ရှင်ကဝိန္ဒာဘိ (ပင်းဆရာတော်)

ရှင်ကဝိန္ဒဘိ (၁၁၅၅ - ၁၂၁၂) သည် “ပင်းဆရာတော်” ဟု သိကြသည့် ကျမ်းပြုဆရာတော်တစ်ပါး ဖြစ်သည်။

ဘဝ

ဆရာတော်ကို ၁၁၅၅ ခုနှစ်၊ နတ်တော်လဆန်း ၁၄ ရက်နေ့တွင် မိတ္ထီလာမြို့၊ သပြေကုန်းရွာတွင် မောင်ကြာ - ရှင်ဖြူတို့မှ ဖွားမြင်ခဲ့သည်။ ငယ်မည်မှာ မောင်လွမ်းပြေ ဖြစ်သည်။

ရှင်သာမဏေပြုသည့်အခါ “ရှင်ကဝိန္ဒ” ဘွဲ့ကို ယူခဲ့သည်။ ရဟန်းပြုသည့်အခါ “ရှင်ကဝိန္ဒာဘိ” ဘွဲ့ကို ယူခဲ့သည်။ ရတနပူရစတုတ္ထမြို့တည် မင်းလက်ထက်တွင် မြို့တော်အတွင်းရှိ လောကထိပ်ဦးဘုရားတောင်ဘက်ရှိ မဲထီးကျောင်းတိုက်တွင် ရေနံချောင်းမြို့စားဝန်ကြီး မောင်တုတ်ကြီးက ဆောက်လုပ်သော သုံးထပ်ကျောင်းတွင် သီတင်းသုံးတော်မူခဲ့သည်။

ဆရာတော်သည် “ကဝိန္ဒာဘိသီရိသဒ္ဓမ္မမဟာဓမ္မရာဇဓိရာဇဂုရု” တံဆိပ်တော်ကို ရခဲ့သည်။

ပျံလွန်တော်မူခြင်း

ဆရာတော်သည် ၁၂၁၂ ခုနှစ်တွင် မိတ္ထီလာနယ်၌ ဘုရားတည်တော်မူနေစဉ် မိုးကောင်းတောင်နှာမောင်းတောကျောင်းတွင် တောမီးသင့်၍ ပျံလွန်တော်မူခဲ့သည်။ ယင်းတော်မြို့နယ်၊ ရှမ်းမငယ်ရွာသို့ ပင့်ဆောင်ကာ သင်္ဂြိုဟ်ခဲ့သည်။

ပြုစုခဲ့သည့် ကျမ်းများ

ဆရာတော်သည် အောက်ပါကျမ်းများကို ပြုစုတော်မူခဲ့သည်။

၁။ နိဒါနဝဂ္ဂသံယုတ်ပါဠိတော်နိသျသစ်၊

၂။ ခန္ဓဝဂ္ဂသံယုတ်ပါဠိတော်နိသျသစ်၊

၃။ သဠာယတနဝဂ္ဂသံယုတ်ပါဠိတော်နိသျသစ်၊

၄။ မဟာဝဂ္ဂသံယုတ်ပါဠိတော်နိသျသစ်၊

၅။ မနောရထပကာသနီဆေးကျမ်းပါဌ်။