ဗိုလ်နဂါး

ဗိုလ်နဂါး
၂၀၂၂ ခုနှစ်ကတွေ့ရသော ဗိုလ်နဂါး
မွေးဖွား	စစ်ကိုင်းတိုင်း၊ မြန်မာနိုင်ငံ
အမှုထမ်း ကာလ	၂၀၂၁–၂၀၂၆
ရာထူးအဆင့်	Commander
တပ်ဖွဲ့	မြန်မာ့တော်ဝင်နဂါးတပ်တော် (၂၀၂၂-၂၀၂၃) ဗမာအမျိုးသား တော်လှန်ရေး တပ်မတော် (၂၀၂၃-၂၀၂၆)
ကွပ်ကဲသည့် ဌာန	ဗမာအမျိုးသား တော်လှန်ရေး တပ်မတော်
တိုက်ပွဲ/စစ်ပွဲများ	မြန်မာ့ပြည်တွင်းစစ် စစ်ကောင်စီတပ်များနှင့် ထိတွေ့တိုက်ခိုက်မှုများ

ဗိုလ်နဂါး (အမည်ရင်း နိုင်လင်း) သည် မြန်မာတော်လှန်ရေးခေါင်းဆောင်တစ်ဦးနှင့် ဗမာအမျိုးသား တော်လှန်ရေး တပ်မတော်၏ ဦးဆောင်သူ တစ်ဦး ဖြစ်သည်။ သူသည် မြန်မာ့နွေဦးတော်လှန်ရေးနှင့် ပြည်သူ့ခုခံတော်လှန်စစ်၏ ထင်ရှားသော ခေါင်းဆောင်တစ်ဦး ဖြစ်သည်။ ဗိုလ်နဂါးသည် ၂၀၂၁ ခုနှစ်အတွင်း ပုလဲမြို့နယ် ပြည်သူ့ကာကွယ်ရေးအဖွဲ့ကို ဦးဆောင်ခဲ့ကာ စစ်ကောင်စီတပ်သားများကို ထိခိုက်ကျဆုံးစေခဲ့သည်။ သူ၏ ဦးဆောင်မှုတိုက်ခိုက်မှုဖြင့် စစ်ကောင်စီတပ်သား ၁၈၀ ခန့် ကျဆုံးခဲ့သည်။ စစ်ကောင်စီက ရွာတစ်ရွာအား စီးနင်းကာ ဗိုလ်နဂါးကို ရှာဖွေခဲ့စဉ်အတွင်း ဗိုလ်နဂါး၏ တူတစ်ဦးအပါအဝင် ရွာသား ၂၀ ခန့် အသတ်ခံခဲ့ရသည်။ ၂၀၂၂ ခုနှစ် ဇန်နဝါရီလအတွင်း စစ်ကောင်စီက ရဟတ်ယာဉ်များအသုံးပြုကာ ဗိုလ်နဂါးကို ရှာဖွေဖမ်းဆီးခဲ့သော်လည်း မအောင်မြင်ခဲ့ပေ။

၂၀၂၃ ခုနှစ် စက်တင်ဘာလ ၉ ရက်နေ့တွင် ဗိုလ်နဂါး၏ မြန်မာ့တော်ဝင်နဂါးတပ်တော် အပါအဝင် NUG ကာကွယ်ရေးဝန်ကြီးဌာန လက်အောက်ခံမဟုတ်သော ဒေသအခြေစိုက်ပြည်သူ့ကာကွယ်ရေးအဖွဲ့များကို ပူးပေါင်းကာ ဗမာအမျိုးသားတော်လှန်ရေးတပ်မတော် (Burma National Army) ကို ဖွဲ့စည်းကြောင်း ထုတ်ပြန်ခဲ့သည်။

BNRA ဟုခေါ်သည့် စစ်ကိုင်းတိုင်း၊ ပုလဲမြို့နယ်အခြေစိုက် ဗမာအမျိုးသား တော်လှန်ရေး တပ်မတော်ခေါင်းဆောင် ဗိုလ်နဂါးသည် လက်နက်များယူဆောင်ပြီး သူ၏မိသားစုနှင့်အတူ ၎င်းတို့ထံ အညံ့ခံလက်နက်ချခဲ့သည်ဟု စစ်တပ်က ၂၀၂၆ ဖေဖော်ဝါရီလ ၁၈ရက်နေ့တွင် သတင်းထုတ်ပြန်ခဲ့သည်။

အာဏာသိမ်းစစ်တပ်ကို ဆန့်ကျင်တိုက်ခိုက်ရန်အတွက် ဖွဲ့စည်းထားကြသည့် NUG နှင့် ဗိုလ်နဂါး၏ BNRA တပ်များသည် ဖေဖော်ဝါရီလ ၁၇ ရက် နံနက် ၇ နာရီဝန်းကျင်ကစပြီး တိုက်ပွဲများ ဖြစ်ပွားခဲ့သည်။ NUG နှင့်ဖြစ်ပွားနေသည့် လက်နက်ကိုင်ပဋိပက္ခ ဒုတိယနေ့တွင် BNRA ခေါင်းဆောင် ဗိုလ်နဂါးက စစ်တပ်ထံ ဘက်ပြောင်းအညံ့ခံသွားသည်။

အငြင်းပွားဖွယ်ရာများ

ဗမာအမျိုးသားတော်လှန်ရေးတပ်မတော်အဖြစ် ပြောင်းလဲဖွဲ့စည်းမည့် အခြေအနေနှင့် ပတ်သက်၍ NUG ကာကွယ်ရေးဝန်ကြီးဦးရည်မွန်နှင့် ဆွေးနွေးခဲ့သလို NUG ယာယီသမ္မတ ဒူဝါလရှီးလ နှင့် အွန်လိုင်းတွင် ဆွေးနွေးပြီးမှ တည်ထောင်ခြင်းဖြစ်သည်ဟု ဗိုလ်နဂါးက ပြောဆိုခဲ့သော်လည်း NUG သမ္မတ၊ ကာကွယ်ရေးဝန်ကြီးတို့ ဗိုလ်နဂါးနှင့် ဆွေးနွေးစဉ်က ပြောဆိုသည့် အချက်များတွင် ထိုအဖွဲ့ ဖွဲ့စည်းရေးနှင့်သက်ဆိုင်သည့် အကြောင်းအရာ မပါဝင်ခဲ့ဟု သမ္မတရုံးက ကြေညာချက် ထုတ်ပြန်ခဲ့သည်။ NUG လက်အောက်ခံ PDF တပ်ဖွဲ့ဝင်များမှ ဝိုင်းဝန်းပိတ်ဆို့ ဖမ်းဆီးစဉ် ဗိုလ်နဂါးနှင့် ၎င်း၏မိသားစုဝင်များ ဘက်ပြောင်းခိုလှုံသွားခဲ့သည်။