စောထွန်းအောင်မြင့်

ဝီကီပီးဒီးယား မှ
အ​ညွှန်း​သို့ ခုန်ကူးရန် ရှာဖွေရန် ခုန်ကူးမည်

စောထွန်းအောင်မြင့်(၁၉၄၃ဖွား) သည် ၂၀၂၁ ခုနှစ် ဖေဖော်ဝါရီလ ၁ ရက်နေ့ နောက်ပိုင်း တပ်မတော်က ခန့်အပ်သော တိုင်းရင်းသားလူမျိုးများရေးရာဝန်ကြီးဌာန၏ ပြည်ထောင်စုဝန်ကြီးဖြစ်သည်။[၁] သူသည်

စစ်တက္ကသိုလ်အပါတ်စဉ်(၆) ကျောင်းဆင်း စစ်တပ်အရာရှိဟောင်း( တပ်မတော်(ရေ))တစ်ဦးဖြစ်ကာ ၁၉၈၈ အရေးအခင်းအပြီးတွင် အရပ်ဘက်ပြည်သူ့ဝန်ထမ်းအဖြစ်ပြောင်းလဲခဲ့ပြီး ၁၉၉၃ခုနှစ်တွင် အငြိမ်းစားယူခဲ့သည်။ ၂၀၁၀ခုနှစ် ဧပြီလ ၁၉ ရက်တွင် စတင်တည်ထောင်ခဲ့သည့် ကရင်ပြည်သူ့ပါတီတွင် ဦးဆောင်သူအဖြစ်ပါဝင်ခဲ့ကာ ပါတီ ဥက္ကဋ္ဌ အဖြစ်ထမ်းဆောင်ခဲ့သူလည်းဖြစ်သည်။[၂] သူသည် ပြည်တွင်း ကရင်ပါတီအသိုင်းအဝိုင်းတွင် ထင်ရှားသူတစ်ဦးဖြစ်သည်။ သူ၏ ဖခင်ဖြစ်သူသည် ၁၈၈၁ ခုနှစ်တွင် စတင်တည်‌ထောင်သည့် ‌ဒေါကလု-ကရင်အမျိုးသား အသင်းကြီး၏ ‌နောက်ဆုံး ဥက္ကဋ္ဌ ဝတ်လုံတော်ရ ‌စောဘ‌မောင် (Barrister At Law) ဖြစ်သည်။.

ငယ်ဘဝနှင့်တာဝန်ထမ်းဆောင်ခဲ့ခြင်းများ[ပြင်ဆင်ရန်]

၁၀တန်းစာမေးပွဲ အောင်မြင်ပြီး တက္ကသိုလ်ပထမနှစ်တက်နေစဉ် စစ်တက္ကသိုလ်က ဝင်ခွင့်ခေါ်ယူနေသည့်အတွက် သွားရောက်လျှောက်ထားရာ အောင်မြင်သဖြင့် စစ်တက္ကသိုလ်အပါတ်စဉ်(၆) ကို ၁၉၆၀ခုနှစ် တွင် စတက်ခဲ့သည်။၁၉၆၄ခုနှစ်တွင် ကျောင်းဆင်းခဲ့ပြီး ကျောင်းဆင်းချိန် သူ၏အသက်သည် ၂၁နှစ်အရွယ်သာ ရှိသေးသည်။ စစ်တက္ကသိုလ်ကျောင်းဆင်းပြီးနောက် တပ်မတော်ရေတွင် တာဝန်ထမ်းဆောင်ခဲ့ပြီး တာဝန်ထမ်းဆောင်စဉ်အတွင်း ဒိန်းမတ်နိုင်ငံသို့ စစ်သ‌င်္ဘောတည် ‌ဆောက်ရန် ၄ ဦး‌ရွေးချယ်‌စေလွှတ်ရာတွင် အ‌ရွေးခံရခြင်း၊ စစ်သ‌င်္ဘောတည် ‌ဆောက် ပြီး‌နောက် ၁၉၈၁ ခုနှစ်တွင် မြန်မာနိုင်ငံသို့ သမုဒ္ဒရာနှင့် ပင်လယ်များကို ၅၆ရက်ကြာ ဖြတ်သန်းပြီး ပြန်‌မောင်းခဲ့ရာတွင်ပါဝင်ခဲ့ရခြင်း၊ ၁၉၈၆ခုနှစ်တွင် အ‌မေရိကန်နိုင်ငံသို့ စစ်သင်တန်းသွားတက်ရန် အ‌ရွေးခံရခြင်းစသည့် ဖြစ်ရပ်များရှိခဲ့သည်ဟု ၎င်းကိုယ်တိုင်ပြောကြားထားသည်။[၃] တပ်မတော်(ရေ)တွင်  ဒုဗိုလ်မှူးကြီးရာထူးဖြင့်  ပူးတွဲဗျူဟာစစ်ရေယာဉ်စုမှူး အဖြစ် ‌ရေတပ်တွင် နောက်ဆုံးတာဝန်ထမ်း‌ဆောင်ခဲ့သည်။ရှစ်‌လေးလုံး(၈၈၈၈)အ‌ရေး‌တော်ပုံအတွင်း တပ်မ‌တော်အာဏာသိမ်းလိုက်ပြီး အရပ်ဘက်သို့ ‌ပြောင်း‌ရွှေ့တာဝန်ထမ်း‌ဆောင်ခဲ့ပြီး ပို့‌ဆောင်‌ရေးဝန်ကြီးဌာန လက်‌အောက်ခံ သ‌င်္ဘောသားအလုပ်အကိုင်ကြီးကြပ်‌ရေးဌာန (SECD)တွင် ညွှန်ကြား‌ရေးမှူး၊ ၁၉၉ဝ ပြည့်နှစ်တွင် ‌ရေ‌ကြောင်းပို့‌ဆောင်‌ရေးညွှန်ကြားမှုဦးစီးဌာန ၌ ညွှန်ကြား‌ရေးမှူးချုပ်၊ ပြည်တွင်းရေ‌ကြောင်းပို့‌ဆောင်‌ရေး ဌာနတွင် ဦး‌ဆောင်ညွှန်ကြား‌ရေးမှူးရာထူးများထမ်းဆောင်ခဲ့ပြီး ၂၀၀၃ခုနှစ်တွင် အငြိမ်းစားယူခဲ့သည်။

နိုင်ငံရေးလောကထဲ ဝင်ရောက်လာခြင်း[ပြင်ဆင်ရန်]

စောထွန်းအောင်မြင့်သည်  ၂၀၁၀ခုနှစ်တွင် ကရင်ပြည်သူ့ပါတီကို တည်ထောင်သူထဲပါကာ  ပါတီဥက္ကဋ္ဌတာဝန်ထမ်းဆောင်ခြင်းဖြင့် နိုင်ငံရေးလောကထဲ ဝင်ရောက်ခဲ့သည်။ အထွေထွေရွေးကောက်ပွဲ ၂၀၁၀ တွင် ရန်ကုန်တိုင်းဒေသကြီး ကရင်တိုင်းရင်းသားရေးရာဝန်ကြီးနေရာကို ဝင်ပြိုင်ရာ အနိုင်ရခဲ့၍ ကရင်တိုင်းရင်းသားရေးရာဝန်ကြီးအဖြစ် ၂၀၁၆ခုနှစ် မတ်လ၃၁ရက်အထိ တာဝန်ထမ်းဆောင်ခဲ့သည်။ ၎င်း ကရင်တိုင်းရင်းသားရေးရာဝန်ကြီး တာဝန်ထမ်းဆောင်နေစဉ်  ကရင်တမျိုးသားလုံးပါဝင်သည့် ညီလာခံတစ်ရပ် ကျင်းပနိုင်ရေး ကြိုးပမ်းသူထဲ ပါဝင်ခဲ့သလို၊[၄] ပြည်ထောင်စုလွှတ်တော်က ဖွဲ့စည်းပုံပြင်ဆင်ရေးအတွက် တောင်းဆိုထားသည့် ၆ပွင့်ဆိုင်တွေ့ဆုံမှုထက် ၁၂ ပွင့်ဆိုင် တွေ့ဆုံဆွေးနွေးစေလိုကြောင်း အရေးကြီးအဆိုအား ရန်ကုန်တိုင်းဒေသကြီးလွှတ်တော် ၌၂၀၁၄ခုနှစ် ဒီဇင်ဘာ ၉ ရက်တွင် တင်သွင်းခဲ့သူလည်းဖြစ်သည်။[၅] ၎င်း၏ အဆိုကို ထူးထူးခြားခြား  ရန်ကုန်တိုင်းဒေသကြီးလွှတ်တော် တွင် လျှိုဝှက်မဲပေးစနစ်ဖြင့် မဲပုံးထောင်ကာ မဲခွဲဆုံးဖြတ်ပြီး ထောက်ခံမဲ ၉၉ မဲ၊ကန့်ကွက်မဲ ၉ မဲဖြင့်  အတည်ပြုပေးခဲ့သည်ကိုတွေ့ရသည်။[၆] [၇] ယင်းနောက် အထွေထွေရွေးကောက်ပွဲ ၂၀၁၅၊အထွေထွေရွေးကောက်ပွဲ ၂၀၂၀ တို့တွင် ကရင်ပြည်သူ့ပါတီ ကိုယ်စားလှယ်အဖြစ် ၎င်းထပ်မံ ဝင်ရောက်ယှဉ်ပြိုင်ခဲ့သော်လည်း ရွေးချယ်ခြင်းမခံရတော့ပေ။သို့သော် ကရင်ပြည်သူ့ပါတီသည် ရွေးကောက်ပွဲတွင် အနိုင်ရပါတီများထဲ ပါဝင်နေသေးသဖြင့် ၎င်းသည် ပါတီကိုယ်စားပြုပြီး ငြိမ်းချမ်းရေးဖော်ဆောင်မှုအတွက် ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ(UPDJC) တွင်လုံခြုံရေးကိစ္စရပ်များဆွေးနွေးမှုလုပ်ငန်းကော်မတီ၏ အဖွဲ့ဝင်အဖြစ် ပါဝင်ဆောင်ရွက်ခဲ့သည်။[၈]

၂၀၂၁ ဖေဖော်ဝါရီ၁ရက်နောက်ပိုင်းပြည်ထောင်စုဝန်ကြီးဖြစ်လာခြင်း[ပြင်ဆင်ရန်]

တပ်မတော်ဦးဆောင်သည့် စစ်အာဏာသိမ်းမှု အပြီး   ၂၀၂၁ ခုနှစ် ဖေဖော်ဝါရီလ ၃ ရက်နေ့တွင်  တိုင်းရင်းသားလူမျိုးများရေးရာဝန်ကြီးဌာန၏ ပြည်ထောင်စုဝန်ကြီးအဖြစ် ခန့်အပ်ခြင်းခံခဲ့ရသည်။

ယင်းနောက် တပ်မတော်က ဖွဲ့စည်းထားသည့် နိုင်ငံတော်စီမံအုပ်ချုပ်ရေးကောင်စီ၊ စစ်တပ်နှင့် ဆက်နွယ်နေသော လူပုဂ္ဂိုလ် ၁၆ ဦးအား အမေရိကန်ပြည်ထောင်စုက   ပိတ်ဆို့အရေးယူမှုကြောင်း ၂၀၂၁ မေလ ၁၇ ရက် ဖြည့်စွက်စာရင်းထဲ  စောထွန်းအောင်မြင့် ပါ ထည့်သွင်းဖော်ပြခြင်းခံခဲ့ရသည်။ [၉] [၁၀]

ပုဂ္ဂိုလ်ရေးဘဝ[ပြင်ဆင်ရန်]

စောထွန်းအောင်မြင့်သည် အိမ်ထောင်သည်တစ်ဦးဖြစ်ပြီး ဇနီးဖြစ်သူမှာ သားဖွားနှင့်မီးယပ်အထူးကုဆရာဝန်မကြီးတစ်ဦးဖြစ်ကာ သား၊သမီးများထွန်းကားခဲ့သည်။  

ကိုးကား[ပြင်ဆင်ရန်]

  1. https://moea.gov.mm/archives/6162
  2. https://www.uec.gov.mm/pages.php?pagename=ကရင်ပြည်သူ့ပါတီ
  3. https://kicnews.org/2020/02/kpp-ဥကၠ႒၏-ျဖတ္သန္းမႈ-ပုံရိပ/
  4. https://www.rfa.org/burmese/news/prepare-karen-national-conference-07132013104239.html
  5. https://burma.irrawaddy.com/news/2014/12/10/68349.html
  6. https://www.rfa.org/burmese/news/yangon-parliament-decided-twelve-party-talks-12102014091923.html/1025102e103810311005102c1011103c10141039103810311021102c10041039103b10191004103910371000102d102f-103110191038103b10191014103910381001103a10001039
  7. https://www.bbc.com/burmese/burma/2014/12/141209_6parties_talk_yangon_hluttaw
  8. https://ispmyanmarpeacedesk.com/function/updjc-လုပ်ငန်းကော်မတီများ/
  9. https://www.rfa.org/burmese/news/us-sanctions-on-16-individuals-connected-to-myanmar-military-regime-05172021120843.html
  10. https://burmese.voanews.com/a/us-sanctions-on-myanmar/5893562.html