ကင်းဘဲလမ်း

ကင်းဘဲလမ်းသည် ရန်ကုန်မြို့ ၊ ဗဟန်းမြို့နယ်၌ တည်ရှိပြီး၊ ယခုအခါ ငါးထပ်ကြီးဘုရားလမ်းဟု အမည်တွင်သည်။

ရာဇဝင်သမိုင်း

ရာဇဝင်အဆိုအတိုင်း ဆာ-အာ-ချီဘော ကင်းဘဲကို အမှတ်တရဖြစ်စေဖို့ မှည့်ခေါ်ထား၏။ ၎င်းသည် ၁၈ဝဝ-၁၈ဝ၃ ခုနှစ်လောက်က အင်းဝကို သံအဖြစ်နှင့် သွားရသော ကာနယ်ဆိုင်း၏လက်အောက်ခံအမှုထမ်း ရိုးရိုးတစ်ဦးဖြစ်သူ မစ္စတာကင်းဘဲဖြစ်ဟန်တူ၏။ ၁၈၂၄ ခုနှစ်၊ ပထမစစ်ဖြစ်စဉ် မြန်မာပြည်ကို ပထမဆုံး စတိုက်သော စစ်တပ်အုပ်ချုပ်လာသော ဗိုလ်ချုပ်ကြီးသည် ဤပုဂ္ဂိုလ်ပင် ဖြစ်၏။ ရန္တပို စာချုပ်အရ ပထမစစ်ပွဲ ပြီး၍ အင်္ဂလိပ်များ ထွက်ခွာသွားသည့် ၁၈၂၆ ခုနှစ်၊ ဒီဇင်ဘာလ ၉ ရက်နေ့အထိ အင်္ဂလိပ်စစ်တပ်ကို ထိုသူပင်အုပ်ချုပ်သွားလေသည်။ ဤသို့ ၂ နှစ်နှင့်၇ လခန့် အုပ်ချုပ်သွားသည့် အတွင်း ထူးဆန်းသောအချက်ကြီး ၂ ချက် တွေ့ရ၏။

ပထမတစ်ချက်ကား မြန်မာနှင့်မွန်ကို ရန်တိုက်ပေး၏။ ရန်တိုက်ပေးပုံကား ၁၈၂၄ ခုနှစ်၊ ဒီဇင်ဘာလ အတွင်းမှာ ဤစစ်ဗိုလ်ကြီးက အမိန့်ပြန်တမ်းတစ်ခု ထုတ်ထားရာ၌ "မွန်လူမျိုးတို ့သည် အင်္ဂလိပ်အလံတော် အောက် ခိုလှုံကြ၊ အသင်တို့အထဲက အကြီးအကဲရွေးချယ်ကြတော့၊ သင်တို့ ရွေးချယ်သောသူအား ကျွန်ုပ်တို့က အသိအမှတ်ပြုမည်" စသည်ဖြင့် ရန်ကုန်ရာဇဝင်တွင် ပါရှိလေသည်။

ဒုတိယအချက်ကား ဆာကင်းဘဲအုပ်ချုပ်သော အင်္ဂလိပ်စစ်တပ်များ ရန်ကုန်မြို့ကို သိမ်းထားခိုက် ဘုရားပုထိုးနှင့် ဆိုင်သော ရွှေဆင်းတု၊ ငွေဆင်းတုများကို အဆီးအတားမရှိ ဗရမ်းဗတာပြုကြလေသည်။ ရွှေတိဂုံစေတီ၌ တပ်စွဲ ရသော စစ်တပ်သည် တစ်ညတည်း ရွှေငွေ ဆင်းတုများ ရရှိသဖြင့် အရာရှိတစ်ဦးအား ၃၀၀ နှင့်ရောင်းချ၏။ ထိုအရာရှိက ကာလကတ္တားသို့ တစ်ဆင့်ရောင်းချရာ အတော်ပင် မြတ်သည်ဆို၏။ ယခုကဲ့သို့ ဘုရားနှင့်ဆင်းတုတော်များကို မရိုးမသေပြုမူဖျက်ဆီးကြသည်များကို အုပ်ချုပ်သူ ဆာအာချီ ဘော်လ်ကင်းဘဲသည် တားလည်း မတားမြစ်၊ ပိတ်လည်း မပိတ်ပင်ရုံသာမဟုတ်၊ သူ ကိုယ်တိုင်ကလည်း အားပေး၊ ရွှေတိဂုံဘုရားကြီး ဌာပနာဖောက်ရာတွင်လည်း ပါဝင်၏။ နောက်ဆုံး၌ လိုရာပစ္စည်းများ မတွေ့တော့ဘူးဆိုမှ လက်လျှော့လိုက်ကြသည် ဟု ရန်ကုန်ရာဇဝင်တွင် ပါရှိလေသတည်း။