မိုးဟိန်းကို

မိုးဟိန်းကို
အမည်ရင်း	ဦးခင်မောင်အုန်း
အမည်ကွဲ	ခင်မောင်အုန်း၊ မိုးဟိန်းကို
မွေးသက္ကရာဇ်	၂၃၊ ၈၊ ၁၉၃၂
ကွယ်လွန်	၅၊ ၅၊ ၂၀၀၆
နိုင်ငံသား	မြန်မာနိုင်ငံ
လူမျိုး	ဗမာလူမျိုး
ပညာရေး	ဝိဇ္ဇာဘွဲ့
အလုပ်အကိုင်	မန္တလေး တက္ကသိုလ် မော်ကွန်းထိန်း အဆင့် (၂) ၊ရန်ကုန် တက္ကသိုလ်၌ အုပ်ချုပ်ရေး အရာရှိ၊ အဆင့်မြင့် ပညာ ဦးစီးဌာန စီမံရေးရာ ဌာနတွင် ဌာနမှူး၊ ရန်ကုန် စက်မှု တက္ကသိုလ် ဌာနမှူး (စီမံ)
မွေးရပ်ဇာတိ	ရန်ကုန်မြို့
ကြင်ဖော်	ဒေါ်သိန်းသိန်းတင်
သားသမီး	ဦးဇော်သိန်းမောင်
မိဘ	ဦးကြံထွန်း + ဒေါ်ညွန့်ညွန့်

ကိုယ်ရေးဖြစ်စဉ်

ဦးခင်မောင်အုန်းက အဖ ဦးကြံထွန်း (ယစ်မျိုးဝန်ထောက်)၊ အမိ ဒေါ်ညွန့်ညွန့်တို့က ၁၉၃၂ ခုနှစ်၊ ဩဂုတ်လ ၂၃ ရက်နေ့တွင် ရန်ကုန်မြို့၌ မွေးဖွားသည်။ ငယ်စဉ်က မိဘများ ပြောင်းရွှေ့ရာ မြို့များဖြစ်သော ရန်ကုန်မြို့၊ ပြည်မြို့၊ မန္တလေးမြို့၊ စလင်းမြို့၊ မြင်းခြံမြို့နှင့် ရေနံချောင်းမြို့များတွင် ပညာသင်ယူခဲ့ပြီး တက္ကသိုလ်ဝင်တန်းကို အောင်မြင်ခဲ့သည်။ ရန်ကုန် တက္ကသိုလ်မှ ဝိဇ္ဇာဘွဲ့ ရရှိခဲ့သည်။

ဦးခင်မောင်အုန်းသည် ၁၉၆၁ ခုနှစ်တွင် အထက်တန်းပြ ဆရာမ ဒေါ်သိန်းသိန်းတင်နှင့် ရေနံချောင်းမြို့၌ လက်ထပ်ခဲ့သည်။

၁၉၆၄ ခုနှစ်တွင် ရန်ကုန် တက္ကသိုလ်၌ အုပ်ချုပ်ရေး အရာရှိ အဖြစ် ဆောင်ရွက်ခဲ့သည်။ ၁၉၆၆ ခုနှစ်တွင် မန္တလေး တက္ကသိုလ် မော်ကွန်းထိန်း အဆင့် (၂) အဖြစ် တာဝန် ထမ်းဆောင်ခဲ့စဉ် ကာလတွင် လူတိုင်း စာတတ်မြောက်ရေး 'အ' သုံးလုံး လုပ်ငန်းများ ဆောင်ရွက်ခဲ့ပြီး မန္တလေးမြို့ နေ့စဉ်ထုတ် သတင်းစာ၌ 'အ' သုံးလုံးနှင့် ပတ်သက်သော ဆောင်းပါးများ ရေးသားခဲ့သည်။

၁၉၇၇ ခုနှစ်တွင် ရန်ကုန်မြို့၊ အဆင့်မြင့် ပညာ ဦးစီးဌာန စီမံရေးရာ ဌာနတွင် ဌာနမှူး အဖြစ် တာဝန် ထမ်းဆောင်ခဲ့သည်။ ၁၉၈ဝ ပြည့်နှစ်တွင် နိုင်ငံတော်မှ ချီးမြှင့်သော နိုင်ငံ့ဂုဏ်ရည်ဘွဲ့ (ဒုတိယအဆင့်) ကို လက်ခံ ရရှိခဲ့သည်။ ၁၉၉၂ ခုနှစ်တွင် ရန်ကုန် စက်မှု တက္ကသိုလ် ဌာနမှူး (စီမံ) အဖြစ် တာဝန် ထမ်းဆောင်ခဲ့ပြီး ၁၉၉၅ ခုနှစ်တွင် အငြိမ်းစား ယူခဲ့သည်။

အစိုးရ ဝန်ထမ်းဘဝမှ အငြိမ်းစား ယူပြီးနောက် အားကစား ဂျာနယ်များတွင် အားကစား ဆောင်းပါးများ၊ Golf Magazine၊ နွယ်နီ မဂ္ဂဇင်း၊ ရနံ့သစ် မဂ္ဂဇင်းနှင့် စာရေးသူ စိတ်ကြိုက် မဂ္ဂဇင်းတို့တွင် ဘာသာပြန်များနှင့် ကိုယ်ရေး အတွေ့အကြုံများကို ခင်မောင်အုန်း၊ မိုးဟိန်းကို အမည်ဖြင့် ရေးသားခဲ့သည်။

ဦးခင်မောင်အုန်းသည် မြန်မာနိုင်ငံ အားကစား ကလောင်ရှင်များ အဖွဲ့ချုပ် အဖွဲ့ဝင်နှင့် မြန်မာနိုင်ငံ စာပေနှင့် စာနယ်ဇင်း အဖွဲ့၊ စာရေးဆရာ၊ သတင်းစာ ဆရာ အဖွဲ့ဝင်လည်း ဖြစ်သည်။

ဦးခင်မောင်အုန်းသည် ၅၊ ၅၊ ၂၀၀၆ ရက်နေ့တွင် ၃၆ နှစ်ကျော်မျှ ခံစားခဲ့ရသော ဆီးချိုရောဂါဖြင့် ရွှေဂုံတိုင် အထူးကု ဆေးရုံ၌ ကွယ်လွန်ခဲ့သည်။ ၎င်းကွယ်လွန်ချိန်တွင် ဇနီး ဒေါ်သိန်းသိန်းတင်နှင့် သား ဦးဇော်သိန်းမောင်တို့သည် အမှတ် - ၁၄၄၇၊ (၄၂) ရပ်ကွက်၊ မင်းရဲကျော်စွာလမ်း၊ ဒဂုံမြို့သစ် မြောက်ပိုင်းမြို့နယ် နေအိမ်၌ ကျန်ရစ်ခဲ့သည်။

ရေးသား ပြုစုခဲ့ပြီးသော စာအုပ်များ

၁။ အနာဂတ်လှိုင်း ၂၀၀၁

၂။ အနာဂတ်ကို မျှော်ကြည့်ခြင်း ၂၀၀၂

၃။ တတိယလှိုင်း စစ်ရေး (ဘာသာပြန်) ၂၀၀၃

၄။ တတိယလှိုင်း ငြိမ်းချမ်းရေး (ဘာသာပြန်) ၂၀၀၃

၅။ မြန်မာ့ ဘောလုံးသမိုင်းကြောင်း ပထမပိုင်း ၂၀၀၄

၆။ အာဂ္ဂီလာ၏ ခေါင်းဆောင်မှု လျှို့ဝှက်ချက်များ ၂၀၀၅

၇။ ကလေးတို့ သိချင်နေမယ့် ဘယ့်အတွက် ဘာကြောင့် (၁) ၂၀၀၇

လူတွေရဲ့အကြောင်း လူတွေရဲ့ သဘာဝ