ပိုလန်သမ္မတလေယာဉ်ပျက်ကျခြင်း

ဝီကီပီးဒီးယား မှ
အ​ညွှန်း​သို့ ခုန်ကူးရန် ရှာဖွေရန် ခုန်ကူးမည်

ပိုလန်နိုင်ငံ သမ္မတ လက်ချ်ကက်ဇင့်စကီ အပါအဝင် စစ်ဘက်အကြီးအကဲများ၊ အဆင့်မြင့်အရာရှိများ တင်ဆောင်လာသော ဆိုဗီယက်ခေတ်လုပ် တူပိုလက်ဂျက်လေယာဉ်သည် ၂၀၁၀ခုနှစ် ဧပြီ ၁၀ ရက်နေ့တွင်ရုရှားနိုင်ငံ၌ပျက်ကျခဲ့ရာ ပိုလန်သမ္မတ အပါအဝင် လေယာဉ်ပေါ် ပါလာသူ ၉၆ ဦးစလုံး သေဆုံးခဲ့သည်။

သေဆုံးသူများတွင် ပိုလန်သမ္မတနှင့်၎င်း၏ဇနီး၊ စစ်ဦးစီးချုပ်နှင့် အခြားစစ်ဘက်တာဝန်ရှိသူများ၊ ဗဟိုဘဏ် ဥက္ကဋ္ဌ၊ နိုင်ငံခြားရေး ဒုတိယဝန်ကြီး၊ လွှတ်တော်အမတ်များ၊ သမိုင်းပညာရှင်များနှင့် အခြားအကြီးတန်းအရာရှိများ ပါဝင်သည်။ ပထမ ကမ္ဘာစစ်အတွင်း ရုရှားတပ်များကြောင့် သေဆုံးခဲ့ရသော ပိုလန်တပ်သား ၂၂၀၀၀ အတွက် အောက်မေ့ဖွယ်အခမ်းအနားသို့ တက်ရောက်ရန်လာစဉ် ဆိုဗီယက်ခေတ်လုပ် Tupolev Tu- ၁၅၄ လေယာဉ်သည် ရုရှားနိုင်ငံ အနောက်ပိုင်း၊ စမိုလင်ရှ်က်လေဆိပ်သို့ ဆင်းသက်ချိန်တွင် မြူနှင်းထူထပ်မှုကြောင့် သစ်ပင်များနှင့်တိုက်မိပြီး မီးလောင် ပေါက်ကွဲခဲ့သည်ဟု ပြည်နယ်အုပ်ချုပ်ရေးမှူး ဆာဂေးအန်တူဖက်ဗ်က ပြောကြားခဲ့သည်။

လေယာဉ်ပျက်ကျမှုမှာ လေယာဉ်မှူးအမှားကြောင့်ဖြစ်သည်ဟု စစ်ဆေးသူများက သံသယရှိပြီး လေကြောင်း ထိန်းချုပ်ရေးမျော်စင်မှ ညွှန်ကြားချက်များအား လေယာဉ်မှူးက လျစ်လျူရှုခဲ့ကြောင်း ၎င်းတို့က ပြောကြားခဲ့သည်။ ခေတ်သစ်ကမ္ဘာတွင် ယခုကဲ့သို့ ကြေကွဲဖွယ် ဖြစ်ရပ်ဆိုးမျိုးကြုံဖူးခြင်းမရှိဟု ပိုလန်ဝန်ကြီးချုပ်ဒေါ်နယ်လ်တာ့ခ်က အစိုးရအဖွဲ့အရေးပေါ်အစည်းအဝေးတွင် ပြောကြားခဲ့သည်။ ပိုလန်သမ္မတ ဟောင်းလက်ချ်ဝေဆာကလည်း ယင်းဖြစ်ရပ်သည် ယုံကြည်နိုင်စရာမကောင်းသော မဖြစ်နိုင်သည့်အရာ ဖြစ်သည်ဟု ပြောကြားခဲ့သည်။

ပိုလန်အောက်လွှတ်တော်ဥက္ကဋ္ဌ ဘရိုနစ်လောကိုမိုရွန်စကီက ကြားဖြတ်အစိုးရသမ္မတအဖြစ် ရာထူးရယူပြီး ဝမ်းနည်းဖွယ်အထိမ်းအမှတ်အဖြစ် သီတင်းပတ်တစ်ပတ်ပြုလုပ်ရန် ညွှန်ကြားခဲ့သည်။ ပျက်ကျခဲ့သော လေယာဉ်ကို ပြီးခဲ့သောဒီဇင်ဘာတွင်မှ ပြန်လည်ပြင်ဆင်မှု ပြီးစီးခဲ့ပြီးဖြစ်သည်ဟု ယင်းလေယာဉ်များကို ထုတ်လုပ်သော Aviakor လေယာဉ်စက်ရုံဒါရိုက်တာ အဲလက်ဆီဂူဆက်ဗ်ကပြောကြားခဲ့သည်။
လေယာဉ်ပျက်ကျမှုကို စုံစမ်းစစ် ဆေးရေးကော်မရှင်ဖွဲ့၍ စစ်ဆေးမည် ဖြစ်ပြီး ရုရှားဝန်ကြီးချုပ်ပူတင်အား ကော်မရှင်အကြီးအကဲအဖြစ် သမ္မတမက်ဗီဒက်ကခန့်အပ်ခဲ့သည်။

ကိုးကား[ပြင်ဆင်ရန်]

Weekly Eleven Journal