မြတ်မယ်တော်ဈာပန
မြတ်မယ်တော်ဈာပန ကဗျာကို မောင်းထောင်းဦးကျော်လှ ရေးသားခဲ့သည်။ သံချို ကဗျာအမျိုးအစားဖြစ်သည်။
အကြောင်းအရာ[ပြင်ဆင်ရန်]
မြတ်မယ်တော်ဈာပန[ပြင်ဆင်ရန်]
ရှေ့ပြုဗ္ဗေ ဘွေနဝတတ်ကဲ့သို့၊ ခွေပတလည် ရေကြည်ဖြာခဲ့၊ မြေလပ်တာဆပ်ပျာပေါက်ရာက၊ ရွာမြောက်စောင် အနောက်တောင် ဆင်းသည့်ပြင်၊ ဖောက်ထွင်းကာတဖြာသွယ်ခဲ့၊ ရွာလယ်မှာ ရေနဂါးပွက်ရယ်နှင့်၊ ရွှေထွက်ရာ သာဘုမ္မိ၏၊ အဂ္ဂီမြေရှေ့တောင်စောင်းတွင်မှ၊ နှစ်သောင်းကျော် ဘော်ငွေတန်တဲ့၊ ဘုံကျောင်းစံ အောင်မြေကြော့၊ ဘုန်းကိုယ်တော့် မြတ်မာတာ။
သက်တန်းမှာ တရာခေါ်ကြ၊ ရှစ်ဆယ်ကျော် ရွယ်တော်ကျူးပြီမို့၊ ဘဝကူးကာ တရာမစေ့ဘု၊ မယ်ပြေ့ကြွယ်မာတာမိငဲ့၊ စုတိနာမ်ဝိညာဉ်ခွာလို့၊ တုဿိတာ နန်းဘုံညွန့်ဆီသို့၊ မြန်းလှုံကွန့်ရှာ။
သဗ္ဗညံ ဓာတ်အသင်္ခတော၊ ရှင်ဂေါတမာ၏၊ စောမာယာ လျောမရဏာ ပြောင်းတော့၊ အလောင်းကျန် ရုပ်အကြွင်းကိုမှ၊ ဖုတ်ကြဉ်းမိမတတ်အားစဉ်က နတ်သားပင်ပြမယ်တော်ဖြစ်နှင့်၊ ခြောက်နှစ်လွန် ခုနစ်ဝါအရှိတွင်မှ၊ ကျမ်းအဘိခုနစ်ဖြာ၊ ညွှန်စရာကြွမြန်း။
မွေးမြင်ကာ ရှေးတင်ဘူးသည့်၊ ကျေးဇူးဂုဏ်ဗလဝါကြောင့်၊ ဦးပညာဝင်သာကီငဲ့၊ ဓမ္မသင်္ဂဏီ ဆိုတဲ့ကျမ်းနှင့်၊ မဋ္ဌာန်းကို မြတ်ဘုရားလိုဖြင့်၊ နတ်သားပင်မယ်တော်ဖြစ်တော့၊ ကသစ်ဘွေကမ္ဗလာက၊ ဒေသနာ ရွှေဗျာ မဟောနိုင်ဘု၊ ကွာလျောကြဉ်ဝိညာဉ်ပြောင်းသူ၏၊ အလောင်းကို သာရထီနှင့်၊ ဆောင်းရာသီပြာသိုရက်၊ ငိုမျက်ဥည်ကြည်ကြည်စို့ငယ်နှင့်၊ ကတုတ်လှန် သုသာန်မြို့တွင်မှ၊ ရုပ်အကျန်မြုပ်နှံဖို့ရန်ပါ့၊ အုတ်ပန်းရံလုပ်ဖန်တို့ကြ၊ သွင်းဘို့ဂူနန်း။
ခက်ဆစ်[ပြင်ဆင်ရန်]
၁။ ရှေ့ပြုဗ္ဗေ = အရှေ့အရပ်။
၂။ နဝတတ် = အနဝဒတ်အိုင်။
၃။ သာဘုမ္မိ = သာယာသောမြေနေရာ။
၄။ စုတိ = ဘဝပြောင်းသည်။
၅။ သဗ္ဗညံ = အလုံးစုံ။
၆။ ဓာတ်အသင်္ခတော = အသင်္ခတဓာတ်၊ အလုံးစုံ ချုပ်ငြိမ်းကင်းပြတ်သည့် တရား။
၇။ ဗလဝါ = အများအပြား (ဘန်း)။
၈။ ဓမ္မသင်္ဂဏီ = အဘိဓမ္မာကျမ်းတစောင်။
၉။ ပဋ္ဌာန်း = အဘိဓမ္မာကျမ်းတစောင်။
၁၀။ သာရထီ = ရထားထိန်း၊ ရထား။
မှတ်ချက်[ပြင်ဆင်ရန်]
ဤကဗျာခေါင်းစဉ်သည် မောင်းထောင်းဦးကျော်လှ ကိုယ်တိုင် ပေးခဲ့ခြင်း မဟုတ်ပါ။ သင့်တော်မည်ထင်သော ခေါင်းစဉ်ကို ပေးထားခြင်း ဖြစ်သည်။
ကိုးကား[ပြင်ဆင်ရန်]
- ↑ မောင်းထောင်းဦးကျော်လှ၏ သံချိုကဗျာပေါင်းချုပ်။ ယဉ်ကျေးမှုဝန်ကြီးဌာန၊ ယဉ်ကျေးမှုဗိမာန်ဌာန။ နိုဝင်ဘာ ၁၉၈၃။