ဆိုနီယာဂန္ဒီ

ဝီကီပီးဒီးယား မှ
ဆိုနီယာဂန္ဒီ
'
မွေးသက္ကရာဇ် (1946-12-09) ၉ ဒီဇင်ဘာ၊ ၁၉၄၆ (အသက် ၇၇)
အမည်ရင်း
မိဘအမည်
မွေးဖွားရာဒေသ
နိုင်ငံသား အိန္ဒိယ
လူမျိုး အီတလီ
ကိုးကွယ်သည့်ဘာသာ ရိုမန်ကက်သလစ်
ပညာအရည်အချင်း
အလုပ်အကိုင် နိုင်ငံရေး၊ လူမှုရေး
ကြင်ဖော် ရာဂျစ်ဂန္ဒီ (၁၉၆၉-၁၉၉၁)
သားသမီး ရာဟူးဂန္ဒီ

ပရီယံကာဗာဒရာ

ထင်ပေါ်ကျော်ကြားမှု အိန္ဒိယ နိုင်ငံရေးသမား
ထင်ရှားသည့်လက်ရာများ
ရရှိခဲ့သည့်ဘွဲ့တံဆိပ်များ
ကွယ်လွန်ရက်
ကွယ်လွန်ရာဒေသ
လက်မှတ် [[Image:|100px]]
ကွန်ယက်


ပုံပြင်တိုင်း နိခုံးကောင်းတတ်သည်။ မင်းသမီးလေးလိုလှသည့် မိန်ကလေးတစ်ဦးသည် မင်းသားလေးတစ်ပါးနှင့် မမျှော်လင့်ဘဲ တွေ့ဆုံရသည်။ အခက်အခဲတွေအမျိုးမျိုးကြားမှ လက်တွဲလိုက်ကြသည်။ သားသမီးနှစ်ယောက်ရသည်။ ဇာတ်လမ်းသည် ပျော်ရွှင်စွာဖြင့် ဇာတ်သိမ်းရန်သာဖြစ်သည်။ သို့သော် ၁၉၆၈ ခုနှစ်ခန့်က ဆိုနီယာမာရီနိုဆိုသည့် မိန်းကလေးတစ်ယောက်၏ စိတ်ကူးယဉ်အိပ်မက်သည် ထက်ဝက်လောက်ပဲ မှန်ခဲ့သည်ဟုဆိုရမည်ဖြစ်သည်။ အီတလီသူလေးဆိုနီယာသည် အိန္ဒိယနိုင်ငံသား ထင်ရှားသည့်မျိုးနွယ်အသိုင်းအဝိုင်းမှ ရာဂျစ်ဂန္ဒီဆိုသူနှင့် လက်ထပ်လိုက်သည်။ သူ့နိုင်ငံ သူ့အသိုင်းအဝိုင်း၏ အရိပ်မည်းကြီးက သူမနောက်သို့ပါ လိုက်လံခြောက်လှန့်နေခဲ့သည်။ စိုးရိမ်စိတ်များ သောကများဖြင့် အိပ်မက်ဆိုးများမှ နိုးထရန်ကြိုးစားသော်လည်း ရုန်းထွက်၍မရတော့။

ရာဂျစ်ဂန္ဒီဆိုသူသည် ၁၉၄၀ ပြည့်နှစ်လောက်ကတည်းက အိန္ဒိယနိုင်ငံကို စိုးမိုးအုပ်ချုပ်ခဲ့သည့် မိသားစုကြီး၏ မျိုးနွယ်ဝင် တစ်ယောက် ဖြစ်သည်။ သူ့အဖိုးသည် ဂျဝါဟာလာနေရူးဖြစ်သည်။ အိန္ဒိယနိုင်ငံ၏ ပထမဦးဆုံးဝန်ကြီးချုပ်ဖြစ်ပြီး သူ့မိခင်ကလည်း ၁၉၇၀ ပြည့်နှစ်ပိုင်း လောက်တွင် နိုင်ငံ့ခေါင်းဆောင်ရာထူးကို လွှဲပြောင်းဆက်ခံနိုင်ခဲ့သည့် အစဉ်အလာကောင်းသော မျိုးနွယ်စုတစ်စုဖြစ်ခဲ့သည်။ ရာဂျစ်ဂန္ဒီကိုယ်တိုင် ၁၉၈၀ ပြည့်နှစ်ပိုင်းတွင် အိန္ဒိယနိုင်ငံ၏ဝန်ကြီးချုပ်ဖြစ်လာပြီး ၁၉၉၁ ခုနှစ်တွင် နောက်ထပ်အာဏာပြန်လည်ရရှိရေးကြိုးပမ်းနေစဉ် လုပ်ကြံ သတ်ဖြတ်ခြင်း ခံလိုက်ရသည်။ ဤသို့ဖြင့် ဆယ်စုတစ်စုခန့်ကြာသွားသည်။ ရာဂျစ်ဂန္ဒီ၏ ကွန်ဂရက်ပါတီက ရာဂျစ်၏ ကျန်ရစ်သူ မုဆိုးမလေး ဆိုနီယာကို နိုင်ငံရေးစင်တင်ရန် အမျိုးမျိုးကြိုးပမ်းခဲ့ကြသည်။ သို့သော်ဆိုနီယာသည် အိန္ဒိယနိုင်ငံရေးကို စိုးရွံ့သည်။ နောက်ပြီးတော့ သူက နိုင်ငံခြားသူတစ်ယောက်ဖြစ်နေသည်။

၂၀၀၄ ခုနှစ်တွင် ကွန်ဂရက်ပါတီသည် သူမကို ပါတီဥက္ကဋ္ဌရာထူးဖြင့်ထားလိုက်သည်။ ပါလီမန်တွင် ကွန်ဂရက်ပါတီနေရာရလာသောအခါ ဆိုနီယာကို ဝန်ကြီးချုပ်ရာထူးအတွက်လက်ခံရန် ဝိုင်းဝန်းတိုက်တွန်းကြသည်။ ဆိုနီယာသည် နိုင်ငံနှင့်လူမျိုးကိုစိုးရွံ့နေသည်။ ကမ္ဘာကြီးကို ရင်ဆိုင်ရန်ပါ မဝံ့မရဲဖြစ်နေသည်။ ယောက်ျားဖြစ်သူ၏ အရှိန်အဝါနှင့် မျိုးနွယ်၏အရှိန်အဝါအငွေ့အသက်တွေက သူမထံတွင် လွှမ်းမိုးနေဆဲဖြစ်သည်။ တကယ်တော့ သူမသည် နိုင်ငံခြားသူတစ်ယောက်။ သူ့ကိုလက်ခံသည်ဆိုခြင်းက သူ့ကို အမှန်တကယ်ယုံကြည်၍ လက်ခံခြင်းဖြစ်ချင်မှဖြစ်မည်။ သို့ဖြစ်ရာ သူမသည် ဝန်ကြီးချုပ်ရာထူးကို ငြင်းဆိုလိုက်သည်။ အတိုက်အခံတွေက ထိုသို့ငြင်းဆိုလိုက်သဖြင့် သက်ပြင်းတွေ ချလိုက်ကြသည်။ အချို့ကလည်း နေရူး-ဂန္ဒီခေတ်ကုန်တော့မည်လားဟု စိုးရိမ်သောကတွေပွားနေကြသည်။

မြင်မြင်ချင်းပဲချစ်မိတယ်[ပြင်ဆင်ရန်]

ဆိုနီယာမာရီနိုကို ၁၉၄၆ ခုနှစ် ဒီဇင်ဘာလ ၉ ရက်နေ့ တွင် အီတလီနိုင်ငံ၊ တူရိန်းမြို့ပြင်ရှိ အော်ဘာ့စ်ဆာနိုရွာလေးတွင် ဖွားမြင်ခဲ့သည်။ မိသားစုအစဉ်အလာ ရိုမင်ကက်သလစ် ဘာသာဝင်ဖြစ်ပြီး မိဘများဖြစ်ကြသည့် စတက်ဖနိုနှင့် ပေါ်လိုတို့သည် အလုပ်သမားလူတန်းစားများသာ ဖြစ်ကြသည်။ စတက်ဖနိုသည် အဆောက်အအုံကန်ထရိုက်တာတစ်ယောက်ဖြစ်ပြီး လုပ်ငန်းအလယ်အလတ်တန်းစားပိုင်ရှင်လေးတစ်ဦးဖြစ်သည်။ ပေါ်လိုသည် သမီးသုံးယောက်ဖြင့် အိမ်မှုတာဝန်များကို ထမ်းဆောင်နေရသူဖြစ်သည်။

ဆိုနီယာ အသက် ၁၈ နှစ်အရွယ်တွင် ဖခင်က အင်္ဂလန်နိုင်ငံ ကင်းဘရစ်ချ်သို့ အင်္ဂလိပ်စာလေ့လာရန် ပို့လိုက်သည်။ သူ့သမီးကြီးဘဝသည် ထိုအချိန်မှစပြီး အကြီးအကျယ်ပြောင်းလဲသွားမည်ဟု သူမျှော်လင့်မထားခဲ့ပေ။

၁၉၆၅ ခုနှစ် ဆိုနီယာ အင်္ဂလန်သို့ရောက်ပြီး တစ်နှစ်ခန့်အကြာတွင် အိန္ဒိယသား ရာဂျစ်ဂန္ဒီဆိုသူနှင့်တွေ့ကြသည်။ ရာဂျစ်သည် အင်္ဂလန်နိုင်ငံ ကင်းဘရစ်ချ်တက္ကသိုလ်တွင် စက်မှုအင်ဂျင်နီယာဘွဲ့အတွက် လာရောက်ပညာသင်နေခြင်းဖြစ်သည်။ ဆိုနီယာအပြောအရ သူတို့နှစ်ယောက် မြင်မြင်ချင်း ချစ်မိသွားကြသည်ဟုဆိုသည်။ သုံးနှစ်သုံးမိုးစောင့်စားပြီး ချစ်ရေးဆို လူပျိုလှည့်ပြီးချိန်မှ ရာဂျစ်သည် အိန္ဒိယနိုင်ငံတွင် ထင်ရှားပြီး လူသိများသည့်မိသားစုမှဖြစ်ကြောင်း သိလာခဲ့ရသည်။ ဆိုနီယာ၏မိဘများသည် ယဉ်ကျေးမှုဓလေ့စရိုက်ချင်း မတူညီသဖြင့် သဘောတူရန် အင်တင်တင်ဖြစ်နေကြသည်။ ဆိုနီယာကိုယ်တိုင်ကပင် အိန္ဒိယနိုင်ငံ၏ခေါင်းဆောင်ဖြစ်နေသည့် ရာဂျစ်၏မိခင် အင်ဒီယာဂန္ဒီနှင့်တွေ့ရန် ရင်ဖိုထိတ်လန့် နေခဲ့ရသည်။ အင်ဒီယာဂန္ဒီ၏ဖခင် ဂျာဝါဟလာနေရူးသည် ၁၉၄၇ ခုနှစ် အိန္ဒိယနိုင်ငံ ဗြိတိန်လက်အောက်မှ လွတ်မြောက်ပြီး ကာစတွင် ပထမဦးဆုံး ဝန်ကြီးချုပ်ဖြစ်လာခဲ့သည်။ အင်ဒီယာဂန္ဒီသည် ဖခင်နှင့်အနီးကပ်နေထိုင်ပြီး ဖခင်ကြီး ကွယ်လွန်ချိန်အထိ နိုင်ငံ့တာဝန်များကို ကူညီလုပ်ဆောင်ပေးခဲ့သူဖြစ်သည်။ ၁၉၆၅ ခုနှစ်တွင် အင်ဒီယာဂန္ဒီသည် ဖခင်ဖြစ်သူ၏ အရိုက်အရာဖြစ်သော ဝန်ကြီးချုပ်ရာထူးကိုဆက်ခံခဲ့သည်။

အင်ဒီယာဂန္ဒီကိုတွေ့ဆုံရန်ကြောက်ရွံ့နေခဲ့သည့် ဆိုနီယာသည် မကြာမီနဖူးတွေ့ဒူးတွေ့ရင်ဆိုင်ရန် အကြောင်းဖန်လာသည်။ ၁၉၆၈ ခုနှစ်တွင် ရာဂျစ်နှင့်ဆိုနီယာတို့သည် အိန္ဒိယနိုင်ငံ နယူးဒေလီတွင် အခမ်းအနားမပါ အကျဉ်းရုံးကာ လက်ထပ်လိုက်ကြသည်။ ဆိုနီယာသည် ထိုနေ့က ပန်းရောင်ဆာရီကို ယောက္ခမဖြစ်သူအင်ဒီယာကိုယ်တိုင် ဝတ်ပေးခြင်းခံလိုက်ရသည်။ လက်ထပ်ပြီးနောက် ရာဂျစ်နှင့် ဆိုနီယာတို့သည် ယောက္ခမဖြစ်သူအိမ်သို့ လိုက်သွားကြသည်။ ဆိုနီယာနှင့် အင်ဒီယာတို့၏ဆက်ဆံရေးကား နက်ရှိုင်းသည်ဟုဆိုရမည်။ မကြာမီ ဆိုနီယာသည် အင်ဒီယာ၏အယုံကြည်ရဆုံး ချွေးမဖြစ်လာရုံမျှမက အိမ်တွင်ဩဇာညောင်းသူဖြစ်လာသည်။ ထိုသို့ဖြစ်ရခြင်းမှာ ဆိုနီယာကိုယ်တိုင်က ဝတ်နေကျ မီနီစကတ်ကိုချွတ်လိုက်ပြီး ဆာရီကိုစွဲမြဲစွာဝတ်လိုက်ကာ အိန္ဒိယရိုးရာကို လိုက်နာသောကြောင့်ဖြစ်မည်ဟု ယူဆကြသည်။ ထို့ပြင် ဆိုနီယာသည် ဟင်ဒီဘာသာစကားကိုပါ လေ့လာသင်ယူနေသောကြောင့်လည်းဖြစ်သည်။

နိုင်ငံရေးလောကသို့ဝင်ရန် စိတ်မပါသည့်ရာဂျစ်[ပြင်ဆင်ရန်]

ဆိုနီယာတစ်ယောက် ယောက္ခမဖြစ်သူ အင်ဒီယာနှင့် တစ်ပူးတွဲတွဲ ဧည့်ခံပွဲများတက်နေချိန်တွင် ရာဂျစ်သည်နိုင်ငံရေးကိုစိတ်မဝင်စားဘဲ သူထင်ရာလျှောက်လုပ်နေသူဖြစ်သည်။ ကင်းဘရစ်ချ်တက္ကသိုလ်မှထွက်လာပြီးနောက် အင်ဂျင်နီယာလုပ်ငန်းဆီသို့လည်းခြေဦးမလှည့်။ သူဝါသနာပါသည့် လေယာဉ်မောင်းလုပ်ငန်းကိုလုပ်ရင်း အိန္ဒိယန်းအဲယားလိုင်းတွင် လေယာဉ်မောင်းရာထူးကိုရလာသည်။ မိခင်ဖြစ်သူ အင်ဒီယာထံမှ နိုင်ငံရေးအမွေကိုဆက်ခံမည့်သူအဖြစ် သတင်းပြေးနေသူမှာ ရာဂျစ်၏ညီဖြစ်သူ ဆန်ဂျေးဖြစ်သည်။

၁၉၇၀ ပြည့်နှစ်များသည် အင်ဒီယာဂန္ဒီ၏ ဘုန်းမီးနေလတောက်ပနေချိန်ဟုဆိုရမည်ဖြစ်သည်။ ဆန်ဂျေးသည် ထိုအချိန်တွင် အင်ဒီယာ၏ အဓိကကျသည့် ပေါ်လစီပိုင်းဆိုင်ရာ အကြံပေးအဖြစ် တာဝန်ထမ်းဆောင်နေသည်။ ၁၉၈၀ ပြည့်နှစ်တွင် သူသည် ပါလီမန်အတွင်း တရားဝင်နေရာရစပြုလာသည်။ ဆန်ဂျေးတစ်ယောက် အင်ဒီယာနောက်ကိုဆက်ခံ မည့်သူဟူ၍ သတင်းပြေးနေချိန်မှာပင် လေယာဉ်ပျက်ကျပြီး အနိစ္စရောက်သွားရရှာသည်။ နိုင်ငံရေးတွင်အားထားရသည့် သားငယ်ကွယ်လွန်သွားသဖြင့် အင်ဒီယာတစ်ယောက် နိုင်ငံရေး မျိုးဆက်မပြတ်ရေး အတွက် သားကြီးဖြစ်သူ ရာဂျစ်ကိုတောင်းပန်ချဉ်းကပ်ရတော့သည်။ ခင်ပွန်းသည်နိုင်ငံရေးလောက အတွင်းသို့ဝင်ရန် ပထမဦးဆုံး အပြင်းအထန် ကန့်ကွက်သူမှာ ဆိုနီယာဖြစ်သည်။ သူမစိတ်ထဲတွင် နိုင်ငံရေးဟုဆိုလိုက်သည်နှင့် ဒဏ်ရာအနာတရဖြစ်မည် သို့မဟုတ် အသတ်ခံရလိမ့်မည်ဟု အလိုလိုကြိုမြင်နေသောကြောင့်ဖြစ်သည်။ အိန္ဒိယနိုင်ငံရေးသည် အစဉ်အမြဲပေါက်ကွဲလုဆဲဆဲဖြစ်နေသဖြင့် ထိုသို့ စိုးရိမ်ပူပန်နေမိခြင်းလည်းဖြစ်သည်။

လင်မယားနှစ်ယောက် အပြင်းအထန်ဆွေးနွေးငြင်းခုံကြပြီးနောက် ရာဂျစ်တစ်ယောက် လေကြောင်းလိုင်းမှ အလုပ်ထွက်လိုက်သည်။ သို့သော်ဆိုနီယာ့ရင်ထဲတွင် ဘဝင်မကျနိုင်အောင်ဖြစ်နေရသေးသည်။ ခင်ပွန်းသည်၏ဆုံးဖြတ်ချက်ကို အတတ်နိုင်ဆုံးလိုက်လျောပြီး ဇနီးကောင်း တစ်ယောက်ဖြစ်အောင် ခံယူသွားမည်ဟုဆုံးဖြတ်ထားသဖြင့် နိုင်ငံရေးလောကအတွင်းသို့ ဝင်သွားသည့် သူမခင်ပွန်းကို လက်ပိုက်ကာ လိုက်လျော လိုက်ရသည်။ ၁၉၈၁ ခုနှစ်တွင် ရာဂျစ်သည် ပါလီမန်တွင်အနိုင်ရပြီး သူ့ညီဖြစ်သူနေရာတွင် ဆက်ခံနိုင်ခဲ့သည်။ ဥတာပရာဒက်ရှ်ပြည်နယ်၊ အာမသီခရိုင်၏ကိုယ်စားပြု ပြည်သူ့လွှတ်တော်အမတ်ဖြစ်လာသည်။ ထိုပြည်နယ်သည် မြောက်ပိုင်းအိန္ဒိယတွင်နာမည်ကြီးဒေသတစ်ခုဖြစ်ပြီး လူဦးရေ သန်း ၁၆၀ ခန့်နေထိုင်သည့် ဒေသကြီးဖြစ်သည်။

မုဆိုးမလေးဆိုနီယာ[ပြင်ဆင်ရန်]

၁၉၈၄ ခုနှစ်တွင် အိန္ဒိယတစ်နိုင်ငံလုံးသာမက ဂန္ဒီမိသားစုကြီးတစ်ခုလုံး တုန်လှုပ်စရာဖြစ်သွားခဲ့ရသည်။ အပြာရောင်ကြယ်ကိစ္စနှင့်စပ်လျင်း၍ အင်ဒီယာဂန္ဒီအား သူမ၏ ကိုယ်ရံတော်နှစ်ယောက်ကပြန်ပြီး လုပ်ကြံလိုက်သည်။ အိန္ဒိယနိုင်ငံအတွင်းရှိ မူဆလင်၊ ဟိန္ဒူနှင့် ဆစ်ခ်မျိုးနွယ်များကြားတွင် အတော်လေး တင်းမာမှုများ ဖြစ်သွားခဲ့ရသည်။ ထိုနှစ်အစောပိုင်းကပင် ဆစ်ခ်တို့သည် လက်နက်များကို သူတို့အထွတ်အမြတ်ထားရာ ရွှေကျောင်းတော်အတွင်း လျှို့ဝှက်ကာစုဆောင်းထားခဲ့ကြသည်။ အင်ဒီယာဂန္ဒီသည် ဆစ်ခ်တို့အထွတ်အမြတ်ထားရာ ရွှေကျောင်းတော်ကြီးကို ဝင်တိုက်ပြီး လက်နက်များ သိမ်းယူသဖြင့် စစ်သွေးကြွ အမြောက်အမြားကျဆုံးခဲ့ရသည်။ ထိုကိစ္စနှင့်ပတ်သက်ပြီး ဆစ်ခ်တို့သည် အင်ဒီယာဂန္ဒီအပေါ် မကျေမချမ်း ဖြစ်နေကြသည်။ အင်ဒီယာ၏ကိုယ်ရံတော်နှစ်ယောက်မှာလည်း ဆစ်ခ်လူမျိုးများဖြစ်ပြီး သူမနေအိမ်အတွင်းမှာပင် လုပ်ကြံ သတ်ဖြတ် လိုက်ကြခြင်းဖြစ်သည်။ အင်ဒီယာဂန္ဒီလုပ်ကြံခံရပြီး နာရီပိုင်းအတွင်းမှာပင် ရာဂျစ်ဂန္ဒီသည် သူ့မိခင်၏နေရာအတွက် ကျမ်းသစ္စာကျိန်ဆိုခဲ့သည်။

ဆိုနီယာသည် ရာဂျစ်ဝန်ကြီးချုပ်ရာထူးကို လက်ခံလိုက်သည့်ကိစ္စနှင့်ပတ်သက်ပြီး လုံး၀သဘောတူခြင်းမရှိပေ။ ခင်ပွန်းဖြစ်သူကို ရာထူးမှနုတ်ထွက်ရန် အမျိုးမျိုးတောင်းပန် ဖျောင်းဖျသော်လည်းမရသည့်အဆုံးတွင် ဝန်ကြီးချုပ်ကတော်ဘဝဖြင့် ခင်ပွန်းသည်နောက်လိုက်ကာ သတိဝီရိယကြီးစွာဖြင့် ပါရမီဖြည့်နေရရှာသည်။ သူမကိုယ်တိုင် နယူးဒေလီရှိ အိန္ဒိယအမျိုးသားပြတိုက်ကြီးတွင် သမိုင်းပညာရှင်အဖြစ် တာဝန်ထမ်းဆောင်ရင်း အိန္ဒိယနိုင်ငံ၏ရှုခင်းများကိုစုဆောင်းနေသည်။ အင်ဒီယာဂန္ဒီနှင့် ဖခင်ဂျဝါဟာလာနေရူးတို့ အပြန်အလှန်ပေးပို့ခဲ့ကြ သည့် စာများကိုလည်း တည်းဖြတ်ပေးနေရသည်။ ထိုစာများကို ၁၉၈၀ ပြည့်နှစ်များနှင့် ၁၉၉၀ ပြည့်နှစ် များအတွင်း အကြိမ်ပေါင်းများစွာ ထုတ်ဝေခဲ့ပြီးဖြစ်သည်။ ဆိုနီယာသည် အောင်မြင်သည့် သမိုင်းပညာရှင်တစ်ယောက် မဖြစ်ခဲ့သော်လည်း ရာဂျစ်သည် အနည်းငယ်အောင်မြင်မှုများ ရလာသည်ဟုဆိုရမည်ဖြစ်သည်။ သူသည် မိခင်၏အရှိန်အဝါ လွှမ်းမိုးမှုကိုမခံလိုသဖြင့် ကိုယ်ပိုင်ပြဋ္ဌာန်းအုပ်ချုပ်မှုများကိုစီစဉ် ဆောင်ရွက်ခဲ့ သော်လည်း အောင်မြင်မှုမရခဲ့ပေ။ ဥပမာ တရားမဝင်လက်နက်များရောင်းဝယ်မှုကို မည်သို့မျှ ထိန်းသိမ်းနိုင်ခြင်းမရှိခဲ့ပေ။ သို့ဖြစ်ရာ ၁၉၈၉ ခုနှစ်တွင် ရာဂျစ်သည် ပြန်လည်ရွေးကောက်ခြင်းမခံရတော့ပေ။

၁၉၉၁ ခုနှစ် ရွေးကောက်ပွဲတွင် ရာဂျစ်သည် မိသားစု အမည်နှင့် အရှိန်အဝါကိုသုံးပြီး ရွေးကောက်ပွဲအတွက် လှုပ်ရှားရန် ဆုံးဖြတ်လိုက်သည်။ သူသည် လူထုစည်းရုံးရေးအတွက် အမြဲလှုပ်ရှားသွားလာရာတွင် အစောင့်အရှောက်များကိုလည်း သိပ်ခေါ်လေ့မရှိပေ။ မိခင်ဖြစ်သူ လုပ်ကြံခံရပြီးကတည်းက ကျည်ကာအင်္ကျီဝတ်ပြီး၊ သက်တော်စောင့်များဖြင့်သွားလာလေ့ရှိသည်။ သူသွားလာသည့်ခရီးတိုင်းတွင် ပြည်သူနှင့်တစ် သားတည်းဖြစ်ရန်နှင့် စည်းရုံးရေးအတွက်ဦးတည်ပြီး သွားလေ့ရှိသည်။ သူသတိတစ်ချက်လစ်ဟင်းသွားမှုသည် သူ့အသက် ပါသွားရလိမ့်မည်ဟု မျှော်လင့်မထားခဲ့ပေ။ ၁၉၉၁ ခုနှစ်၊ မေလ ၂၂ ရက်နေ့တွင် အိန္ဒိယတောင်ပိုင်း တမီလ်နာဒူးမြို့၌ လှည့်လည်သွားလာနေရင်း အမျိုးသမီးငယ်တစ်ယောက်၏ လုပ်ကြံသတ်ဖြစ်ခြင်းကို ခံလိုက်ရသည်။ ထိုအမျိုးသမီးငယ်သည် တမီးလ်ကျားအဖွဲ့ဝင်တစ်ဦးဖြစ်ပြီး သီရိလင်္ကာ မြောက်ပိုင်းခွဲထွက်ရေးအတွက် လှုပ်ရှားနေကြသူများဖြစ်သည်။

ခင်ပွန်းဖြစ်သူ လုပ်ကြံသတ်ဖြတ်ခံလိုက်ရပြီးနောက် ဆိုနီယာ၏ဘဝသည် တစ်စစီကြေလုမတတ်ဖြစ်သွားခဲ့ရသည်။ ခင်ပွန်းဖြစ်သူ ကွယ်လွန်ပြီး ၆ နှစ်ခန့်တစ်ကိုယ်တည်းဧကစာကျင့်ကာ အထီးကျန်နေထိုင်ခဲ့သည်။ အိမ်ထဲမှအိမ်ပြင်သို့မထွက်၊ သားသမီးများနှင့်သာ အချိန်ကုန်နေခဲ့သည်။ ပြင်ပလောကနှင့် မဆက်ဆံတော့ရန် ဆုံးဖြတ်ပြီးချိန်မှ နှစ်ကြိမ်သာချိုးဖောက်ပြီး လူထုထဲရောက်ခဲ့သည်။ တစ်ကြိမ်မှာ ၁၉၉၂ ခုနှစ်တွင် Rajiv ဆိုသည့်စာအုပ်ထုတ်ဝေသည့်အထိန်းအမှတ်အဖြစ် လူထုထဲရောက်လာသည်။ သူမခင်ပွန်းဖြစ်သူရာဂျစ်၏ လျှပ်တစ်ပြက် ရုပ်ပုံလွှာများဟုဆိုရမည့် မမျှော်လင့်ပဲ သူမနှင့်ဆုံတွေ့ခဲ့ရသည့်ဇာတ်လမ်းများကို ပြန်လည်ရေးသား တင်ပြထားသည့်စာအုပ်ဖြစ်သည်။ ၁၉၉၄ ခုနှစ်တွင် ရာဂျစ်နှင့် သူမအကြောင်းအပြည့်စုံဆုံးဟုဆိုရမည့် Rajiv's World ဆိုသည့်စာအုပ်ထပ်ထွက်သည်။ နောက်ပိုင်းတွင် ခင်ပွန်းဖြစ်သူ ကမ္ဘာအနှံ့ခြေဆန့်ကာ ထူထောင်သွားခဲ့သည့် ရန်ပုံငွေလုပ်ငန်းများကို ဆက်လက်ထိန်းသိမ်းလုပ်ဆောင်သွားခဲ့သည်။

ကွန်ဂရက်ပါတီကိုကယ်တင်ခြင်း[ပြင်ဆင်ရန်]

လူတွေကိုရှောင်ဖယ်ကာ ဧကစာကျင့်သုံးနေသည့် ဆိုနီယာအား ကွန်ဂရက်ပါတီမှ သူတို့ပါတီ၏ခေါင်းဆောင်အဖြစ် တာဝန်ယူပေးပါရန် မေတ္တာရပ်ခံကြသည်။ ကွန်ဂရက်ပါတီသည် အိန္ဒိယနိုင်ငံတွင် အင်အားကြီးသည့်ပါတီကြီးတစ်ခုဖြစ်သော်လည်း အင်ဒီယာဂန္ဒီ ကွယ်လွန်ပြီးသွားကတည်းက အခြေအနေယိမ်းယိုင်စပြုလာသည်။ ၁၉၉၀ ပြည့်နှစ်တွင် ပါတီ၏အရှိန်အဝါနှင့်ဩဇာ အတော်လေး ကျဆင်း လာခဲ့သည်။ ထိုအချိန်တွင် ကွန်ဂရက်ပါတီ၏ အတိုက်အခံပါတီဖြစ်သည့် ဘာရာတီယဂျနတပါတီ (BJP) သည် ရှေ့တန်းသို့ရောက်လာ သည်။ အိန္ဒိယနိုင်ငံတွင် ဂန္ဒီဆိုသည့်အမည်က ပြည်သူများစိတ်ထဲတွင် စွဲနေဆဲဖြစ်သည်။ သို့ဖြစ်ရာ ကွန်ဂရက်ပါတီ ကိုယ်စားလှယ်တို့ကလည်း ဆိုနီရာဂန္ဒီဟူ၍အမည်ခံယူထားသည့် တိုင်းတစ်ပါးသူကို ပွဲထုတ်ပြီး ပါတီကိုပြန်လည် အသက်သွင်းချင်နေကြသည်။ သို့သော်ဆိုနီယာက ကမ်းလှမ်းချက်ကို ငြင်းဆိုလိုက်ပြန်သည်။ ၁၉၉၇ ခုနှစ်သည် ကွန်ဂရက်ပါတီအတွက် သေရေးရှင်ရေးတမျှ အရေးကြီးသည့်ကာလဖြစ်လာ သည်။ သို့ဖြင့် ခင်ပွန်းသည်နှင့် ယောက္ခမဖြစ်သူတို့မျက်နှာကို ထောက်ထားပြီး ပါတီတွင်းသို့ ဝင်ရောက်လှုပ်ရှားပေးရန် သဘောတူလိုက်လေ သည်။

ဆိုနီယာသည် နိုင်ငံရေးလောကအတွင်းသို့ဝင်သာဝင်လိုက်ရသည် နိုင်ငံရေးနှင့်ပတ်သက်ပြီး အတွေ့အကြုံမရှိ။ ၁၉၉၈ ခုနှစ် ဥပဒေပြုရေးတွင် စတင်လှုပ်ရှားပါဝင်လိုက်သည်။ နိုင်ငံအတွင်း နေရာပေါင်း ၁၄၀ ခန့်၌ ပရိသတ်များကို စည်းရုံးရေးအတွက် မိန့်ခွန်းများပြောကြားပေးရသည်။ ဟိန္ဒီလေသံနှင့် အီတလီသံဝဲဝဲဖြင့် အိန္ဒိယသားတွေကို ဖြည်းဖြည်း မှန်မှန်ပြောကြားကာ စည်းရုံးရရှာသည်။ ပြည်သူတွေ၏အမြင်တွင် ပူဆွေးလွမ်းမောဖွယ်မျက်နှာထားနှင့် မုဆိုးမလေးကိုကြည့်ပြီး သနားနေကြရော့သလားမသိ။ မဲဆန္ဒရှင်တွေကလည်း ကွန်ဂရက်ပါတီ၏ အနာဂတ်အတွက် ဆိုနီယာကိုမဲပေးလျှင်ကောင်းမလား၊ နိုင်ငံ၏အနာဂတ်အတွက် တိုင်းတစ်ပါးသူလက်ထဲ နိုင်ငံကို၀ကွက်အပ် လိုက်လျှင် ကောင်းမလား ဝေဝါးစွာသံသယဖြစ်နေကြဆဲ။ သို့သော် ဆိုနီယာကြောင့် ကွန်ဂရက်ပါတီအနာဂတ်ရောင်နီကတော့ ထွန်းလင်းလာခဲ့သည်။

အတိုက်အခံပါတီများကြားတွင် ဆိုနီယာသည်ပိုပြီးထင်ရှားလာသည်။ အထူးသဖြင့် ဘီဂျေပီပါတီက သူမကိုထိတ်လန့်စရာကောင်းသည့် ပြိုင်ဘက်တစ်ဦးအနေဖြင့် မြင်လာသည်။ အတိုက်အခံတို့က ဆိုနီယာကို အိန္ဒိယနိုင်ငံ၏နိုင်ငံရေးနှင့်ပတ်သက်ရန်အကြောင်းမရှိဟု ထောက်ပြ လာကြသည်။ အဘယ်ကြောင့်ဆိုသော် သူမသည် အီတလီနိုင်ငံတွင်မွေးဖွားပြီး နိုင်ငံခြားသားဖြစ်နေသောကြောင့်ဖြစ်သည်။ ဆိုနီယာသည် ၁၉၈၄ ခုနှစ်ကတည်းက အိန္ဒိယနိုင်ငံသားအဖြစ် ခံယူပြီးဖြစ်သည်ဟုဆိုကြသည်။ ပြည်သူတွေအမြင်က ဆိုနီယာကို ရာဂျစ်နှင့်တွဲပြီး နိုင်ငံသား တစ်ယောက်ကဲ့သို့ရှုမြင်နေကြသော်လည်း အတိုက်အခံများနှင့် ပညာတတ်များက နိုင်ငံခြားသူတစ် ယောက်အနေဖြင့်သာ ရှုမြင်သုံးသပ်ကြသည်။ ရာဂျစ်နှင့်လက်ထပ်ပြီး၊ အိန္ဒိယတွင်နေကာ၊ အိန္ဒိယစာသင်ပြီး၊ အိန္ဒိယသားတွေလိုဝတ်ဆင်နေထိုင်ပြရုံဖြင့် အိန္ဒိယအမျိုးသမီးတစ်ဦးအဖြစ် လက်ခံသူတွေရှိသကဲ့သို့ လက်မခံသူများရှိနေခြင်းကပင် ဆိုနီယာအတွက် စိုးရိမ်စရာအနေအထားဖြစ်သည်။

သို့သော် ၁၉၉၈ ခုနှစ်ရွေးကောက်ပွဲတွင် ကွန်ဂရက်ပါတီသည် ပါလီမန်၌အမတ်နေရာ ၂၈ နေရာရလိုက်သည်။ BJP ပါတီက မဲအပြတ်အသတ်နိုင်သော်လည်း အခြားရှုံးနိမ့်သည့် ပါတီ ၁၇ ပါတီနှင့် ညွန့်ပေါင်းအစိုးရဖွဲ့လိုက်သည်။ သို့ဖြစ်ရာ ၁၉၉၈ ခုနှစ် မတ်လတွင် BJP ပါတီခေါင်းဆောင် Atal Behari Vajpayee သည် ဝန်ကြီးချုပ်အဖြစ် အမည်စာရင်း တင်သွင်းခြင်းခံရသည်။ သို့သော်အောင်မြင်မှုသည် ခေတ္တသာ ဖြစ်သည်ဟုဆိုရမည်။ ဗက်ပရီး အစိုးရသည် ၁၉၉၉ ခုနှစ် ဧပြီလအထိ တိုင်းပြည်၏အခြေအနေအရပ်ရပ်ကို ထိန်းသိမ်းနိုင်စွမ်းမရှိဘဲ နောက်တစ်နှစ်တွင် ရွေးကောက်ပွဲကိုပြန်လည်ကျင်းပပေးရသည့်အခြေအနေသို့ရောက်ခဲ့သည်။

ထိုအချိန်တွင် ဆိုနီယာသည် ကွန်ဂရက်ပါတီ၏ ဥက္ကဋ္ဌဖြစ်နေသည်။ လူတွေကလည်းနောက်ထပ်အင်ဒီယာဂန္ဒီဖြစ်လာလေမလား စောင့်ကြည့်အကဲခပ်နေကြသည်။ ထိုအချိန် တွင်နောက်ထပ်လေသံတွေထွက်လာပြန်သည်။ ဆိုနီယာသည် အိန္ဒိယနိုင်ငံရေးတွင် ပါဝင်ပတ်သက်ခွင့်ရှိ မရှိအငြင်း အခုန်ဖြစ်လာကြသည်။ ယခုတစ်ကြိမ်ထိုသို့အော်သူများထဲတွင် သူမပါတီ၏ ထိပ်တန်းခေါင်းဆောင်ပိုင်းမှပင် သံသယဖြင့် မေးခွန်းထုတ် သည့်အထဲတွင်ပါလာသည်။ သို့ဖြစ်ရာ ပါတီကိုမပြိုကွဲစေလိုသဖြင့်ဟုအကြောင်းပြပြီး ဆိုနီယာသည် ပါတီမှ နုတ်ထွက်ပေးလိုက်သည်။ သို့သော် ကွန်ဂရက်ပါတီက သူမနုတ်ထွက်လွှာကိုလက်မခံဘဲ၊ သူမကိုတိုက်ခိုက်သည့်ပါတီဝင် များအား ပါတီဝင်အဖြစ်မှထုတ်ပယ်လိုက်သည်။

အောက်တိုဘာလ ရွေးချယ်တင်မြှောက်ပွဲထပ်မံကျင်းပရာတွင် ဆိုနီယာအား ကွန်ဂရက်ပါတီ၏ ဝန်ကြီးချုပ်အဖြစ် ယှဉ်ပြိုင်ရန် ပါတီက ခွင့်ပြုမည် မပြုမည်ကလည်းမရှင်းလင်းသေးပေ။ ကွန်ဂရက်ပါတီသည် အမတ်နေရာ ၁၁၂ နေရာသာရသဖြင့် အခြေအနေမကောင်းပေ။ BJP ပါတီသည် အမတ် နေရာ ၁၈၂ နေရာရရှိထားသည်။ ဗက်ပရီးသည် နောက်တစ်ကြိမ် ညွန့်ပေါင်းအစိုးရ ထပ်မံဖွဲ့ရပြန်သည်။ အမျိုးသား ဒီမိုကရက်တစ်တပ်ပေါင်းစုအမည်ဖြင့် BJP ဦးဆောင်သည့် အစိုးရသည် ပါလီမန်အမတ်နေရာ ၅၄၅ နေရာတွင် အမတ် နေရာ ၃၀၀ ကျော်ဖြင့် အစိုးရအဖွဲ့ကိုဦးဆောင်ခွင့်ရသွားသည်။ ဤတစ်ကြိမ်တွင် ဗက်ပရီးသည် အားလုံးနှင့်သင့်မြတ် အောင် စီမံဆောင်ရွက်နိုင်ခဲ့သဖြင့် BJP ပါတီကနောက်သက်တမ်း ငါးနှစ်အုပ်ချုပ်ခွင့်ရရှိသွားခဲ့သည်။

ပါလီမန်တွင် ခင်ပွန်းသည်၏နေရာကိုဆက်ခံခြင်း[ပြင်ဆင်ရန်]

ထိုရွေးကောက်ပွဲတွင် ဆိုနီယာသည် ပါလီမန်၌နေရာနှစ် နေရာရခဲ့သည်။ သူမခင်ပွန်း ရာဂျစ်တက်လာခဲ့သည့် အူတာပရာဒက်ရှ်ပြည်နယ် သည်လည်း တစ်ခုအပါအဝင်ဖြစ်သည်။ ရွေးကောက်ပွဲဝင်သည့် ကိုယ်စားလှယ်လောင်းတစ်ယောက်သည် အမတ်နေရာနှစ်နေရာအတွက် ပြည်နယ်နှစ်ခုတွင် ပါဝင်ယှဉ်ပြိုင်ခွင့်ရှိပြီး နှစ်နေရာစလုံးတွင် အနိုင်ရရှိပါက ရွေးချယ်တင်မြှောက်ခြင်းခံရလေသည်။ ဆိုနီယာသည် ထိုအမတ်နေရာ နှစ်နေရာစလုံးတွင် အနိုင်ရရှိခဲ့သဖြင့် သူမခင်ပွန်းသည်ဆက်ခံခဲ့သည့်နေရာကို တိုက်ရိုက်ရွေးချယ်တင်မြှောက်ခြင်းခံခဲ့ရသည်။

BJP ပါတီအုပ်ချုပ်မှုအောက်တွင် နိုင်ငံစီးပွားရေးအောင်မြင်တိုးတက်ခဲ့သည်ဟုဆိုရမည်။ ၂၀၀၄ ခုနှစ်တွင် ဗက်ပရီးသည် စီးပွားရေး ကိုဘက်စုံတိုးတက်အောင် ဆောင်ရွက်နိုင်ပြီး အိန္ဒိယနိုင်ငံသည် စီးပွားရေးသာမက သိပ္ပံနှင့်နည်းပညာကဏ္ဍတွင်ပါ တိုးတက်လာသည်။ သို့ရာတွင် အိန္ဒိယနိုင်ငံ၏ သန်းပေါင်းများစွာသော ကျေးလက်ပြည်သူများသည် BJP ပါတီ၏ပြုပြင်ပြောင်းလဲမှုအောက်တွင် တိုးတက်သင့်သလောက် တိုးတက်သည်ဟု မဆိုနိုင်သေးပေ။ ၂၀၀၄ ခုနှစ်စာရင်းအင်းများအရ အိန္ဒိယနိုင်ငံ၏ လူဦးရေထက်ဝက်ခန့်သည် တစ်နေ့လျှင် နှစ်ဒေါ်လာ ဝင်ငွေဖြင့်သာ ရပ်တည်နေကြရသေးသည် ဟုဆိုသည်။ သို့သော် ဗက်ပရီးက မဲဆန္ဒရှင်များသည် သူ့နောက်တွင်ရှိနေဆဲဟုယုံကြည်နေခဲ့သည်။ ၂၀၀၄ ခုနှစ် အောက်တိုဘာလတွင် နိုင်ငံတော်ရွေးချယ်တင်မြှောက်ပွဲအတွက် ကိုယ်စားလှယ်လောင်းအမည်စာရင်းများတင်သွင်းရန် ကြေညာခဲ့သည်။ သူ့အနေဖြင့် ဆန္ဒခံယူပွဲကို ၆ လခန့်စောပြီး ကျင်းပရန် စီစဉ်ခဲ့ခြင်းဖြစ်သည်။

ဆိုနီယာသည် ရွေးကောက်ပွဲသို့ ဝင်နွှဲရန်ပြင်ဆင်ရပြန်သည်။ မိုင်ပေါင်း ၄ သောင်းခန့်အားလပေါင်းများစွာခရီးထွက်ကာ ရွေးကောက်ပွဲ အတွက်စည်းရုံးရေးဆင်းခဲ့သည်။ အပူချိန် ၁၀၀ ဒီဂရီဖာရင်ဟိုက်ထဲတွင် ချွေးပြိုက်ပြိုက်ကျကာ အချိန်ကုန်ခံပြီး စည်းရုံးခဲ့ရသည်။ စည်းရုံးရေး ဆင်းစဉ်ကာလအတွင်း ဆိုနီယာသည် ဆာရီအဖြူကိုသာဝတ်ဆင်ခဲ့သည်။ အိန္ဒိယနိုင်ငံရှိ မုဆိုးမများဝတ်ဆင်ရသည့် အထိမ်းအမှတ် ကိုဝတ်ဆင်ပြီး လှည့်လည်ဟောပြောနေခဲ့ခြင်းဖြစ်သည်။ နိုင်ငံအတွင်းရှိဆင်းရဲသားများနှင့် ဆင်းရဲရခြင်းအကြောင်းများကို ရိုးရိုးနှင့်ရှင်းရှင်း ပြောပြပြီး လိုက်လံ စည်းရုံးခြင်းဖြစ်သည်။ တစ်နည်းအားဖြင့် ဗက်ပရီးကို အတိုက်အခံပြုကာ စိန်ခေါ်စည်းရုံးလိုက်ခြင်းလည်းဖြစ်သည်။ ဗက်ပရီးသည် အိန္ဒိယနိုင်ငံ၏ စီးပွားရေးကို မြှင့်တင်နိုင်ရေးအတွက် စွမ်းဆောင်ကြိုးပမ်းခဲ့သည်ဆိုစေ အိန္ဒိယနိုင်ငံအတွင်းရှိ အောက်ခြေဆင်းရဲသားလူများစုမှာ ဆင်းရဲမွဲတေ နေဆဲဖြစ်သည်။ ဤသည်ကို ဆိုနီယာကအခွင့်ကောင်းယူပြီး တိုက်ကွက်ဆင်လိုက်ခြင်းလည်းဖြစ်သည်။ ဆိုနီယာစည်းရုံးရေးဆင်းရာတွင် စည်းလုံးကြရန်၊ စိတ်ရှည်သည်းခံကြရန်နှင့် အချင်းချင်းချစ်ခင်ကြရန် စည်းရုံးလှုပ်ရှားခဲ့ကြောင်းလည်းတွေ့ရသည်။ ၁၉၉၈ ခုနှစ်တွင် အိန္ဒိယနိုင်ငံ အတွင်းရှိ အောက်ခြေလူတန်းစား အများစုကို လေပြေလေးထိုးပြီး ဆွဲဆောင်နိုင်သဖြင့် သူမကို လူတိုင်းကချွေးမလေးဟု ချစ်စနိုးခေါ်သည်အထိ ဖြစ်ခဲ့ရသည်။

ဧပြီလတွင် ရွေးချယ်တင်မြှောက်ပွဲစတင်ခဲ့သည်။ လူပေါင်းသန်း ၄၀၀ ခန့် မဲရုံများဆီသို့သွားပြီး မဲပေးခဲ့ကြသည်။ မေလတွင် မဲများ ရေတွက်ပြီးစီးခဲ့ရာ အံ့အားသင့်စရာအဖြေတစ်ခုရရှိခဲ့သည်။ ကွန်ဂရက်ပါတီသည် ညွန့်ပေါင်းအဖွဲ့နှင့်အတူ အမတ်နေရာ ၂၇၉ နေရာ ရရှိသည်အထိ အောင်ပွဲဆင်နိုင်ခဲ့သည်။ မဲအရေအတွက် အများစုဖြင့် အနိုင်ရခဲ့သဖြင့် ကွန်ဂရက်ပါတီသည် ဝန်ကြီးချုပ်အသစ်ကို ရွေးချယ်တင်မြှောက်ရန် အခွင့်အရေးရရှိခဲ့သည်။ အများစုရှေ့ကပြေးနေသူမှာ ဆိုနီယာကလွဲပြီး မည်သူများဖြစ်နိုင်ပါမည်နည်း။ သို့သော် ကာယကံရှင် ကိုယ်တိုင်က နှုတ်ဆိတ်နေသည်။ ကွန်ဂရက်ပါတီကလည်း သူမကိုသာ ဝန်ကြီးချုပ်တာဝန်ပေးအပ်လိမ့်မည်ဟု ထင်မှတ်နေကြသည်။ ဆိုနီယာသည် ကွန်ဂရက် ပါတီ၏ခေါင်းဆောင်တစ်ဦးမဟုတ်ပါလော။

စိတ်ကူးယဉ်ဇာတ်လမ်းတစ်ပုဒ်၏နိဂုံး[ပြင်ဆင်ရန်]

ထိုနှစ် မေလ ၁၇ ရက်နေ့ အင်္ဂါနေ့တွင် ကွန်ဂရက်ပါတီက အစည်းအဝေးထိုင်သည်။ ဆိုနီယာက သူမသည် ကွန်ဂရက်ပါတီမှ နုတ်ထွက်ကြောင်း ကြေညာလိုက်ရာ အိန္ဒိယ တစ်နိုင်ငံလုံးသာမက တစ်ကမ္ဘာလုံးကပါ ကြက်သေ သေသွားကြသည်။ သူမကိုယ်တိုင်က သူမသည် ဤရာထူးနှင့်မထိုက်တန်ပါဟု ရိုးသားစွာဝန်ခံပြီး နုတ်ထွက်လိုက်ခြင်းဖြစ်သည်။ သူမကို နီးစပ်သူများနှင့် ဩဇာကြီးမားသူများက ပြန်လည်စဉ်း စားပါရန် ပန်ကြားကြသော်လည်း စိတ်ဓာတ်ခိုင်မြဲစွာဖြင့် စဉ်းစားဆုံးဖြတ်ပြီးဖြစ်သဖြင့် အိန္ဒိယနိုင်ငံ၏ခေါင်းဆောင်ဘဝကို မခံယူဝံ့ပါဟု ပြန်ကြားလိုက်လေသည်။ အချို့ကလည်း BJP ပါတီ၏တွန်းအားကြောင့် သူမသည် ဤရာထူးကို ငြင်းပယ်ရခြင်းဖြစ်သည်ဟု စွပ်စွဲကြသည်။ အတိုက်အခံတွေအားလုံးကလည်း ထိုအချိန်တွင် သူမကို နိုင်ငံခြားသူတစ်ယောက်အနေဖြင့် တောက်လျှောက်ဖိအားပေး နေသည် ကတော့ အမှန်ဖြစ်သည်။ အချို့ကလည်း သူမနှင့် သားသမီးနှစ်ယောက် အသက်အန္တရာယ်ကိုစိုးရိမ်သောကြောင့် ဤရာထူးကို ငြင်းပယ်ရခြင်း ဖြစ်ကြောင်း ခန့်မှန်းကြသည်။ ကျိန်စာသင့်သလိုဖြစ်နေသော ဂန္ဒီမိသားစုအတွက် ဤအချက်သည်လည်း ထည့်သွင်းစဉ်း စားရမည့် အချက်တစ်ချက် ဖြစ်နေသည်။ သို့သော် ဆိုနီယာကတော့ သူမသည် ပါတီ၏ဘေးသို့ထွက်ထိုင်လိုက်ခြင်းသာလျှင် အိန္ဒိယပြည်သူများနှင့် သူမပါတီအတွက် အကောင်းဆုံးဖြစ်လိမ့်မည်ဟု ဆုံးဖြတ်လိုက်လေသည်။

ဆိုနီယာသည် ပါတီမှနုတ်ထွက်ကြောင်း ကြေညာပြီးသည်နှင့် မိတ်ဆွေဖြစ်သူ မန်မိုဟန်ဆင်းကို ဝန်ကြီးချုပ်အဖြစ် အမည်စာရင်းတင်သွင်းပြီး အဆိုပြုခဲ့သည်။ ၂၀၀၄ ခုနှစ် မေလ ၁၉ ရက်နေ့တွင် မန်မိုဟန်ဆင်းသည် ဝန်ကြီးချုပ်ရာထူးကို လက်ခံလိုက်သည်။ ဆိုနီယာသည် နိုင်ငံတော်အကြီး အကဲရာထူးကို လက်မခံသော်လည်း ကွန်ဂရက်ပါတီ၏နောက် ကွယ်တွင် ကြိုးကိုင်သူများတွင် တစ်ဦးအပါအဝင်ဖြစ်နေခဲ့သည်။ အများစုကတော့ ဆိုနီယာအား ထိုသို့ရှေ့တန်းထွက်မလာခြင်းကို နောက်ဆုံးတွင် လက်ခံလိုက်ကြသည်။