ကုန်းတိုက်ရန်ပွဲ

ကုန်းတိုက်ရန်ပွဲ ကဗျာကို မောင်းထောင်းဦးကျော်လှ ရေးသားခဲ့သည်။ သံချို ကဗျာအမျိုးအစားဖြစ်သည်။

အကြောင်းအရာ

၁၂၆၇ ခုနှစ်တွင် အာကာသ၌ ဂြိုဟ်တို့၏ သွားလာပုံအရ ဖြစ်ပျက်တတ်သော အကျိုးအပြစ်တို့ကို ဖွဲ့ဆိုထားသည်။

ကုန်းတိုက်ရန်ပွဲ

ပါပကုန် ဓာတ်သဘောပေထင့်၊ သတ်သော ဗီဧစ် နှင့်၊ သည်ခေတ်တွင် ဖြစ်ပျက်ဆန်းပါဘိ၊ ပွင့်ပန်းခိုင်ခွာညိုခက်ကယ်နှင့်၊ ဆန်းသုံးရက် လပြာသို။

နှစ်လုံးပြိုင် ပါပဂြိုဟ်တို့၊ အဇဋာ ဟိုကောင်းကင် တွေ့ကြတော့၊ ခြင်္သေ့နံ မြွေနဂါးရယ်နှင့်၊ အများလူသိစေအပ်ဘို့၊ ထိထပ်ကာ ကောင်းကင်လမ်းမှာ၊ မြန်းကြွသကို။

ကြောက်စရာ နစ်နာသည့် အချက်မတော့၊ ခြောက်ရက်ယန်စန္ဒီသို့၊ ဂြို်ဟ်သောရီ ဖောက်ကာဖြတ်သည့်ပြင်၊ နောက်ထပ်ကာငွေစင်လသို့၊ တောမ တဝင်ကာခို၊ အင်္ဂါဂြိုဟ်မွှေနဲ။

စန်းငွေယုန်၊ လမ်းစုံပေါက်ပါလို့၊ အနောက်မှာစနေနင်းရင်ဖြင့်၊ ပြည်ချင်ပြည်၊ ခိုက်ရန်ဖြစ်သည့်ပြင်၊ မင်းသစ်ဘုရင်တွေ့တတ်သတဲ့၊ ခြင်္သေ့နံစန္ဒာကိုမွှေခဲ့လျှင်၊ မြန်မာတွေ စာပေသိပြီထင့်၊ သိတတ်လျှင် နားလည်ကြပေလိမ့်၊ တဘောင်သံ အောင်လံပြခဲ့၊ တေဇတလီ နှင့်၊ သကျမှီနန္ဒီထုံးကိုပ၊ ညီအစ်ကို သည်ဂြို်ဟ်နှစ်လုံးရယ်တို့၊ ကုန်းတိုက်ရန်ပွဲ။

ခက်ဆစ်

၁။ သတ်သောဗီဧစ် = ၁၂၆၇ ခုနှစ်။

၂။ အဇဋာ = ကောင်းကင်။

၃။ ခြင်္သေ့ = အင်္ဂါဂြိုဟ်။

၄။ မြွေနဂါး = စနေဂြိုဟ်။

၅။ ဂြိုဟ်သောရီ = စနေဂြိုဟ်။

၆။ ဘောမ = အင်္ဂါဂြိုဟ်။

၇။ တေဇတလီ = အောင်လံတေဇ သကျမှီအုံး၊ နန္ဒီသေနထုံးဆိုသော အင်္ဂဝိဇ္ဇာ စကားအရ စစ်ထိုးတတ်သော သဘောကိုဆိုလိုသည်။

မှတ်ချက်

ဤကဗျာခေါင်းစဉ်သည် မောင်းထောင်းဦးကျော်လှ ကိုယ်တိုင် နာမည်ပေးခဲ့ခြင်း မဟုတ်ပါ။ သင့်တော်မည်ထင်သော နာမည်ကို ပေးထားခြင်း ဖြစ်သည်။