ဗျာပါဆံ

ဝီကီပီးဒီးယား မှ
Jump to navigation Jump to search
မြန်မာဝစ်ရှင်နရီ
မြန်မာ ဝစ်ရှင်နရီ တွင် ဤစကားလုံးအတွက်
အဓိပ္ပါယ်ဖွင့်ဆိုချက် ရှိသည် -

ဗျာပါဆံဟူသည် ရှေးမိန်းမငယ်များ နားနောက်၌ ခပ်တိုတိုဖြတ်၍ချထားသော ဆံပင်ပုံစံကို ခေါ်သည်။ အင်းဝခေတ်တွင် ပေါ်လာသော်လည်း အမရပူရခေတ်တွင် ထင်ရှားသည်။ [၁] ပူပန်သောက (ဗျာပါ) ရှိသူတို့ ဆံမသိမ်းနိုင်သဖြင့် ထိုသို့ကျသည်ကို တင့်တယ်ဟန်ထင်ကာ အတုလိုက်ရာမှ အလေ့ဖြစ်ဟန်တူကြောင်း ဦးဖိုးလတ်က ဆိုထားသည်။ [၂]

မြန်မာအမျိုးသမီးတို့ ဆံပင်ပုံစံ တစ်မျိုး (ဗျာပါဆံ)

ပေါ်ပေါက်လာပုံ[ပြင်ဆင်ရန်]

ရှင်မြတ်လှ (မင်းမြတ်လှ) သည် မိဖုရားကြီးဖြစ်ရန် မျှော်မှန်းသော်လည်း ဘုရင်မင်းခေါင်က မိုးညှင်းမြို့စား မင်းဥဒိန် နှင့် စုံဖက်ပေးရန် စီစဉ်သည်။ [fn ၁] အမိန့်အား မလွန်ဆန်ဝံ့ရာ မြစ်ဆိပ်သို့ဆင်း၍ လှေနံ၌ဆံထုံးတင်ဖြတ်ပြီး ရေ၌ မျှောသည်။ အထုံးပြတ်သော်လည်း ဆံတိုဆံစများမှာ ကားရယားဆင်း၍ တစ်မျိုးကြည့်ကောင်းနေရာ အမိန့်ပြန်သူ ဘိုးရာဇာက "ကပိုကရို ဗျာဆံဝိုက်နှင့် နန်းထိုက်တဲ့တို့ခင်လေး" ဟု မင်္ဂလာစကား ဆိုသည်မှသည် ဗျာပါဆံ ဟူ၍ ပေါ်ပေါက်လာသည်။ [၃]

စာပေထဲက ဗျာပါဆံ[ပြင်ဆင်ရန်]

ရာမ ရကန်[ပြင်ဆင်ရန်]

ဦးတိုးက ရာမရကန်၌

ဗျာပါဆံစွယ်စုံကို အပုံကြီးလည်းမချဘူး ပါးအထက်မှာငှက်လိပ်ပြာပျံ ရွှေတာင်ပံသွဲ့ နွဲ့သနှင့်စိမ်းသနှင့် ပလိမ်းတုံးမို့ လက်သန်းလုံးခန့် ယဉ်စံ့လို့ချတတ်သည့် မိန်းမဂုဏ်စံ နည်းရစ်တန်နှင့်

ဟု ဆိုထားသည်။

သံဝေဂ လေးဆစ်သဖြန်[ပြင်ဆင်ရန်]

မိဖုရား ရှင်မင်းက သံဝေဂလေးဆစ်သဖြန်တွင်

ဗျာကေ[fn ၂]ကို သာခွေရုပ်ပါလို့

ခွံလျှော်တေ ဖန်ရေအုပ်ကယ်နှင့်

လဲ့လုပ်ကဲ့ ကြော့ဒေဝီမှာ

ယောဂီတို့ ကျင့်နည်း

ဟု စပ်ဆိုဖူးသည်။

အောက်ခြေမှတ်စု[ပြင်ဆင်ရန်]

  1. မဟာရာဇဝင်၌မူ မင်းဥဒိန်အား ပေးသည်မှာ မိဖုရားငယ် ရှင်မိမြတ် ဖြစ်သည်ဆို၏။ ရှင်မြတ်လှမှာ ဘုရင်မင်းခေါင်နှမ (နောင်သော် သုပဘာဒေဝီ ဘွဲ့ဖြင့် ရာဇာဓိရာဇ်၏ မိဖုရား) ဖြစ်လေရာ ဖီလာသွားနေသည်။
  2. ဗျာပါရကေသ (ပါဠိ) ဗျာပါဆံ

ကိုးကား[ပြင်ဆင်ရန်]

  1. ရွှေကိုင်းသား။ "ဆင်ယင်ထုံးဖွဲ့မှု"၊ တတိယအကြိမ်။ ကြီးပွားရေး စာအုပ်တိုက်၊ မန္တလေး။ ၂၀၀၅၊ ဒီဇင်ဘာ။
  2. ဦးဖိုးလတ်၊ သီချင်းပဒေသာ၊ ပထမအုပ်၊ စာ ၁၃၃
  3. "ရှင်မြတ်လှ၏ မိဖုရားသွေး"။ ပြုပြင်ရေး မဂ္ဂဇင်း။ ၁၉၃၅၊ ဇွန်။