မဲလံဆံတော်ရှင်စေတီတော်

မဲလံဆံတော်ရှင်အဝင်မုခ်ပေါက်

မဲလံဆံတော်ရှင်စေတီတော်သည် သည် မွန်ပြည်နယ်၊ ဘီးလင်းမြို့နယ်တွင် တည်ရှိသည့် ဗုဒ္ဓဆံတော်ရှင်ကို ဌာပနာထားသည့် စေတီတော်တစ်ဆူ ဖြစ်သည်။

သမိုင်း

စေတီတော်သည် မြတ်စွာဘုရားရှင်၏ ဆံတော်ကို ဌာပနာထားသည်။ မြတ်စွာဘုရားရှင်သည် သုဝဏ္ဏဘူမိသထုံပြည်သို့ ဒေသစာရီ ကြွလာစဉ်အခါတွင် မဲလံရသေ့ကြီးအား ဆံတော်ကို ပေးသနားခဲ့သည်။ ထိုဆံတော်များကို ဌာပနာကာ တည်ထားခဲ့သည့် စေတီတော်ဖြစ်သည့်အတွက် မဲလံဆံတော်ရှင် ဟု နာမည်ထင်ရှားခဲ့သည်။ စေတီတော်ကို ဦးခေါင်းပြုကာ တောင်ဘက်သို့ ခြေဆင်းထားသည့် ကျောက်ပိရဟန္တာ သည်လည်း လူသိများ ထင်ရှားသည်။

စေတီတော်၏ ဘုရားပွဲကို တပေါင်းလပြည့်နေ့တွင် ကျင်းပကြသည်။

အတိုင်းအတာများ

စေတီတော်ကို ကျောက်တုံးသုံးတုံးပေါ်တွင် တည်ထားကာ ဉာဏ်တော်သည် ၁၃ တောင် မြင့်သည်။ အောက်ခြေကျောက်တုံးမှ စိန်ဖူးတော်အထိ အမြင့်မှာ ၂၈ တောင် မြင့်သည်။

တည်နေရာနှင့် လမ်းပန်းဆက်သွယ်ရေး

စေတီတော်၏ တည်နေရာမှာ မွန်ပြည်နယ်၊ ဘီးလင်းမြို့၏မြောက်ဘက် ၁၄ မိုင် ၅ ဖာလုံအကွာ၊ ဘီးလင်း - ဖာပွာ ကားလမ်းအနီး၊ ဘီးလင်းချောင်း၏ အနောက်ဘက်ကမ်း၊ နာပဗ္ဗတတောင်ထွတ်ဖျားတွင် တည်ရှိသည်။

စေတီတော်တည်ရှိရာ တောင်ပေါ်သို့ တောင်တက်ကားများဖြင့် တက်ရောက်ဖူးမြော်နိုင်သည်။ ထို့ပြင် တောင်ခြေမှ ဂဝံအုတ်လမ်းအတိုင်း ခြေကျင်လျှောက် တက်ရောက်၍လည်း ဖူးမြော်နိုင်သည်။

အနီးအနားရှိ စေတီပုထိုးများ

စေတီတော်၏ အနီးအနားတွင် ထပ်မံ ဖူးမြော်နိုင်သည့် စေတီပုထိုးများမှာ ကျောက်တံခါးစေတီ၊ ဆုတောင်းပြည့်စေတီ၊ နောင်တော်ကြီးစေတီ၊ ကျောက်တော်ကြီးစေတီ၊ ယင်းအုံစေတီ၊ ပြင်သာစေတီ၊ နယ်ခြားစေတီ၊ ပြည်လုံးချမ်းသာစေတီ၊ တောင်စွန်းစေတီ၊ မဲနသံစေတီ၊ ကျောက်သင်္ဘောစေတီ၊ ကျိုက်ထီးရိုးလေးစေတီများ တို့ ဖြစ်ကြသည်။