ဇာတ်တူသားစား၍ ဟင်္သာကိုးသောင်းပျက်

ဇာတ်တူသားစား၍ ဟင်္သာကိုးသောင်းပျက် ဟူသည်မှာ မြန်မာစကားပုံတစ်ခု ဖြစ်သည်။

ရှင်းလင်းချက်

ဟင်္သာအချင်းချင်းပြန်စား၍ ဟင်္သာကိုးသောင်းပျက်စီးသကဲ့သို့ မိမိတို့အချင်းချင်း သစ္စာမဲ့၍ အားလုံးပျက်စီးရသည်။

ရှေးအခါက စိတ္တကုဋ်တောင် ရွှေဂူကြီးတစ်ခုအတွင်းတွင် ဟင်္သာကိုးသောင်းတို့ ခိုအောင်းနေထိုင်ကြသည်။ မိုးတွင်းကာလတွင် အပြင်သို့မထွက်ဘဲ နွေအခါက သိုမှီးထားသည့် အစားအစာများကိုသာ စား၍ နေထိုင်ကြသည်။ ထိုအခါ လှည်းဘီးခန့်ရှိသော ပင့်ကူကြီးတစ်ကောင်သည် ဂူဝတွင် အမြှေးကွန်ရက်ဖွဲ့၍ နေ၏။ ဟင်္သာတို့သည် ထိုကွန်ရက်ကို ဖောက်ရန် သန်စွမ်းသော ဟင်္သာပျိုတစ်ကောင်အား အစာနှစ်ဆကျွေးထား၏။ မိုးစဲသော် ဟင်္သာပျိုဦးဆောင်သော ဟင်္သာများသည် ပင့်ကူမြှေးကို ဖောက်ထွက်၍ သွားကြ၏။ တစ်ခါသော် ငါးလပတ်လုံးမိုးရွာ၏။ ဟင်္သာတို့အစာကုန်သော် အချင်းချင်းတိုင်ပင်၍ ဦးစွာဟင်္သာဥတို့ကိုစားကြ၏။ နောက်မှဟင်္သာငယ်တို့ကိုလည်းကောင်း၊ ဟင်္သာအိုတို့ကိုလည်းကောင်း စားကြ၏။ ငါးလလွန်၍ မိုးစဲသော် ပင့်ကူသည် အမြှေးကွန်ရက်ငါးခုဖွဲ့ပြီး၏။ ဟင်္သာတို့သည် မိမိတို့ ဇာတ်တူသားကို စားကြသဖြင့် ခွန်အားနည်းလေ၏။ အစာနှစ်ဆ စားရသော ဟင်္သာပျိုဦးဆောင်၍ ပင့်ကူမြှေးကို ရှေးနည်းတူ ဖောက်ရာ ငါးခုမြောက်သော ပင့်ကူကွန်ရက်၌ ငြိ၍ အသက်ဆုံးရှုံးကြရလေ၏။ ဤသို့ဖြင့် ဟင်္သာကိုးသောင်း ပျက်စီးရသည်။

မူလရင်းမြစ်

• "ရှေးဝယ်မယွင်း၊ မင်းပေါရိသာဒ်၊ ဗြဟ္မဒတ်ရာဇာ၊ အာနန္ဒာနှင့်၊ ဟင်္သာကိုးသောင်း၊ထိုအပေါင်းတို့၊ တိမ်းစောင်းတရား၊ ဇာတ်တူသားကို၊ စား၍မုချ၊ ပျက်စီးကြ၏။" [၁၂၆၆] မဃ * ၁၇၆။
• "ဇာတ်တူသားစား ဟင်္သာကိုးသောင်းပျက်ဟူသော ထုံးကိုမျှ သတိမူမိကြပုံမရ၊ ရွာသားအချင်းချင်းပင် သတ်ချင်လျှင် သတ်ကြသည်။" [၁၃၂၉] ရှေ့သို့၊ ၁၂၊ ၄။ ၂၂။