ဟိုက်ပါရေတံခွန်
| ဟိုက်ပါရေတံခွန် | |
|---|---|
| ၼမ်ႉတူၵ်းႁၢႆးပႃႇ | |
 ဟိုက်ပါရေတံခွန်၏ ပထမထပ် မြင်ကွင်း | |
| တည်နေရာ | ဟိုက်ပါရွာ၊ မိုင်းရှူးမြို့နယ်၊ မိုင်းရှူးခရိုင်၊ ရှမ်းပြည်နယ် |
| ကိုဩဒိနိတ် | 21°47′33″N 98°19′08″E / 21.792447°N 98.318856°Eကိုဩဒိနိတ်: 21°47′33″N 98°19′08″E / 21.792447°N 98.318856°E |
| အမျိုးအစား | တောင်ကုန်းအဆင့်ဆင့်စီးဆင်း (Tiered/Terraced) |
| ရေဆင်းလမ်းများ | ၁၁ |
| ရေလမ်း | နမ့်ပန်ချောင်း |
ဟိုက်ပါရေတံခွန် (ရှမ်း: ၼမ်ႉတူၵ်းႁၢႆးပႃႇ၊ အင်္ဂလိပ်: Hai-Pa Waterfall) သည် မြန်မာနိုင်ငံ၊ ရှမ်းပြည်နယ်တောင်ပိုင်း၊ မိုင်းရှူးခရိုင်၊ မိုင်းရှူးမြို့နယ်၏ အနောက်တောင်ဘက် ၁၂ မိုင်ခန့်အကွာ ဟိုက်ပါကျေးရွာအုပ်စု၊ ဟိုက်ပါရွာအနီးတွင် တည်ရှိသည့် ထင်ရှားကျော်ကြားသော သဘာဝရေတံခွန်ကြီးတစ်ခု ဖြစ်သည်။[၁][၂] ရေတံခွန်၏ ထူးခြားလှပသော အဆင့်ဆင့်စီးဆင်းမှုကြောင့် အရှေ့တောင်အာရှ၏ အလှပဆုံးသော ရေတံခွန်များထဲမှ တစ်ခုအဖြစ် တင်စားခေါ်ဝေါ်ကြသည်။
အမည်ရင်းမြစ်
[ပြင်ဆင်ရန်]"ဟိုက်ပါ" ဟူသော စကားလုံးသည် ရှမ်းဘာသာစကား "ႁၢႆးပႃႇ" (ဟိုင်းပါး) မှ ဆင်းသက်လာခြင်း ဖြစ်သည်။ ရှမ်းဘာသာဖြင့် "ဟိုင်း" (ႁၢႆး) ဆိုသည်မှာ ယာခင်း သို့မဟုတ် ကျယ်ပြန့်သောမြေဟု အဓိပ္ပာယ်ရပြီး၊ "ပါး" (ပႃႇ) ဆိုသည်မှာ တောစပ် သို့မဟုတ် မြက်ခင်းပြင်ဟု အဓိပ္ပာယ်ရသဖြင့် ရေတံခွန်တည်ရှိရာ ဝန်းကျင်၏ ပထဝီဝင်အခြေအနေကို အစွဲပြု၍ ခေါ်ဆိုခဲ့ခြင်း ဖြစ်သည်။
သဘာဝအခြေအနေ
[ပြင်ဆင်ရန်]ဟိုက်ပါရေတံခွန်သည် သံလွင်မြစ်၏ လက်တက်တစ်ခုဖြစ်သော နမ့်ပန်ချောင်းပေါ်တွင် တည်ရှိပြီး ရေတံခွန်၏ သဘာဝအဆင့် ပေါင်း (၁၁) ဆင့် ရှိသည်။[၃] ဘေးဝဲယာတွင် ထုံးကျောက်တောင်ကုန်းများနှင့် စိမ်းလန်းစိုပြည်သော တောတောင်သဘာဝများ ဝန်းရံထားပြီး ရေတံခွန်အောက်ခြေတွင် ကျယ်ပြန့်သော သဲသောင်ပြင်များနှင့် ရေကူးအပန်းဖြေနိုင်သည့် နေရာများ ရှိသည်။ ရေတံခွန်သည် အဆင့်ဆင့် ကျဆင်းစီးဆင်းသွားသော ပုံစံရှိသဖြင့် အပေါ်ဆုံးထပ်များတွင် ရေစီးသန်သော်လည်း အောက်ခြေအဆင့်များတွင် ရေပြင်ကျယ်သကဲ့သို့ အေးချမ်းစွာ စီးဆင်းသည်။[၄]
တည်နေရာနှင့် လမ်းပန်းဆက်သွယ်ရေး
[ပြင်ဆင်ရန်]ဟိုက်ပါရေတံခွန်တည်ရှိရာ ဒေသသည် ရှမ်းပြည်နယ်၏ အလယ်ဗဟိုချက်တွင် ရှိသဖြင့် လမ်းကြောင်းအသွယ်သွယ်မှ လာရောက်နိုင်သည်။ သွားရောက်နိုင်သည့် အဓိက လမ်းကြောင်းများမှာ -
- တောင်ကြီး - ပင်လုံ - လဲချား - မိုင်းနောင် - ဝမ်စင်း - ဖခီးလမ်းခွဲမှတစ်ဆင့် သွားရောက်ခြင်း၊
- တောင်ကြီး - နမ့်စန် - ခိုလမ် - ဝမ်စင်း - မိုင်းနောင် - ဖခီးလမ်းခွဲအတိုင်း သွားရောက်ခြင်း၊
- လားရှိုး - သီပေါ - မိုင်းရယ် - တန့်ယန်း - မိုင်းရှူးလမ်းကြောင်းမှတစ်ဆင့် လာရောက်ခြင်းတို့ ဖြစ်သည်။[၁][၅]
ပွင့်လင်းရာသီ (နိုဝင်ဘာလမှ မေလအထိ) တွင် ရေပြာ၍ အလွန်လှပသဖြင့် လာရောက်လည်ပတ်သူ အများဆုံး ဖြစ်ပြီး မိုးရာသီကာလများတွင် ရေစီးအလွန်သန်သဖြင့် ရေကူးခြင်းကို အထူးသတိပြုရသည်။[၁]
ကိုးကား
[ပြင်ဆင်ရန်]- 1 2 3 ညီညီသူ (၂၀ မေ ၂၀၁၉)။ ရန်ကုန်မှသည် ရှမ်းပြည်နယ်၊ ဟိုက်ပါရေတံခွန်ဆီသို့။ ဧရာဝတီ သတင်းဌာန။ ၂၃ ဇူလိုင် ၂၀၂၀ တွင် ပြန်စစ်ပြီး။
- ↑ မိုင်းရှူးမြို့နယ်က ဟိုက်ပါရေတံခွန်။ လွတ်လပ်တဲ့အာရှအသံ (RFA) (၂၈ ဧပြီ ၂၀၁၈)။ ၂၃ ဇူလိုင် ၂၀၂၀ တွင် ပြန်စစ်ပြီး။
- ↑ အရှေ့တောင်အာရှရဲ့ အလှဆုံး မြန်မာပြည်က ဟိုက်ပါရေတံခွန်။ Yangon Style။ 23 July 2020 တွင် မူရင်းအား မော်ကွန်းတင်ပြီး။ 23 July 2020 တွင် ပြန်စစ်ပြီး။
- ↑ ဟိုက်ပါရေတံခွန် သန့်ရှင်းရေးကိုလည်း ကူညီကြပါ။ ကုမုဒြာဂျာနယ်။ 23 July 2020 တွင် မူရင်းအား မော်ကွန်းတင်ပြီး။ 23 July 2020 တွင် ပြန်စစ်ပြီး။
- ↑ ဟိုက်ပါရေတံခွန်သို့ အလည်တစ်ခေါက် ရောက်ခဲ့တယ်။ Myanmar Digital News။ 23 July 2020 တွင် မူရင်းအား မော်ကွန်းတင်ပြီး။ 23 July 2020 တွင် ပြန်စစ်ပြီး။