ဝင်းဖေ(ဒါရိုက်တာ)

ဝီကီပီးဒီးယား မှ
(ဝင်းဖေ မှ ပြန်ညွှန်းထားသည်)
Jump to navigation Jump to search

ဝင်းဖေ၊ (ဦး) ရုပ်ရှင် ဒါရိုက်တာ စာရေးဆရာ ၂ဝဝ၇ ခုနှစ် ဇူလိုင်လမှာ ပထမ အကြိမ် အဖြစ် ဖန်မီးအိမ် စာပေ ချစ်သူများ [ဆန်ဖရန်စစ္စကို] မှ ထုတ်ဝေ ဖြန့်ချိ ခဲ့တဲ့ ကဗျာဆရာ ဦးတင်မိုး [၁၉၃၃-၂ဝဝ၇] ကွယ်လွန်ခြင်း ၆ လပြည့် အမှတ်တရ စာစုက နိုင်ငံသိ ရုပ်ရှင် ဒါရိုက်တာ စာရေးဆရာ "(ဦး) ဝင်းဖေ အတ္ထုပ္ပတ္တိ" ကို ပြန်လည် ကူးယူ ဖော်ပြ လိုက်တာ ဖြစ်ပါတယ်။


၁၉၃၆ - မန္ဈလေး၌ မွေးဖွား၊ မိသားစု ထုံးတမ်း အရ ငယ်စဉ် ကတည်းက ဂီတနှင့် ပန်းချီ မသင်မဖြစ် သင်ကြားခဲ့ရ။


၁၉၅၁ - ၁၉၅၉ မန္ဈလေး တက္ကသိုလ် နှင့် ရန်ကုန် တက္ကသိုလ် တို့တွင် ပညာ သင်ကြား၊ ဘွဲ့မရခဲ့။ ဒုတိယ ကမ္ဘာစစ်ပြီးခေတ် မြန်မာ ခေတ်ပေါ် ပန်းချီ စတင် လိုက်စားသူ ၆ ဦး အနက် တဦး ဖြစ်ခဲ့။ ပန်းချီ ပြပွဲ များစွာတွင် ပါဝင် ခဲ့သော်လည်း တကိုယ်တော် ပြပွဲ ယခုထိ မပြုလုပ် ဖြစ်သေး။


၁၉၅၉ - ၁၉၆၂ မန္ဈလေး အခြေစိုက် လူထု သတင်းစာနှင့် စာပေတိုက်တွင် လက်သင် နိုင်ငံခြားရေး အယ်ဒီတာနှင့် သရုပ်ဖော် ပန်းချီ ဆရာ၊ ကာတွန်း ဆရာ လုပ်ကိုင်။


၁၉၆၂ - ၁၉၆၄ မြန်မာပြည် မြောက်ပိုင်း ကချင် ပြည်နယ်တွင် ကျောက်စိမ်း သွားတူး။


၁၉၆၄ - ၁၉၆၆ ရတနာ ကုန်သည်။


၁၉၆၆ - ၁၉၇၃ မန္ဈလေးရှိ အနုပညာ ဦးစီး ဌာန ပန်တျာနှင့် အကကျောင်းတွင် ကျောင်းအုပ် အဖြစ် တာဝန် ထမ်းဆောင်။


၁၉၇၃ - ၁၉၉၄ ဝတ္ထုတို၊ ရုပ်ရှင် ဇာတ်လမ်း နှင့် ဇာတ်ညွှန်းများ ရေးသား၊ ရုပ်ရှင် ဒါရိုက်တာလုပ်၊ နောက်ပိုင်းတွင် ဗီဒီယို ထုတ်လုပ်ရေးပါ လုပ်ကိုင်။ ၁၉၈၁ အကောင်းဆုံး ဒါရိုက်တာ အဖြစ် အကယ်ဒမီဆု ရခဲ့၊ အခြားသော အကယ်ဒမီ ဆုများ ကိုလည်း ၎င်းရိုက်ကူးသည့် ရုပ်ရှင်များမှ ဆွတ်ခူးခဲ့၊ ပန်းချီလည်း ဆွဲ။


၁၉၉၄ - အမေရိကန် အစိုးရ၏ ယဉ်ကျေးမှု ဖလှယ်ရေး အစီအစဉ်ဖြင့် ယူစီအယ်လ်အေနှင့် ဟောလိဝုဒ်တွင် တလတာ လေ့လာရေး ခရီး ထွက်ခဲ့။ နောက်ပိုင်းတွင် အိုင်အိုဝါ တက္ကသိုလ် နိုင်ငံတကာ စာရေး ဆရာများ အစီအစဉ်သို့ တက်ရောက်၊ ဂုဏ်ထူးဆောင် ပညာရှင် အဖြစ် ချီးမြှင့်ခံရ။


၁၉၉၅ - ၁၉၉၆ အလွတ်တန်း စာရေးဆရာ၊ ပန်းချီဆရာ အဖြစ် နယူးယောက် မြို့တွင် ရပ်တည်။


၁၉၉၇ - ၂ဝဝ၅ လွတ်လပ်သော အာရှ အသံ ရေဒီယို ဌာနတွင် အကြီးတန်း အသံလွှင့်သူ၊ အကြီးတန်း အယ်ဒီတာ အဖြစ် ဆောင်ရွက်ခဲ့၊ ရေဒီယို အစီအစဉ် များနှင့် ဆောင်းပါး များစွာ ရေးသား ထုတ်လွှင့်ခဲ့။


၂ဝဝ၅ မှ ယနေ့ အထိ - ရေဒီယို ဌာနမှ အနားယူ၊ အချိန်ပြည့် ပန်းချီဆရာ စာရေးဆရာ အဖြစ် ရပ်တည်၊ Open Society Institute (OSI) - Burma Project ၏ မြန်မာ့ ရုပ်သံ မော်ကွန်း အစီအစဉ် များကို မိုးမခ စာနယ်ဇင်း အဖွဲ့နှင့် အတူ ဆောင်ရွက် လျက်ရှိ။ မိုးမခ၏ အကြံပေး အမှုဆောင် လူကြီး အဖြစ် ကူညီပေး၊ လောလောဆယ် အမေရိကန် ပြည်ထောင်စုတွင် နေထိုင်လျက်ရှိ။