မြန်မာပြည်သိန်းတန်
 | ဤ ဆောင်းပါးသည် မည်သည့် ကျမ်းညွှန်း (သို့) အကိုးအကား ကိုမှ ရည်ညွှန်းထားခြင်းမရှိပေ။ |
သိန်းတန် (မြန်မာပြည်) သည် မြန်မာနိုင်ငံသား တေးရေး၊ တေးဆို၊ ဂီတမှူး တစ်ဦးဖြစ်သည်။
ကိုယ်ရေးအကျဉ်း
[ပြင်ဆင်ရန်]ဦးသိန်းတန်(မြန်မာပြည်) သည် အင်းဝဇာတိဖြစ်၍ ၁၉၄၅ ခုနှစ်၊ဒီဇင်ဘာလ ၁၄ ရက်နေ့တွင်မွေးဖွားခဲ့သည်။ မိဘများမှာ ဦးဘသာ နှင့် ဒေါ်ကြင်နုတို့ဖြစ်သည်။ မွေးချင်း ၁၃ ယောက်ရှိသည့်အနက် ၆ ယောက်မြောက်ဖြစ်ပြီး ကျန် ၂ ယောက်မှာ စစ်ကြီးအတွင်း၌ တိမ်းပါးသွားခဲ့သည်။ မိသားစုမျိုးရိုးထဲတွင် ဂီတလောကကိုဝါသနာပါသူတစ်ဦးတစ်ယောက်မှမရှိသော်လည်း ဦးသိန်းတန် အသက် ၁၃ နှစ်အရွယ်တွင် ကမ္ဘာကျော်ရော့ခ်ဘုရင် အဲလ်ဗစ်ပရက်စလေ(Elvis Presley) ၏ King Creole ရုပ်ရှင်ဇာတ်ကားကို ကြည့်ရှုပြီးနောက်ပိုင်းတွင် ဦးသိန်းတန်၏ရင်ထဲ၌ ဂီတပိုးစတင်စီးဝင်ခဲ့သည်။ ထိုရလဒ်အဖြစ် ဖခင်ဖြစ်သူက အိမ်ပေါ်မှနှင်ချခြင်းကို ခံခဲ့ရသည်။ နှင်ချခံရပြီးနောက် သူငယ်ချင်းများ၏အိမ်တွင် တစ်လှည့်စီနေထိုင်ရင်း ငယ်ဘဝကုန်ဆုံးခဲ့ရသည်။
အနုပညာလောက
[ပြင်ဆင်ရန်]အစောဆုံးကာလများတွင် ဗစ်တာခင်ညို ၏ The Shades တီးဝိုင်းတွင် လိဒ်ဂစ်တာကို စတင်တီးခတ်ခဲ့သည်။ ထိုစဉ်က လျှပ်စစ်ဂစ်တာများ ယခုကဲ့သို့ မပေါများသေးသောကြောင့် ကိုယ်ပိုင်တီထွင်ထုတ်လုပ်သောလျှပ်စစ်ဂစ်တာများဖြင့်သာ တီးခတ်ခဲ့ရသည်။
ထို့နောက်ပိုင်းတွင် ပလေးဘွိုင်းသန်းနိုင် ၏ Playboy တေးဂီတအဖွဲ့နှင့်လက်တွဲကာ တေးသီချင်းများစတင်သီဆိုခဲ့ကာ ပထမဦးဆုံးသီဆိုခဲ့သည့်သီချင်းမှာ ဇော်မင်းလေး ရေးသားသီကုံးသည့် "မနောအလှပန်းမောင့်ချစ်သူ" ဖြစ်သည်။
နောက်ပိုင်းတွင် "တောင်ပြာတန်းကမောင့်ချစ်သူ"၊ "စတိတ်ရှိုးနဲ့တိတ်တခိုးအချစ်"၊ "ရွှေဘုံစံမင်းသမီးလေး" ၊ "ရွှေရုပ်ကလေးကောက်ရသူ"၊ "စနေထောင့်မှာပန်းလှူမယ်" ၊ "သူဆိုသူမှချစ်မိခဲ့"၊ "မေတ္တာရေလှိုင်း" စသည့်တေးသီချင်းများကို ဆက်လက်သီဆိုခဲ့ရာ အောင်မြင်မှုတစ်ခုအဖြစ် မှတ်တိုင်စိုက်ထူနိုင်ခဲ့သည်။
၁၉၇၉ ခုနှစ်အရောက်တွင် ကိုယ်တိုင်ဦးဆောင်ကာ L.P.J (Love,Peace & Joy) အမည်ရှိ တီးဝိုင်းကိုထူထောင်ဖွဲ့စည်းခဲ့သည်။ ထို L.P.J တီးဝိုင်းဖြင့်လည်း တေးသီချင်းများနှင့်တေးစီးရီးများ သီဆို၊ တီးခတ်၊ ထုတ်လုပ်ခဲ့ရာ အများစုမှာ လူကြိုက်များအောင်မြင်ခဲ့ကြ၏ ။
ဦးသိန်းတန်သည် စတီရီယိုသီချင်းများကိုသာမက မြန်မာဆိုင်းဝိုင်းနှင့် တွဲဖက်တီးခတ်သော စီးရီးများစွာကိုလည်း အောင်မြင်စွာသီဆိုထုတ်လုပ်နိုင်ခဲ့သူဖြစ်သည်။ "စုံတောမြိုင်" စီးရီးခွေသည် ထိုခေတ်ထိုအခါက အိမ်တိုင်းလိုလိုမရှိမဖြစ် ဝယ်ယူအားပေးခြင်းခံခဲ့ရသည့် ကက်ဆက်ခွေဖြစ်သည်။ "စုံတောမြိုင်" စီးရီးနောက်ပိုင်းတွင်လည်း "ရွှေသုန္ဒရီ" ၊ "ကကြိုးမပျောက်ပါစေနဲ့ရွှေသုန္ဒရီ" ၊ "ကချေသည်လေးငိုရယ်ငိုရယ်" ၊ "ရွှေပင်ဆင့်" ၊ "စုံနံ့သာမြိုင်" အစရှိသည့် မြန်မာသံတေးစီးရီးများကို သီဆိုထုတ်လုပ်ခဲ့သည်။ ထို့အပြင် ၂၀ရာစုကိုကျော်ညွန့် ၏ တေးလက်ရာစီးရီးခွေများဖြစ်သည့် "ချိုပလီသဲ" ၊ "ရှက်ပြုံး" ၊ "သမင်မျက်လုံး" ၊ "ဘယ်သူကစတာလဲ" စသည်တို့ကို သီဆိုထုတ်လုပ်ခဲ့ရာ အတိုင်းအတာတစ်ခုအထိ အောင်မြင်ခဲ့သည်။
ထိုစဉ်အချိန်အခါက စတိတ်ရှိုးပွဲများ ဖျော်ဖြေတင်ဆက်ခဲ့ရာတွင် ပွဲကြည့်ပရိသတ်များက ခုံတန်းရှည်ကြီးများဖြင့်သာထိုင်၍အားပေးခဲ့ရသော်လည်း ဦးသိန်းတန်တို့ခေတ်ရောက်သောအခါ ကုလားထိုင်ကြီးများဖြင့် အဆင်ပြေပြေထိုင်၍အားပေးနိုင်ရန် စီစဉ်နိုင်ခဲ့ကြသည်။ နောက်တစ်ခုမှာ ထိုအချိန်က စင်မြင့်ပေါ်တွင်သီဆိုဖျော်ဖြေနေကြသော စတီရီယိုတေးသံရှင်များကို လူကြီးသူမများက မျက်စိစပါးမွှေးအလွန်ထူခဲ့ကြသည်။ ဤသို့သောအချက်ကြောင့် ဦးသိန်းတန်က သူသီဆိုရမည့်အလှည့်ရောက်တိုင်း လူကြီးများ အမြင်ကြည်လင်လာစေရန် "မင်္ဂလာပါခင်ဗျာ" ဟု ဦးစွာနှုတ်ခွန်းဆက်လေ့ရှိသည်။ ယခုခေတ်အနုပညာရှင်များ "မင်္ဂလာပါ" ဟု နှုတ်ခွန်းဆက်သည့်အလေ့အထမှာ ဦးသိန်းတန်စတင်တီထွင်ခဲ့ခြင်းဖြစ်သည်ဟုဆိုလျှင် မမှားနိုင်ပေ။