သဘာဝဓာတ်ငွေ့ရည်

သဘာဝဓာတ်ငွေ့ရည် (အင်္ဂလိပ်: Liquefied natural gas, LNG) သည် စီအန်ဂျီ (CNG) ကဲ့သို့ပင် အသုံးပြုနိုင်သော လောင်စာအမျိုးအစားဖြစ်ပြီး ၎င်း၏ ဓာတုသင်္ကေတမှာ CH₄ (မီသိန်း) ဖြစ်သည်။ နိုင်ငံအများစုက ၎င်းကို အလားအလာကောင်းသော လောင်စာအဖြစ် သတ်မှတ်ကြပြီး သိုလှောင်နိုင်မှုတွင် အားသာချက်များ ရှိနေသည်။ LNG သည် အရည်ပြုလုပ်စဉ်ကပင် ကာဗွန်ဒိုင်အောက်ဆိုက်၊ ရေငွေ့၊ ဟိုက်ဒရိုဂျင် ဆာလ်ဖိုက်နှင့် အခြားသော မလိုလားအပ်သော ဒြပ်စင်များကို ဖယ်ရှားထားပြီး ဖြစ်သောကြောင့် စီအန်ဂျီထက် ပိုမိုသန့်စင်ကာ ဟိုက်ဒရိုကာဗွန် ပါဝင်မှု မြင့်မားသည်။ ၎င်းကို သန့်စင်စေရန်နှင့် သယ်ယူပို့ဆောင်ရန် အထူးလုပ်ငန်းစဉ်များဖြင့် ထုတ်လုပ်ကာ ပျမ်းမျှအပူချိန် အနုတ် ၁၆၀ ဒီဂရီစင်တီဂရိတ် (-160°C) တွင် ဖိသိပ်၍ အထူးပြုလုပ်ထားသော သိုလှောင်စည်များ၌ ထည့်သွင်းထားခြင်း ဖြစ်သည်။ LNG သည် သဘာဝဓာတ်ငွေ့ အခြေအနေထက် ထုထည်အားဖြင့် အဆ ၆၀၀ ခန့် (၆၀၀ ပုံ ၁ ပုံ) သာ ရှိတော့သဖြင့် ခရီးရှည် သယ်ယူပို့ဆောင်ရေးအတွက် လုံလောက်သော စွမ်းအင်သိပ်သည်းမှုကို ရရှိစေသည်။ ဓာတ်ငွေ့ကို ပိုက်လိုင်းများဖြင့် သယ်ယူရန် ခက်ခဲသော နေရာများသို့ အရည်အဖြစ် ပြောင်းလဲကာ အထူးပြုလုပ်ထားသော သင်္ဘောကြီးများဖြင့် တင်ဆောင်ပို့ဆောင်နိုင်သည်။ သို့သော် LNG သည် ဓာတ်ဆီ သို့မဟုတ် ဒီဇယ်နှင့် စွမ်းအင်တူညီသည်ဟု ဆိုနိုင်သော်လည်း ၎င်းကို ထုတ်လုပ်သည့် စရိတ်နှင့် အအေးခန်း ဆလင်ဒါများဖြင့် သိုလှောင်ရသည့် စရိတ်မှာ မြင့်မားလျက်ရှိသည်။ ထို့အပြင် LNG စက်ရုံများနှင့် ဆိပ်ကမ်းများတွင် အအေးခံစနစ်များအတွက် ကုန်ကျစရိတ် ကြီးမြင့်မှုသည် စီးပွားဖြစ် အသုံးပြုရန် အားနည်းချက်တစ်ခုအဖြစ် ရှိနေခဲ့သော်လည်း မကြာသေးမီနှစ်များအတွင်း နည်းပညာတိုးတက်မှုများကြောင့် အဆိုပါ အားနည်းချက်များကို ပြုပြင်နိုင်ခဲ့သည်။ဘေးအန္တရာယ်ကင်းရှင်းရေးနှင့် ပတ်သက်၍ ကျွမ်းကျင်သူအချို့က LNG သည် အရည်အဖြစ် ပြောင်းလဲစဉ်နှင့် သိုလှောင်ထားစဉ်အတွင်း အလွန်အငွေ့ပြန်လွယ်သော သဘာဝရှိသဖြင့် ခရီးရှည်သယ်ယူရာတွင် အန္တရာယ်ရှိနိုင်သည်ဟု ယူဆကြသော်လည်း ယနေ့တိုင် ဓာတ်ငွေ့ရည်တင်သင်္ဘောများပေါ်တွင် ထိုသို့သောအန္တရာယ်မျိုး ကြုံတွေ့ရခြင်း မရှိသေးပေ။ အခြားလောင်စာဆီများနှင့် နှိုင်းယှဉ်ပါက စီအန်ဂျီထက် ဈေးကြီးသော်လည်း စွမ်းအင်ပိုမို သာလွန်ပြီး ကာဗွန်ဒိုင်အောက်ဆိုက် အထွက်နှုန်း အနိမ့်ဆုံး ဖြစ်သည်။ ၎င်းတွင် ဆာလ်ဖာအောက်ဆိုက်၊ ပြာနှင့် အနယ်အနှစ်များ ထွက်ရှိမှု မရှိသလောက်ဖြစ်သဖြင့် သန့်စင်သော လောင်စာအဖြစ် အသိအမှတ်ပြုထားကြသည်။

မြန်မာနိုင်ငံ၏ အခြေအနေ

လက်ရှိတွင် မြန်မာနိုင်ငံသည် ပြည်တွင်းစွမ်းအင် လိုအပ်ချက်ကို ဖြည့်ဆည်းရန်အတွက် ပြည်ပမှ LNG တင်သွင်းမှုကိုလည်း စဉ်းစားဆောင်ရွက်နေရပြီး ရုရှားကဲ့သို့သော နိုင်ငံများနှင့်လည်း တင်ပို့ရောင်းချနိုင်ရေး ဆွေးနွေးမှုများ ရှိနေသည်။

သီလဝါဆိပ်ကမ်းက သဘာဝဓာတ်ငွေ့ရည် (LNG) သုံး ဓာတ်အားပေးစက်ရုံကနေ ကနဦးအနဖြင့် လျှပ်စစ်ဓာတ်အား ၁၅၀ မဂ္ဂါဝပ် ထုတ်လုပ်ပေးလျက်ရှိသည်။