မာကျောက်

ဝီကီပီးဒီးယား မှ

မာကျောက်သည် အကွက်အခြေပြုကစားနည်းဖြစ်ပြီး ၁၉ ရာစုတွင် တရုပ်ပြည်၌ ထွန်းကားလာသည်။ နောက် ၂၀ ရာစုအစောပိုင်းတွင် ကမ္ဘာအနှံ့သို့ ပျံ့သွားသည်။ လေးယောက်ကစားသည်မှာ ပုံမှန်ဖြစ်သည်။ သုံးယောက်ကစားကြသည်လည်း ရှိ၏။ နေရာဒေသပေါ်လိုက်၍ ကစားနည်းစနစ်အတိုးအလျော့များရှိသော်လည်း အရှေ့ပိုင်း၌ရော အနောက်ပိုင်းတွင်ပါ ကျယ်ကျယ်ပြန့်ပြန့်ကစားလျက် ရှိသည်။ အွန်လိုင်း၌ ဖျော်ဖြေရေးအဖြစ်ပင် ပါဝင်အသုံးတော်ခံနေသည်။ ဖဲကစားနည်း ဆယ်တွဲခြင်းနှင့် ဆင်သည်။ အနိုင်ရရန် ကျွမ်းကျင်မှု၊ ဗျူဟာချတတ်မှုအပြင် ကံလည်း လိုသည်။

တရုပ်အက္ခရာနှင့်သင်္ကတများပါသော အတုံး ၁၄၄ တုံးဖြင့် လုပ်ထားသည်။ အချို့ဒေသများတွင် အတုံးအတိုးအလျှော့ ရှိနိုင်သေး၏။ အများအားဖြင့် ကစားသူတဦးသည် ၁၃ တုံး စရသည်။ တတုံးကောက် တတုံးချဖြင့် ကစားသွားပြီး သုံးတုံးပါ လေးတွဲနှင့် နှစ်တုံးပါ တစုံဖြစ်ပါက အနိုင်ရ၏။ အချို့အတုံးများ ရကာ နိုင်နိုင်သေးသည်။