စိုးတင့်

ဦးစိုးတင့်
မွေးဖွား	(1954-03-04)မတ် ၄၊ ၁၉၅၄ ပျဉ်းမနားမြို့
ကွယ်လွန်	ဇူလိုင် ၁၇၊ ၂၀၁၇(2017-07-17) (အသက် ၆၃) ခုတင် ၁,၀၀၀ စစ်ဆေးရုံ၊ နေပြည်တော်
ထာဝရ နားခိုရာနေရာ	ကွေ့ကြီးသုဿန်
မိခင်ကျောင်း	ရန်ကုန်နတ်မောက် T.H.S ကျောင်း
အလုပ်အကိုင်	ဥက္ကဋ္ဌ (စိုးလျှပ်စစ်ဖောင်ဒေးရှင်း)
အိမ်ထောင်ဖက်(များ)	ဒေါ်ရီရီမာ
မိဘ(များ)	ဦးဘိုးကြွယ်၊ ဒေါ်အမာ

ဦးစိုးတင့် (၄ မတ် ၁၉၅၄ – ၁၇ ဇူလိုင် ၂၀၁၇) သည် စိုးလျှပ်စစ်ဖောင်ဒေးရှင်း၏ ဥက္ကဋ္ဌ ဖြစ်ပြီး ပျဉ်းမနားမြို့နယ်ရှိ ခေါင်းရွက်ဗျပ်ထိုးဈေးသည်များ၊ အနှေးယာဉ်လုပ်သားများ၊ ဆင်းရဲနွမ်းပါးသူများအား ကူညီထောက်ပံ့ပေးခဲ့သူတစ်ဦး ဖြစ်သည်။

အစောပိုင်းဘဝနှင့် ပညာရေး

ဦးစိုးတင့်ကို ပျဉ်းမနား မင်္ဂလာသာခေါင်ရပ်ကွက်တွင် ဦးဘိုးကြွယ်နှင့်ဒေါ်အမာတို့မှ မွေးခဲ့ပြီး မွေးချင်း ၃ ယောက်အနက် အငယ်ဆုံးသား ဖြစ်သည်။

ပျဉ်းမနား အ.ထ.က(၂) တွင်ပညာသင်ကြားခဲ့သည်။ ၁၉၆၈ခု ကျောင်းဖွင့်ရာသီတွင် ၉တန်း ဆက်မတက်တော့ဘဲ ဆရာများအကြံပေးမှုအတိုင်း ရန်ကုန်နတ်မောက် T.H.S ကျောင်းတွင် EP တက်ရောက်ခဲ့သည်။

ကျောင်းပြီးသောအခါ ရန်ကုန်စည်ပင်တွင် တစ်ရက်ခြောက်ကျပ်ခွဲ အငယ်တန်းအင်ဂျင်နီယာ ရာထူးဖြင့် လုပ်ကိုင်ခဲ့သည်။

ထို့နောက် အလုပ်ထွက်ကာ အပြင်တွင် လျှပ်စစ်နှင့် ပတ်သက်သော ကိုယ်ပိုင်အလုပ်ကို စတင်လုပ်ကိုင်ခဲ့သည်။ ပျော်ဘွယ်မြို့မှ ဘေဘီဦးအုန်းမေနှင့်တွေ့ဆုံပြီးနောက် ဘဝလမ်းကြောင်းပြောင်းခဲ့သည်။

ကိုယ်ပိုင်ကုမ္ပဏီတည်ထောင်ခြင်း

၁၉၉၃ ခုနှစ် ဩဂုတ်လတွင် စိုးလျှပ်စစ်နှင့်စက်ကိရိယာကုမ္ပဏီကို တည်ထောင်ခဲ့ပြီး ကိုယ်ပိုင် SOE တံဆိပ်ဖြင့် ထရန်စဖော်မာများ ထုတ်လုပ်ခဲ့သည်။ ၂၀၁၅ ခုနှစ်တွင် ဂျပန်နိုင်ငံမှ ဟီတာချီကုမ္ပဏီနှင့် ပူးပေါင်း၍ ဟီတာချီ စိုးကုမ္ပဏီ (Hitachi Soe Electric & Machinery Co.,Ltd) ကို ဖွဲ့စည်းခဲ့သည်။

အလှူအတန်းများ

စိုးလျှပ်စစ်နှင့် စက်ကိရိယာ ကုမ္ပဏီတည်ထောင်၍ ကြီးပွားချမ်းသာလာပြီးနောက် မိမိမွေးဖွားရာ ပျဉ်းမနားမြို့နှင့် မြို့နေလူထုကို ပြန်လည် အကျိုးပြုခဲ့သည်။ ပျဉ်းမနားမြို့ရှိ စာသင်ကျောင်းများ၊ ဘုရားများ၊​ ဓမ္မာရုံများ၊ တံတားများကို ပြန်လည်ပြင်ဆင် ဆောက်လုပ်ပေးပြီး၊ အဖိုးအဖွားများ၊ ဆင်းရဲနွမ်းပါးသူ အခြေခံလူတန်းစားများအား ​တိုက်ရိုက်ငွေလှူဒါန်းခြင်း၊ ဆေးလှူဒါန်းခြင်းများကို အကြိမ်ကြိမ် ပြုလုပ်ခဲ့သည်။ ပျဉ်းမနားမြို့ရှိ ဈေးသည်များ၊ အနှေးယာဉ်လုပ်သားများ ရှိရာနေရာများတွင် သူကိုယ်တိုင် လိုက်လံ ဦးစီးပြီး ကျပ်သိန်းဂဏန်းဖြင့် တစ်ဦးချင်းစီ ပေးအပ်လှူဒါန်းခဲ့သည်။ ထို့အပြင် ဦးစိုးတင့်သည် ပျဉ်းမနားမြို့နယ်ရှိ ခေါင်းရွက်ဗျပ်ထိုးဈေးသည်များ၊ အနှေးယာဉ်လုပ်သားများအား ကျန်းမာရေး၊ ပညာရေးနှင့် စီးပွားရေးအတွက် ကူညီထောက်ပံ့ပေးခဲ့သည်။

အကျယ် ၆ ဧကရှိ မြေတွင် ကျပ်သိန်းပေါင်း ၇၀၀၀ မတည်ကာ အေးငြိမ်းချမ်းသာ ဂိလာနဘိုးဘွားရိပ်သာကြီး တည်ဆောက်ပြီး အဖိုးအဖွားများအတွက် စားရေးသောက်ရေး၊ ကျန်းမာရေးများ အလုံးစုံတာဝန်ယူပြီး အမြဲခန့်ဝန်ထမ်းများဖြင့် ဆောင်ရွက်ထားရှိသည်။

စိုးလျှပ်စစ်ဖောင်ဒေးရှင်းကို တည်ထောင်ခဲ့ပြီး လူမှုရေးလုပ်ငန်းများကို စဉ်ဆက်မပြတ်လုပ်ဆောင်လျက်ရှိသည်။

ကွယ်လွန်ခြင်း

၂၀၁၇ ခုနှစ် ဇူလိုင်လ ၁၇ ရက်နေ့တွင် ALS ရောဂါဖြင့် နေပြည်တော်ရှိ ခုတင် ၁,၀၀၀ စစ်ဆေးရုံတွင် ကွယ်လွန်ခဲ့သည်။ သေဆုံးချိန်တွင် အသက် ၆၃နှစ်ရှိပြီ ဖြစ်သည်။