သံရောင်လိုက်မှို

ဝီကီပီးဒီးယား မှ
အ​ညွှန်း​သို့ ခုန်ကူးရန် ရှာဖွေရန် ခုန်ကူးမည်

သံရောင်လိုက်မှိုသည် ပင်ဖျက်ပိုးများကဲ့သို့အပင်များ အထူးသဖြင့်ကောက်ပင် များကိုများစွာ ပျက်စီးစေနိုင်သောမှိုမျိုးဖြစ်သည်။ ယင်းမှို မျိုးမှထွက်သော မျိုး မှုန်များသည်အလွန်သေးငယ်ကြ ၍သံချေးနှင့်တူပြီးလျှင် သံချေးအရောင်ကဲ့သို့ရှိသောကြောင့် သံရောင်လိုက်မှိုဟုအမည်တွင်သည်။ ကောက်ပင်များတွင် သံရောင်လိုက်မှိုကျရောက်လာသည့်အခါ အပင်များညှိုးနွမ်း သွားကာသီးနှံများမအောင်မြင်နိုင်တော့ချေ။ တစ်ခါတစ်ရံစိုက် ပျိုးထားသည့်လယ်ယာတွင် တစ်ဝက်မျှအထိပျက်စီးဆုံးရှုံး စေနိုင်သည်။ သံရောင်လိုက်မှိုတွင် ခြည်မျှင်သဖွယ်အထူး အင်္ဂါများရှိရာ ယင်းတို့သည်အပင်၏ဆဲများထဲသို့ဖောက် ထွင်း ထိုးဝင်ပြီးလျှင်အပင်၏အစာများကို စုပ်ယူစား သောက်ကြသည်။ ထိုအခါပင်စည်နှင့် အရွက်များသည် ခြောက်သွေ့သွားတော့၏။ ထိုကြောင့်သံရောင်လိုက်မှိုသည် တောင်သူလယ်သမားများအတွက်ကြီးစွာ သောအန္တရာယ် တစ်ခုဖြစ်ပေသည်။ သံရောင်လိုက်မှိုအများဆုံး ကျရောက် တတ်သောကောက်ပင်များမှာ ဂျုံပင်၊ မြင်းစားဂျုံပင်၊ မု ယောပင်တို့ဖြစ်ကြသည်။ ရိုင်းစပါးပင်၊ပဲပင်၊ ကလိုဗာပဲပင် နှင့် အစေ့မာသီးအပင်များ၌လည်း သံရောင် လိုက်မှို ကျရောက်စွဲကပ်တတ်သည်။ သံရောင်လိုက်မှိုသည် ကောက်ပင်များကိုသာမက သစ်ပင်ကြီး များကို လည်းပျက်စီးစေနိုင်သဖြင့် သစ်လုပ်ငန်းကိုလည်းများ စွာ ထိခိုက်စေနိုင်သည်။

သံရောင်လိုက်မှိုကို စတင်လက်ခံ၍ကြီးပွားစေသော လက်ခံပင်နှစ်မျိုးရှိ၏။ လက်ခံပင်တစ်မျိုးမှာဂျုံ ပင်ဖြစ်၍ အခြားလက်ခံပင်တစ်မျိုးမှာဗာဗာရီပင်ဖြစ်သည်။ အကယ်၍ ဗာဗာရီပင်များကိုအမြစ်ပါမကျန် သုတ်သင်ရှင်းလင်းလိုက် ပါက ဂျုံပင်များတွင်ကျရောက်တတ်သော သံရောင်လိုက်မှို များပါပျောက်ကွယ် သွားနိုင်သည်ဟု ရုက္ခဗေဒပညာရှင်များ ကယူဆကြသည်။ သံရောင်လိုက်မှိုမူလကျရောက်လာပုံမှာ ဗာဗာ ရီပင်အရွက်၏ အောက်ဘက်ရှိချိုင့်ခွက်ကလေးများ တွင် လိမ်မော်ရောင်မျိုးမှုန်စိုင်များကိုပထမတွေ့ရှိရ သည်။ ဤမျိုးမှုန်များကိုလေကမိုင်ပေါင်းများစွာ တိုက်ခတ်ယူဆောင် ရာမှဂျုံပျိုးပင်များ ပေါ်သို့ရောက် ရှိလာသည်။ မျိုးမှုန်များသည် ဂျုံပင်ပေါ်တွင်ခြည်မျှင်သဖွယ်အညှောက်ထွက်လာကာ ရိုးတံတွင်းသို့ထိုး ဖောက်ဝင်သွားပြီးလျှင် ဂျုံပင်၏အစာ ကိုစားသောက်သဖြင့် အပင်မကြီးထွား နိုင်တော့ပဲညှိုးနွမ်း သွားလေသည်။ ကောက်ရိတ်ချိန်မတိုင်မီတွင် ဂျုံပင်၏ အရွယ်များနှင့်တစ်ခါတစ်ရံရိုးတံများပေါ်တွင်သံရောင်စင်းများ နှင့်အစက်များပေါ်လာ၏။ ဤသံရောင်လိုက်မှိုစင်းများ၏ အရောင်မှာအနီဖြစ်သည်။ လေတိုက်ခတ်မှုကြောင့်ဤမှိုစင်းများမှ မျိုးမှုန်များသည်အနီးအနားဂျုံပင်များသို့ပျံ့လွင့်သွားရကား မျိုးပွားကာမှိုရောဂါ လျင်မြန်စွာကူးစက်သွားလေသည်။ ဂျုံပင်များကြီးရင့်လာသောအခါပင်စည်များတွင် အမည်း ရောင်အစင်းနှင့် အစက်များပေါ်လာပြန်၏။ လေတိုက်ခတ ်မှုကြောင့် ထိုအမည်းရောင်အစင်းများမှမျိုးမှုန်များသည်ဗာဗာ ရီပင်အရွက်များသို့ရောက်ရှိသွားပြန်လေသည်။ သို့ဖြင့် ဤသံရောင်လိုက်မှိုရောဂါသည်တစ်နေရာမှတစ်နေရာသို့ လှည့်လည်ကာ တစ်နှစ်ပြီးတစ်နှစ်ဆက်၍ ကောက်ပင်များ ကိုဖျက်ဆီးလေသည်။ စိုက်ပျိုးသည့်အခါ ဂျုံပင်တစ်မျိုး တည်းကို နှစ်စဉ်မစိုက်ပျိုးဘဲ အခြားကောက်ပင်များနှင့် လဲ၍အလှည့်ကျစိုက်ပျိုးသွားပါကသံ ရောင်လိုက်မှိုရောဂါ ပျောက်ကင်းသွားနိုင်ပေသည်။

မှိုရောဂါတစ်မျိုးရှိသေးသည်။ ထိုမှိုမျိုးသည်သံရောင်လိုက် မှိုမျိုးကဲ့သို့မဟုတ်ဘဲ မျိုးစေ့များတွင်ဦးစွာ စွဲကပ်တတ်သည်။ ထိုမျိုးစေ့များကိုလယ်တွင်ကျဲလိုက်သည့်အခါ ပျိုးပင်များထွက် ပြူလာသည်နှင့်တစ်ပြိုင် နက်မှိုရောဂါပါ တစ်ဆက်တည်းပါ လာတော့၏။ ကောက်ပင်နှင့်အတူရောဂါမျိုးမှုန်တို့လည်း တိုးပွားလာ ကြ၍ အပင်၏အစာကိုစုတ်ယူစားသောက်ကြ သည်။ ထိုကြောင့် ထိုမှိုရောဂါမျိုးကျရောက်သော ကောက် ပင်တို့တွင်အနှံများမအောင်မြင်ဘဲရှိတတ်သည်။ အောင်မြင် သော်လည်းအစေ့များအဖျင်းများ၏။ အဖျင်း များတွင်ရောဂါ မျိုးမှုန်တို့ဖြင့်ပြည့်နေသဖြင့် ကောက်နှံနယ်သည့်အခါ၌ဖြစ်စေ၊ ကောက်လှိုင်းများကို တစ်နေရာမှတစ်နေရာသို့ သယ်ယူသည့်အခါ၌ဖြစ်စေ၊ ထိုရောဂါ မျိုးမှုန်တို့သည် အောင်မြင်သောကောက်စေ့ များသို့ကူးစက် သွားလေသည်။ ဤနည်းဖြင့် ရှေ့တစ်နှစ်တွင် ကြဲရမည့်မျိုးစေ့များ၌ မှိုရောဂါတွယ်လျက် ရှိပြန်လေသည်။ ဤမှိုရောဂါမျိုးမှာသုံးမျိုးရှိသည်။ တစ်မျိုးမှာကောက်နှံကို ကျပ်ခိုးမှုန့်ကဲ့သို့ဖြစ်သွားစေ၏။ ထိုကျပ် ခိုးမှုန့်ကိုလေ တိုက်ခတ်၍လွင့် ထွက်သွားသည့်အခါ အပင်ရိုးတံသာထီး တည်းကျန်ခဲ့တော့သည်။ ဒုတိယ ရောဂါမှိုရောဂါမျိုးမှာ ကောက်နှံတစ်ခုလုံးကိုကောက်ရိတ်ချိန်ရောက်မှ ကြွေ ကျစေသည်။ တတိယရော ဂါမျိုးမှာအခွံအတွင်း၌ရှိသော အစေ့များကိုဖျက်ဆီးသဖြင့်အဆိုးရွားဆုံးရှိသည်။ တစ်ခါ တစ်ရံလယ်တဝက် ခန့်လောက်ပျက်စီးသွားနိုင်သည်။ ဤတတိယမှိုရောဂါမျိုးကျရောက်သည့်အခါ အစေ့အတွင်း ၌ရှိသော အမှုန့်နံ့မှာငါးပုပ်နံ့ရသည်။

ကောက်ပဲသီးနှံပင်တို့ကို ဤမျှပျက်စီးစေနိုင်သောသံ ရောင်လိုက်မှိုနှင့် အခြားမှိုရောဂါများကို ကာကွယ်ရန် နည်းလမ်းများရှာရာ၌ ထိုရောဂါများကိုခံနိုင်ရည်ရှိမည့် မျိုးသန့်များရရှိအောင်ထိန်းသိမ်း နည်းမှာအကောင်းဆုံး နည်းဖြစ်သည်ဟု စိုက်ပျိုးရေးလေ့လာသူများတွေ့ရှိရသည်။ ထိုရောဂါမျိုး ကျရောက် လျက်ရှိသောလယ်မြေများတွင် ကောက်ပင်အမျိုးမျိုးကိုအလှည့်ကျ စိုက်ပျိုးခြင်းဖြင့်လည်း ပပျောက်သွား နိုင်သည်။ မြေဆီလွှာတွင်နိုက်ထရိုဂျင်ဓာတ်၊ သို့မဟုတ်အစိုဓာတ်များလွန်းလျှင်လည်း ထိုရောဂါမျိုးကျ ရောက်နိုင်သည်။ [၁]

ကိုးကား[ပြင်ဆင်ရန်]

  1. မြန်မာ့စွယ်စုံကျမ်း၊ အတွဲ(၁၃)