅ဝ မှ ၆ဝ အထိ အသက်ရှည်ကြလေ သည်။[၁]

ကိုးကား[ပြင်ဆင်ရန်]

  1. မြန်မာ့စွယ်စုံကျမ်း၊ အတွဲ( )