ဆူဒိုနင်

ဝီကီပီးဒီးယား မှ
Jump to navigation Jump to search

ကိုယ်ရေးအကျဉ်း[ပြင်ဆင်ရန်]

၁၉၅၇ ခုနှစ်၊ နိုဝင်ဘာလ အတွင်း မန္တလေးမြို့မှာ အဖ ဦးစိန်မောင်၊ အမိ ဒေါ်သောင်းမေတို့က ပေါက်ဖွားတဲ့ တဦးတည်းသော သား၊ အမည်ရင်း အောင်သိန်းကျော်။


မန္တလေး၊ လွိုင်ကော်၊ လောပိတ၊ တောင်ကြီးတို့မှ မူလတန်း ပညာများ သင်ကြားခဲ့ပြီး ရန်ကုန်မြို့ကို ၁၉၆၇ ခုနှစ်မှာ စတင် ရောက်ရှိခဲ့ကာ အလယ်တန်း၊ အထက်တန်း ပညာများ သင်ကြားခဲ့တယ်။ ၁၉၇၅ ခုနှစ်မှာ ဆယ်တန်းကို ရူပဗေဒ၊ အင်္ဂလိပ်စာ ဂုဏ်ထူးများနဲ့ အောင်မြင်ခဲ့ပါတယ်။


ရန်ကုန် ဝိဇ္ဇာနဲ့ သိပ္ပံ တက္ကသိုလ်ကနေ ၁၉၇၉ ခုနှစ်မှာ သိပ္ပံဘွဲ့ (ရူပဗေဒ) ကို လည်းကောင်း၊ ၁၉၈၃ မှာ အဆင့်မြင့် ပညာဦးစီး ဌာနကနေ မှတ်ပုံတင် ရှေ့နေ သင်တန်း အောင်လက်မှတ်ကို လည်းကောင်း၊ ၁၉၈၇ ခုနှစ်မှာ Université de Paris, Sorbonne ကနေ Certificat Pratique de la Langue Française (1er Degré) ကို လည်းကောင်း ရရှိခဲ့ပါတယ်။


၁၉၇၆ ခုနှစ်၊ တက္ကသိုလ် ပထမနှစ် တက်နေစဉ်မှာ ဖခင်ဖြစ်သူ ပျောက်ဆုံးသွားတဲ့ အတွက် အငှားယာဉ်မောင်း အဖြစ် စတင် အသက်မွေး ခဲ့ရတယ်။ အဲဒီ့နောက် ရွှေဝယ်ရောင်း၊ ကားဝယ်ရောင်း ဘဝများမှာ ကျင်လည်ပြီး ဘွဲ့ရချိန်မှာ အင်္ဂလိပ်စာ အလွတ်သင် ဆရာအဖြစ် အသက်မွေးခဲ့တယ်။ ၁၉၈၅ ခုနှစ်မှာ တရားရုံးချုပ် ရှေ့နေ လိုင်စင်ရတဲ့ အထိ ရှေ့နေ အဖြစ်လည်း ကျင်လည်ခဲ့ဖူးတယ်။


၁၉၈၈ ခုနှစ်၊ ဇူလိုင်လမှ ၁၉၉၁ ခုနှစ်၊ နိုဝင်ဘာ ၃ဝ ရက်နေ့အထိ ဥရောပသမဂ္ဂရဲ့ ဘာသာပြန် အခစား ဝန်ထမ်း အဖြစ် လုပ်ကိုင်ခဲ့ပြီး၊ အဲဒီ့နှစ် ဒီဇင်ဘာလ ၁ ရက်နေ့က စတင်ကာ ပြည်ထောင်စု မြန်မာနိုင်ငံတော် ဆိုင်ရာ ဩစတြေးလျ သံရုံးရဲ့ ပြန်ကြားရေး တာဝန်ခံ အဖြစ် အမှုထမ်းခဲ့ပါတယ်။ ပြန်ကြားရေးနဲ့ သုတေသန အရာရှိ အဆင့်အထိ ရာထူး အဆင့်ဆင့် တက်ခဲ့ပြီး ၁၉၉၉ ခုနှစ်က မလေးရှားနိုင်ငံ ကွာလာလမ်ပူမြို့မှာ ကွန်ပျူတာ ကွန်ရက် ဆက်သွယ်ရေး သင်တန်း၊ ဩစတြေးလျနိုင်ငံ ဆစ်ဒနီ၊ မော်လိမု(ခ်) နဲ့ ကင်ဘာရာမြို့များမှာ ခေါင်းဆောင်မှုနဲ့ ဖွံ့ဖြိုးတိုးတက်မှု သင်တန်း၊ ၂၀၀၂ ခုနှစ်က ဟောင်ကောင်မှာ လုံခြုံရေးစနစ်ပါ ကွန်ပျူတာ ကွန်ရက် ဆက်သွယ်ရေး သင်တန်းများ တက်ရောက်ခဲ့ရပါတယ်။


၂၀၀၂ ခုနှစ်၊ အောက်တိုဘာလ အတွင်း အဲဒီအချိန်က ဩစတြေးလျ နိုင်ငံခြားရေးဝန်ကြီး ဒေါင်နာ မြန်မာနိုင်ငံကို လာရောက်ခိုက်မှာ ဩစတြေးလျ သံရုံးက မျက်နှာဖြူ ဝန်ထမ်းများက မြန်မာနိုင်ငံ နိုင်ငံခြား သတင်းထောက်များ အသင်းက သတင်းထောက်များကို သိသိသာသာ ခွဲခြား ဆက်ဆံခဲ့မှု တရပ်အား "မဟာဂျာနယ်" မှာ ဖွင့်ထုတ် ရေးသားခဲ့တဲ့ အတွက် ဩစတတြေးလျ သံရုံးက နောက်ပိုင်းမှာ မြန်မာနိုင်ငံ နိုင်ငံခြား သတင်းထောက်များ အသင်းကို တရားဝင် တောင်းပန်လွှာ ပေးပို့ခဲ့ပြီးတဲ့နောက် အဲဒီ့ပြစ်မှုနဲ့ ၂၀၀၃ ခုနှစ်၊ မတ်လမှာ ရာထူးက ထုတ်ပယ်ခံခဲ့ရပါတယ်။ အဲဒီ့ရာထူးက ထုတ်ပယ် ခံရချိန်မှာ ရရှိနေခဲ့တဲ့ လခက အမေရိကန် ဒေါ်လာ တထောင် ဖြစ်ပါတယ်။


အဲဒီ့အချိန်က စပြီး အခစား ဝန်ထမ်း ဘဝကို အပြီးတိုင် စွန့်လွှတ်ကာ လက်တွဲဖော် စာအုပ်တိုက်နဲ့ စာရေးခြင်း အလုပ်ကိုပဲ ဇောက်ချ လုပ်ကိုင်ခဲ့ပါတယ်။ စာကို လူမှန်းသိချိန် ကတည်းက စတင် ရေးသားခဲ့ပြီး ၁၉၆၅ ခုနှစ်၊ တောင်ကြီးမြို့ အထက (၃) က ၄ တန်း ကျောင်းသားဘဝမှာ ကဗျာစာမူကို နံရံကပ် စာစောင်မှာ စတင် ဖော်ပြခြင်း ခံခဲ့ရပါတယ်။ အဲဒီ့ ကျောင်းမှာပဲ ကဗျာရွတ်ပြိုင်ပွဲ ပထမဆုကို ရရှိခဲ့သလို အမျိုးသား ပညာဝန် ဦးဖိုးကျားရဲ့ "ဘိလပ်ပြန် မောင်သောင်းဖေ" ပြဇာတ်မှာ မောင်သောင်းဖေ အဖြစ် သရုပ်ဆောင်ခဲ့ဖူးတယ်။


၁၉၈၈ ခုနှစ်က စပြီး ဆူဒိုနင် ကလောင် အမည်နဲ့ မဂ္ဂဇင်းတွေမှာ စတင် ရေးသားခဲ့တယ်။ ၁၉၉၈ ခုနှစ်မှာ စာပေလောက စာအုပ်တိုက်ကနေ ပထမဆုံး လုံးချင်းစာအုပ် ထုတ်ဝေခဲ့ပါတယ်။


အလုပ်ပြုတ်လာပြီးတဲ့နောက် ရန်ကုန် တက္ကသိုလ် စိတ်ပညာ ဌာနမှာ အသုံးချ စိတ်ပညာ ဒီပလိုမာ သင်တန်းကို တနှစ်တိတိ တက်ရောက်ပြီးနောက် ရပ်နားခဲ့သည်။


ဝန်ထမ်း အလုပ်က ရပ်နားခဲ့ပေမယ့် ကုလသမဂ္ဂ ကလေးများ ရန်ပုံငွေ အဖွဲ့နဲ့ တခြား နိုင်ငံတကာ အစိုးရ မဟုတ်တဲ့ အဖွဲ့အစည်း အသီးသီး အတွက် ဘာသာပြန်ပေးတဲ့ အလုပ်များ၊ အတိုင်ပင်ခံ အလုပ်များကို ဆောင်ရွက်ဆဲ ဖြစ်ပါတယ်။ ဒါ့ကြောင့် ကလေးများ ရန်ပုံငွေ အဖွဲ့က ကြီးမှူးကျင်းပတဲ့ "မွေးကင်းစမှ ခြောက်နှစ်အရွယ် ကလေးများအတွက် စာအုပ်ရေးသားနည်း သင်တန်း"၊ "တီထွင်ဆန်းသစ်သော မီဒီယာနှင့် ပစ္စည်း ပစ္စယများဖြင့် ကလေးငယ်များ၏ စောစောစီးစီး သင်ယူမှု စွမ်းအားများအား မြှင့်တင်ရေး သင်တန်း"၊ "မွေးကင်းစများ၊ ကလေး သူငယ်များနှင့်၊ သူတို့၏ မိသားစုများ အတွက် အလုံးစုံ ပါဝင်သော ဖွံ့ဖြိုး တိုးတက်မှုနှင့် မီဒီယာသင်တန်း၊" "လူထုအာဟာရ သင်တန်း" များကို လည်းကောင်း၊ ဗြိတိန်နိုင်ငံ ရာဇဝတ်မှုခင်း ထောက်လှမ်းရေး အဖွဲ့က ပို့ချတဲ့ "ကလေး သူငယ်များအား မဖွယ်မရာ ပြုကျင့်သူများအား ကိုင်တွယ် ဖြေရှင်းရေး" သင်တန်းကို လည်းကောင်း၊ အခြား စီမံခန့်ခွဲမှု သင်တန်းပေါင်းစုံ၊ ရှေးဦးသူနာပြုစုနည်း သင်တန်း၊ အဖွဲ့အစည်း ဖွံ့ဖြိုး တိုးတက်မှု သင်တန်း၊ ရပ်ရွာ အကျိုးငှာ သဘင်ပညာ သင်တန်းများကို တက်ရောက်ခွင့် ရခဲ့ပါတယ်။ ဒါ့အပြင် "မဲခေါင်ဒေသ အတွင်း လူကုန်ကူးမှုကို တိုက်ဖျက်သည့် ကုလသမဂ္ဂ အစီအစဉ်" နဲ့ အတူ နိုင်ငံတကာ ထိပ်သီး အစည်းအဝေးများကိုလည်း တက်ရောက်ကာ စကားပြန် အဖြစ် ဆောင်ရွက်ပေးခဲ့ဖူးတယ်။


ဒါ့အပြင် ၁၉၉၉ ခုနှစ်က စပြီး ယနေ့ထက်တိုင် နိုင်ငံခြား သံတမန် အဖွဲ့အစည်းများ၊ ကုလသမဂ္ဂ ဖွံ့ဖြိုးမှု အစီအစဉ်၊ ပြည်တွင်းက စီးပွားရေး လုပ်ငန်းကြီးများ စတာတွေရဲ့ ဝန်ထမ်းတွေကိုလည်း စီမံခန့်ခွဲရေး သင်တန်းများ အခါအားလျော်စွာ ပို့ချခဲ့၊ ပို့ချဆဲ ဖြစ်ပါတယ်။


ဇနီးသည် သမီးတဦး၊ သားတဦးနဲ့ အတူ ရန်ကုန်မြို့မှာ နေထိုင်လျက် ရှိပါတယ်။ [၁]

ကိုးကား[ပြင်ဆင်ရန်]

  1. Lettwebaw Books [atkbooks.wordpress.com] ဘလော့ စာမျက်နှာမှ