ဦးဘိုးသီးပိဋကတ်တိုက်

ဦးဘိုးသီးပိဋကတ်တိုက် သည် မြန်မာနိုင်ငံ၊ မွန်ပြည်နယ်၊ သထုံမြို့ တွင်ရှိ၍ အငြိမ်းစားဝန်ထောက် ဦးဘိုးသီးဆိုသူက ၎င်းထံတွင် စုဆောင်းထားရှိသော ပေ၊ ပရပိုဒ်၊ ပိဋကတ်တော်များဖြင့် သာဓုဇနပါသာဓိက မဟာဓမ္မစေတီတော်တိုက် အမည်ဖြင့် တည်ဆောက်ခဲ့သည်။ သုဝဏ္ဏဘူမိ ပရိယတ္တိသာသနာဟိတအသင်းကြီး၏ စာမေးပွဲများသို့ ဝင်ရောက်ဖြေဆိုကြသော ရဟန်းသံဃာမျအတွက် အဆင်ပြေစေရန် ရည်ရွယ်၍ တည်ဆောက်ခဲ့သည်။

တည်နေရာ

သာဓုဇနပါသာဒိကဓမ္မစေတီတော်တိုက် (သို့မဟုတ်) ဦးဘိုးသီးပိဋကတ်တိုက်သည် သထုံမြို့ မြသပိတ်တောင်ခြေရှိ သဒ္ဓမ္မဇောတိကာရာမကျောင်းတိုက်ကြီးအတွင်း၌တည်ရှိသည်။

ဖြစ်ပေါ်လာပုံသမိုင်းအကျဉ်း

သာသနာတော်အတွက်အရေးကြီးလှသည့် ပိဋကတ်စာပေများကို အရှည်ထိန်းသိမ်းရန်၊ ဖတ်ရှုလေ့လာနိုင်ရန်ပိဋကတ်တိုက်(စာကြည့် တိုက်)များကိုဆောက်လုပ်ခဲ့ကြသည်။ ပိဋကတ်တိုက်(ပုဂံ)၊ ပိဋကတ်တိုက် (မန္တလေး) စသည်ဖြင့်ရှိကြရာမွန်ပြည်နယ်၊ သထုံမြို့၊ မြသ ပိတ်တောင်ခြေရှိဦးဘိုးသီးပိဋကတ်တိုက်သည်လည်းတစ်ခုအပါအဝင်ဖြစ်သည်။

သထုံရှိအငြိမ်းစားနယ်ပိုင်ဝန်ထောက်မင်းဦးဘိုးသီးနှင့်မင်းကတော်ခင်ခင်ကြီးတို့သည် ဘုရားတည်ကျောင်းဆောက်ကုသိုလ်တို့ဖြင့် အားမရနိုင်ဘဲဓမ္မဒါနကုသိုလ်အတွက် ပိဋကတ်တိုက်ကြီးဆောက်လုပ်လှူဒါန်းရန်အာသီသဖြစ်ခဲ့သည်။ မြန်မာသက္ကရာဇ် ၁၂၈၈ခန့် က ငွေတစ်သိန်းအကုန်အကျခံပြီး ဦးလူဖေဝင်း နှင့်တိုင်ပင်ကာရှားပါးစာအုပ်များကိုလမ်းဘေးအဟောင်းဆိုင်များ၊ ရွှေတိဂုံဘုရားဈေး၊ မန္တလေးဈေးချိုတိုက်တန်းများတွင် ဝယ်ယူစုဆောင်းခဲ့သည်။ပိဋကတ်သုံးပုံ အတွက် ပိဋကတ္တသဝီဒူအဂ္ဂမဟာပဏ္ဍိတ်ပုဂ္ဂိုလ်ကျော်တို့အား လွှဲအပ်ကာပေးစာရေးသူများစွ ဖြင့် ဆယ်နှစ်ကျော်ခန့်ပေထက်အက္ခရာတင်ခဲ့သည်။ သီဟိုဠ်ကျွန်းရှိရှားပါးစာပေများကိုလည်း မရရအောင်ကူးယူခဲ့လေသည်။ တစ်ဆင့်ကူးယူလိုသောရဟန်းရှင်လူသုတေသီများ အခက်အခဲမရှိစေရန်ရည်ရွယ်ရင်းဖြစ်သည်။

ဓမ္မစေတီတော်တည်ဆောက်ထားပုံ

ပိဋကတ်တိုက်တွင်ဘုံသုံးဆင့်ပါဝင်ပြီး ပထမဆင့်တွင်စာပြန်ပွဲ၊ ကထိန်ပွဲများအတွက်သံဃာတော်များအစည်းအဝေးပြုလုပ်နိုင်ရန်ပိဋကတ်ကျမ်းများကို ညဉ့်အိပ်ညဉ့်နေ ကြည့်ရှုနိုင်ရန် စီစဉ်ထား၏။ ဒုတိယဆင့်တွင် အတွင်းခန်း၊ အပြင်ခန်းဟူ၍ နှစ်ခန်းရှိသည်။ အတွင်းခန်းတွင်ရွှေဖြင့်မွမ်းမံထားသော ဗီရို(၈)လုံးရှိပြီး ဗီရိုတစ်လုံးတွင်ပေစာ(၇၅)ထုပ်ရှိသည်။ ပိဋကတ်ပေစာထုတ်များကိုကတ်တလောက်သဘောဖြင့်လွယ်ကူစွာရှာဖွေနိုင်ရန် လယ်တီဦးလှတင်ကပိဋကတ်သုံးပုံစာတမ်းဟူသောစာအုပ်ကို ၁၉၄၀ ခုနှစ်တွင်ရေးသားခဲ့သည်။ ထိုစာအုပ်အကူအညီဖြင့် မိမိအလိုရှိရာကိုအလွယ်တကူရှာဖွေနိုင်သည်။ အပြင်ခန်းတွင်လွတ်လပ်စွာသွားနိုင်သော စင်္ကြံလမ်းနှင့်ထောင့်လေးထောင့်တွင် အခန်းလေးခန်းရှိသည်။ တတိယဆင့်တွင်ဓာတ်တော်များဌာပနာထားသောစေတီတော်လေးဆူကိုတည်ထား ပါသည်။

စာအုပ်စာပေများနှင့်ပေစာများ

စာကြည့်တိုက်တွင်ရှားပါးစာအုပ်များ(၁၅၀၀) နီးပါးနှင့်ပေစာထုပ်ပေါင်း(၁၃၄၅)ထုပ်ရှိသည်။ ထို့ပြင်ရှေးမြန်မာမင်းတို့၏ မင်းမြောက်တန်ဆာအဆောင်အယောင်များနှင့် စကြဝဠာနက္ခတ်တာရာများဆေးရောင်စုံရေးဆွဲထားသည့် ပိုးပုရပိုက်ဖြူများကိုညရွှေချထားသည့်ဗီရိုများတွင်သိမ်းဆည်းထားသည်။ ကောဇာ ၁၂၉၉ခု နှစ်တွင်သာဓုဇနပါသာဒိကဓမ္မစေတီတော် (ဦးဘိုးသီးပိဋကတ်တိုက်) ကိုရေစက်သွန်းချလှူဒါန်းခဲ့သည်။

ဆောင်ရွက်ချက်များ

၂၀၁၅ ခုနှစ်မှစတင်ကာပိဋကတ်တိုက်အတွင်းရှိ ရှေးဟောင်းစာပေများကိုသန့်ရှင်းရေးပြုလုပ်ခြင်း၊ ဓာတ်ပုံရိုက်မှတ်တမ်းတင်ကာ soft copy ပြုလုပ်သိမ်းဆည်းခြင်းတို့ကိုဆောင်ရွက်နေပြီးအင်တာနက်ဝက်ဘ်ဆိုက်ဒ်တစ်ခုအနေဖြလွှင့်တင်နိုင်ရန်ကြိုးပမ်းဆောင်ရွက်လျက်ရှိသည်။