လမ်းစဉ်လူငယ်

လမ်းစဉ်လူငယ်အဖွဲ့သည် မြန်မာ့ဆိုရှယ်လစ်လမ်းစဉ်ပါတီ၏ လူငယ်အဖွဲ့ဖြစ်ပါသည်။ လမ်းစဉ်လူငယ်အဖွဲ့တွင် တေဇလူငယ်၊ ရှေ့ဆောင်လူငယ်၊ လမ်းစဉ်လူငယ် ဟူသော အသက်အရွယ်အလိုက်ဖွဲ့စည်းသည့်အဖွဲ့ခွဲသုံးဖွဲ့ပါဝင်သည်။

(ဝဲမှယာသို့) တေဇလူငယ်၊ ရှေ့ဆောင်လူငယ်၊ လမ်းစဉ်လူငယ် တံဆိပ်များ

စတင်တည်ထောင်ခြင်း

ပြည်ထောင်စုမြန်မာနိုင်ငံတော်လှန်ရေးကောင်စီအစိုးရသည် ပြည်ထောင်စုမြန်မာနိုင်ငံကင်းထောက်အဖွဲ့ချုပ်ကိုဖျက်သိမ်းလိုက်ကြောင်း ၁၉၆၄ခုနှစ် မတ်လ ၁ရက်နေ့တွင် ကင်းထောက်ချုပ် ဦးရဲထွန်း က သတင်းပို့ခဲ့သည်။

တော်လှန်ရေးအစိုးရသည် ကင်းထောက်အဖွဲ့ချုပ်ကို ပြည်သူပိုင်သိမ်းလိုက်ကာ ၎င်းအဖွဲ့ချုပ်၏ပိုင်ဆိုင်မှုများကို ပညာရေးဝန်ကြီးဌာနသို့ လွှဲပြောင်းပေးလိုက်ပြီး လမ်းစဉ်လူငယ်အဖွဲ့ ကို ဖွဲ့စည်းတည်ထောင်စေခဲ့သည်။

ဖွဲ့စည်းပုံ

လမ်းစဉ်လူငယ်အဖွဲ့ဘောင်အတွင်း၌ပင် အသက်အရွယ်နှင့်အသိအမြင်ကွာခြားမှုပေါ်မူတည်၍ အဖွဲ့ခွဲ၃ဖွဲ့ခွဲကာ ဖွဲ့စည်းခဲ့သည်။
၁။ တေဇလူငယ်အဖွဲ့ကို အသက်၅နှစ်မှ၁၀နှစ်ရှိ မူလတန်းကျောင်းသားကလေးငယ်များနှင့် ဖွဲ့စည်းသည်။
၂။ ရှေ့ဆောင်လူငယ်အဖွဲ့ကို အသက်၁၁နှစ်မှ၁၅နှစ်ရှိ အလယ်တန်းနှင့်အထက်တန်းကျောင်းသားများနှင့် ဖွဲ့စည်းသည်။
၃။ လမ်းစဉ်လူငယ်အဖွဲ့ကို အသက်၁၆နှစ်မှ၂၅နှစ်ရှိ ကောလိပ်နှင့်တက္ကသိုလ်ကျောင်းသားလူငယ်များနှင့် ဖွဲ့စည်းသည်။
အသက်၁၈နှစ်ပြည့်ပြီးပါက မြန်မာ့ဆိုရှယ်လစ်လမ်းစဉ်ပါတီ တွင် အရန်ပါတီဝင် အဖြစ် လျှောက်ထားနိုင်သည်။ အရန်ပါတီဝင်တစ်‌‌ဦးသည် အသက်၂၁နှစ်ပြည့်ပြီးနောက် လိုအပ်ချက်များနှင့်ကိုက်ညီပါက တင်းပြည့်ပါတီဝင် အဖြစ် တိုးမြှင့်ရန် လျှောက်လွှာတင်သွင်းနိုင်သည်။

၁၉၈၁နှစ်၌ အသက်၁၈နှစ်ပြည့်‌သည့် လမ်းစဉ်လူငယ်များ၏ ၆.၁၉%သာ မြန်မာ့ဆိုရှယ်လစ်လမ်းစဉ်ပါတီသို့ ဝင်ရောက်ခဲ့သဖြင့် ထိုစဉ်က ပါတီအတွက်တုန်လှုပ်ဖွယ်အခြေအ‌‌နေတစ်ရပ်ဖြစ်ခဲ့သည်။ ထို့‌‌ကြောင့် တက္ကသိုလ်၊ကောလိပ်များ၏ ကျောင်းဝန်းများထဲတွင် လမ်းစဉ်လူငယ်အဖွဲ့စည်းရုံးရေးကော်မီတီများ တည်ထောင်ခဲ့သည်။