ကဗျာဝကမ်းခြေ

ကဗျာဝကမ်းခြေ
ကဗျာဝကမ်းခြေ
ကိုဩဒိနိတ်: 15°03′47″N 97°47′17″E
နိုင်ငံ	မြန်မာ
ပြည်နယ်	မွန်ပြည်နယ်
မြို့နယ်	ရေးမြို့နယ်
ကျေးရွာ	ကဗျာဝ
အချိန်ဇုန်	မြန်မာစံတော်ချိန် (UTC6:30)

ကဗျာဝကမ်းခြေ သည် မြန်မာနိုင်ငံ၊ မွန်ပြည်နယ်၊ မော်လမြိုင်ခရိုင်၊ ခေါဇာမြို့၊ ကဗျာဝကျေးရွာတွင် တည်ရှိသည့် ပင်လယ်ကမ်းခြေ တစ်ခု ဖြစ်သည်။ ရေးမြို့နှင့် မိုင် ၂၀ အကွာတွင် တည်ရှိပြီး ကမ်းခြေသို့ ကားဖြင့် ၄၅ မိနစ်ခန့် သွားရောက်နိုင်သည်။ ကမ်းခြေသို့ နေ့စဉ် လာရောက်လည်ပတ်သူများရှိပြီး ရုံးပိတ်ရက်များနှင့် အခါကြီးရက်ကြီးများတွင် ၅၀ဝ၀ ကျော်ခန့် လာရောက်လည်ပတ်ကြသည်။ ကမ်းခြေအလျားမှာ ကဗျာဝကျေးရွာအနီးမှ တောင်ဘက် မန်ကျည်းချောင်းဝထိ အရှည် ၈မိုင်ခန့်ရှိသည်။

ရေးမြို့နှင့် မဝေးသော်လည်း ယခင်က နယ်မြေလုံခြုံမှု မရှိခြင်း၊ လမ်းပန်းဆက်သွယ်ရေး မကောင်းခြင်းတို့ကြောင့် အပန်းဖြေသူ နည်းပါးခဲ့သည်။ ကဗျာဝကမ်းခြေဟိုတယ်နှင့် ပင်လယ်ကမ်းခြေ ခရီးသွားလုပ်ငန်းစီမံကိန်း ဖော်ဆောင်ရန် ၂ဝ၁၄ ခုနှစ် စက်တင်ဘာလက မွန်ပြည်နယ် လွှတ်တော်၌ အဆိုပြုတင်သွင်းခဲ့ကာ ၂ဝ၁၅ ခုနှစ် မတ်လတွင် စီမံကိန်းကို စတင်အကောင်အထည်ဖော်ခဲ့သည်။

ထိန်းသိမ်းစောင့်ရှောက်မှု

ကမ်းခြေအား စနစ်တကျ ကြီးကြပ်ဆောင်ရွက်နိုင်ရန်အတွက် ကဗျာဝကမ်းခြေ သဘာဝဝန်းကျင် သန့်ရှင်းရေးနှင့် ထိန်းသိမ်းရေးကော်မတီကို ၂၀၁၇ ခုနှစ် နိုဝင်ဘာလတွင် ဖွဲ့စည်းခဲ့သည်။ ယင်းကော်မတီတွင် ရေးမြို့နယ် လွှတ်တော်ကိုယ်စားလှယ် ၅ ဦးနှင့် မြို့နယ်အုပ်ချုပ်ရေးမှူးတို့မှ နာယကအဖြစ်ပါဝင်ပြီး ဥက္ကဋ္ဌအဖြစ် ခေါဇာမြို့အုပ်ချုပ်ရေးမှူးက ဆောင်ရွက်ပြီး ဌာနဆိုင်ရာများ၊ ရပ်မိရပ်ဖများ၊ လူမှုရေးအဖွဲ့အစည်းများအပါအဝင် စုစုပေါင်း ၂၂ ဦးဖြင့် ဖွဲ့စည်းထားသည်။

ခရီးသွားလုပ်ငန်း စီမံကိန်း

ကဗျာဝကမ်းခြေ ဟိုတယ်နှင့် ပင်လယ်ကမ်းခြေ ခရီးသွားလုပ်ငန်း စီမံကိန်းကို Aurun Company Limited က ၂ဝ၁၅ ခုနှစ် မတ်လတွင် စတင်ဆောင်ရွက်ခဲ့သည်။ စီမံကိန်းအရ ကဗျာဝကမ်းခြေကို နိုင်ငံတကာအဆင့်မီ ကမ်းခြေအဖြစ် မြှင့်တင်ပြီး ကမ်းခြေ၌ စားသောက်ဆိုင်များ၊ ဟိုတယ်ဇုန်များ၊ အပန်းဖြေစခန်းများ၊ သယံဇာတနှင့် ဘူမိဗေဒပြတိုက်၊ Speed Boat များဖြင့် အပန်းဖြေနိုင်ရန်နှင့် ခရီးသွားဧည့်သည်များ လေ့လာနိုင်ရန် မွန်စာပေနှင့် ယဉ်ကျေးမှုပြတိုက်တို့ ပါဝင်မည်ဖြစ်သည်။

စီမံကိန်းကြောင့် ကဗျာဝကျေးရွာရှိ အချက်အချာကျသည့် နေရာများတွင် အိမ်ခြံမြေဈေးများ အဆ ၅၀ ခန့် မြင့်တက်သွားခဲ့သည်။